April

Twatela kufwelela mundando yakusokola mangana tukanganyale kunyama yaYesu nakumanyinga enyi. (Efwe. 1:7) Vatu vaze Yesu avulukile ngwenyi “mikoko veka,” kavatela kulya mbolo nakunwa vinyo hachilika chaKulya chaMwata chaChingoloshi chize cheji kupwangako mwaka himwakako. (Yowa. 10:16) Chipwe ngocho, vatu kana veji kunganyalanga kunyama yaYesu Kulishitu nakumanyinga enyi. Cheji kupwanga ngocho, hakufwelela ndando yakusokola yaYesu Kulishitu. (Yowa. 6:53) Vaze veji kulyanga vifwanyisa veji kusololanga ngwavo, vavaneha mulushiko lwaluhya lwakukapwa vaswana muWangana wamwilu. Chipwe ngocho, numba tupwa tuvawavisa chipwe mikoko veka, twatela kupwa nalufwelelo mangana tukapwe nakuyoya chahaya myaka. w24.12 13 ¶14, 16

Hakulinga Kulya chaMwata chaChingoloshi, Yesu ahanyine vaposetolo jenyi mbolo yakuzeneka chimbalwila nakuvalweza ngwenyi yemanyinako mujimba wenyi. Kufumaho avahanyine vinyo nakwamba ngwenyi, vyemanyinako “manyinga [enyi] alushiko.” (Mako 14:​22-25; Luka 22:20; Koli. 1, 11:24) Yesu alishikile lushiko kana “navaze vakuzuvo yaIsalele” yakushipilitu, vaze navakapwa “muWangana waKalunga.” (Hepe. 8:​6, 10; 9:15) Vyuma ahanjikile Yesu omu apwile nakulinga Kulya chaMwata chaChingoloshi vyashindakanyine halizavu lyavatu vamwe vaze vapwa “mikoko vavandende.” Lizavu kana lyaputukile navaposetolo jenyi vakushishika vaze apwile navo hamwe mukapete. Vatu kana vakiko navakatambula vihela mwilu hamwe naYesu. w24.12 11 ¶9-10

Yesu vamusolwele, nakumukasa, nakumwamba mazu akasautu, nakumuvangijikila nakumuyanjisa. Maswalale vamutwalile kuchihela chakujihila vatu, kaha vamupapalilile hachitondo. Halwola Yesu vapwile nakumuyanjisa kwapwile mutu umwe uze apwile nakwivwa kukola chikuma kumuchima. Mutu kana shina Yehova Kalunga. Kazachishile ngolo jenyi nakuyovola Yesuko. Uno chuma muka chamulingishile echelele Mwanenyi ayande mujila kaneyi? Chuma kana shina, zangi. Kulisuula chaYesu chahana unjiho wakusolola omwo Yehova amizanga. Alisuwile chikuma nakwivwa kukola chikuma mangana amilwile kushili nakukufwa. (Yowa. 1, 4:​9, 10) Chikupu vene, asaka tuvosena mutu himutu afungulule shili. w24.08 6 ¶13-14

Kachi nge natushinganyeka hakukola evwile Yehova hakusuula mwanenyi kwiza nakutufwila, kaha nachitukafwa tutachikize kanawa ngwetu Yehova atuzanga. Satana amba ngwenyi kakweshi ngamba yaKalunga uze nahase kutwalaho lika kupwa wakushishika kachi nge ali nakumona ukaluko. Hakusaka Yehova asolole ngwenyi Satana ahanjikile vyuma vyamakuli, etavishile Yesu ayande shimbu kanda afwenga. (Yopa 2:​1-5) Yehova apwile nakumona omu Yesu vamutolekelenga kuli vaka-kole vamukwitava, nomu vamulipwilenga vikote kuli maswalale, nakumupapalila hachitondo. Kufumaho, Yehova amwene omu Mwanenyi uze azanga chikuma vamujihile mujila yayipi. (Mateu 27:​28-31, 39) Yehova apwile nangolo jakuhonesa vyuma kana. (Mateu 27:​42, 43) Oloze nge Yehova alingile ngocho kachi kakwatwama ndando yakusokolako, kaha nawa kachi katwatwama nalutalililoko. Shikaho Yehova echelelele Mwanenyi ayande palanga nakukufwa. w25.01 22 ¶7

HaNyisane 16, 33 C.E., tumbaji twaYesu valishonene chikuma, kaha nawa vapwile muchiwomawoma. Tumbaji vavali vapwile nakufuma kuYelusalema nakuya kuEmau. Vaze malunga vavali valiwanyine namutu uze kavatachikijileko, kaha vaputukile kuya nenyi hamwe. Tumbaji vaputukile kulweza uze mutu kupihya vevwile mwomwo yakufwa chaYesu. Kaha uze mutu aputukile kushimutwila navo. “[Aputukilile] vene kuMazu aMose naMazu aVapolofweto vosena,” nakuvalumbunwina ovyo Meshiya atelelele kuyanda nakufwa. Omu vahetele kuEmau, uze mutu vawanyine alilumbunwine ivene ngwenyi ikiye Yesu uze nasanguka. (Luka 24:​13-35) Yesu asolokelenga mapapa kakavulu kuli tumbaji twenyi hamakumbi 40 amakumishilo hano hamavu. Halwola kana, vaka-kukavangiza Yesu vaze valishonene nakwivwa woma, vapwile jino vakuwahilila, nakumika, nakupwa vakuhamuka hakupwa vaka-kwambulula mujimbu waWangana kaha nawa vaka-kunangula. w24.10 12 ¶1-3

