Zatenuña naÑovu Mwakashikihu Kupapatishewa

1. (a) Yumanyi yayiwahi yikwawu yafumañamu neyi tupapatishewa? (b) Yumanyi yitukuhanjekahu muchinu chibaaba?

KOMANA mwadihana dehi kudi Yehova nawa munamwekeshi kudihana kwenu kuhitila mukupapatishewa mumenji? Neyi dichimuneli, dikwila nawu munalombi chinleji chamuchima chitooka kudi Nzambi. (1 Pet. 3:21) Muloña wakwila mwenimu, muneli chuma chachiwahi chinateli kwimbujolawu atwansi niamaha anakupompa muchipompelu chenu. Dichi munafuukuli chuma chachiwahi nankashi! Indi neyi kanda mupapatishewi? Chakadi nikujina, mwamukeña Yehova nawa munakukeña kwila chuma chinakukeñayi. Mweluka nenu chipapatishu chalema hakwila ayanakeneña nshidi jenu nawa ayitiyeña kuwaha kudi Yehova. (Yilw. 2:​38-40) Hela chochu, hadaha muchidi kushintajala. Yumanyi yinateli kuyikwasha? Muchinu chibaaba tukuhanjeka (1) antu amakwawu chashintajalilañawu kupapatishewa, (2) chichalemena kwanukaña netu kukuma kudi mukamwihi, nawa (3) yuma yayiwahi yakafumamu neyi muzata nañovu kupapatishewa chakadi kushintajala.

ANTU AMAKWAWU CHASHINTAJALILAÑAWU

2. Muloñadi antu amakwawu chashintajalilañawu kupapatishewa?

² Antu amakwawu ashintajalaña kupapatishewa muloña wakutiya woma. Chakutalilahu, hela chakwila anakukeña kumukalakela Yehova, atiyaña woma nawu hiyanateli kwila yuma yikumutiyisha kuwahaku. Neyi ninenu dichimwatiyaña, tañenu mavasi amuBayibolu anateli kuyikwasha kukuhwelela chikupu nenu Yehova wakuhwelelaña wanyi nindi mwiikali awanina nawa watiyaña kuwaha neyi mudifukulaña kudi yena kwesekeja nahanakumini ñovu jenu. (Mas. 103:​13, 14; Kol. 3:23) Neyi munakutiya woma muloña wekañesha, mulombenu Yehova kulonda yayikwashi kutiya neyi chatiyiliyi ñimbi yaMasamu wasonekeli nindi: “Yehova wudi kukabadi kami, hinukutiya womaku. Chumanyi chikuñilayi muntu?”—Mas. 118:6.

3. Yitoñojokanyi yinateli kukañesha antu amakwawu kufuukulahu kupapatishewa? (Talenu nimwevulu.)

³ Antu amakwawu amukeña Yehova afuukulañahu kubula kupapatishewa muloña atoñojokaña nawu hiyeluka nsañu yayivulu yamuBayiboluku. Komana mwatela kwiluka yuma yejima yashimunawu muBayibolu hakwila mushikihu kupapatishewa? Inehi! Talenu chuma chamwekeni chashimunawu muNsona. Chelili mutentanshi wunyinkeshi kaleya mwakasililiwu kapostolu Pawulu niSilasi, awa amayala amushimwinini mukakuhemba kaleya niamwitala dindi. Iwu iyala niamuchisaka chindi elukili nawu Nzambi diyi welili chihayamisha hakwila afumishi ambuñindi mukaleya. Kubombelahu, adizili chuma chalema hawuna wufuku. Chafuminimu, nsañu yadiziliwu yayisañumwini ‘hohenohu kupapatishewa.’ (Yilw. 16:​25-33) Neyi mwamwiluka Yehova, mwamukeña namuchima wenu wejima, muneluki yuma yalema yamuBayibolu yitwatachikilañahu kudiza, munabalumuki nakuleka nshidi jenu nawa munakufwila kutwalekahu kuhanda kwesekeja nanshimbi jindi, dikwila nawu munashikihu kupapatishewa.—Maku 12:30.

