June

Oholyapwa tuli nakunganyala kundando yakusokola yaKulishitu. Chakutalilaho, Yehova eji kutukonekelanga jishili jetu mwomwo yandando kana. Numba tuhu katelelele kutukonekelako, oloze afwila kutukonekela. Muka-kwimba jisamu asakwililile Yehova hakumukonekela. (Samu 103:​3, 10-13) Vatu vamwe vanahase kushinganyeka ngwavo kavatamo kuvakonekela kuli Yehovako. Tachikizenu ngwenu, tuvosena katwatamo kutukonekelako. Kaposetolo Paulu atachikijile chishina kana, kaha ahanjikile ngwenyi: “Kangwatelemo kunguvuluka ngwavo kaposetoloko.” Kaha ambile nawa ngwenyi: “Halikoji lyalinene lyaKalunga hakiko ngunapwila nge omu nguli.” (Koli. 1, 15:​9, 10) Yehova mwatukonekela kachi nge tunapihilila nakwalumuka. Mwomwo ika? Mwomwo Yehova atuzanga, keshi nge mwomwo twatamo kutukonekelako. Kachi nge muli nakulivwa kupwa vamokomoko, kaha anukenu ngwenu, Yehova ahanyine ndando kana kuli vaka-shili vaze navapihilila nakwalumuka, keshi kuli vatu vakukupukako.—Luka 5:32; Chimo. 1, 1:15. w25.01 26-27 ¶3-4

Katweshi nangolo havyuma navahanjika vakwetu chipwe vize navalingako, oloze tukwechi ngolo jakutachikiza mwakulingila nge vanatwivwisa kukola kumuchima. Jila yamwaza yakuliwilamo vyuma vanatwivwisa kupihya shina kukonekela. Mwomwo ika? Mwomwo etu twazanga Yehova, kaha nawa asaka tupwenga vaka-kukonekela. Nge natutwalaho lika kupihilila nakuhona kukonekela vakwetu, chinahase kutulingisa tusakule kulinga vyuma vyauleya, kaha nawa pamo chinahase kutuvijisa. (Vishi. 14:​17, 29, 30) Nge natumbila matoto, kaha nachitukafwa tuhone kuviza muchima mwomwo yakupihilila. Nachitukafwa nawa tulinge vyuma vize navitunganyalisa nakuhona kushinganyeka havyuma vyavipi vanatulingi, nakulivwisa cheka kuwaha kuyoya. Munahase kuhonesa ngachilihi muchima wakupihilila? Jila yimwe shina kulihana lwola lwakuunjisa muchima. Chakutalilaho, nge mutu navulumuka muponde, eji kumbatanga lwola numba ayoye, numba tuhu vali nakumuhana vitumbo. Chochimwe nawa, nayetu nge tunapihilila, twatela kulihana lwola lwakuunjisa muchima shimbu kanda tukonekele mutu namuchima wakusuuluka. (Kwambu. 3:3; Petu. 1, 1:22) Lombenu Yehova amikafwe mupwenga namuchima wakukonekela. w25.02 16-17 ¶8-11

Chakutalilaho, kunangula chimwe chamaputukilo shina kupihilila nakwalumuka, nalufwelelo, nalumbapachiso, nakusanguka. (Hepe. 6:​1, 2) Echi hikunangula chimwe chamaputukilo chize vaka-Kulishitu vosena vafwelela. Echi chikiko kaposetolo Petulu ahanjikilile vyuma kana omu ambulilile liyongomena haPendekoseta. (Vili. 2:​32-35, 38) Ngocho twatela kwitavila kunangula kanechi chamaputukilo, mangana tupwenga tutumbaji twaKulishitu. Chakutalilaho, Paulu ahanjikile ngwenyi weshowo mwakana kunangula chakusanguka, kaha ali nakukana vyuma vyosena vafwelela vaka-Kulishitu. (Koli. 1, 15:​12-14) Chipwe ngocho, katwatela kusuuluka kaha nachinyingi chamuchano wamaputukiloko. Kunangula chamaputukilo chalihandununako nakulya chakutafunya chakushipilitu, mwomwo kulya kana chapwa jishimbi jaYehova najindongi jenyi jize jeji kutukafwanga tutachikize vishinganyeka vyenyi. Shikaho twatela kulinangulanga Mazu aKalunga nakuhunananangaho, nakukavangiza vyuma tunalinangula mangana tunganyale kukulya kana. Nge natulinga ngocho kaha natusakula vyuma vyakulinga vize navivwisa Yehova kuwaha. w24.04 5 ¶12-13