Kukola chamutu kumujimba cheji kulijilanga chivene. Oloze kukola chamutu kushipilitu kachalijila chiveneko. Chakutalilaho, vaka-Kulishitu muKolinde vetavilile mujimbu wamwaza, kaha vavambapachishile nakutambula shipilitu yajila. Kaha nawa, vanganyalile kuvyuma avanangwilenga kaposetolo Paulu. (Vili. 18:​8-11) Chipwe ngocho, vamwe vatwalileho lika kupwa vakemba kushipilitu, nomu mwahichile myaka yayivulu hanyima yakuvambapachisa. (Koli. 1, 3:2) Hakusaka tukule kushipilitu, twatela kuvangila kupwa namuchima wakufwila kuhya kushipilitu. Vaze vazanga “kutwama chakuzeneka chinyingi,” kaha nawa vasaka kutwalaho lika kupwa vakemba kushipilitu, kavakolako. (Vishi. 1:22) Etu katwasaka kupwa ngana mwavatu vaze vanakolo kumujimba, oloze chivatwalaho lika kupendamina hali visemi javo, hakusakula vyakulingako. Oloze twasaka kukilikita etu vavene mangana tukule kushipilitu. Shikaho, nge muli nakukilikita mangana mukule kushipilitu, kaha lombenu Yehova mangana amihane “muchima wakufwila kulinga vyuma nangolo jakulingamo nawa.”—Fwili. 2:13. w24.04 4 ¶9-10

Yehova atulweza omwo eji kwivwanga kutalisa kujila eji kusopeselangamo vatu. (Ezeke. 33:11) Yehova keshi kunongesa vatu hahaze vene kaha nawa haya myakako. Yehova azala nakeke kaha nawa eji kusololanga keke kana kala heshoho nasakila. Vyuma muka vize twatachikiza kutalisa kuvatu vaze kaveshi kukasangukako? Mbimbiliya yatulweza vyavindende kaha. Yesu asolwele hatoma ngwenyi Yuta Isakalyote kaveshi kukamusangulako. (Mako 14:21; talenu nawa Yowano 17:12 nachishina chakulinangula muMbimbiliya yakulinangula yaChingeleshi.) Yuta alikangile kuli Yehova nakuli Yesu, chakufuma kumuchima. (Talenu Mako 3:29 navishina vyakulinangula muMbimbiliya yakulinangula yaChingeleshi.) Chochimwe nawa, Yesu ahanjikile kutalisa kuli vatwamina vamukwitava vaze valikangile kuli ikiye ngwenyi, nge vanafu kaha kaveshi kukasangukako. (Mateu 23:33; talenu Yowano 19:11 nachishina chakulinangula muMbimbiliya yakulinangula yaChingeleshi, haze vanavuluka ngwavo “the man.”) Kaha nawa kaposetolo Paulu ahanjikile ngwenyi, vaka-kulikanga kuli Kalunga vaze kaveshi kupihilila nakwalumukako navakavanongesa.—Hepe. 6:​4-8; 10:29. w24.05 4 ¶10-11

Nge natutwalaho lika kupandama kuli Yehova, kaha Satana keshi kulinga vyuma vize navitwingisa muponde haya myakako. (Yowa. 1, 3:8) Mukaye kakahya, Yehova mwakatwalaho lika kukinga masepa jenyi vakushishika kuponde yakushipilitu nakukufwa. (Kuso. 21:4) Chapwa hikutokwa chikuma kupwa tuvangeji mumbalaka yaYehova, kulumbununa kulivwisa kuwaha usepa wakukola naikiye haya myaka yosena. (Ezeke. 37:27) Uno vyuma muka twatela kulinga kachi nge tuli nakusaka kutwalaho lika kupwa tuvangeji jaYehova? Kachi nge mutu umwe namisanyika kuzuvo yenyi, namufwila kutachikiza kanawa vyuma ali nakusaka mulinge. Chochimwe nawa, twafwila kutachikiza vyuma asaka Yehova kuli vatu vaze vasaka kutwalaho kupwa vangeji jenyi. Kuzanga Yehova cheji kutulingisanga tuzate nangolo mangana “[tumwivwisenga] kuwaha chikuma.” (Kolo. 1:10) Twatela kutwalaho lika kumwivwa woma. Echi nachitukafwa tulihende kukulinga vyuma vize navimwivwisa kupihya. Shikaho twafwila kupwa ‘vakulinyisa hakutambuka’ naKalunga ketu.—Mika 6:8. w24.06 4 ¶8-9

