May

Yehova atongwele vapilishitu vazachilenga hatavanaku hanyima yakusokola vatu jenyi muEjipitu muundungo. Atongwele nawa vaLevi vazakamenga milimo yeka hatavanaku. Kutala Yehova azakaminenga chikuma vaze vazachililenga hatavanaku chipwe vaze vatwaminenga kwakamwihi nayikiko, kuhambakana vatu veka tahi? Nduma. Yehova katala vatu kumesoko. VaIsalele vosena vapwilenga nausepa wakukola naYehova. Chakutalilaho, Yehova azachile nangolo mangana muyachi wosena umone panda yalivwi napanda yakakahya vize ahakileko mujila yakukomwesa hatavanaku. (Kulo. 40:38) Nge livwi linaputuka kutalisa kumutamba weka, kaha navaze vatwaminenga hahasuku natavanaku vapwilenga nakumona livwi kana. Kaha vaputukile kulongejeka viteli vyavo nakukasununa jimbalaka javo nakuputuka kutambukila hamwe navatu vosena. (Kula. 9:​15-23) Chochimwe namakumbi ano, Yehova atuzanga kaha nawa atuzakama nakutukinga, chamokomoko nokwo twatwama. w24.06 4 ¶10-12

Kuyoya chaNdavichi chapwile muponde. Mwanenyi Avasalome afwililile kumutambula wangana. (Samwe. 2, 15:​12, 13) Ndavichi asakiwile kufuma muYelusalema hahaze vene. Omu vangamba jenyi vapwile nakuchina, Ndavichi amwene ngwenyi kwapwile nakusakiwa vatu vamwe vaze vatela kukinduluka kuYelusalema mangana vamulwezenga vyuma mwajina Avasalome. Ngocho alwezele Zatoke navapilishitu veka vakinduluke kunganda. (Samwe. 2, 15:​27-29) Ava malunga vasakiwile kupwa vakuvanguluka. Ndavichi alwezele Zatoke naHushai masepa jenyi vakushishika, vakundwize vishinganyeka vyenyi. (Samwe. 2, 15:​32-37) Hushai alyongele kukundwiza Avasalome nakumulweza jila yakufungulwilamo Ndavichi, yize yakafwile Ndavichi apwenga nalwola lwaluvulu lwakulizanga kulwa jita. Kufumaho, Hushai alwezele Zatoke naAviyatale vyuma alwezele Avasalome. (Samwe. 2, 17:​8-16) Ava malunga vavali vatumine jino mujimbu kuli Ndavichi uze wakingile kuyoya chaNdavichi.—Samwe. 2, 17:​21, 22. w24.07 4-5 ¶9-10

Vangamba jaYehova vamwe veji kuliveyanga havyuma vyavipi valingile kunyima, pamo shimbu kanda vavambapachise chipwe hanyima yakuvambapachisa. Shikaho, nachipwa chamangana kwanuka ngwetu Yehova atuhana ndando yakusokola mwomwo atuzanga chikuma. Chikupu vene, asaka twitavile wana wenyi. Yehova atufwelelesa ngwenyi, nge ‘tunasungamisa lyehi vyuma’ naikiye, kaha kanuka cheka jishili jetuko. Chikupu vene, Yehova kanuka jishili jize twalingile kunyimako. Kaha nawa keshi kukavulyama vyuma vyamwaza tweji kulingangako. (Samu 103:​9, 12; Hepe. 6:10) Nge muli nakuliveya havyuma mwalingile kunyima, kaha zatenu nangolo mushishikenga havyuma muli nakulinga oholyapwa navyakulutwe, muchishishisa chakushinganyeka kaha havyuma vyakunyima. Kamweshi kuhasa kwalumuna vyuma vyasolokele kunyimako. Oloze munahase kuvumbika Yehova havyuma muli nakulinga oholyapwa kweseka nomu chili chiyoyelo chenu, nakutwalaho kutalilila vyuma vyamwaza vyakulutwe vize amishika. w24.10 8 ¶8-9

Nge muli nakutanga Mbimbiliya, munahase kufwila kuwana jijila jakuzachishilamo jindongi jatwamamo, oloze shimbu jimwe, echi chinahase kumilingisa mulizakamine. Achishinganyekenu hachakutalilaho chino: Lelo munatange mijimbu yamuMbimbiliya yakuhuhumuna yakutalisa kukutala vatu kumeso. (Yako. 2:​1-8) Kaha namumona ngwenu mwatela kuzachila hajila mweji kumwenangamo vatu, ngocho namufwila kwalumunako vyuma vimwe. Kaha hamene namukatanga mijimbu yize nayikashindakanya hakulema chatwama hakupwa nahanjikiso yamwaza. (Yako. 3:​1-12) Namumona ngwenu lwola lumwe hanjikiso yenu kayapwile kanawako. Ngocho namulitomena jino ngwenu namufwilanga kupwa nahanjikiso yamwaza yakutunga vakwenu. Kaha likumbi lyeka nawa omu namukatanga Mbimbiliya namukawana mazu akuhuhumuna akulihenda kukutunga usepa nakaye. (Yako. 4:​4-12) Kaha namumona ngwenu mwatela kusakula kanawa vyakuhemahema. Kuheta halikumbi lyamuchiwana, pamo namulizakamina chikuma hakuvula chavyuma mwatela kuzachilaho. Kanda kuhombako. Anukenu ngwenu, kuvwala “mutu wamuhya” cheji kutwalangaho lika. w24.09 5-6 ¶11-12

