Chitunateli Kukwasha Antaña Jetu Abula Kwitiya

1-2. Yumanyi yatela yaletesheli wubwambu wetu nawantaña jetu wubuli kwikala chiwahi hampinji yitwelukili chalala katachi?

YESU walejeli iyala wumu wakeñeleña kwikala mukakumulondela nindi: “Yaña kwitala kudi antaña jeyi wuyileji yuma yejima yinakwililiyi Yehova.” (Maku 5:19) Yesu wahosheli muniyi njila muloña welukili nindi antu amavulu akeñaña kulejaku antaña jawu nsañu yayiwahi.

² Munakwanuka chimwatiyili hampinji yimwelukili katachi nsañu yayiwahi? Chakadi nikujina, mwafwilileña kulejaku antu iyi nsañu yayiwahi! Hela chochu, hadaha antaña jenu atiyili kuwaha wanyi chimwatachikili kudiza nawaYinsahu jaYehova. Indi kwiji njila yimwayilejelelimu chalala yaletesheli hakachi kanenu nawena hekali kwambokelamu. Neyi dichuma chayimwekeneni, munateli kutwalekahu ñahi hela kwikala cheñi nawubwambu wawuwahi nawantaña jenu chakadi kufumpa nshimbi jawakaKristu?

3. Yumanyi yitukuhanjekahu muchinu chibaaba?

³ Muchinu chibaaba, tukuhanjeka: (1) Wushona chiwunateli kutusañumuna kukwasha antaña jetu abula kwitiya,a hela chakwila hiyanakukeña kutiyilila kunsañu yayiwahiku; (2) chitunateli kwila neyi antaña jetu ahosha hela ela chuma chinatuneñeshi; (3) kudiwunjika kwetu nikukuhwelela netu akatachika kumukalakela Yehova kumbidi chikunateli kukwasha antaña jetu kwiluka chalala; nawa (4) nichitunateli kumwekesha netu twayikeña.

LEKENU WUSHONA WUYISAÑUMUNI KUYIKWASHA

4. Yesu wayikwashili ñahi antu abulileña kukeña kutiyilila kunsañu yashimwinineñayi?

⁴ Yesu hashikeneneña kuleka kukwasha antu abulileña kukeña kutiyilila kunsañu yashimwinineñayiku. Wadesekejeli yomweni namukakukalakala mwitempa danyivinyu, wazatileña nañovu kukwasha mutondu wachikuyu wabulileña kusoña kulonda wutachiki kusoña nyikaabu. (Luka 13:​6-9) Yesu chazatishiliyi ichi chakutalilahu, haniyi mpinji wazatileña nañovu kukwasha akwawu aYudeya kwikala nachikuhwelelu hadi yaaka kubadika hayisatu. Chuma chaletesheli yatwalekihu kuzata nañovu kuyikwasha? Yesu watiyilileña antu wushona nawa chumichi chamukwashili kudiwunjika nawena.

5. Chumanyi chamusañumwini Yesu kutiyila akwawu aYudeya wushona?

⁵ Yesu watiyilileña wushona akwawu aYudeya ashimwinineñayi, muloña anlomboli jakudifukula akañenyeña kuyikwasha awa antu kumukuhwelela Nzambi chikupu. Yesu wamweni nindi antu “adiña neyi anyikoku akadi kabiña.” (Maku 6:34) Henohu kunashali mpinji yantesha kwakwihi nakufwa kwindi, Yesu wamudilili Yerusalema muloña welukili nindi antu amavulu ashakamineñamu akafwa muloña wakubula chikuhwelelu. (Luka 19:​41-44) Neyi tuyimonaña antaña jetu muniyi njila, chumichi chikutusañumuna kuyikwasha.