4. Yumanyi antu amakwawu yashañawu muchima nankashi yayileteshaña akañanyeña kufuukulahu kupapatishewa? (Talenu nimwevulu.)

⁴ Antu amakwawu anakukeña kumutiyisha Nzambi kuwaha, ashaña muchima hayuma yikulekawu kwila neyi afuukulahu kupapatishewa. Kafwampi, chalema kutoñojoka hayuma yinateli kufuma muchuma chidi chejima chitunateli kufuukula. (Luka 14:​27-30) Hela chochu, amakwawu atoñojokaña hayuma yakeñawu yinateli kulekawu kwila hakwila afuukulihu kumukalakela Nzambi. Candace, akulishililiwu muchalala, watiyili muniyi njila hampinji yatachikiliyi kudiza Bayibolu henohu nakuli dehi. Wahosheli nindi: “Nelukili yuma yinateleli kumwilila Yehova, ilaña nashintajalileña kwila mwenimu muloña kudi yuma yamukaayi yinadiluñishileña. Nelukili nami chakankalila nankashi kuleka iyi yuma yinelileña.” Amakwawu akamenaña nawu chakayikalilaña kwovwahila nshimbi jaYehova jovwahilaña antu apapatishewa. Akamenaña cheñi nawu chapapatishewawu akakoña nshidi yeneni nawa akayifumisha muchipompelu. Neyi kwakama kwamuchidiwu kunakuyikañesha kufuukulahu kupapatishewa, yumanyi yimwatela kwila?

5. Yumanyi yitwatela kutoñojokañahu nankashi neyi tunakushintajala kupapatishewa? (Matewu 13:​44-46)

⁵ Neyi tunakulanda chuma hitwatalaña hohu hawuseyaku, ilaña nihakulema kwanochu chuma. Kakavulu twashintajalaña wanyi kulanda chuma chitunamoni netu chikutukwasha nankashi. Munjila yoyimu, neyi munakukeña kupapatishewa bayi mutoñojokaña hohu hayuma yimwakeña yimukuleka kwilaku, ilaña toñojokenuña hayuma yabadika yimukudiluñishaña muloña wakwikala nawubwambu wawuwahi naYehova. Yesu wazatishili yakutalilahu yiyedi hakukonkomwena hanichi chikuma. (Tañenu Matewu 13:​44-46.) Muniyi yakutalilahu yejima, muntu ashimunawu watiyili kuwaha kulandisha maheta indi ejima kulonda alandi chuma chalema nankashi chawaniniyi. Ninenu munawani chuma chasweja kulema wuseya, chalala chahosha haWanta waNzambi. Dichi, neyi munakushintajala kuleka kwilahu yuma yimu kulonda mupapatishewi, toñojokenu chikupu hayakutalilahu yashimwiniyi Yesu. Munateli kudihula nenu: ‘Nakuhwelela chikupu nami nsañu yayiwahi yahosha haWanta waNzambi hichuma chalema nankashi? Komana nalemesha wubwambu wami naYehova, yuma yanshiikayi yinachiñejaña niamanakwetu niahela akweti kukeña anyinkayi?’ Ñakwilu jenu kunawa malwihu jikuyikwasha kwiluka yuma yimwatela kwila hakwila mumwekesheña kusakilila hachalala hela kwiluka yuma yinakuyiletesha mushintajaleña kufuukulahu kwila chuma chimweluka.

6. Tunateli kwikala ñahi namuchima wawuwahi?

⁶ Muchakutalilahu chindi chamukakukuwa, Yesu walumbulwili chekala muchima wunateli kumukañesha muntu kupama kuspiritu. Hela chochu, Yesu wamwekesheli cheñi nindi antu amakwawu akatiya “namuchima wawuwahi” nawa aketeja nsañu yaWanta. (Luka 8:​5-15) Neyi munakwakama nenu muchima wenu wunambokelimu, bayi muzeyaku. Nawukwashu waNzambi, munateli kwikala “namuchima wawuha,” wukuyikwasha kwovwahila wunlomboli windi. Mulombenu Yehova yayikwashi kwikala namuchima wamwovu kulonda mukeñi chikupu chalala chahosha haWanta waNzambi.—Ezek. 18:31; 36:26.