Kalunga alwezele Yona ngwenyi vaka-Nyineve kavatachikijile “kuhandununa vyuma vyamwaza navyevi vyavipiko.” (Yona 1:​1, 2; 3:10; 4:​9-11) Kutwala muze, Yesu azachishile chakutalilaho kana mangana anangule hachiyulo chakwoloka chaYehova nakutetela chenyi. Uno vaka-Nyineve ‘navakasangukila’ ‘kukusopesa’ muka? Yesu anangwile ngwenyi kulutwe nakukapwa vatu “navakasangukila kukuvasopesa.” (Yowa. 5:29) Apwile nakutalisa kuchiyulo chenyi chamyaka 1,000, muze navakasangukila “vaka-kwoloka navaka-kuhenga.” (Vili. 24:15) Vaka-kuhenga ‘navakasangukila kukuvasopesa.’ Kulumbununa nge Yehova naYesu navakakekesa kanawa vilinga vyavo, mangana vakamone omu navakakula kuvyuma navakalinangula. Nge vaka-Nyineve vaze navakasanguka navakakana kulemesa chamuchano, kaha navakavanongesa. (Isa. 65:20) Oloze vosena vaze navakasakula kulemesa Yehova nakashishi navakapwa nakutokwa chakukayoya haya myaka yosena.—Ndanye. 12:2. w24.05 5 ¶13-14

Muchima waYesu wakeke wasolwele omu apwa Ise uze apwa muka-kutetela. (Yowa. 14:9) Vyuma ahanjikilenga navilinga vyenyi, vyasolwele hatoma nge Ise uze apwa muka-kutetela kaha nawa wakeke azanga vatu. Kaha asaka kukafwa mutu himutu afungulule shili. Yesu asakile kukafwa vatu valumuke kujijila javo nakumukavangiza. (Luka 5:​27, 28) Yesu atachikijile vyuma navikamusolokela kulutwe. Alwezele vaka-kumukavangiza mapapa kakavulu ngwenyi, navakamusolola nakumujiha hachitondo chakumuyanjishila kuli vaka-kole jenyi. (Mateu 17:22; 20:​18, 19) Atachikijile ngwenyi kufwa chenyi nachikafumisa shili mukaye. Yesu anangwile nawa ngwenyi, hanyima yakuhana kuyoya chenyi, mwakakoka “vatu vakulisezaseza vosena vakeze kuli” ikiye. (Yowa. 12:32) Vatu vakuhona kukupuka navevwisanga Yehova kuwaha, nakwitavila Yesu kupwa Mwata wavo nakukavangizanga mujitambo jenyi. Kulinga ngocho, nachivalingisa vapwenga “vakulihehwa kushili.” (Loma 6:​14, 18, 22; Yowa. 8:32) Shikaho Yesu omikile nakulisuula kuhana kuyoya chenyi.—Yowa. 10:​17, 18. w24.08 5 ¶11-12

Achishinganyekenu omu mwevwile halwola lwatete mwalinangwile muchano wamuMazu aKalunga. Mwalinangwile ngwenu, Senu wamwilu amizanga, kaha asaka mupwenga mutanga yavaka-kumulemesa, kaha nawa amishika ngwenyi mwakafumisako ukalu wosena nakuyanda muli nakumona. Mwalinangwile nawa vyalutalililo lwakukamona vatu vaze mwazanga vaze navakasanguka mukaye kakahya, navyuma vyeka vyavivulu. (Mako 10:​29, 30; Yowa. 5:​28, 29; Loma 8:​38, 39; Kuso. 21:​3, 4) Muchano kana wamihetele chikuma kumuchima. (Luka 24:32) Mwazangile vyuma mwalinangwile, kaha mwafwililile kulwezako vakwenu muchano kanou waulemu. (Esekesenuko Yelemiya 20:9.) Nge natuzanga vyuma tunalinangula muMbimbiliya, kaha natufwila kuvilwezako vakwetu. (Luka 6:45) Tweji kwivwanga ngana muze vevwile tumbaji twaYesu vamulikulukaji lyamyaka lyakulivanga vaze vambile ngwavo: “Katweshi kuhasa kulitwamina kuhanjika vyuma tunamono nakwivwako.” (Vili. 4:20) Hakuwana nge twazanga chikuma muchano wamuMbimbiliya, ngocho tweji kufwilanga kulwezako vatu vavavulu muchano kana. w24.05 15 ¶5; 16 ¶7

Etu vatu jaYehova tweji kwambulilanga vakwetu mujimbu wamwaza, mwomwo twazanga Setu wamwilu nakusaka nawa kukafwa vakwetu vamutachikize. Oloze vamwe cheji kuvakaluhwilanga kulivwisa kuwaha kuzata mulimo wakwambulula. Mwomwo ika? Vamwe vatwama chikuma nasonyi kaha nawa kavalifwelelako. Veka nawa cheji kuvakaluhwilanga kuya hamembo ambala kachi nge kavavasanyikileko. Vamwe veji kulizakaminanga ngwavo kaveshi kuvevwililako. Vamwe pamo vavanangula ngwavo kavatela kwivwisanga vakwavo kupihyako. Ava vandumbwetu cheji kuvakaluhwilanga kwambulula mujimbu wamwaza kuvatu vaze kavatachikizako. Kutala nayenu cheji kumikaluhwilanga kupwa vakuwahilila mumulimo wamuwande mwomwo yavyuma tunavuluka tahi? Nge mukiko, kaha kanda kuhombako. Muchima wenu wakuhona kulifwelela unahase kusolola nge mwapwa vakulikehesa kaha nawa kamwasaka vatu vahake mangana kuli yenuko, kaha kamwasaka kulipula jipami navakwenuko. Kaha nawa twatachikiza ngwetu vatu vosena vasaka kuvevwilila, chikumanyi nge vali nakulingila vakwavo vyuma vyamwaza. Shikaho tachikizenu ngwenu, Senu wamwilu atachikiza kanawa ukalu muli nakuhitamo, kaha nawa asaka kumikafwa.—Isa. 41:13. w24.04 14 ¶1-2