Yesu atachikijile ngwenyi kumona vyuma ngana muze avimona Yehova chikiko chapwile chachilemu chikuma. Afwelelele ngwenyi Yehova mwakafumisako upi wosena halwola lwakutamo. Tunahase kulondezeza Yesu kachi nge natupwa namuchima wakulikanyisa kutalisa kuvyuma natuhanjika kachi nge vanatulingi mwamupi. Shimbu jimwe chapwa chakutamo kuhola kaha kulu nge vanatulingi mwamupi, mwomwo pamo vyuma vanatulingi kavyapihile chikumako. Chipwe tunahase kuhola kulu mwomwo tuli nakusaka kulihenda kuukalu waunene uze unahase kwiza. (Kwambu. 3:7; Yako. 1:​19, 20) Shimbu jimwe, chasakiwa kuhanjika hatoma kachi nge vanatulingi mwamupi chipwe nge tuli nakusaka kuhakwila muchano. (Vili. 6:​1, 2) Nge tunasakula kuhanjika, kaha twatela kulinga ngocho mujila yakuunda kaha nawa yakalemesa. Tunahase nawa kulondezeza Yesu hakuseza vyuma vyosena mumavoko “ayaUze eji kuyulanga mwakwoloka.”—Petu. 1, 3:15. w24.11 5-6 ¶10-12

Nge mutu uze nalingi shili napihilila nakwalumuka, echi hichuma chatela kutulingisa tuwahilile. (Luka 15:7) Nge mutu nalumuna vishinganyeka vyenyi chipwe vilinga vyenyi, kaha iya vatela kwalisa? Uno vakulwane tahi? Anukenu vyuma asonekele kaposetolo Paulu kutalisa kuvatu vaze valingile shili ngwenyi: “Pamo Kalunga nahase kuvalingisa vapihilile nakwalumuka.” (Chimo. 2, 2:25) Nge mutu nalumuna vishinganyeka vyenyi chipwe vilinga vyenyi, kaha Yehova ikiye vatela kwalisa, keshi mutuko, mwomwo ikiye eji kukafwanga muka-Kulishitu uze nahungumuka alumuke. Paulu avulukile jino vyuma vyamwaza vinahase kufumamo kachi nge mutu mwapihilila nakwalumuka ngwenyi, nachimulingisa apwenga nachinyingi chakwoloka chakutachikiza muchano nakuputuka cheka kushinganyeka kanawa nakutusunuka mumiheto yaSatana. Kachi nge mutu uze nalingi shili napihilila nakwalumuka, kaha komiti nayinoneka kumutambukilanga mangana yitwaleho lika kukafwa mutu kana afungulule tufuta twaSatana nakusungamisa jijila jenyi.—Hepe. 12:​12, 13. w24.08 23 ¶14-15

Liyongomena lize Yesu alishile vyakulya, lyahakile mangana kuvyuma vyamukuyoya. Mujila muka? Halikumbi lyakavangijileho, lize liyongomena lyatachikijile ngwalyo Yesu navaposetolo jenyi vanayi. Ngocho lize liyongomena lyengilile mumato amwe aze apwile nakufuma kuChivelya nakuya kuKapelenau mangana vakawane Yesu. (Yowa. 6:​22-24) Kutala eli liyongomena lyasakile kuya nakwivwa vyavivulu kutalisa kuWangana tahi? Nduma. Ava vatu vasakile kaha Yesu avahane jimbolo jikwavo. Tunatachikiza ngachilihi ngocho? Talenu vyuma vyasolokele omu liyongomena lyamwene Yesu kwakamwihi naKapelenau. Yesu ahanjikile hatoma ngwenyi vatu kana vahakile kulutwe vyuma vyakashimbu kakandende vize navikuchisa majimo avo. Atachikijile ngwenyi numba tuhu vekuchile najimbolo jize valile oloze chapwile ‘kulya chize cheji kupolanga.’ Ngocho avakolezezele vazachile “kulya chize cheji kwililanga nakutwala kukuyoya chahaya myaka yosena.” (Yowa. 6:​26, 27) Yesu ambile ngwenyi, Ise nahase kuhana kulya kana kuvatu. w24.12 5 ¶8-9

Hakusaka enu vandumbwetu vamalunga mupwenga muvaka-kunangula vamwenemwene, pendaminenunga haMazu aKalunga. Linangulenunga kanawa Mbimbiliya namikanda yetu. (Vishi. 15:28) Omu namulinangulanga, monenu kanawa jila yamwaza yize munahase kuzachishilamo Visoneka. Kaha nawa nge muli nakunangula, fwilenu kuheta kumichima yavaze vali mulizavu. Munahase kuhotola uhashi wenu wakupwa vaka-kunangula kachi nge namuhulisangako vakulwane vakuhya nakukavangiza vyuma navamilweza. (Chimo. 1, 5:17) Vakulwane vatela kukolezezanga vandumbwavo, chipwe ngocho vakulwane shimbu jimwe vanahase kuhuhumuna vandumbwavo chipwe kuvahanjikila. Muvyuma vyosenevi, vakulwane vatela kulinga ngocho nalikoji. Nge namupwanga vavavwovu kaha nawa vazangi, nakupendamina haMazu aKalunga hakunangula vakwenu, kaha namupwa vaka-kunangula vamwenemwene mwomwo muli nakulondezeza Muka-kunangula Wamunene Yesu.—Mateu 11:​28-30; Chimo. 2, 2:24. w24.11 24 ¶16