Yehova alwezele Apalahama ahane mwanenyi Isaka kupwa wana. Chikupu vene, Apalahama evwile kukola kumuchima hakumulweza alinge chuma chize kashinganyekeleko. Chipwe ngocho, alizangile kulinga vyuma vamulwezele. Oloze omu apwile kwakamwihi nakujiha mwanenyi, Kalunga amukanyishile. Chipwe ngocho, echi chapwa hichakutalilaho chize chanangula vatu vosena vaze vatwama nalufwelelo muchano waulemu uze wasolola nge Yehova alisuwile kuhana Mwanenyi uze azangile chikuma mwachimuna wakuvatula. Chuma kana chasolola nge Yehova azanga chikuma vatu. (Kupu. 22:​1-18) Omu mwahichile myaka, vaIsalele vavahanyine lushimbi lwakuhana mawana amavulu mangana vatu jaKalunga vavatomese kujishili javo. (Levi 4:​27-29; 17:11) Mawana kana apwile nakwinyikilako wana waunene, uze naukalwila vatu kujishili javo josena. Vapolofweto jaKalunga vavahwiminyinyine valumbunune ngwavo muka-tanga uze vashikile, uze ejile nakupwa MwanaKalunga wakulipwila, mwakayanda nakumujiha mangana akasokole vatu kushili nakukufwa, kuhakilako vene nayenu.—Isa. 53:​1-12. w24.08 4 ¶7-8

Nge munatange Mbimbiliya, kaha fwilenu kuwana jijila jakuzachishilamo vyuma muli nakutanga. Kachi nge muli nakutanga Mazu aKalunga, kaha lihulisenu ngwenu, ‘Uno ngunahase kuzachisa ngachilihi mujimbu kana oholyapwa chipwe kulutwe?’ Chakutalilaho, achishinganyekenu muli nakutanga mukanda Wavaka-Tesolonyika 1, 5:​17, 18. Hanyima yakutanga eji jivesi jivali munahase kulihulika nakushinganyeka mapapa mweji kulombanga, najila mweji kulombelangamo. Kaha munahase kufwila kusakwilila Yehova havyuma vitatu vize namilingila. Mukalwola kakandende kaha, omwo muli nakushinganyeka havyuma kana, namumona ngwenu munapu vaka-kwivwa, kaha nawa muvaka-kulinga mwaya Mazu aKalunga. Achishinganyekenu omwo munahase kunganyala kachi nge namuzachisa jila kana hakumbi hakumbi nakumijimbu yeka yamuMbimbiliya yize namutanga. Chikupu vene, namupwa muvaka-kulinga mwaya Mazu aKalunga. w24.09 4-5 ¶9-10

Yehova atutenga nauhashi wakulipwila. Numba nge tweji kulivwisanga kuwaha kutambula, oloze tweji kuwahililanga chikuma nge natuhana vakwetu. Tweji kwivwanga kuwaha kachi nge natukafwa vandumbwetu, kaha nawa tweji kuwahililanga kachi nge navatusakwilila. Chipwe ngocho, numba nge mutu uze tunakafwe mwatusakwilila chipwe chiku, oloze yetu natupwa vakuwahilila mwomwo tunatachikiza ngwetu twalingile vyuma vyakwoloka. Tachikizenu ngwenu kala vyeshovyo namuhana, “Yehova nahase [kumihana] vyuma vyavivulu kuhambakana” vize munahane. (Miji. 2, 25:9) Shikaho, Yehova mwamihana vyuma vyavivulu kuhambakana vize namuhana vakwenu. Kaha nawa tweji kuwahililanga chikuma hakutufweta kuli Yehova. Chikupu vene, tutwalenuho lika kulondezeza Setu wamwilu uze apwa muka-kuhana. w24.09 31 ¶20-21

Yehova apwa wakeke, kaha nawa muka-kutetela. (Samu 103:13; Isa. 49:15) Eji kwivwanga kupihya kachi nge vanatwivwisa kupihya. (Zeka. 2:8) Eji kulingisanga chipwenga chachashi etu kupandama kuli ikiye hakupwa Sepa lyetu. (Samu 25:14; Vili. 17:27) Apwa nawa wakulinyisa, mwomwo “eji kunongamanga nakutala melu namavu, eji kukatulanga muka-kukalikiza mulukungu.” (Samu 113:​6, 7) Chikupu vene, naumwe wauchi mwasaka kulitwamina kutohwesa Kalunga ketu wamunene. Tweji kutohwesanga Yehova mwomwo twasaka vakwetu vamutachikize. Vatu vavavulu kavatachikiza muchano hali Yehovako. Mwomwo ika? Mwomwo Satana nelavisa vishinganyeka vyavo hakuhanjika vyuma vyamakuli hali Yehova. (Koli. 2, 4:4) Satana nakunyulanga vatu vashinganyeke ngwavo, Yehova apwa muka-kulinga sambanjinga, katuzakamako, kaha nawa ikiye eji kulingisanga vatu mukaye vayande. Oloze etu twatachikiza muchano hali Kalunga ketu. Shikaho, tukwechi kutokwa chakuhanjika muchano hali Yehova nakukafwa vatu vamutohwese.—Isa. 43:10. w25.01 3 ¶6-7