6. Muloñadi chitwatela kwikalila adiwunjika hampinji yitunakukwasha antaña jetu abula kwitiya? (AÑalija 6:9)

⁶ Tañenu AÑalija 6:9. Hela chakwila antaña jetu chayinu mpinji hiyanakukeña kukuhwelela muyuma yitwakuhwelelaku, twatela kwikala adiwunjika nawena nawa bayi tuleka “kwila yuma yayiwahiku.” Tuneluki netu hahitaña mpinji yeneni hakwila nawu muntu ashindi chaambu chavumbama mumuchima windi nawa hakwila ekali nachikuhwelelu. Komana kudihu mpinji yimwadiña neyi antu ‘abulili kwikala nakuchiñeja nawa abulili kumwiluka Nzambi mukaayi’? (Efwe. 2:12) Neyi dichuma chayimwekeneni, chakadi nikujina kudi muntu wenjili nakuyikwasha. Neyi mudiwunjika nawantaña jenu, ninenu munateli kwikala nampinji yakuyikwasha kudiza kulonda amwiluki Yehova.

CHITUNATELI KWILA NEYI AHOSHA HELA ELA YUMA YINATUNEÑESHI

7. Yumanyi yatela yaletesheli amana kwaYesu akañanyi kumukuhwelela?

⁷ Amana kwaYesu hadaha atiyili yihayamisha yakoñeliyi Yesu muÑaliliya. (Luka 4:​14, 22-24) Hela chochu, hakusambila hiyamukuhweleleliku. (Yow. 7:5) Muloñadi? Bayibolu yahosha wanyi chuma chaletesheli. Ilaña yashimuna hohu yuma yiyedi yaletesheli aYudeya amakwawu abuli kufuukulahu kwikala atumbanji twaYesu. Antu amakwawu achiinineña nawu akuyikaana kudi antu amuchituñilu mwashakamineñawu. (Yow. 9:​18-22) Amakwawu amwilukili Yesu henohu wuchidi kansi, dichi chayikalilili kukuhwelela neyi chakwila nateli kwikala ñimeni yaNzambi. (Maku 6:​1-4) Iyi yitoñojoka yatela yaluwañesheli niamana kwaYesu. Komana yitoñojoka yamuchidiwu kwila yiluwañesha niantaña jetu nehi?

8. Yumanyi yinateli kuletesha antaña jetu abula kwitiya kuhosha hela kwila chuma chinateli kutuneñesha?

⁸ Toñojokenu chaleteshaña ahosheña hela kwila yuma yatuneñeshaña. Amana kwaYesu atela adiña hakachi kawantaña jindi amulejeli mpinji yimu nawu “nazaluki.” (Maku 3:21) Chumanyi chaletesheli ahoshi muniyi njila? Nsañu yahosha hadi Yesu yamwekeshaña nawu, washili muchima nankashi hamudimu wazatileñayi chakwila wakañenyeña nikwikala nampinji yakuda. (Maku 3:20) Komana antaña jindi atoñojokeleña nawu wahambakesheli munzatilu yindi? Hadaha dichatoñojokeleñawu. Antaña jetu anateli kutoñojoka nawu twasweja kulemesha kudifukula kwetu. Neyi atachika kutiya muniyi njila, twatela kumwekesha muyuma yitwelaña niyitwahoshaña netu munakutoñojokawu diimu wanyi.

9. Yumanyi yitwatela kwila hakwila tukwashi antaña jetu kutachika kutumona munjila yayiwahi? (1 Petulu 3:​1, 2) (Talenu ninyevulu.)

