Kutiyishisha Mwatalisha Chipapatishu

1. Yumanyi yamwekeshaña nawu chipapatishu hintañishilu yamuBayibolu yalema?

WENOWU muzañalu wutwatiyaña neyi tumona antu anakupapatishewa! Komana mweluka nenu iwu muzañalu watachikili dehi kufuma tuhu hefuku dakupompa kwatachi kwachipompelu chawakaKristu? Haniku kupompa hadiña antu apapatisheweli nawa kwadiña mpanji yalumbulwili ntañishilu yalema yahosha hachipapatishu. (Yilw. 2:​38, 40, 41) Kapostolu Pawulu wasonekeli nindi “ntañishilu yatachi yahosha hadi Kristu” mwabombela ntañishilu “yeñi-nayeñi yachipapatishu.” (Heb. 6:​1, 2) Nsañu yahosha hachipapatishu yekala hakachi kantañishilu yalema yamuBayibolu yitwatachikilañahu kudiza, dichi twatela kuyitiyishisha chiwahi. Muloñadi?

2. Muloñadi chitwatela kutiyishishila chikupu mwatalisha chipapatishu?

² Neyi chikuku chakola chichinateli kukwasha itala kubula kuhumuka, kutiyishisha chikupu mwatalisha chipapatishu kunateli kutukwasha kwikala nachikuhwelelu chakola. Twatela kutiyishisha chumichi hela chakwila tunakupama kulonda tupapatishewi indi kwiji yaaka yinakotoki kufuma hitwapapatisheweli. Dichi, muchinu chibaaba tukwakula awa malwihu: Chipapatishu chatalisha mudihi? Yumanyi yabombela muchipapatishu chawakaKristu? Nawa muloñadi chitwapapatishewelaña mwijina daTata, daMwana nidaspiritu yajila?

MWATALISHA CHIPAPATISHU CHENU

3. Chimwapapatishewa mukumwekesha nenudi?

³ Neyi mupapatishewa mukumwekesha hatooka nenu muneteji chalala chahosha hadi Yehova Nzambi niKristu Yesu, munabalumuki mumuchima nakuleka nshidi jimwakoñeleña, nawa munahimpi chihandilu chenu nakutachika kumukalakela Yehova. Mukumwekesha cheñi nenu muneluki nenu Yesu diyi njla yinakuzatishayi Nzambi kwamwina antu, nawa munamuleji Nzambi mukulomba nenu munakufwila chikupu kwila nkeñelu Yindi kuzatila hamu nakuloñesha Kwindi. Neyi mukana ichi chikaninu hela mudihana nawa mupapatishewa, mukutachika kwenda munjila yatwalaña kuwumi wahaya nyaaka.

4. Kuyijimika mujimba wejima mumenji kuhiñahu dinu ayitumpulamu kwatalisha mudihi? (Talenu nimwevulu.)

⁴ Neyi anakuyipapatisha, atela kuyijimika mujimba wenu wejima mumenji kuhiñahu dinu ayitumpulamu,a neyi kwiji anayijiiki, nkumininaku dinu ayisañula. (Esekejenu AKolosi 2:12.) Chipapatishu chamwekeshaña nawu kudi yuma yayivulu yimunahimpi muchihandilu chenu. Munjilanyi? Chimweñila mujimba wejima mumenji, mukumwekesha nenu dihanamanini chihandilu chenu chejima chakunyima. Chimwatumpuka mumenji, mukumwekesha nenu munatachiki chihandilu chachiha chinashindameni hakwila nkeñelu yaNzambi.