Kachi nge muli nakutanga Mbimbiliya, muchishishisa chakufwila kuzachisa vyuma vyosena namutanga halwola lwolumwe, litomenenu kulinga vyuma vimwe vize namutesamo. Munahase kweseka jila yino: Esekenu kusoneka vyuma muli nakusaka kuzachilaho, kaha sakulenu chuma chimwe chipwe vivali vize namusaka kuzachilaho chatete, nakuseza evi vikwavo mangana mukavitesemo kulutwe. Jino namuputukila halihi? Munahase kulitomena kuputuka nachuma chize munahase kutesamo. Chipwe pamo munahase kusakula kuzachila hachuma chize munamono ngwenu, chikiko mwatela kuzachilaho chikuma. Nge munawane lyehi chuma munakusaka kuzachilaho, kaha hehwojolenu kuzachisa mikanda yetu. Lombenu Yehova kutalisa kuvyuma munakusaka kutesamo mangana amihane “muchima wakufwila kulinga vyuma nangolo jakulingamo nawa.” (Fwili. 2:13) Kufumaho, zachisenu vyuma munalinangula. Nge munatesamo lyehi chuma mwalitomenanga kulinga chatete, kaha nachimikunyula mutesemo nachikwavo nawa. Tachikizenu ngwenu nge namufwila kuzachila havilinga vyachiyoyelo chauKulishitu chipwe hamihako yimwe yavaka-Kulishitu, kaha nachimyashiwila kuzachila nawa havyuma vyeka. w24.09 6 ¶13-14

Munahase kuhomba mwomwo yavyuma mwalingile kunyima vize vyevwishile vakwenu kupihya. Uno vyuma muka navimikafwa? Zatenu nangolo mangana muwahise vyuma, kahechi chasakiwa nakulomba lukonekelo. Lombenu Yehova akafwe vaze vevwile kupihya kumuchima mwomwo yavyuma mwalingile. Nahase kumikafwa nakukafwa nawa vakwenu vaze vevwile kumuchima kupihya mangana mutwaleho lika kupwa nalukakachila nakutwama mukuunda. Linangulenu kuvyuma mwalimbenjele nakwitavila Yehova amizachise mukala jila mwasakula. Talenu hachakutalilaho chakapolofweto Yona. Yehova amulwezele ayenga kuNyineve, oloze ikiye achinyine nakuya kuchihela cheka. Ngocho Yehova amuzangamishile, kaha Yona alinangwile kuvyuma alimbenjele. (Yona 1:​1-4, 15-17; 2:​7-10) Yehova kalitwaminyinyine kuzachisa Yonako. Amulwezele cheka kuya kuNyineve, kaha hahaze vene Yona ononokele Yehova. Shikaho, Yona kaliveyele havyuma alimbenjele kunyima nakumulingisa ahone kwitavila mulimo amuhanyine Yehovako.—Yona 3:​1-3. w24.10 8-9 ¶10-11

Yehova eji kujimbangananga jishili jetu. Nge mukuli vanaujimi, tunahase kushinganyeka hamutu uze nafunjika mufunda halipapilo vasoneka jimbongo twakongwele. Chipwe ngocho, vatu vanahase kumona jinambala jakusolola jimbongo twakongwele. Oloze kujimbangana kachapwa ngochoko. Hakusaka twivwishise kanawa chifwanyisa kana, anukenu ngwenu kushikulu ulombo uze vazachishilenga hakusoneka, wapwilenga wawashi kuufumisa nameya. Mutu nahase kuzachisa kalihina kakuzova nakujima jinambala. Shikaho, nge mukuli ‘vanaujimbangana,’ kaha kaweshi kupwako chekako. Vatu kavamwenenga cheka vyuma vasonekeleho hakavangako. Chapwilenga kwijiva nge kakwapwile namukuliko. Chikupu vene, cheji kutuvendejekanga hakutachikiza ngwetu Yehova eji kujimanga jishili jetu nakujijimbangana josena.—Samu 51:9. w25.02 10 ¶11