Mulikulukaji lyamyaka lyakulivanga, vaka-kukundwiza Satana vahanjikilenga vyuma vyamakuli havyakukomwesa alingilenga MwanaKalunga uze apwile wakukupuka. Chakutalilaho, vatwamina vamukwitava valwezelenga vatu ngwavo “muka-kuyula vandemone,” ikiye ahanyinenga ngolo Yesu jakulovola vandemone. (Mako 3:22) Omu Yesu apwile hachitondo chakumuyanjishila, vatwamina vamukwitava vamuvangijikilile ngwavo, nasaula Kalunga ngocho vakunywile vatu mangana vamujihe. (Mateu 27:20) Mukuhita chalwola, omu vaka-kukavangiza Yesu vambulwilenga mujimbu wamwaza, vaka-kole javo “vasowangijile vatu” mangana vayanjise ava vaka-Kulishitu. (Vili. 14:​2, 19) Kaposhi Kakutalila waDecember 1, 1998, ahanjikile kutalisa kuchisoneka chaVilinga 14:2 ngwenyi: “Shikaho, vaze vaYuleya hakole yavo vakanyine mujimbu nakutwala lusongi kuli Vaka-mafuchi eka mangana vemanyine vaka-Kulishitu nakole.” Namakumbi ano, Satana ali nakutwalaho lika “kuhungumwisa vatu vosena hamavu.” w24.04 11 ¶15-16

Kuyoya chamutu chahaya myaka yosena kachapendamina halwola mutu mwafwako. Yehova apwa Muka-kuyula wakukupuka, kaha vyuma eji kusakulanga kulinga vyapwa vyakwoloka kaha nawa vyachiyulo. (Samu 33:​4, 5) Twafwelela chikupu ngwetu “Muka-kuyula vaka-mavu vosena” mwakalinga mwakwoloka. Chapwa nawa chakutamo kukukulula ngwetu, kuyoya chamutu chahaya myaka yosena, kacheshi kupendamina kuchihela ali nakuyoyelako. Shikaho nachipwa chakuhenga kukukulula ngwetu Yehova mwakasopesa vatu vavavulu kupwa “vapembe,” mwomwo yakuyoyela kuchihela kuze kavapwile nakutokwa chakwivwilila kumujimbu waWanganako. (Mateu 25:46) Muka-kuyula vaka-mavu vosena eji kuzakamanga vatu kana kuhambakana muze tunahase kuvazakama yetu. Katwatachikiza mujila Yehova mwakalingilamo vyuma haluyando lwaluneneko. Pamo vatu vamwe halwola kana navakapwa nakutokwa chakulinangula hali Yehova nakumufwelela nakupwa kusali yenyi, omu mwakalijilika kumeso avaka-mafuchi osena.—Ezeke. 38:16. w24.05 12 ¶14-15

Vatu jaYehova vasaka kukafwa vakwavo. (Koli. 2, 8:4) Chipwe ngocho, shimbu jimwe chasakiwa kupwa vakuhamuka numba tulinge ngocho. Chakutalilaho, nge kunepuka jita, vakulwane muvikungulwilo veji kumonanga ngwavo vandumbwavo vali nakusakiwa kuvakolezeza nakuvakafwa, chikumanyi kushipilitu nakumujimba. Hakuwana nge vakulwane vazanga ava mikoko, ngocho veji kuhakanga myono yavo muponde mangana vavakafwe. Mulwola lwakufwana ngana, chapwa chachilemu kutwalaho lika kupwa vakulinunga. Kavangizenunga jindongi jakufuma kuOfesi yamutango. (Hepe. 13:17) Vakulwane vatela kuhitulukanga kuswakumwe vyuma vanalongesa kutalisa kukukafwa vatu vali muukalu, kuhakilako vene najindongi jamuliuka jize jahanjika havyuma twatela kulinga nge kunasoloka ukalu. (Koli. 1, 14:​33, 40) Pwenunga vakuhamuka nakuvanguluka. (Vishi. 22:3) Zachisenu uhashi wenu wakushinganyeka. Kanda kulinga vyuma vize naviminehela pondeko. Pendaminenunga hali Yehova. Nahase kumikafwa mangana mukafwe kanawa vandumbwenu chakuzeneka kupwa muponde. w24.07 4 ¶8; 5 ¶11