7-8. Muloñadi atwansi amakwawu chakañenyañawu kupama kulonda apapatishewi? (Talenu nimwevulu.)

⁷ Atwansi amakwawu amukeña Yehova akañanyaña kupama kulonda apapatishewi muloña wakuyiluwañesha kudi antu amakwawu. Chakutalilahu, antañishi amakwawu kushikola alejaña anyana kashikola nawu amoneña yilwilu yikwawu nawu yidi hohu chiwahi hela chakwila Nzambi wayihela oyu yilwilu. Ilaña wukwashu wamuchidiwu munateli kufuma yuma yomisha mbaña. (Mas. 1:​1, 2; Yish. 7:​1-5) Munateli kutondolwela iwu wubanji neyi mwimbujolaña chuma cheliliyi ñimbi yaMasamu wamulejeli Yehova nindi: “Nikweti kashinshi chikupu kubadika antañishi jami ejima, muloña natoñojokaña chikupu yanukishu yeyi.”—Mas. 119:99.

⁸ Malipoti amwekeshaña nawu anvwali amakwawu aYinsahu, chakadi nikwiluka, aleteshaña anyanawu chiyikalileña nankashi kufuukulahu kupapatishewa. Awa anvwali ashaña nankashi maana hashikola yawanyanawu ninyidimu yakazatañawu, hela akañanyaña hohu kuyikwasha anyanawu kudimikila yikonkwanyi yakuspiritu. Indi neyi munakutoñojoka nenu anvwali jenu anateli kuyikwasha nankashi kupama kuspiritu? Kwila muhanjeka nawu haniyi nsañu nehi? Ilukenu chikupu nenu yaaka yimukweti hiyinateli kuyikañesha kwila yuma yikuyikwasha kwikala nawubwambu wakola naYehovaku. —Yish. 20:11.

9. Yumanyi yinateli kuletesha antu amakwawu kushintajala kufuukulahu kupapatishewa?

⁹ Antu amakwawu anashikihu kupapatishewa, anateli kushintajala kufuukulahu kwila chumichi muloña wekakeja dawakwawu, indi kwiji kudi muntu anakuhembelelawu nawu akafuukwili hamu. Chakutalilahu, hadaha akukeña nawu akapapatisheweli hampinji yoyimu nebwambu dawu chikupu hela nantaña yawu akeñawu. Diimu tuhu, munateli kupapatishewela hampinji yoyimu nawantu imwakeña. Hela chochu, komana yumiyi yikuyiletesha mushintajaleña kufuukulahu kupapatishewa? Anukenu nenu, kudihana kudi Nzambi hichikaninu chimukumukana nkawenu. Chipapatishu chenu bayi chishindamena hayuma yelañawu akwenuku.—Rom. 14:12.

CHICHALEMENA KWANUKA NETU KUKUMA KUDI MUKAMWIHI

10. Chumanyi chinateli kuyiletesha antu amakwawu kushintajala kupama kuspiritu?

¹⁰ Kubombela hayuma yitunahanjekihu dehi, antu amakwawu anateli kushintajala kupama kuspiritu muloña wakutoñojoka nawu kukuma kuchidi kwakulehi nankashi. Komana yitoñojoka yamuchidiwu yayiwahi? Inehi. Yesu wayisoñamishili atumbanji twindi nindi “diloñeshelenu chadimu, muloña Mwana kamuntu wakenza hampinji yimwakabula kumukuhwelela nenu nakwinza.”—Luka 12:40.