Tweji kutohwesanga Yehova kuhichila muvyuma tweji kuhanjikanga hali ikiye. Vatu jaYehova vavalweza ‘valise Yehova,’ ‘nakwalisa lijina lyenyi,’ “[nakuvilika] mujimbu wamwaza waulwilo wenyi,” “[nakwambulula] upahu wenyi muli vaka-mafuchi.” (Samu 96:​1-3) Eji hijijila jimwe jize tunahase kutohweselamo Setu wamwilu. (Vili. 4:29) Tunahase nawa kutohwesa Yehova kuzachisa vikumba vyetu. Vaka-kulemesa Yehova vamuchano vanamutohwesanga mujila kaneyi. (Vishi. 3:9) Chakutalilaho, vaIsalele vakundwijile mulimo wakutunga tembele nakuyiwahisa. (Vamya. 2, 12:​4, 5; Miji. 1, 29:​3-9) Tumbaji twaKulishitu vazachililenga Kulishitu navaposetolo jenyi ‘kuzachisa vyuma vyavo.’ (Luka 8:​1-3) Vaka-Kulishitu vamulikulukaji lyamyaka lyakulivanga nawa vatumine vyuma vyakulikafwa navyo kuli vandumbwavo vakushipilitu. (Vili. 11:​27-29) Nayetu makumbi ano, tunahase kutohwesa Yehova kuhichila mukuhana mawana akulisakila. w25.01 4 ¶8; 5 ¶11

Vyuma muka vyakafwile Kolonelyu vamumbapachise? Mbimbiliya yamba ngwayo ‘evwilenga Kalunga woma, navaze vakuzuvo yenyi vosena.’ Kaha nawa Kolonelyu atwalileho lika kulembelela Kalunga. (Vili. 10:2) Kolonelyu hamwe kaha natanga yenyi, vetavilile Kulishitu nakuvambapachisa omu vavambulile mujimbu wamwaza kuli Petulu. (Vili. 10:​47, 48) Chikupu vene, Kolonelyu alisuwile kwalumunako vyuma vimwe mukuyoya chenyi mangana alemesele Yehova hamwe kaha natanga yenyi. (Yoshu. 24:15; Vili. 10:​24, 33) Kolonelyu naikiye kachi alangishile nakuhona kumumbapachisa kupwa muka-Kulishitu, mwomwo yachihela apwile nacho. Oloze ketavishile chuma kana chimuhoneseko. Kutala muli nakusakiwa kwalumunako vyuma vimwe mukuyoya chenu mangana mwitavile muchano tahi? Nge mukiko, kaha Yehova mwamikafwa nakumikisula hakufwila kumuzachila kweseka najindongi jamuMbimbiliya. w25.03 5 ¶12-13

Nge namwivwa mijimbu yamakuli kutalisa kuliuka lyetu chipwe hali vandumbwetu vaze vali nakutwaminyina, kaha mwatela kwanuka omwo vaka-kole jaYehova vahanjikilenga vyuma vyamakuli hali Yesu nahali tumbaji vamulikulukaji lyamyaka lyakulivanga. Makumbi ano, vatu jaYehova vali nakuvayanjisa nakuvavangijikila ngana muze Mbimbiliya yahanjikilile chimweza. (Mateu 5:​11, 12) Kachi nge natutachikiza owo ali nakuneha makuli nakuzata nangolo mangana tulikinge, kaha katweshi kuhungumuka namijimbu yamakuliko. Chuma muka twatela kulinga? Kanenu mijimbu yamakuli. Kaposetolo Paulu atulweza vyuma twatela kulinga kachi nge tunevu mijimbu yamakuli. Akolezezele Chimoteu ‘akande vatu vamwe vahone kuhaka michima yavo kuvihande vyamakuli, nakukana vihande vyamakuli, vyamokomoko.’ (Chimo. 1, 1:​3, 4) Tweji kukananga mijimbu yamakuli, mwomwo twatachikiza okwo kweji kufumanga mijimbu kana. Tweji kukakachilanga ‘kumazu amwenemwene’ amuchano.—Chimo. 2, 1:13. w24.04 11 ¶16; 13 ¶17