Mwangana Ndavichi atachikijile Yehova nakupendamina hali ikiye. Ndavichi alombelenga kuli Yehova mangana amukafwe omu vamuhangasanyinenga kuli vaka-kole jenyi kuhakilako vene naMwangana Saulu. Ndavichi ahanjikile ngwenyi, “Yehova ayoya” omu Kalunga akumbulwile kulomba chenyi nakumuyovola. (Samu 18:46) Ndavichi hakuhanjika mazu kana kapwile nakusolola kaha ngwenyi Kalunga kwatwamako. Mukanda umwe wahanjika ngwavo, mazu ahanjikile Ndavichi asolola nge afwelelele Yehova hakupwa “kalunga ou ayoya uze eji kukafwanga vatu jenyi.” Vyuma ahichilemo Ndavichi vyamukafwile atachikize ngwenyi Kalunga ayoya, kaha echi chamukolezezele chikuma atwaleho lika kuzachila Yehova nakumwalisa. (Samu 18:​28, 29, 49) Tunahase kuzachila Yehova natwima kachi nge natukunyuka ngwetu apwa Kalunga ou ayoya. Natupwa nawa nangolo jakutukafwa tumike muvyeseko natumona nakutukunyula tutwaleho lika kuzata nangolo mumilimo yaKalunga. Nachitukafwa nawa tutwaleho lika kupwa masepa jaYehova. w24.06 20-21 ¶3-4

Vyuma muka tunahase kulinangula kumazu akaposetolo Paulu aze asonekelele vaka-Tesolonyika? Nge tunevu mijimbu yize kayalitombwele navyuma twalinangula muMbimbiliyako, chipwe mangwavo akukomwesa, kaha twatela kuzachisa uhashi wetu wakushinganyeka. Muchiyulo chaSoviet Union, vaka-kole jetu vatandakanyishile mukanda uze wapwile namujimbu wasolokele nge unafumu kuchikota chetu. Mukanda kana wakolezezele vandumbwetu vamwe vatunge kalizavu kavo kakulimanyina. Ou mukanda wasolokele nge wamwenemwene. Oloze vandumbwetu vakushishika kavavahungumwishileko. Vamwene ngwavo mumukanda kana muli vyuma vize kavyalita navyuma valinangulako. Namakumbi ano, shimbu jimwe vaka-kole jetu vanahase kuzachisa chinyingi chamakina mangana vatuluwanganyise nakuneha vihandwa mukachi ketu. Ngocho, muchishishisa ‘chakuluwangana washiwashi muvishinganyeka vyetu,’ etu twatela kulikinga etu vavene hakushinganyeka havyuma natwivwa chipwe natutanga nakumona numba nge vinalite namuchano uze twalinangula.—Teso. 2, 2:2; Yowa. 1, 4:1. w24.07 12 ¶14-15

Chuma chachilemu chikuma chize mutu nahase kusakula shina, kulihana kuli Yehova nakupwa mutanga yenyi yavaka-kumulemesa. Yehova asaka vatu vosena valinge chuma kana. Mwomwo ika? Mwomwo asaka valivwise kuwaha kutunga usoko naikiye nakupwa nakutokwa chakukayoya haya myaka. (Lushi. 30:​19, 20; Ngale. 6:​7, 8) Yehova kashinjila vatu vamuzachileko. Eji kwitavisanga mutu himutu alisakwile vyakulinga. Nyi ngachilihi nge muka-Kulishitu wakumbapachisa nahokola jishimbi jaKalunga nakulinga shili yayinene? Kachi nge kapihililile nakwalumukako, kaha vatela kumufumisa muchikungulwilo. (Koli. 1, 5:13) Chipwe ngocho, Yehova asaka ngwenyi mutu kana akinduluke kuli ikiye. Kaha nawa echi chikiko chuma chachilemu chamulingishile ahane ndando yakusokola mangana akonekele jishili javaze navapihilila nakwalumuka. Kalunga ketu wazangi eji kulembelelanga vaka-shili vapihilile nakwalumuka.—Zeka. 1:3; Loma 2:4; Yako. 4:8. w24.08 14 ¶1-2

Halwola luze kaposetolo Yowano asonekele mukanda wamuchitatu, vatu vamwe vaputukile kutandakanyisa kunangula chamakuli nakuneha vihandwa. Chipwe ngocho, vamwe vatwalileho lika “kutambuka mumuchano.” Vononokele Yehova “[na]kutambukanga mwaya jishimbi jenyi.” (Yowa. 2, 4, 6) Ava vaka-Kulishitu vakushishika vevwishile Yowano naYehova kuwaha. (Vishi. 27:11) Vyuma muka natulinangulako? Kupwa vakushishika cheji kunehanga kuwahilila. (Yowa. 1, 5:3) Chakutalilaho, tweji kuwahililanga hakutachikiza ngwetu tunevwisa Yehova kumuchima kuwaha. Yehova eji kuwahililanga hakutumona natukana vyuma vyamukaye nakwitavila muchano. Navangelo mwilu nawa veji kuwahililanga. (Luka 15:10) Nayetu nawa tweji kuwahililanga hakumona omwo vakwetu vanakutwalaho lika kupwa vakushishika. (Teso. 2, 1:4) Kaha omu kano kaye nakakahita, natukasuuluka hakutachikiza ngwetu twapwile vakushishika kuli Yehova numba tuhu kano kaye vapwile nakukayula kuli Satana. w24.11 12 ¶17-18