Kachi nge vakwetu vanatulingi mwamupi, twatela kufwelela ngwetu Yehova natachikiza muchano. Echi chinahase kutukafwa tumike nge vanatulingi mwamupi mwomwo twatachikiza ngwetu Yehova mwakolola vyuma. Kuseza vyuma mumavoko aYehova nachitukafwa tuhone kulama koko nakuhona kutwalaho lika kupihilila. Kulama koko nakutwalaho lika kupihilila nachitulingisa tuhone kupwa vakuwahilila nakwenyeka usoko wetu naYehova. Hakuwana nge yetu vatu katwakupukako, ngocho katweshi kuhasa kulondezeza Yesu muvyuma vyosenako. Shimbu jimwe tunahase kulinga chipwe kuhanjika vyuma vize natukaliveya kulutwe. (Yako. 3:2) Tunahase kutwalaho lika kwivwa kukola kumuchima havyuma vimwe navatulinga vakwetu, nakuhona kuvivulyama. Nge mukiko chili nakuli yenu, kaha ijivenu ngwenu Yehova natachikiza ukalu muli nakuhitamo. Kaha naYesu uze valingilenga mwamupi, natachikiza kanawa omu muli nakwivwa. (Hepe. 4:​15, 16) Twatokwa chikuma hakuwana nge Yehova atuhana jindongi jize jeji kutukafwanga tutachikize vyakulinga nge vanatulingi mwamupi. w24.11 6 ¶12-13

Mutu asakiwa kufwelela muli Yesu numba akapwe “nakuyoya chahaya myaka yosena.” (Yowa. 3:​16-18, 36; 17:3) VaYuleya vavavulu kavetavilile kunangula chaYesu chachihya “[cha]mulimo waKalungako.” Vahulishile Yesu ngwavo: “Chinjikizo muka naulinga mangana tuchimone nakukwitavila?” (Yowa. 6:30) Vahanjikile ngwavo vakakuluka javo vamumakumbi aMose vatambwilenga mana yize tunahase kufwanyisa kumbolo. (Nehe. 9:15; Samu 78:​24, 25) Chikupu vene, vishinganyeka vyavo vyapwile kaha kukwikuchisa majimo avo nambolo ivene. Vahonene kuhulisa Yesu mangana avalumbunwine omu ahanjikile cheka vyakutalisa, “[ku]kulya chamuchano chakufuma mwilu” chize chapwile nge mana yakufuma mwilu yize yahanyinenga kuyoya kuvatu. (Yowa. 6:32) Ava vaYuleya vahakile kaha mangana kukufwila chamujimba, chize chavalingishile vahone kuhaka mangana kumuchano uze Yesu apwile nakuvalweza. w24.12 5-6 ¶10-11

Omu mwanenu mwalinangula vyavivulu kushikola, mwawana jino ngwenyi, kwatwama lushimbi luze lweji kutwaminyinanga vyuma vyosena vyakutenga. Chakutalilaho meya akale, eji kulitunganga kweseka navihanda vyakulijingajinga vavuluka ngwavo fractals. Evi vihanda vyatwama nawa muvyuma vikwavo vyakutenga. Oloze tunahase kulihulisa ngwetu, iya ahakileko jishimbi jize jeji kutwaminyinanga vyuma vyakutenga? Kaha iya atengele vyuma kana? Omu mwanenu mwashinganyeka havihula kana, kaha nachimukafwa akunyuke ngwenyi Kalunga ikiye atengele vyuma vyosena. Halwola lukwavo nawa munahase kuhulisa mwanenu chihula chino ngwenu, “Nge Kalunga ikiye atutengele kutala kacheshi kupwa chakutamo kukulula ngwetu ikiye nawa atuhana jishimbi jenyi jakwoloka jakutulingisa tupwenga vakuwahililako tahi?” Kufumaho, munahase kuvulukako jindongi jimwe jatwama muMbimbiliya jize jeji kutulingisanga tupwenga vakuwahilila. w24.12 16 ¶8

Kaposetolo Paulu vamuhwiminyinyine kuli Kalunga asonekele chikungulwilo ngwenyi, muka-shili uze kapihililile nakwalumukako, vatela kumufumisa muchikungulwilo. (Koli. 1, 5:13) Uno vaka-Kulishitu vakushishika vatelelele kumona ngachilihi mutu? Paulu avalwezele ngwenyi ‘valitwamine kulikata’ nenyi. Uno alumbunwine ika? Mulushimbi ahanyine Paulu mwaliwezele nawa ‘kuhona kulya namutu kana.’ (Koli. 1, 5:11) Kulya vyakulya namutu cheji kulingisanga vatu valikate namutu kana. Shikaho Paulu alumbunwine ngwenyi chikungulwilo kachatelelele kulikata namutu kanako. Kulinga chuma kana nachikinga chikungulwilo chihone kupwa navilinga kana. (Koli. 1, 5:​5-7) Kaha nawa kuhona kulikata namutu kana nachimulingisa amone ngwenyi nahanduka chikuma kujijila jaYehova, nakuputuka kwivwa sonyi, nakumulingisa apihilile nakwalumuka. w24.08 15 ¶4-5