11. Chitwasweja kumwiluka Yehova chikutukwasha kwila yumanyi, nawa muloñadi? (Isamu 119:60)

¹¹ Twatela kudihana kudi Yehova muloña wakumukeña. Chitwasweja kumwiluka Nzambi yetu wukweti kukeña, chikutukwasha kukeña nshimbi jindi chikupu nikunyakala kujovwahila chatulejawu oju nshimbi. (Tañenu Isamu 119:60.) Kambanji Yakoba washimwini chikuma chikwawu chalema chaletesha twovwahileña nshimbi jaYehova chakadi kushintajala: Kwosi niwumu hakachi ketu weluka yuma yakamwekana kumadikiku. Hadaha hitunashalihu nefuku hela dimuku ‘dakwila mwaloña,’ dichi ayinu diyi mpinji yakufuukulahu kwila chuma chituneluki.—Yak. 4:​13-17.

12. Yumanyi yitunateli kudizila kuchakutalilahu chaYesu chahosha hetempa danyivinyu?

¹² Toñojokenu hachakutalilahu chashimwiniyi Yesu chahosha hetempa danyivinyu. Komana watañishili wanyi nindi akakukalakala amakwawu akuzata hohu ora yimu nawa akutambwila wufwetu wowumu nawakakukalakala azata ifuku damukumaku? Dichatañishiliyi. Hela chochu, talenu chahosheliwu akakukalakala azatili hohu ora yimu chayiletesheli abuli kutachika swayi kuzata. Ahosheli nawu: “Muloña kwosi muntu wunatwiñiji mudimuku.” Awa akakukalakala hiyakeñeleña hohu kubula kuzata ifuku damukumaku, ilana adiña kanda ayiñiji mudimu. Chayitambikiliwu hohu, akwatili nikumatahu wanyi, atachikili kuzata. (Mat. 20:​1-16) Makonu, Yesu watutambikaña kwikala atumbanji twindi kulonda tuzatileña hamu mudimu waWanta. Chitwatiya hohu mutambi windi, bayi tushintajala kwitejaku.

13. Yumanyi yitunateli kudizila kudi ñoda Loti?

¹³ Antu amakwawu ashintajalaña kuhimpa kulonda atachiki kumukalakela Yehova, muloña atoñojokaña nawu akahimpa neyi kunashali dehi mpinji yantesha henohu kukuma kanda kushiki. Ilaña neyi mutwalekahu kushintajala chakayikalila chikupu kuhimpa nakutachika kumukalakela Nzambi. Yesu welukili chumichi nawa wayisoñamishili atumbanji twindi nindi: “Anukenu ñoda Loti.” (Luka 17:​31-35) Iwu mumbanda welukili chikupu nindi katataka Nzambi yasompeshi Sodoma naGomora; hela chochu, chinamwekani neyi wakeñeleña wanyi kushiya yuma yadiñawu nayu. (Kutach. 19:​23-26) Chuma chamumwekeneni chatwanukishaña cheñi nawu chiisu chawamwinu hichakatwalekahu kwikala chakwenzununaku. Hampinji yaNzambi yatoñolayi, ichi chiisu akachenzela nawa chakekala chakukiya haya nyaaka.—Luka 13:​24, 25.

14. Wuprofwetu wamuBayibolu wahosha hakukuma wunateli kuyikwasha ñahi?

¹⁴ Yuma yinakumwekana hefuku-hefuku mukaayi yinakushikija wuprofwetu wamuBayibolu wahosha hakukuma kwanshakaminu yamakonu. Hela chakwila iyi yuma yikwawu yinakumwekana yinakuyimwekena enu wanyi, kumona yumiyi chiyinakumwekena antu kumaluña acheñi, chikuyikwasha kumona kulema kwakufuukulahu kupapatishewa swayi. Talenu chuma chamwekeni mumafuku awakaKristu akusambila. Kapostolu Petulu wayikonkomweneni akaKristu kwikala “adiloñesha” hela “asoñama,” muloña “kukuma kwayuma yejima [kwadiña kwaswina] dehi kwakwihi.” (1 Pet. 4:7; tth.) Iku “kukuma” kwateneniyi kwatalishili kukukuma kwanshakaminu yawaYudeya. AkaKristu asonekeleliyi Petulu iwu mukanda ashakaminena kwakulehi naYerusalema, dichi hampinji yakujilumuna iwu musumba adiñaku wanyi. (1 Pet. 1:1) Hela chochu, chamweniwu kushikijewa kwaniwu wuprofwetu, chumichi chayikwashili kukuhwelela chikupu nawu yikaninu yikwawu yejima yakanayi Yehova yakashikijewa. Munjila yoyimu, chimukumonaña wuprofwetu wahosha hanshakaminu yamakonu wunakushikijewa, chumichi chikuyiletesha kwikala adiloñesha kuzata nañovu kushikija chikonkwanyi chenu chakupapatishewa.