Lwola lungahi mwatela kumbata hakutachikiza kanawa mutu numba mumulweze ngwenu mwamuzanga? Nge namulusuka kulweza mutu ngwenu mwamuzanga, kaha navamimona ngwavo kamwashinganyeka kanawa shimbu kanda musakule vyakulingako. (Vishi. 29:20) Kaha nawa nge namushimbula kulweza mutu ngwenu mwamuzanga, chikumanyi uze natachikiza ngwenyi munamuzange, kaha vanahase kumimona ngwavo mweji kulangisanga chikuma hakusakula vyakulinga. (Kwambu. 11:4) Anukenu ngwenu, shimbu kanda mulweze mutu ngwenu mwamuzanga, kamwatela kukunyuka ngwenu namwingila nenyi muuloko. Oloze mwatela kukunyuka ngwenu munalizange kwingila muulo, kaha nawa mutu uze munawane natemo kupwa muka-mahyenu. Namulinga ngachilihi nge munamono ngwenu kuli mutu ali nakusaka kumitachikiza kanawa? Kachi nge munamono ngwenu kamweshi nakusaka kulisesembwa namutu kanako, kaha mulwezenu hatoma kuhichila muvyuma namulinga. Nachipwa chakuhenga kulingisa mutu ashinganyeke ngwenyi muli nakusaka kulisesembwa okunyi chiku.—Efwe. 4:25. w24.05 22-23 ¶9-10

Vawavisa vamwenemwene vakushishika vakiko kaha navakatambula kuli Yesu muWangana wamwilu. Sololenu ngwenu mwapwa muvakutona. Vawavisa vaze kaveshi kupwa vakuvanguluka kushipilituko kaveshi kukavakungulwila hamwe ‘navaze vasakulako.’ (Mateu 24:31) Shikaho, vatu jaKalunga vosena chamokomoko nalutalililo lwavo, vatela kumona mazu ahanjikile Yesu kutalisa kukupwa vakutona nakupwa vakushishika, kupwa himazu akuhuhumuna. Hakuwana nge tunatachikiza jino kanawa Yehova, ngocho twatela kufwelela jila yenyi yakusopeselamo vatu. Katwalizakaminako kachi nge Yehova nasakula kuwavisa vatu vamwe vakushishika mumyaka yakalinwomu. Tweji kwanukanga vyuma ahanjikile Yesu hali vaka-kuzata vaze vayile nakuzata muwande wamivinyo haola yakusokesa 11. (Mateu 20:​1-16) Vaze vayile nakuzata muwande wamivinyo mukukotokela, vatambwile fweto yoyimwe navaze valivangile. Chochimwe nawa, chamokomoko nalwola mutu vamuwavishile, vosena navakatambula fweto mwilu kachi nge navatwalaho lika kupwa vakushishika. w24.09 24 ¶15-17

Yesu atuhana chakutalilaho chamwaza kutalisa kuvyuma twatela kulinga kachi nge vanatulingi mwamupi. Achishinganyekenu omu vamulingilenga mwamupi kuli vausoko wenyi nakuli vatu veka. Vausoko wenyi vaze kavapwile vaka-kwitavako vamwambilenga ngwavo nazaluka, kaha vatwamina vamukwitava vamwambilenga ngwavo ali navandemone, maswalale javaLoma nawa vamusawilenga nakumuveta, kaha kutwala muze vamujihile. (Mako 3:​21, 22; 14:55; 15:​16-20, 35-37) Chipwe ngocho, Yesu omikile muvyuma vyosenevi, chakuzeneka kulinga sambanjinga. Vyuma muka natulinangula kuchakutalilaho chenyi? (Petu. 1, 2:​21-23) Yesu atusela chakutalilaho chamwaza kutalisa kuvyuma twatela kulinga kachi nge vanatulingi mwamupi. Atachikijile lwola lwakuhola kulu nalwola lwakuhanjika. (Mateu 26:​62-64) Shimbu jimwe aholelenga kulu nge vatu vanamuvangijikila. (Mateu 11:19) Kaha nge nakumbulula kuvyuma vimwe, kaha kahanjikilenga nakasautu kuli vaka-kumuyanjisa chipwe kuvevwisa womako. w24.11 4-5 ¶9-10

Achishinganyekenu munahane mutu mwazanga wana wamwaza chikuma uze nawa unahase kumukafwa mukuyoya chenyi. Munahase kwivwa kupihya chikuma kachi nge mutu kana mwambata uze wana nakuuhaka muchikasha nakuhona kushinganyeka hawana kana. Kaha nawa namuwahilila kachi nge mutu kana mwazachisa kanawa wana kana nakumisakwilila hawana kana. Uno echi chakutalilaho chinalikwatasana ngachilihi nawana uze Yehova atuhana wakutuma Mwanenyi? Yehova eji kwivwanga kuwaha kachi nge natusolola kusakwilila chetu hawana wakulipwila uze atuhana nahazangi yenyi yize yamulingisa atuhane ndando yakusokola. (Yowa. 3:16; Loma 5:​7, 8) Mukuhita chalwola, tunahase kulitwamina kumona wana wandando yakusokola kupwa hiwana wakulipwila. Echi chinafwane nge kuhaka ou wana waKalunga muchikasha. Twapwa vakuwahilila hakupwa nawana kana. Oloze nge katwazangamineko, tunahase kuhombwanyisa wana kana. Hakusaka chuma kana chihone kusoloka, twatela kuzata nangolo mangana tutwaleho lika kusakwilila Kalunga naKulishitu havyuma vatulingila. w25.01 26 ¶1-2