Twalenuho lika kupwa vakulinunga navatu vaze vapwa vakushishika kuli Yehova. Kalunga asaka tupwenga vakulinunga mukulemesa chetu. Tunahase kutwalaho lika kupwa vakulinunga kachi nge natulinjilila kumuchano. Anukenu ngwenu, vatu vaze navasosoloka kumuchano veji kunehanga vihandwa muchikungulwilo, shikaho Kalunga atuhuhumuna ‘tulihende kuli vakiko.’ Mwomwo nge natulikata navatu kana, kaha navatuhungumwisa nakutulingisa tuseze muchano. (Loma 16:17) Nge natutachikiza muchano nakulinjilila kuukiko, kaha natupandama chikuma kuli Yehova nakupwa nalufwelelo lwakukola. (Efwe. 4:​15, 16) Kaha nawa natupwa vakukingiwa kukunangula chamakuli chaSatana namijimbu yamakuli. Natutwalaho lika kupwa vakukingiwa, kaha Yehova mwakatukinga nakutuzakama haluyando lwalunene. Shikaho, twalenuho lika kulinjilila kuvyuma vyamuchano, “kaha Kalunga wakuunda mwapwanga nayenu.”—Fwili. 4:​8, 9. w24.07 13 ¶16-17

Yesu ahakilenga muchima vatu vaze valivwilenga kupwa vamokomoko mwomwo yashili valingile nakuvasanyika vapwenga vaka-kumukavangiza. Atachikijile ngwenyi vatu vamwenenga ukalu mwomwo yashili. Shikaho apandaminenga kuli malunga namapwevo vaze vatu vamwenenga kupwa vaka-shili. Alumbunwine kuzachisa chifwanyisa chino ngwenyi: “Vatu vavakangule kaveshi kusakiwa chimbukeko, kuvanga vaka-kuviza kaha.” Ambile nawa ngwenyi: “Ami kangwejile nakusanyika vaka-kwolokako, oloze shina vaka-shili.” (Mateu 9:​12, 13) Chikupu vene, Yesu ateselemo mazu ahanjikile. Akonekelele shili yapwevo uze amusanyishile kumahinji enyi namasoji. (Luka 7:​37-50) Anangwile muchano waulemu pwevo wakaSamaliya uze awanyine halishima numba tuhu atachikijile ngwenyi apwile muka-ujila. (Yowa. 4:​7, 17-19, 25, 26) Kalunga ahanyine nawa Yesu ngolo jakufumisako kufwa chize cheza mwomwo yashili. Mujila muka? Yesu asangwile malunga, namapwevo, navanyike navakulwane.—Mateu 11:5. w24.08 4 ¶9-10

Uno Yehova mwakatohwesa ngachilihi lijina lyenyi kulutwe? Kuhichila muchiyulo chenyi chakwoloka. Kalinwomu anongese Mbavilone Yayinene mwomwo yakusaula lijina lyenyi lyajila. (Kuso. 17:​5, 16; 19:​1, 2) Vatu vamwe vaze navakamona omu Mbavilone Yayinene navakayinongesa, vanahase kukalikata nayetu mukulemesa chamuchano. Kufumaho, Yehova mwakanongesa kano kaye kaSatana haAlamangetone, nakufumisako vaze veji kulikanganga kuli ikiye nakusaula lijina lyenyi. Oloze mwakayovola vaze vamuzanga nakumwononoka, vaze nawa vasuuluka kumutohwesa. (Mako 8:38; Teso. 2, 1:​6-10) Hanyima yacheseko chamakumishilo chize nachikapwako hakukuma chaChiyulo chaKulishitu chaMyaka 1,000, lijina lyaYehova nalikapwa hanalitomesa lyehi. (Kuso. 20:​7-10) Halwola kana, hamavu hosena “nahakazala chinyingi chakutachikiza upahu waYehova, nge muze kalungalwiji azala nameya.” (Hamba. 2:14) Ocho kuwaha kana natukevwa omu vatu vosena navakatohwesanga Yehova mujila yize yatela! w25.01 7 ¶15-16

Vyuma muka vyakafwile vaka-Kulishitu vavaHepeleu vapwenga nalukakachila omu vapwile nakuvayanjisa? Kaposetolo Paulu atachikijile ngwenyi ava vaka-Kulishitu vatelelele kumona vyeseko mujila yamwaza. Kaha alumbunwine ngwenyi nge vaka-Kulishitu vali nakuhita muvyeseko, kaha Kalunga nahase kuzachisa vyeseko kana mangana avanangule. Vyeseko kana vinahase kuvanangula mwakupwila navilinga vize vatela kupwa navyo vaka-Kulishitu. Shikaho, kushinganyeka havyuma vyamwaza navifumamo hakuhita muvyeseko, chakafwile vaka-Kulishitu vavaHepeleu vapwenga nalukakachila. (Hepe. 12:11) Paulu akolezezele vaka-Kulishitu vavaHepeleu vapwenga vakumika nakuhona kuzeya hakuhita muvyeseko. Kaposetolo Paulu atelemo kuhuhumuna vakwavo kutalisa kuluyanjisa. Hakuwana nge hakavanga ayanjishile vaka-Kulishitu, ngocho atachikijile kanawa mujila ava vaka-Kulishitu vavayanjishililengamo. Kaha nawa atachikijile mwakupwila wakumika muvyeseko, mwomwo naikiye omwo apwile muka-Kulishitu vamuyanjishilenga mujijila jakulisezaseza.—Koli. 2, 11:​23-25. w24.09 12-13 ¶16-17