Chilika chaLikumbi lyaKulinga Chakufwika haShili vachilingilenga kamwe mumwaka muIsalele. Halikumbi kana, kapilishitu wakulitulaho ahanyinenga wana wachimuna wakuvatula hakwimanyinako vatu. Chipwe ngocho, wana wachimuna wakuvatula kawahashile kukumisa jishili javatu josenako mwomwo vimuna vapwa vakukuminamo hakuvesekesa kuvatu. Oloze Yehova alisuwilenga kuvakonekela jishili javo kachi nge vaIsalele vaze vapihililile nakwalumuka navahana wana wachimuna wakuvatula, uze Yehova asakilenga. (Hepe. 10:​1-4) Wana kana wakafwile vaIsalele vamone ngwavo vapwile vaka-shili. Chipwe ngocho, Yehova ahakileko jila yakwilila yakukonekelelamo jishili javatu. Alongesele vyuma mangana Mwanenyi azanga vamuhane “kamwe kaha kunahu mangana ambate jishili javatu vavavulu.” (Hepe. 9:28) Yesu ahanyine “mwono wenyi kupwa ndando yakusokola vavavulu.”—Mateu 20:28. w25.02 4 ¶9-10

Yesu ambile ngwenyi, “Shipilitu yinasake vene, oloze mujimba unazeye.” (Mateu 26:41b) Awa mazu ahanjikile Yesu asolola nge atachikiza ngwenyi katwapwa vakukupukako. Oloze mazu kana nawa apwa akutuhuhumuna tulihende kumuchima wakulifwelela etu vavene. Haufuku vene uze, tumbaji twenyi vahanjikile namuchima wakukunyuka ngwavo kaveshi kuseza Mwata wavoko. (Mateu 26:35) Muchima wavo wapwile wamwaza. Oloze kavatachikijile numba nge navahonesa chesekoko. Echi chikiko chalingishile Yesu avahuhumune kweseka namazu ali muchisoneka chalelo. Chaluvinda, tumbaji kavapwile vakutonako. Omu Yesu vamukashile, kutala vapwile lika naikiye nyi vamusezele? Mwomwo yakuhona kuvanguluka, tumbaji valingile chuma chize vambile ngwavo kaveshi kuchilingako. Vachinyine Yesu.—Mateu 26:56. w24.07 14 ¶1-2

VaAlama naEve vajimbalishile usoko wavo naSevo Yehova. Hakavanga Alama naEve vapwilenga mutanga yaKalunga. (Luka 3:38) Oloze omu valikangile kuli Yehova, avahangile mutanga yenyi shimbu kanda vapwenga navana. (Kupu. 3:​23, 24; 4:1) Hakupwa tuvana vavo, ngocho twasakiwa kutuwanyisa kuli Yehova. (Loma 5:​10, 11) Mujila yikwavo twatela kupwa nausoko wamwaza naYehova. Mukanda umwe wahanjika ngwawo, lizu lyachiHelase valumuna ngwavo “kuwanyisa,” linahase kulumbununa “kulingisa muka-kole kupwa sepa lyaKalunga.” Yehova ikiye awanyine jila yakulingilamo ngocho. Mujila muka? Chakufwika hashili hijila yize Yehova ahakako mangana apwenga cheka nausoko wamwaza navaka-shili. Chasakiwile kutambasana chuma chimwe nachuma chikwavo chakulitombola. Ngocho chuma chize chajimbalile, chipwe chize chalyenyekele, chinahase kupwako cheka chipwe kuchishishisa. w25.02 3-4 ¶7-8

Kaposetolo Paulu ambile ngwenyi, “kuzangamisa vanazangamisa mutu wangocho kuli vavavulu chinatemo.” (Koli. 2, 2:​5-8) Mujila yikwavo, apwile nakulumbununa ngwenyi kuzangamisa vazangamishililemo uze lunga alingilenga ujila nanaye wakumulela, chanehele mihako yamwaza. (Koli. 1, 5:1) Mihako muka? Uze lunga apihililile nakwalumuka. (Hepe. 12:11) Paulu alwezele chikungulwilo ngwenyi: “Mwatela kumukonekela namuchima wosena nakumuvendejeka,” kaha nawa ngwenyi “mumusolwele cheka zangi.” Tachikizenu ngwenu, Paulu asakile chikungulwilo chilinge vyuma vikwavo keshi kukumina kaha hakwitavila mutu kana akinduluke havatu jaYehovako. Paulu asakile echi chikungulwilo chisolole ngwacho, chakonekelele ou mutu apihililile nakwalumuka, nakumuzanga kuhichila mumazu avo namuvilinga vyavo. Kulinga ngocho, chasolwele hatoma nge vanamwitavila kukinduluka kuchikungulwilo. w24.08 15 ¶4; 16-17 ¶6-8

Kaposetolo Paulu ahanjikile namuchima wakukunyuka kutalisa kuvyuma vyasakiwa mangana mutu apwenga nalukakachila. Anukishile ava vaka-Kulishitu ngwenyi kavatela kupendamina hangolo javoko, oloze vatela kupendamina hali Yehova. Shikaho Paulu ahanjikile nakumika ngwenyi: “Yehova ikiye muka-kungukafwa, kangweshi kwivwa womako.” (Hepe. 13:6) Muholyapwa ngana vandumbwetu vamwe vali nakumika omu vali nakuvayanjisa. Shikaho tunahase kuvakundwiza hakuvalombelangako, kaha lwola lumwe nawa tunahase kuvakafwa hakuvahanako vyuma vali nakusakiwa. Mbimbiliya yahanjika hatoma ngwayo, “vosena vaze vafwila kuyoya mwaya muchima wakuzachila Kalunga hakulikata naKulishitu Yesu, navakiko navavayanjisanga.” (Chimo. 2, 3:12) Shikaho echi chatela kulingisa etu tuvosena tupwenga vakulizanga havyuma vili nakwiza kulutwe. Tutwalenuho lika kufwelela chikuma Yehova nakukunyuka ngwetu mwatukafwa tumike mukala vyeseko navituwana. Kaha halwola lwakutamo mwakasokola vaka-kumulemesa vakushishika.—Teso. 2, 1:​7, 8. w24.09 13 ¶17-18