⁹ Lekenu yilwilu yenu yiyihosheliku. Nhoshelu yetu yayiwahi niyuma yitwelaña yinateli kuletesha antaña jetu kutachika kutumona munjila yambukaku. (Tañenu 1 Petulu 3:​1, 2.) Iyala wabula kwitiya nateli kutachika kutiya wuudi hela kuhilashana neyi ñodindi nakuya kukupompa kwachipompelu hela nakushimwina. Chineli hanakukeña nfumwindi yatiyeña muniyi njilaku, nateli kuhimpaku ndandanda yindi yakwililamu yuma yakuspiritu kulonda ekaleña nampinji yeneni hamu nanfumwindi. Chakutalilahu, nateli kuya mumudimu wakushimwina neyi nfumwindi nakasiki nanyidimu yimu hela wudi hetala wanyi. Neyi mumbanda mukaKristu ekala wamwovu muchima nawa watoñojokelañaku nfumwindi, wukumukwasha kutachika kuyimona aYinsahu munjila yayiwahi.

10. Neyi anakutuhosha yuma yatama, tunateli kumwimbujola ñahi Yesu?

¹⁰ Neyi antaña jenu ahosha mazu atama hadi enu, bayi neyi mpinji yejima mwatela kuyakulaku. Yesu chamutwambililiwu nawu wadaña nikunwa nankashi, wahilili wanyi. Ilaña wayilejeli antu nindi adimweni awenawu wunsahu wunakumwekesha neyi chakwila munakuhoshawu mwalala hela nehi. (Mat. 11:19) Wamwekesheli cheñi muyuma yelileñayi nindi welileña yuma nakwesekeja nawa wadiña namuzañalu. (Esekejenu Yowanu 2:​2, 6-10.) Munjila yoyimu, neyi antaña jenu ahosha mazu atama hadi enu, bayi mutoñojoka nenu mpinji yejima mwatela kuyakulaku. Ilaña lekenu yuma yimwelaña yiyikwashi eluki nawu mwelaña yuma nakwesekeja nawa mudi namuzañalu muchihandilu chenu. Chumichi chinateli kuletesha atachiki kudiwula nsañu yakutwamba yatiyañawu antu anakuhosha hadi etu.

DIWUNJIKENUÑA NIKUKUHWELELA NENU AKATACHIKA KUMUKALAKELA YEHOVA KUMBIDI

11. Yesu welili ñahi nawanyiki jindi abula kwitiya?

¹¹ Nyikanda yaNsañu Yayiwahi yamwekeshaña nawu Yesu wadiwunjikili nawamanakwindi. Chakutalilahu, chinamwekani neyi niwena adiña muKana hampinji yakoñeliyi Yesu chihayamisha chindi chatachi. (Yow. 2:​11, 12) Neyi chashimunawu hakusambila, Yesu hiyamukuhweleleli kudi anyiki jindiku. Hela chochu, Yesu halekeli kudikunda nawuku. Bayibolu yamwekesha nawu chimwahitili yaaka kwakwihi nayisatu kufuma hakoñeliyi chihayamisha chindi chatachi muKana, Yesu wahosheli nawamanakwindi munjila yayiwahi.—Yow. 7:​5-8.

12. Chumanyi chinateli kutukwasha kutwalekahu kukuhwelela netu antaña jetu amakwawu akahimpa muchima?

¹² Neyi twiluka chikupu chekala luwi lwaYehova, chikutukwasha kukuhwelela netu antaña jetu abula kwitiya akatachika kumukalakela. Neyi kudifukula kwakutwamba anakukisañani dehi, antaña jetu akanuka nawu twayilejeli netu chumichi chakamwekana.b (Chim. 17:16) Hadaha akafuukulahu kudibomba nanetu mukudifukula kwalala neyi lukadi lwasweja lunatachiki dehi. Nawa neyi kudi kukala kunakumonawu antaña jetu chayinu mpinji, chakadi nikujina, tukuzata hakumina ñovu jetu hakwila tuyikwashi. Hadaha chamonawu nawu tunakuyimwekeshela kukeña kwalala niluwi, akunyakala kwiteja kudiza chalala chamuBayibolu.