Hakumbi hakumbi, mulimo wetu wakwambulula wasakiwa kuuzata mukwanguhwa. Mwomwo ika? Mwomwo kunasale kaha lwola lwalundende. Achishinganyekenu havyuma ahanjikilile chimweza Yesu kutalisa kumulimo wakwambulula hamakumbi akukuminyina, ngana muze vasoneka hali Mako 13:10. Kweseka namujimbu wakulifwanako wamumukanda waMateu, Yesu ahanjikile ngwenyi mujimbu wamwaza navakawambulula hamavu hosena shimbu kanda “kukuma” chizenga. (Mateu 24:14) Lizu lyakwamba ngwavo kukuma, lyatalisa kukunongesa kaye kaSatana kakuhuka. Yehova anoneka ‘likumbi naola’ kutalisa kuvyuma navisoloka kalinwomu. (Mateu 24:36; Vili. 1:7) Hakumbi hakumbi tuli nakupandama chikuma kulwola kana. (Loma 13:11) Muholyapwanyi, twatela kutwalaho lika kwambulula nomu kukuma nachikeza. Omu tuli nakushinganyeka hamulimo wetu wakwambulula, twatela kushinganyeka chikuma hachihula chino chachilemu: Mwomwo ika tweji kwambulwilanga mujimbu wamwaza? Kukumbulula mukavatu ngwetu, zangi yikiko yeji kutukunyulanga twambulule. Vyuma tweji kulinganga mumulimo wakwambulula vyeji kusololanga nge twazanga mujimbu wamwaza, nakuzanga vatu, kaha chachilemu chikumanyi tweji kusololanga ngwetu twazanga Yehova nalijina lyenyi. w24.05 14-15 ¶2-3

Enu visemi, kolezezenunga mwanenu ashinganyekenga havyuma vyakutenga. Kachi nge muli nakutambuka namwanenu mumusenge chipwe nge muli nakulima, kaha kafwenu mwanenu ahake mangana kujila vyuma vimwe vavitengelamo. Mwomwo ika? Mwomwo jila vatengelamo vyuma kana, vyasolola mangana ayauze avitengele. Chakutalilaho, vaka-sayasi vanalinangulanga hajila vatengelamo vyuma vyakulijinga hamyaka yayivulu. Mutu uze alinangula chikuma vyasayasi Nicola Fameli alumbunwine ngwenyi, nge namulava mifunda yakulijinga yatwama muvyuma vyakutenga vimwe, namuwana ngwenu mifunda kana yalifwana. Kuvula cheyi mifunda vachivuluka ngwavo, Fibonacci sequence. Vyuma vimwe vyakutenga vize vyapwa vyakulijinga shina, milalaji, navimbangachi vyavakolekole, namafwo akumitondo namitwe yasunflower. w24.12 16 ¶7

Mose, naNdavichi naYowano vayoyele halwola lwakulihandununa nayetu nachiyoyelo chakulihandununako nayetu. Oloze twalifwanako muvyuma vyavivulu. Vazachilile Kalunga wamuchano uze tweji kuzachilanga nayetu. Ngana mwavakiko, nayetu tweji kulombanga kuli Yehova, nakupendamina hali ikiye, nakumwitavila atutwaminyine. Ngana mwavava malunga vakukola vakushishika, nayetu tunafwelela ngwetu Yehova mwakisula vaze veji kumwononokanga. Shikaho, tuvosena tutwalenuho lika kukavangiza mazu amakumishilo amalunga vakukola hakukavangiza jishimbi jaYehova. Nge natulinga ngocho, kaha natufukila muvyuma vyosena natulinganga. Kaha natukayoya ‘nakukatwama myaka yayivulu,’ kulumbununa haya myaka. Kaha nawa natupwa vakuwahilila hakwivwisa Setu wamwilu wazangi kuwaha, uze eji kutesangamo jishiko jenyi josena mujila yize katweshi kuhasa kushinganyekako.—Efwe. 3:20. w24.11 13 ¶20-21

Mulikulukaji lyamyaka lyakulivanga, vandumbwetu vamwe vamalunga vavatongwelenga kupwa vaka-kuzachila. (Chimo. 1, 3:8) Chasoloka nge, ava vaka-kuzachila vakiko vazachilenga “milimo yakukafwa vatu,” yize kaposetolo Paulu asonekele. Chikupu vene, vaka-kuzachila veji kuzatanga milimo yayilemu mangana vakulwane vahake muchima kumulimo wakunangula nawakufunga. Chakutalilaho, vaka-kuzachila pamo vazachilenga mulimo wakunungulula Visoneka, chipwe kulanda vinoma vyakunungulwilaho Visoneka. Talenu hamilimo yimwe yakukafwa vatu veji kuzatanga vaka-kuzachila muchikungulwilo. (Petu. 1, 4:10) Vanahase kuvahana mulimo wakuzakama jiakauti jajimbongo jamuchikungulwilo, chipwe jingalila jakwambulwila, chipwe kuvahana mulimo wakuwota mikanda nakuyihana kuli vaka-kwambulula, nakuzachila kumakina chipwe kupwa vaka-kukafwa, nakuzata mulimo wakuwahisa Zuvo yaWangana. Milimo yoseneyi yapwa yayilemu mwomwo yeji kulingisanga chikungulwilo chizate kanawa.—Koli. 1, 14:40. w24.10 19 ¶4-5