Vyuma muka vyakafwile vaka-Kolinde vavambapachise? (Koli. 2, 10:​4, 5) Mazu aKalunga nashipilitu yajila vyavakafwile valumuneko vyuma vimwe mukuyoya chavo. (Hepe. 4:12) Vatu vaze vapwile muKolinde vaze vetavilile mujimbu wamwaza wakuvuluka Kulishitu, vasezele vilinga vyavo vyavipi vyakufwana nge kupenda, nawiji, nakulisavala chavatu vausonyi woumwe. (Koli. 1, 6:​9-11) Tachikizenu ngwenu, numba tuhu vaka-Kolinde vamwe vapwile navilinga vize vatelelele kuhonesa, oloze kavakukulwile ngwavo chuma kana nachivahonesa kutamo kupwa vaka-Kulishituko. Vazachile nangolo mangana vatambuke mujila yakupalakanya yakuya kukuyoya chahaya myaka. (Mateu 7:​13, 14) Kutala muli nakulipika naukalu wakufungulula vilinga vyavipi mangana mutengamo kumimbapachisa tahi? Kanda kuzeyako. Lombenu Yehova amihane shipilitu yenyi yajila yimikafwe muhonese vilinga vyavipi. w25.03 6 ¶15-17

Yehova atushika kutuhana mangana akutukafwa tukekese numba nge jila natusakula nayimwivwisa kuwaha nyi chiku. Eji kuhananga mangana kana kuli “vosena namuchima umwe chakuzeneka kutoleka.” Nge munalombo lyehi kuli Yehova amitwaminyine, kaha hakenu mangana kujila mwamikumbulwilamo. Chakutalilaho, namulinga ngachilihi nge munajimbala omu muli haungeji? Pamo munahase kuhulisa venyembo vamungalila kana mangana vamikafwe. Kutala namuputuka kutambuka shimbu kanda vamikumbulule tahi? Tunafwelela kamweshi kulinga ngochoko. Oloze namufwila kwivwilila kanawa kuvyuma vali nakumilweza. Chochimwe nawa, nge munalombo Yehova amihane mangana, kaha fwilenu kutachikiza omwo mwamikumbulula hakufwila kuwana jishimbi jamuMbimbiliya najindongi jize najimikafwa kuvyuma muli nakusaka kusakula. Chakutalilaho, kachi nge namusakula kuya kuchilika kaha munahase kushinganyeka havyuma yahanjika Mbimbiliya kutalisa kuviwanyino vyaliuya, nakukulikata navatu vavapi, navyuma yahanjika kutalisa kukuhaka Wangana kulutwe kuhambakana kuhaka kulutwe vyuma twasaka.—Mateu 6:33; Loma 13:13; Koli. 1, 15:33. w25.01 16 ¶6-7

Upolofweto waIsaya walumbununa kanawa chihandwa chatwama hachiyoyelo chavatu vaze vatwama mupalachise yakushipilitu nachavaze kavatwamamoko. Yehova eji kuhananga vaka-kumulemesa vyuma vyavivulu vasakiwa kushipilitu. Eji kutuhananga shipilitu yenyi yajila, naMazu enyi vasoneka, nakulya chakushipilitu mangana ‘tulyenga, . . . nakunwa, . . . nakuwahilila.’ (Esekesenuko Kusoloka 22:17.) Oloze vaze kavatwama mupalachise yakushipilituko, veji ‘kufwanga zala . . . , nakufwa lipwila . . . , nakwivwa sonyi.’ Vatu kana kaveshi nausepa wakukola naYehovako. (Amo. 8:11) Yehova eji kuhananga vatu jenyi vyuma vize vasakiwa kuhakilako vene nakulya chakushipilitu. (Yowe. 2:​21-24) Eji kulinganga ngocho kuhichila muMbimbiliya, namikanda yetu yahanjika vyamuMbimbiliya, nakeyala yetu, nakukunguluka chachikungulwilo, nachachihanda nechi changalila. Tunahase kulyanga echi kulya chakushipilitu hakumbi hakumbi, nakutulingisa tupwenga vakulikangula nakuhizumuka. w24.04 21 ¶5-6