5. Munateli kwesekeja ñahi yuma yimunakwila hakwila mwakashikihu kupapatishewa namudimu wazatiliyi Nowa wakutuña watu? (1 Petulu 3:​18-21)

⁵ Tañenu 1 Petulu 3:​18-21. Munjila yikwawu, tunateli kwesekeja yuma yimunakwila hakwila mwakashikihu kupapatishewa namudimu wazatiliyi Nowa wakutuña watu. Neyi dihimunatachiki hohu kudiza hadi Yehova, hadaha mukutoñojokaña nenu mukutwesha wanyi kwila yuma yejima yinakukeñeka hakwila mwakashikihu kupapatishewa. Mukutachika kumona chumichi neyi chakala nankashi, neyi mudimu weneni wazatiliyi Nowa wakutuña watu. Komana munakutoñojoka nenu chalema kuzata muniyi njila? Eña. Muloñadi chitunahosheli mwenimu? Toñojokenu hadi Nowa. Nzambi wahanini nshimbi yakutuñilamu watu nawa Nowa walondeleli chikupu iji nshimbi hakwila nawu akapuluki haDibaji. Muloña wachikuhwelelu niwukwashu waNzambi, Nowa wovwahililili nawa watuñili watu. Neyi cheliliyi Nowa, ninenu munateli kutwesha kwila “kwesekeja namwejima [mwatulejawu] kudi Nzambi.”—Kutach. 6:22.

6. Chipapatishu chinateli kuyamwina munjilanyi?

⁶ Muvasi 21, kapostolu Petulu wasonekeli nindi chipapatishu “chinakuyamwina enu.” Ilaña, ichi hichinatalishi mukwila nawu kupapatishewa dichuma hohu chimwatela kwila hakwila ayanakeni nshidi jenuku. Mashi aYesu hohu diwu anateli kuyitookesha kunshidi. (1 Yow. 1:7) Hela chochu, chipapatishu hichuma chalema chikuyiletesha kwila yuma yejima yakeñañayi Nzambi nawa chikuyikwasha “[kulomba] chinleji chamuchima chachiwahi kudi Nzambi.” Yehova wakayinka chakufuma hamuchima chuma chimunamulombi. Muniyi njila, dikwila nawu chipapatishu “chinakuyamwina enu,” hela chinakuyilombola kuwamwinu.

YUMA YABOMBELA MUCHIPAPATISHU CHAWAKAKRISTU

7. Ntanjikilwinyi yakulondela kutalisha hachipapatishu?

⁷ Bayibolu yahosha hohu nawu muntu anakupapatishawu atela kumujimika mujimba wejima mumenji, ilaña hiyashimunahu nsañu jikwawu kutalisha hachipapatishuku. Hela chochu, Nsona jatukwashaña kwiluka yuma yalema yitwatela kulondela. Chakutalilahu, yishina yamuBayibolu yakwashaña antu anakupapatishewa kwiluka yakuvwala yatela kuvwalawu nawa yakwashaña antu anapompi nakutala anakupapatishewa kwiluka yilwilu yatela kumwekeshawu. (1 Kor. 14:40; 1 Tim. 2:9) Makonu, akulumpi diwu avula kuzata mudimu wakupapatisha nawa twatondolwelaña kusweja kuyilemesha awa amanakwetu akweti iku kukooleka. (1 Kor. 1:​14, 15) Chipapatishu chalema hela chakwila antu anenzi nakutala antesha hela amavulu.—Yilw. 8:36.

8. Malwihwinyi ayihulañawu antu anakupapatishewa, nawa muloñadi? (Yilwilu 2:​38-42) (Talenu nimwevulu.)

⁸ Bayibolu yamwekeshaña nawu twatela ‘kushimuna hatooka kulonda tumoni wamwinu,’ dikwila nawu, kushimuna yuma yitwakuhwelela. (Rom. 10:​9, 10) Twashimunaña hatooka iwu wamwinu bayi neyi hampinji yitunakuleja hohu antu nsañu yayiwahiku, ilaña sweje-e hefuku ditunakupapatishewa! Muloña wachumichi, antu anakupapatishewa ayihulaña malwihu ayedi. Lwihu lwatachi lwekala lwakwila nawu, “Komana munabalumuki nakuleka nshidi, munadihani kudi Yehova nawa muneteji njila yindi yakupulwishilamu kuhitila mudi Yesu Kristu?” Ilu lwihu lwakonkomwenaña hayuma yineliyi muntu hakwila yashikihu kupapatishewa, nawa chumichi chadifwana nakukonkomwena kwakonkomweneniyi Petulu izaza dawantu haPentekosta. Lwihu lwamuchiyedi lwekala lwakwila nawu, “Komana muneluki nenu chipapatishu chenu chikuyimwekesha nawu munekali dehi Chinsahu chaYehova kwendela hamu nakuloñesha kwindi?” Ilu lwihu lwatwanukishaña nawu twakakelaña kukudihana kwetu neyi twovwahilaña wunlomboli wutwatambwilaña mukuloñesha kwaYehova nawa tumuzatilaña Nzambi hamu nawakwetu akaKristu, neyi chelileñawu atumbanji amumafuku awakaKristu akusambila. (Tañenu Yilwilu 2:​38-42.) Ejima akulaña chakufuma hamuchima nawu eña kumalwihu ejima ayedi, ashikañahu kupapatishewa.