Tunahase kumika muvyeseko vyosena kachi nge natwanuka ngwetu Yehova ayoya kaha nawa mwatukafwa. Hakuwana nge apwa Wangolo Josena ngocho mwatuhana ngolo jakutukafwa tumike. Echi cheji kutujikijisanga kachi nge tuli nakumona ukalu. Kushinganyeka omwo Yehova natukafwenga muvyeseko vyavindende, nachitukunyula tufwelele ngwetu mwatukafwa nawa muvyeseko vyavinene. Shinganyekenu havyuma vivali ahichilemo Mwangana Ndavichi vize vyamulingishile afwelele chikuma Yehova. Omu Ndavichi apwile kafunga wakanyike, ulusu nandumba vakwachile mikoko jaise. Hamapapa osena awa avali, Ndavichi ahamukile kununga vaze tunyama vavali nakuyovola mikoko jaise. Chipwe ngocho Kashinganyekele ngwenyi natesamo chuma kana mungolo jenyiko. Atachikijile ngwenyi Yehova ikiye namukafwe. (Samwe. 1, 17:​34-37) Kushinganyeka havyuma kana chakafwile Ndavichi afwelele ngwenyi, Kalunga ou ayoya mwakamujikijisa nakulutwe. w24.06 21 ¶5-6

Achishinganyekenu vanamisanyika kuchilika. Kutala namuyako tahi? Kachi nge kamwatachikijile kanawa mutu uze nalongesa chilika kana, chipwe vyuma vanalongesako, kaha mwatela kumuhulisa vihula vyakufwana nge: “Chilika kana nachikapwila kulihi, kaha lwola muka nachikapwako? Uno nakukapwa vatu vangahi? Veya navakachitwaminyina? Veya navakapwako? Vyuma muka vananoneka vize navikapwako? Kutala nakukapwa wala tahi?” Kukumbulula vihula kana nachimikafwa musakule kanawa vyakulinga. Nge munawane lyehi mashina namasongo, kaha kekesenu kanawa omwo vili vyuma vyosena. Chakutalilaho, ngachilihi nge munatachikiza ngwenu vatu vamwe vaze navakapwa kuchilika kana kavavumbika jindongi jamuMbimbiliyako, nyi pamo kakweshi kukapwa mutu uze mwakakekesanga amone numba nge vatu vali nakunwa wala wauvulu chikuma? Kutala munamono ngwenu echi chilika chinahase kukapwa nge chilika chakukaye tahi? (Petu. 1, 4:3) Kachi nge munatachikiza lyehi vyuma vyosena navikapwako, kaha namusakula kanawa vyakulinga. w25.01 15 ¶4-5

Yehova azachisa vifwanyisa mangana vitukafwe tutachikize omwo eji kutomesanga jishili javaze navapihilila nakwalumuka kuhichila mundando yakusokola. Chapwa chachikalu kufumisa ulombo uchila halihina. Shikaho, Yehova atufwelelesa kuzachisa chifwanyisa kanechi ngwenyi, jishili jetu vanahase kujikosa jipwenga jitoma nakuhona kujimona cheka. Jishili vajifwanyisa ‘kumikuli.’ (Mateu 6:12; Luka 11:4) Shikaho, kala lwola natulinga shili kuli Yehova, cheji kupwanga kwijiva nge tuli nakukongwelako lika mukuli, ngocho tukwechi mukuli waunene kuli ikiye. Oloze nge Yehova natukonekela, chili kwijiva nge najimi mukuli uze twatelanga kufweta. Katulweza tufwete cheka mikuli yajishili jize vanakonekela lyehiko. Chikupu vene, eyi hijila yamwaza yakulumbunwinamo kulihehwa tweji kupwanga nacho nge Yehova natukonekela. w25.02 9-10 ¶9-10

Visemi vasakiwa kuvakafwako mujila yimwe kachi nge vanashinakaja, kaha vana vavavulu vene vafwila kulinga ngocho. (Chimo. 1, 5:4) Oloze visemi vavaka-Kulishitu vatachikiza ngwavo, kuwahilila chamwenemwene cheji kwizanga hakukafwa vana vavo vapwenga vangamba jaYehova, keshi kuvalela nakufwila ngwavo kulutwe vakavazakamengako. (Yowa. 3, 4) Hanenu chakutalilaho chamwaza vana venu vafwelele chikuma Yehova oku nawa muli nakuvakafwa valizange kukalizakama vavene kulutwe. Shimbu vachili vanyike, vanangulenu kulema chakukilikita. (Vishi. 29:21; Efwe. 4:28) Kahomu vali nakuya nakukola, vakafwenu vahakenga mangana kushikola. Chapwa chamwaza visemi vavaka-Kulishitu kuhehwojola kanawa nakukavangiza jindongi jamuMbimbiliya, mangana vakafwe vana vavo vasakule omwo vanahase kuzachisa kanawa chinyingi chavo chakushikola. Echi nachikakafwa vana vakalizakame vavene kulutwe nakukapwa nalwola lwaluvulu lwakuzata mulimo wakwambulula. w25.03 30-31 ¶15-16