Nge munakusaka kuputuka kulisesembwa namutu, munahase kulongesa vyuma mangana mushimutwile namutu kana. Munahase kulinga ngocho kuchihela chasanga chipwe hashinga. Lwezenu hatoma mutu kana ngwenu mwamuzanga, kaha munakufwila kumutachikiza kanawa. (Koli. 1, 14:9) Nge chinahase, kaha hanenu mutu kana lwola lwakushinganyeka mwakukumbulwila. (Vishi. 15:28) Nge mutu kana keshi nakusaka kulisesembwako, kaha mwatela kuvumbika vishinganyeka vyenyi. Namulinga ngachilihi nge mutu nasolola ngwenyi amizanga? Tachikizenu ngwenu mutu kana kachiwananga kupwa chachashi kumilweza ngwenyi amizangako, shikaho mwatela kumusolwela likoji nakumuvumbika. Nge muli nakusaka kumihana lwola lwakushinganyekaho shimbu kanda mwitavile, kaha hanjikenu hatoma. Chipwe ngocho, kumbululenu washi mukwenu. (Vishi. 13:12) Nge kamweshi nakusaka kulisesembwa namutu kanako, kaha mulwezenu hatoma mujila yalikoji. Nge munamono ngwenu muli nakusaka, kaha shimutwilenu omwo muli nakwivwa navyuma namufwila kutalilila omu namulisesembwa. Vyuma namutalilila vinahase kulihandununa navyuma mwatalilila mukwenu. w24.05 23-24 ¶12-13

Mukuhita chalwola nawa, pamo omu apwile mukweze, Ndavichi ayile kuchilombo chamaswalale javaIsalele. Omu ahetele kuze awanyine maswalale vanalizakamina chikuma mwomwo Ngolyate kaFwilishite ahulamishilenga “Lizavu lyamaswalale javaIsalele.” (Samwe. 1, 17:​10, 11) Maswalale vevwile woma mwomwo vashishikilenga hali kaFwilishite nahavyuma avasawilenga. (Samwe. 1, 17:​24, 25) Oloze Ndavichi ashishikile havyuma vyeka. Ndavichi atachikijile ngwenyi, Ngolyate kapwile nakuhulamisa lizavu lyamaswalale javaIsaleleko, oloze apwile nakuhulamisa “lizavu lyamaswalale jaKalunga ou ayoya.” (Samwe. 1, 17:26) Chikupu vene, Ndavichi ashinganyekelenga chikuma hali Yehova. Afwelelele ngwenyi Kalunga uze amukafwile omu apwile kafunga, ikiye cheka mwamukafwa muukalu kanou. Kupendamina hali Kalunga chakafwile Ndavichi alwenga naNgolyate nakumufungulula.—Samwe. 1, 17:​45-51. w24.06 21 ¶7

Tunahase kushinganyeka omwo kachi chili chiyoyelo chetu nge katwapwile nakuzachila Yehovako. Kulinga ngocho kaha nachitukafwa tutwaleho lika kupwa vakushishika mukuyoya chetu nakukukulula ngana muze akukulwile muka-kwimba jisamu ngwenyi: “Chinapu chamwaza kuli ami kupandama kuli Kalunga.” (Samu 73:28) Tunahase kumika mukala ukalu tunahase kumona mumakumbi ano akukuminyina, mwomwo tweji kuzachilanga “Kalunga ou ayoya kaha nawa wamuchano.” (Teso. 1, 1:9) Kalunga ketu atuzakama ngocho mwatwalangaho lika kutukafwa. Hakuwana nge akafwilenga vangamba jenyi kunyima, ngocho nayetu makumbi ano mwatukafwanga. Kalinwomu tumone luyando lwalunene luze kanda lusolokengaho lyehi hano hamavu. Oloze katwatela kulizakaminako mwomwo Yehova mwakapwa nayetu. Shikaho tuvosena tunahase “kumika chikuma nakwamba ngwetu: ‘Yehova ikiye muka-kungukafwa.’”—Hepe. 13:​5, 6. w24.06 25 ¶17-18

Mbimbiliya yatulweza majina amalunga vakuzomboka 40 vaze vapwile vamyangana javaIsalele. Vamyangana vamwenemwene valingilenga vyuma vimwe vyavipi. Achishinganyekenu hali mwangana wamwenemwene Ndavichi. Yehova ambile ngwenyi: “Ngamba yami Ndavichi . . . anguzachilile namuchima wenyi wosena, nakulinga kaha vyuma vyamwaza kumeso ami.” (Vamya. 1, 14:8) Chipwe ngocho, Ndavichi alingile ukoji napwevo lyambala, kaha nawa alongesele vyuma mangana lunga lyauze pwevo vamujihe mujita. (Samwe. 2, 11:​4, 14, 15) Mbimbiliya yatulweza nawa vyuma vyamwaza vize valingilenga vamyangana vaze kavatwalileho kupwa vakushishika kuli Yehovako. Chakutalilaho, achishinganyekenu hali Lehovowame. Yehova ambile ngwenyi, ou mwangana “alingilenga vyuma vyavipi.” (Miji. 2, 12:14) Chipwe ngocho, Lehovowame ononokele Kalunga omu amulwezele ahone kulwa namiyachi likumi yavaIsalele nakuvecha valisakwile vavene mwangana weka. Kaha nawa azamishile jinganda jamuwangana wenyi mangana akinge vatu jaKalunga kuli vaka-kole javo. (Vamya. 1, 12:​21-24; Miji. 2, 11:​5-12) Uno Yehova atachikijilenga ngachilihi ngwenyi ou mwangana napu wakushishika kuli ikiye? Akekesele amone numba nge amuzachililenga namuchima wenyi wosena, nakupihilila nakwalumuka, nakumulemesa mujila yakwoloka. w24.07 20 ¶1-3