9. Yumanyi yatela kwilayi muntu-himuntu hakwila amutiyeña kuwaha kudi Nzambi?

⁹ Henohu kanda mutachiki nikudiza chalala, hadaha mwahandileña chihandilu chachiwahi nawa himwakoñelihu nshidi yidi yejima yeneniku. Indi kwiji ayikulisha kudi anvwali akaKristu ayikwashili kumukeña Yehova. Hela chakwila yuma yidi muniyi njila, komana munakukeñeka kubalumuka nikupapatishewa kulonda ayitiyeña kuwaha kudi Nzambi? Eña. Hichikweti muloña nachihandilu chetu chakunyimaku, wejima wetu twatela kwanukaña netu twaswana nshidi, yatwaambula kudi Nzambi. (Mas. 51:5) Hela chochu, hampinji yitunakumwiluka Yehova, twafuukulañahu kutwamijaku yuma yakeñañayi bayi yitwakeñaña etu aweniku. Chitwela mwenimu, twatela kubalumuka nakuleka nshidi yitwakoñeleña kunyima niyuma yamuneñeshaña Nzambi, nakutachika kuhanda chihandilu chamutiyishaña kuwaha Tata yetu wamwiwulu. Kuhiñahu dinu tupapatishewa.—Yilw. 3:19.

10. Chumanyi chimwatela kwila neyi kunyima mwapapatisheweli nakwikala membala mukudifukula kwacheñi?

¹⁰ Neyi kunyima mwapapatisheweli nakwikala membala mukudifukula kwacheñi, mwatela cheñi kupapatishewa hakwila wiikali Chinsahu chaYehova. Muloñadi? Muloña hayina mpinji himwatiyishishili chalala chahosha hadi Yehova Nzambi niYesuku. Nawa hela hakwila mwadihanini enu aweni kudi Nzambi mukulomba, himwamukanineña mwelukili chikupu wanyi mwatalisha nkeñelu yindi. Kapostolu Pawulu chawaniniyi antu amuEfwesesa apapatisheweli kunyima chakadi kutiyishisha mwatalisha ntañishilu yawakaKristu, washiliku ntanjikilu yakuyipapatisha cheñi.b (Yilw. 19:​1-5) Nimakonu, chipapatishu chalala chashindamena hohu hakwiluka kwalala kwakwiluka nkeñelu yaNzambi.

“MWIJINA DATATA NIDAMWANA NIDASPIRITU YAJILA”

11. Kupapatishewa “mwijina daTata nidaMwana nidaspiritu yajila” kwatalisha mudihi? (Matewu 28:​18-20)

¹¹ Yesu wahanini lushimbi lwakwila nindi atumbanji amaha atela kuyipapatisha “mwijina daTata nidaMwana nidaspiritu yajila.” (Tañenu Matewu 28:​18-20.) Watalishili mudihi? MuBayibolu, izu dakwila nawu “ijina” kakavulu datalishaña kuyilwilu yikwetiyi muntu. Dinateli cheñi kutalisha kuchifulu niwuswa wukwetiyi muntu. Dichi neyi twilila chuma “mwijina” damuntu hela dachuma, dikwila nawu tunakulemesha wuswa wukwetiyi owu muntu hela chuma chikweti odu ijina. (Esekejenu Matewu 10:41.) Talenu chimunateli kulemesha chifulu niwuswa wukwetiyi Tata niwaMwanindi kushilahu nimudimu wazataña spiritu yajila yaNzambi.