Mumukanda waIsaya kapetulu 65 mwatwama mazu akulumbununa omwo chiyoyelo nachikapwa kuli vaze navakatwamanga mupalachise yakushipilitu. Upolofweto kana wateselemo chatete kunyima mu 537 B.C.E. Halwola kana, vaYuleya vaze vapihililile nakwalumuka vavafumishile muufunge muMbavilone nakukinduluka kulifuchi lyavo. Yehova akiswile vatu jenyi nakuvakafwa vatungulule nganda yaYelusalema nakuyilingisa kupwa yamwaza cheka nakuwahisa tembele yipwenga cheka chihela chachinene chakulemesela Kalunga wamuchano muIsalele. (Isa. 51:11; Zeka. 8:3) Upolofweto waIsaya waputukile kutesamo kamuchivali mu 1919 C.E. omu vaka-kulemesa Yehova vamakumbi ano vasokokele muundungo waMbavilone Yayinene. Kufumaho, palachise yakushipilitu yaputukile kutanda mukaye kosena. Vaka-kwambulula Wangana vatwima vaputukile kutunga vikungulwilo vyavivulu nakuputuka kupwa navilinga vyamwaza. Vatu vavavulu vaze vapwilenga navilinga vyaukenya, vaputukile “[kuvwala] mutu wamuhya uze vatengele kweseka nomu mwaya muchima waKalunga.” w24.04 20-21 ¶3-4

Mumafuchi amwe, visemi chipwe vatu veka vaze vanakolo lyehi, vakiko vanahase kusakwila kausoko kavo wamujike mutu atela kwingila nenyi muulo. Kaha mumafuchi eka nawa, tanga chipwe masepa vakiko veji kuwanyinanga mutu wamujike mutu wakwingila nenyi muulo nakulongesa vyuma mangana ava valunga napwevo valiwane nakushimutwila mangana vamone numba nge vanahase kuputuka kulisesembwa. Nge vanamilombo mutondele mukwenu mutu wakulisesembwa nenyi chipwe wakwingila nenyi muulo, kaha kamwatela kushinganyeka kaha havyuma asaka mutu umweko, oloze mwatela kushinganyeka kujisali josena jivali. Nge munawane mutu kana, kaha fwilenu kutachikiza kanawa vilinga vyenyi, chachinenenyi fwilenu kutachikiza kanawa omwo apwa kushipilitu. Anukenu ngwenu usoko wamutu naYehova ukiko waulemu chikuma, kuhambakana jimbongo chipwe kulinangula, chipwe ulemu. Anukenu ngwenu, ndumbwetu walunga wamujike nandumbwetu wapwevo wamujike, vakiko vakwechi lisesa lyakusakula numba nge navalimbata nyi chiku. w24.05 23 ¶11

Tunahase kukafwa valunga napwevo vaze vali nakulisesembwa kuhichila muvyuma natuhanjika navize natulinga. Shimbu jimwe twatela kupwa namuchima wakulikanyisa. (Vishi. 12:18) Chakutalilaho, tunahase kufwila kulwezako vatu veka ngwetu vandumbwetu vanganji nakananga vali nakulisesembwa, okunyi pamo vaze vali nakulisesembwa navasaka kukalihanjikila vavene. Katwatela kuyongolanga vatu vaze vali nakulisesembwa chipwe kuvamona mujila yayipi havyuma vanasakula kulingako. (Vishi. 20:19; Loma 14:10; Teso. 1, 4:11) Kaha nawa vaze vali nakulisesembwa vanahase kwivwa kupihya kuvahulisa numba nge navakalimbata nyi chiku. Nyi ngachilihi nge vaze vali nakulisesembwa navasakula kulitwamina kulisesembwa? Katwatela kwingila muvihande vyavo chipwe kupwa kusali yimweko. (Petu. 1, 4:15) Kulitwamina kulisesembwa kachalumbununa nge vapwevo navalunga vanasakula kulinga chuma chakuhengako. Oloze chalumbununa nge kulisesembwa chinavakafwe valitachikize kanawa nakusakula kanawa vyakulinga. Chipwe ngocho, vyuma vanasakula vinahase kuvevwisa kukola kumuchima. Shikaho tunahase kuwana jijila jakuvakafwilamo. w24.05 31 ¶15-16

Cheseko chimwe chachikalu chize chinahase kutuhombesa shina, nge muka-tanga yetu chipwe sepa lyetu uze twazanga chikuma naseze Yehova. (Samu 78:40) Chapwa chachikalu chikuma kwitavila vyuma vinasoloka, kachi nge vinasolokela mutu uze twazanga chikuma. Nge nayenu mwahitaho lyehi muukalu kana, kaha chakutalilaho chaZatoke uze apwile wakushishika nachimikolezeza. Atwalileho lika kupwa wakushishika kuli Yehova omu sepa lyenyi Aviyatale ahonene kupwa wakushishika. Chuma kana chasolokele omu Ndavichi apwile kwakamwihi nakufwa. Mwanenyi Atonyiya asakile kutambula wangana uza Yehova ashikile ngwenyi Solomone ikiye mwakauswana. (Miji. 1, 22:​9, 10) Aviyatale akundwijile Atonyiya. (Vamya. 1, 1:​5-8) Aviyatale ahonene kupwa wakushishika kuli Ndavichi naZatoke nakuli Yehova. Zatoke azachililile hamwe naAviyatale milimo yaupilishitu hamyaka yayivulu.—Samwe. 2, 8:17; 15:29; 19:​11-14. w24.07 6 ¶14-15