15. Tunateli kudiloñeshela ñahi chadimu nakwinza kwefuku daYehova? (2 Petulu 3:​10-13)

¹⁵ Mumukanda windi wamuchiyedi wonenewa, Petulu walumbulwili chitwatela kumonaña mpinji yakwinza kwefuku daYehova dawunsompeshi. Kutalisha kudi akaKristu ashakamineña mumafuku awapostolu, idi ifuku dachidiña kwakulehi nankashi hakwila dishiki, hela chochu, Petulu wayilejeli nindi ‘anukeña chikupu,’ hela ‘kufwila chikupu,’ idi ifuku. (Tañenu 2 Petulu 3:​10-13; tth.) Tunateli kutwalekahu kwanuka chikupu idi ifuku neyi twikala adiloñesha nawa tufwilaña netu dinzi. Tukumwekesha netu tunakufwila chikupu idi ifuku neyi tumwekeshaña “yilwilu yakujila nawa [tukalakalaña] nyidimu yakumwakama Nzambi.” Toñojokenu hohu Yehova chikutiyayi kuwaha neyi ayimona munakukalakala “nyidimu yakumwakama Nzambi”! Chakadi nikujina, wukuzañalala nankashi neyi ayimona munadihani kudi yena nawa mupapatishewa.

YUMA YAYIWAHI YAKAFUMAMU NEYI MUPAPATISHEWA YOYINU MPINJI

16. Mpinjinyi yayiwahi yimwatela kufuukulahu kupapatishewa? (2 AKorinda 6:​1, 2) (Talenu ninyevulu.)

¹⁶ Ayinu diyi mpinji yayiwahi yimwatela kufuukulahu kupapatishewa. (Tañenu 2 AKorinda 6:​1, 2.) Iyala ntuñu mwini Etiyopiya wadibulakeni naFwilipu, wamweni nindi hatela kushintajala kupapatishewaku. Chatiyishishiliyi nsañu yayiwahi nawa chamweniyi nindi diyi mpinji yatela kupapatishewayi, wadihoshesheli wanyi nindi: ‘Natela ntahi kudizilahu yuma yayivulu hansañu yayiwahi. Tukuwana kaloña kakwawu munjila.’ Ilaña wamwihwili Fwilipu nindi, “Chumanyi chikunkañesha kupapatishewa?” (Yilw. 8:​26, 27, 35-39) Ichi hichuma chachiwahi chitwatela kwimbujola! Iwu ntuñu chapapatisheweliyi, “watwalekelihu nalwendu lwindi iku nazañalali.”

17. Yumanyi yitwatela kukuhwelela?

¹⁷ Neyi munakushintajala kukupapatishewa, kuhwelelenu nenu Yehova nakufwila chikupu kukwata wubwambu wawuwahi nanenu. (Rom. 2:4) Nateli kuyikwasha kuleka kutiya woma wudi wejima, kwakama hela yuma yikwawu yinakuyikañesha kupama. Neyi mupapatishewa, mukwikala namuzañalu waweni wenzaña muloña wakumutiyisha Nzambi kuwaha. Nawa chakadi nikujina, mwakawana nenu “yuma yakunyima” himukuyimonaña cheñi kulemaku. (Fwili. 3:​8, 13) Kuhiñahu, mukutalilaña “yuma yidi kumbidi,” dikwila nawu kushikijewa kwayikaninu yaYehova yakanayi antu adihanaña awenawu kudi yena nikupapatishewa.—Yilw. 3:19.