12. Twapapatishewaña ñahi mwijina daTata? (Chimwekeshu 4:11) (Talenu ninyevulu.)

¹² Kupapatishewa mwijina daTata. Twakuhwelelaña chikupu netu Yehova diyi Tata yetu wamwiwulu, hela Mukakuhana Wumi. HiNzambi wañovu jejima, Nleñi wayuma yejima. (Tañenu Chimwekeshu 4:11.) Tweluka netu diyi Mukakutiya kulomba, twazatishaña ijina dindi nakalemesha nawa nakukasunuka hampinji yitunakulomba kudi yena nihitunakuleja antu nsañu yahosha hadi yena. (Mas. 65:2) Hela chochu, kudi chuma chikwawu chitwatela kwiluka kutalisha hakupapatishewa mwijina daTata. Antiyilili jaPetulu haPentekosta adiña eluka dehi ijina daYehova, ilaña haniyi mpinji akeñekeleña kwiluka nawu diyi Mukakuhana wamuwahi wahanaña wamwinu wahaya nyaaka kuhitili mudi Yesu Kristu.—Rom. 5:8.

13. Twapapatishewaña ñahi mwijina daMwana? (Talenu nimwevulu.)

¹³ Kupapatishewa mwijina daMwana. Twakuhwelelaña chikupu netu Yesu diyi hohu Mwana kaNzambi. Yesu diyi “njila,” kuhitila mudi yena hohu dimutunateli kwikalila nawubwambu wawuwahi naYehova. (Yow. 14:6) Yesu diyi cheñi Chamwinu chetu watufwilili hakwila nawu twakekali nawumi. Kwiluka yumiyi dikwatusañumunaña hefuku-hefuku muchihandilu chetu kwimbujola yuma yayiwahi yelileñayi, bayi hefuku ditunakupapatishewa hohuku. (1 Yow. 2:6) Dichi twashimwinaña neyena neyi cheliliyi, chakadi kuleka chuma chidi chejima kutukañesha. (Luka 4:43) Nawa twadihanaña kuumika makabisha muloña wakumukalakela Nzambi nakashinshi. (2 Tim. 3:12) Twamulemesha Yesu chineli diyi “mutu wachipompelu,” dichi twovwahilaña chakufuma hamuchima antu enkayi mudimu wakulombola nawa akamenaña akakumulondela.—Efwe. 4:​8, 11, 12; 5:23.

14. (a) Twapapatishewaña ñahi mwijina daspiritu yajila? (Talenu nimwevulu.) (b) Yipapatishwinyi yikwawu awayishewa yapapatishewañawu? (Talenu chikasha chinakwila nawu “Yipapatishu Yikwawu Awayishewa Yapapatishewañawu.”)

¹⁴ Kupapatishewa mwijina daspiritu yajila. Twetejaña chalala chahosha haspiritu yajila. Bayi neyi himuntu indi kwiji wumu mudi Anzambi Asatuku, ilaña hiñovu yaNzambi yazatikaña. Tweluka netu spiritu yajila diyalombweleña atuprofwetu niansoneki aBayibolu, dichaletesha tutañeña Bayibolu mpinji yejima nikulondela ntañishilu yekalamu. (2 Pet. 1:​20, 21) Nawa twatondolwelaña kukoña nshidi jahamesu bwii-i, muloña yilwilu yamuchidiwu yatukañeshaña etu nichipompelu kutambwila spiritu yajila yaNzambi.—Efwe. 4:30.

15. Chumanyi chitukufwilaña kwila?

¹⁵ Neyi mudi mukaKristu wapapatishewa, fwilenuña kutiyishisha ntañishilu yejima yansañu “yeñi-nayeñi yachipapatishu,”c nawa kakelenuña kuchikaninu chenu chimwamukanini Yehova hampinji yimwadihanini nikupapatishewa. Indi neyi kanda mwiikali mukaKristu wapapatishewa? Kudihu chuma chinakuyiletesha mushintajaleña kupapatishewa? Chibaaba chinalondelihu chakashimuna yuma yimwatela kwila hakwila mwakashikihu kupapatishewa.