Tunatachikiza ngwetu chapwa chachilemu chikuma kupwa vakuvanguluka mangana tuhone kwingila mucheseko. Anukenu ngwenu, “kulivwisa kuwaha viseke vyashili hatando yayindende,” kacheshi kulyeseka nakuwahilila natupwa nacho chize cheji kwizanga mwomwo yakuyoya kweseka najishimbi jaYehovako. (Hepe. 11:25; Samu 19:8) Chapwa ngocho mwomwo Yehova atutenga tuyoyenga kweseka najijila jenyi. (Kupu. 1:27) Ngocho natupwa nachivezu chitoma nakupwa nalutalililo lwakukayoya haya myaka. (Chimo. 1, 6:12; Chimo. 2, 1:3; Yuta 20, 21) Chikupu vene, “mujimba unazeye.” (Mateu 26:41) Oloze echi kacheshi nakulumbununa nge katweshi kuhasa kufungululako. Yehova alizanga kutuhana ngolo jize twasakiwa. (Koli. 2, 4:7) Ijivenu ngwenu, Kalunga mwatuhana ngolo jakuhambakana jize javatu. Nge natuvangila kukilikita tuzachise ngolo jetu mangana tuhonese vyeseko, kaha natufwelela ngwetu Yehova mwakumbulula kulomba chetu nakutuhana ngolo jize twasakiwa. (Koli. 1, 10:13) Chikupu vene, Yehova mwatukafwa tupwenga vakuvanguluka mangana tuhonese vyeseko. w24.07 19 ¶19-21

Uno omu kaposetolo Paulu asonekele mazu ali muchisoneka chalelo kuli mukwavo kalama Chimoteu kutalisa kujila yakukafwilamo “vatu vaze veji kulinganga shili,” apwile nakulumbununa ika? Kapwile nakulumbununa ngwenyi chikungulwilo chosena chikiko ‘vatu vosenako.’ Oloze apwile nakutalisa kuvatu vavandende kaha, vaze pamo vatachikijile shili alingile mutu kana. Pamo vamumwene chipwe pamo ou alingile shili avalwezele chihande kana. Vakulwane navalweza mujila yakuzangama vatu kana ngwavo vanatale hachihande kana, kaha mutu uze alinganga shili vanamukafwe. Shimbu jimwe nge mutu nalingi shili, mulonga kana weji kuyanga puho chipwe unahase kuya puho. Halwola lwakufwana ngana, nachikungulwilo chosena cheji kupwanga jino ‘hivatu vosena.’ Shikaho vakulwane veji kuvilikanga kuchikungulwilo ngwavo ndumbwetu vanamuhanjikila. Mwomwo ika? Paulu akumbulwile ngwenyi, “mangana vosena vatalileko” nakuhona kulinga shili yayinene. w24.08 23-24 ¶16-17

Twatela kuzata nangolo mumulimo waYehova palanga nakusongo. Vawavisa vatela kupwa vakutona mangana ‘vakavambate’ mwilu kuli Yesu nakukatambula fweto. (Mateu 24:40) Vatu kana vatalilila ‘kukavakungulwila hamwe’ kuli Yesu mwilu. Hanyima yaAlamangetone, navakapwa mwenga waYesu nakwingila muulo waMwanamukoko. (Teso. 2, 2:1) Numba tuhu kusopesa chinapandama kwakamwihi, oloze katwatela kwivwa womako. Nge natutwalaho lika kupwa vakushishika, kaha Setu wamwilu mwatuhana “ngolo jakuhambakana jize javatu” mangana “[tukahase] kwimana kumeso aMwanamutu.” (Koli. 2, 4:7; Luka 21:36) Kachi nge natukavangiza kuhuhumuna chaYesu chamuvifwanyisa vize ahanjikile, kaha natwivwisa Setu kuwaha, numba tupwa nalutalililo lwakukayoyela mwilu chipwe hano hamavu. ‘Majina etu navakawasoneka mumukanda’ wakuyoya mwomwo yalikoji lyaYehova lyalinene.—Ndanye. 12:1; Kuso. 3:5. w24.09 24-25 ¶19-20

Mazu aKalunga anahase kumikafwa muunde muchima. Mujila muka? Tachikizenu ngwenu vyuma vize muli navyo vyapwa vyavilemu chikuma kuhakilako vene nausoko wenu naYehova, kaha kavyeshi kuhasa kulyeseka navyuma vize vatu veji kuwananga mukaye kanoko. Vatu kana veji kupendaminanga kaha havyuma vali nakutesamo mukuyoya chavo, mwomwo kavatwama nalutalililo lwavyuma vyakulutweko. Oloze enu Yehova amishika vyuma vyamwaza vize namukalivwisa kuwaha. (Samu 145:16) Shinganyekenu nawa hachuma chino: Kutala twatachikiza omwo chiyoyelo chetu chinahase kupwa kachi nge natusakula vyuma vyakulinga vyakulihandununako tahi? Chuma chachilemu mwatela kutachikiza shina echi: Vosena vaze veji kusakulanga vyuma kupendamina hazangi yavo yakuzanga Yehova nakuzanga vakwavo vatu veji kulivwisanga kuwaha vyuma vyamwaza. w24.10 27 ¶12-13