Ndumbwetu walunga uze natemo kupwa mukulwane muchikungulwilo katela kupwa wamuhya mukwitavako. Numba tuhu kamwatela kumbata myaka yayivulu kufuma haze vamimbapachishileko, oloze mwasakiwa lwola numba mupwenga muvaka-Kulishitu vakuhya. Shimbu kanda vamitongole kupwa vakulwane muchikungulwilo, mwatela kusolola ngwenu mwapwa muvakulinyisa, kaha nawa mwasuuluka kuvandamina Yehova amihane kala mulimo, ngana muze alingile Yesu. (Mateu 20:23; Fwili. 2:​5-8) Munahase kusolola ngwenu mwapwa muvakushishika hakulipanjika kuli Yehova nakukavangiza jishimbi jenyi jakwoloka, nakukavangiza jindongi jakufuma kuliuka lyenyi. Visoneka vyasolola hatoma ngwavyo tulama vatela kutamo kunangula vakwavo. Uno echi chalumbununa nge kuvanga mupwenga muvaka-kunangula vamwenemwene kumeso avatu tahi? Nduma. Numba tuhu vakulwane vavavulu muchikungulwilo kavapwa vaka-kuhanjika kanawa vihandeko, oloze vapwa vaka-kunangula vamwenemwene mumulimo wakwambulula, kaha nawa vakwechi uhashi wakuya nakufunga vandumbwavo. w24.11 23-24 ¶14-15

Kachi nge munawane mujimbu muMbimbiliya uze kamwevwishishile kanawako, kaha hehwojolenu. Kaha likumbi lyosena hunananenu havyuma vize munawane, navyuma munalinangulako hali Yehova naMwanenyi nahazangi yize vatwama nayo hali enu. (Samu 119:​97, kwinyikila) Kanda kwecha kulinangulako kachi nge kamwawanyine vyuma vyavihya chipwe vize navimivwisa kuwaha omu muli nakutanga chipwe kuhehwojolako. Mujila yachifwanyisa tunahase kuhanjika ngwetu enu munafwane nge mutu uze ali nakutondatonda ulu. Muka-kutonda ulu eji kumbatanga lwola lwaluvulu, chipwe makumbi amavulu numba awane ulu chipwe vene kachihanda kakandende kaulu. Oloze eji kutwalangaho lika kufulyangila mwomwo natachikiza ngwenyi, numba vene kalilolwa kakandende kaulu kapwa kakalemu kuli ikiye. Muchano tweji kulinangulanga muMbimbiliya wapwa waulemu chikuma kuhambakana naulu. (Vishi. 8:10) Shikaho twalenuho lika kutanga Mbimbiliya halwola mwanoneka, nakulinangulayo nakuhehwojola vyuma vyavihya.—Samu 1:2. w25.01 25 ¶14-15

Yehova asaka tukonekelenga vaze veji kutulinganga mwamupi. (Samu 86:5; Luka 17:4; Efwe. 4:32) Tunahase kwivwa kupihya chikuma kachi nge mutu umwe nahanjika chipwe nalingi vyuma vize vinatwivwisa kupihya, chikumanyi nge mutu kana apwa sepa lyetu chipwe muka-tanga yetu. (Samu 55:​12-14) Shimbu jimwe, kukola chize tweji kwivwanga kumuchima, tunahase kuchifwanyisa kukukola chize tunahase kwivwa nge vanatutuvu poko. (Vishi. 12:18) Tunahase kulisolola nge katwevwile kupihyako. Oloze kulinga ngocho nachipwa kwijiva nge vanatutuvu poko nakuyiseza mumbandu. Shikaho, kulisolola nge katwevwile kupihyako kacheshi kutukafwako. Nge mukwetu natulingi mwamupi, pamo hahaze vene tweji kupihililanga. Mbimbiliya yatulweza ngwayo, lwola lumwe tunahase kupihilila. Chipwe ngocho, yatuhuhumuna tuhonenga kupihilila halwola lwalusuku. (Samu 4:4; Efwe. 4:26) Mwomwo ika? Mwomwo kupihilila kachavula kuneha vyuma vyamwazako. (Yako. 1:20) Anukenu ngwenu, kupihilila cheji kulijilanga chivene, oloze tunahase kusakula kutwalaho lika kupihilila. w25.02 15 ¶4-6