YILILENU YUMA YINAKUMWEKESHA NAWU MWAYIKEÑA

13. Hela chakwila tukweti yuma yayivulu yakwila mumudimu waYehova, chumanyi chitwatela kusoñama nachu?

¹³ Hela chakwila tukweti yuma yayivulu yakwila mumudimu waYehova, tunakukeña wanyi antaña jetu atoñojokeña nawu hitukweti mpinji yakwikala hamu nawena hela nawu hitwayikeñaku. (Mat. 7:12) Tunateli kumwekesha ñahi netu twayakamenaña? Talenu njila jimu mutunateli kwilila mwenimu.

14-15. Njilanyi yimu mutwamwekeshelaña netu twayikeña antaña jetu abula kwitiya? Shimunenu chakutalilahu.

¹⁴ Hanjekenuña nawu, nawa yimwekeshelenuña kukeña. Twamwekeshaña netu twayikeña antaña jetu neyi mpinji yejima tuyilejaña chitunakuhanda. Chakutalilahu, tunateli kuyitemeshela meseji ninyevulu yinakumwekesha chuma chitwadiluñisha katataka. Neyi tuyinka chawaana chashikila hela tuyisonekela mukanda mudi mazu amawahi, tukuletesha wubwambu wetu nawena kukolelaku. Neyi tutachikilañahu kwila yuma muniyi njila, akwiluka nawu twayikeña.

¹⁵ Talenu chuma chamumwekeneni Anna, muhela wakuArmenia. Antaña jindi kakavulu ekalaña nampinji yakudiluñishila hamu, sweje-e hampinji yakwanuka mafuku akuvwalika nimafuku akunooka. Anna chetejeliyi chalala, antaña jindi atachikili kwakama chikwikala wubwambu wawu nayena muloña wayuma yatachikili kukuhwelelayi. Akamineña cheñi chakekala chihandilu chindi kumbidi neyi yafuukulahu kwikala Chinsahu. Yumanyi yelañayi Anna hakwila yayikwashi aleki kwakama? Wahosheli nindi: “Neyi nayi nakuhempula antaña jami, nayilejaña chidi chihandilu chami niyuma yinnakwila. Nayitambikaña cheñi kwitala dami kulonda eluki amabwambu jami. Muloña wachumichi, antaña jami amavulu elukaña chikupu antu inadikundaña nawu nawa ekalaña akasunuka kuhanjeka nawu.” Wabombelelihu nindi: “Antaña jami amavulu ahoshaña nawu nidi namuzañalu nawa hiyatwalekahu kwakama kutalisha hadi amiku.”

16. Yesu wamwekesheli ñahi nindi wamwakameneni manakwindi Yakoba? (Talenu nitumazu twaheshina.)

¹⁶ Yililenuña yuma yikumwekeshaña nawu mwayakamenaña. Chamusañwiliwu, Yesu wamwekesheli nindi wamwakameneni manakwindi Yakoba kuhitila mukudimwekesha yomweni kudi yena. (1 Kor. 15:7) Fwikijenu chatiyiliyi Yakoba chelukiliyi nindi hiyamuvulameneni kudi Yesuku. Chumichi chatela chamuletesheli Yakoba kukuhwelela chikupu nindi Yesu wadiña Mesiya. Hanyima yakudimona naYesu, Yakoba watela wakwashili antaña jindi amakwawu kwiluka nawu Yesu wadiña Mesiya.c—Yilw. 1:14.

17. Tunateli kuzatisha ñahi chishina chekala haARoma 12:15? (Talenu nimwevulu.)

¹⁷ Tañenu ARoma 12:15. Neyi tuyakamenaña antaña jetu hampinji yinakukeñeka kuyakamenawu chikupu, mumpinji yayiwahi nimumpinji yatama, tukuyikwasha kuhimpa yitoñojoka yawu hanochu chatumonañawu.d Chakutalilahu, tunateli kuyifwakwija hefuku dinavwaliki mwanawu nikuyinka chawaana hakwila tumwekeshi netu ninetu tunazañalali hachuma chinamwekani. Neyi ntaña yetu nafwishi, tunateli kuhosha nindi mazu akukundeja, kumukwashaku muyuma yakumujimba hela kumutemeshela meseji mudi mazu akumukundeja. Kubombelahu, twatela kutwalekahu kuhanjeka nawu mpinji yejima, sweje-e neyi anakumona kukala.