Yesu alumbunwine ovyo kachapwila chamangana kulilunjikila jimbongo nakuhona kupwa “naluheto kuli Kalungako.” (Luka 12:​16-21) Naumwe wauchi nahase kutachikiza omwo nachipwa kuyoya chenyi hameneko. (Vishi. 23:​4, 5; Yako. 4:​13-15) Hakupwa tuvaka-kukavangiza Kulishitu, ukalu umwe tweji kuhitangamo wapwa wakulipwila. Yesu ambile ngwenyi, twatela kulizanga “kuseza” vyuma vyetu vyosena numba tupwenga tutumbaji twenyi. (Luka 14:33) Vaka-Kulishitu vamulikulukaji lyamyaka lyakulivanga muYuleya, vapwile vakuwahilila chamokomoko nakuseza vyuma kana. (Hepe. 10:34) Makumbi ano, vandumbwetu vavavulu vanalisuula kuseza milimo yavo mwomwo yakukana kwazana muvihande vyamapolitiki. (Kuso. 13:​16, 17) Uno vyuma muka vinavakafwenga valinge ngocho? Vafwelela chikuma lushiko avashika Yehova lwakwamba ngwenyi: “Kangweshi kukakusezako, kangweshi kukakumbilako.” (Hepe. 13:5) Chapwa chamwaza kulizangila chimweza nakupwa navyuma vyakulikafwa navyo kulutwe, kaha nge ukalu naukeza mukukasumuna twatela kufwelela ngwetu Yehova mwatukafwa. w25.03 29 ¶13-14

Yehova asaka vakwetu vatukafwe tukule kushipilitu. Vaze vapwa tufunga kaha nawa vaka-kunangula muchikungulwilo chavaka-Kulishitu, valizanga kutukafwa tupwenga ‘vakukola lyehi’ kushipilitu, “nakuheta kuseteko yachivuvu chakuzala chize aheteleho Kulishitu.” (Efwe. 4:​11-13) Yehova atuhana nawa shipilitu yajila mangana yitukafwe tupwenga “navishinganyeka vyaKulishitu.” (Koli. 1, 2:​14-16) Kaha nawa, Kalunga ahwiminyinyine vatu vasoneke Mikanda yaMujimbu Wamwaza yiwana mangana asolole omu Yesu ashinganyekelenga, nakuhanjika, nakulinga vyuma omu apwile hano hamavu. Shikaho munahase kukula kushipilitu, hakulondezeza mujila Yesu apwile nakushinganyekelamo nakulingilamo vyuma. Oloze hakusaka tukule kushipilitu, katwatela kutachikiza kaha “kunangula chamaputukilo chakuvuluka Kulishituko,” kulumbununa kunangula chamaputukilo chavaka-Kulishitu. w24.04 4-5 ¶11-12

Hakumbi hakumbi twasakiwa kusakula vyakulinga. Kaha vyuma vimwe tweji kusakulanga vyapwa vyavyashi, vyakufwana nge kusakula vyakulyaula nachimene chipwe kusakula lwola lwakuya nakusavala. Kaha vyeka nawa vyapwa vyavikalu kuvisakula. Vyuma natusakula vinahase kukwata hakulikangula chetu, nahakuwahilila chetu, nahavatu twazanga chipwe hakulemesa chetu. Twasaka vyuma natusakula vitunganyalise etu natanga yetu. Chachilemunyi shina, twafwila kusakula vyuma vize navivwisa Yehova kuwaha. (Loma 12:​1, 2) Chuma chachilemu nachimikafwa musakule kanawa vyakulinga shina kuwana mashina namasongo. Mwomwo ika chapwila chachilemu? Achishinganyekenu muveji nalweze ndotolo ngwenyi ali nakuviza. Kutala ndotolo nahase kusakula kuputuka kuka ou muveji chakuzeneka kumupima chipwe kumuhulisa vihula tahi? Tunafwelela keshi kulinga ngochoko. Nayenu munahase kusakula kanawa vyakulinga kachi nge namuvangila kuwana mashina namasongo havyuma muli nakusaka kusakula. w25.01 14 ¶1-3

Vyuma muka twatachikiza kutalisa kumuchima waYehova wakutetela? Uno nasolola ngachilihi ngwenyi “kazanga mutu numba umwe akanongeko”? (Petu. 2, 3:9) Talenu omwo asolwele muchima wenyi wakutetela kuvatu vaze valingile shili yayinene. Mwangana Ndavichi alingile jishili jajinene. Chakutalilaho alingile ukoji nakumwanga manyinga. Oloze Ndavichi apihililile nakwalumuka, kaha Yehova amutetelelele nakumukonekela. (Samwe. 2, 12:​1-12) Mwangana Manase apwile wakuhuka chikuma mukuyoya chenyi. Numba tuhu ou lunga apwile wakuhuka chikuma, oloze Yehova amwivwililile keke, nakumukonekela omu apihililile nakwalumuka. (Miji. 2, 33:​9-16) Vyakutalilaho kana vyeji kutwanukisanga nge Yehova eji kusololanga muchima wenyi wakutetela heshoho namwena ngwenyi chinatemo kulinga ngocho. Shikaho, mwakasangula vatu kana mwomwo vamwene ngwavo valingile shili yayinene chikuma, kaha vapihililile nakwalumuka. w24.05 4 ¶12