18. Tunateli kumwimbujola ñahi kambanji Anderi?

¹⁸ Yikwashenu eluki akwetu akakwitiya. Chelili kambanji Anderi eluki nindi Yesu diyi Mesiya, wayili kudi manakwindi Petulu nakumuleja nindi enzi nakudimona naYesu. (Yow. 1:​40-42) Komana ninetu kwila twila chuma chochimu nehi? Chakutalilahu, mumpinji-mumpinji tunateli kutambika ntaña yetu kwinza nakupompa hela kwinza nakudiila yakuda hamu nanetu niamabwambu jetu. Neyi tumukwasha kwiluka akwetu akakwitiya, wukutachika kuyimona aYinsahu nindi ekala neyi chekala antu ejima nawa hiyantu amawahi.

19. Hela chakwila antaña jetu hiyanateli kutiyishisha yuma yikwawu yitwakuhwelelaku, tunateli kuyikwasha ñahi? (1 Petulu 3:15)

¹⁹ Tañenu 1 Petulu 3:15. Antaña jetu hadaha chinateli kuyikalila kutiyishisha muloña waweni chitwabulilaña kwila yuma yikwawu, ilaña mpinji yejima akanukaña yuma yayiwahi yitwayililaña nikalemesha kitwayimwekeshelaña. Hela chakwila hitunatwalekihu kwanuka mafuku akunooka hela kudiñija muyisemwa yikwawu yabula kwikala yamuNsonaku, antaña jetu akutiya kuwaha neyi tuzataña nañovu kwikala nampinji yakudikunda nawu. Chakutalilahu, tunateli kuyihempula, kudiila hamu nawu nikuyinka yawaana hampinji yacheñi.

BAYI MULEKA KUKWASHA ANTAÑA JENUKU

20. Yumanyi yitunakudizila kuyuma yeliliyi Yakoba?

²⁰ Yakoba hekalili nakukooleka kwakuzatila hamu naYesu mumudimu wakushimwinaku, ilaña nkumininaku, wekalili kambanji. (Ñal. 1:​18, 19; 2:9) Hela chakwila hadiña hakachi kawatumbanji akusambilaku, chinamwekani hatooka nawu Yakoba walemesheli yuma yatañishileñayi Yesu. Chakutalilahu, chamwoneneniwu wasonekeli mukanda mwekala nsañu yahosha haMpanji yahaMpidi.e

21. Muloñadi chitwatela kubulila kuleka kuyilila yuma yayiwahi antaña jetu abula kwitiya?

²¹ Hela tukuzata nañovu chamuchidinyi, antaña jetu abula kwitiya hadaha anateli wanyi kumwekesha muchima wakufwila kudiza chalala hela kusakilila neyi tunayilili yuma yayiwahi. Muloñadi chitwatela kutwalekelahu kuyilila yuma yayiwahi? Muloña tukwimbujolaña Nzambi yetu wukweti luwi, Yehova, niMwanindi, Yesu, mpinji yejima yitukuyililaña antaña jetu yuma yayiwahi. (Luka 6:​33, 36) Mukuhita kwampinji, yilwilu yetu yayiwahi yinateli kuyiletesha kuhimpa yitoñojoka yawu hachatumonañawu. Anateli nikwanuka yuma yitwakuhwelela yitwayilejeli kunyima. Neyi tutwalekahu kuzata nañovu kukwasha antaña jetu nikuyilila yuma yayiwahi, anateli kufuukulahu kutachika kumukalakela Yehova nawa chumichi chakatuzañalesha nankashi!