Uno vakulwane navalinga ngachilihi nge kanyike wakumbapachisa wamwishi yamyaka yakusemuka 18 nalingi shili yayinene? Lizavu lyavakulwane nalitongola vakulwane vavali valiwane nenyi, hamwe navisemi jenyi vaka-Kulishitu. Ava vakulwane navafwila kutachikiza vyuma vanalingi visemi mangana vakafwe mwanavo apihilile nakwalumuka. Nge ou kanyike nevu kupihya hashili nalingi, kaha nawa visemi jenyi vali nakumukafwa, kaha vaze vakulwane vavali vanahase kumona ngwavo kacheshi nakusakiwa kumutungila komiti yiliwane nenyi hamwe kaha navisemi jenyiko. Tachikizenu ngwenu, Kalunga ahana mulimo wakwolola vana kuli visemi. (Lushi. 6:​6, 7; Vishi. 6:20; 22:6; Efwe. 6:​2-4) Vakulwane vatela kuhulisanga visemi jayou mwana mangana vamone nge vali nakutwalaho lika kumukafwa kushipilitu nyi chiku. Uno vakulwane navalinga ngachilihi kachi nge ou kanyike mwatwalaho lika kulinga vyuma vyakuhenga, chamokomoko nakumukafwa kuli vakulwane vavali navisemi jenyi? Nge chili ngocho, kaha vamutungile komiti yize nayiliwana nenyi hamwe navisemi jenyi vaka-Kulishitu. w24.08 24 ¶18

Kuhanjika muchano, twatachikiza ngwetu tweji kuwahililanga nge tunatambula wana. Oloze, tweji kuwahililanga chikuma kachi nge natupwa vaka-kuhana. Hakuwana nge Yehova atutenga mujila kaneyi, ngocho twatela kuzata noho hakumina ngolo jetu mangana tupwenga vakuwahilila chikuma. Tunahase kulinga ngocho hakuwana jijila jikwavo jakuhanyinamo vakwetu. Echi chasolola chikupu nge Yehova atutenga mujila yakukomowesa. (Samu 139:14) Visoneka vyatufwelelesa ngwavyo, kuhana cheji kunehanga kuwahilila, ngocho chapwa chakutamo Mbimbiliya kuvuluka Yehova kupwa ‘Kalunga wakuwahilila.’ (Chimo. 1, 1:11) Yehova ikiye apwile watete kupwa muka-kuhana, kaha nawa apwa muka-kuhana wamunene. Kaposetolo Paulu ahanjikile kutalisa kuli Yehova ngwenyi, “twayoya, tweji kutambukanga, kaha nawa twapwako mwomwo yaikiye.” (Vili. 17:28) Chikupu vene, “mawana amwaza osena namawana akukupuka osena,” eji kufumanga kuli Yehova. (Yako. 1:17) Tuvosena twafwila kupwa nakuwahilila chikuma chize cheji kwizanga mwomwo yakuhana. Tunahase kulinga ngocho hakulondezeza Yehova uze atwama namuchima wakuhana.—Efwe. 5:1. w24.09 26 ¶1-4

Omu tunakekesa havyuma atela kutesamo mutu numba atengamo kupwa mukulwane, vaka-kuzachila vamwe vanahase kumona ngwavo kaveshi kuhasa kutamoko. Oloze anukenu ngwenu, Yehova naliuka lyenyi kaveshi nakufwila mutesemo vyuma kana mujila yakukupukako. (Petu. 1, 2:21) Tachikizenu ngwenu shipilitu yaYehova yikiko nayimikafwa mutesemo vyuma kana. (Fwili. 2:13) Kutala kuliko mihako yimwe yize muli nakufwila kusolola tahi? Nge chili ngocho, kaha lombenu Yehova amikafwe. Hehwojolenu chihande kana nakulwezako vakulwane vamwe vamilweze vyuma mwatela kulinga. Fwilenu kuzovoloka. Lwezenu Yehova aminangule nakumikafwa mupwenga nauhashi uze naumikafwa mumuzachile nakuzachila nawa chikungulwilo. (Isa. 64:8) Shikaho, Yehova amikisule hakulisuula chenu mangana mutengamo kupwa vakulwane muchikungulwilo. w24.11 25 ¶17-18

Kakwatela kupwa mutu atela kulivwa ngwenyi atamo kumutetela kuli Yehova, mwomwo yakumuzachila hamyaka yayivuluko. Chipwe ngocho, Yehova eji kwanukanga milimo yetu tunamuzachila nakashishi. Atuhanyine Mwanenyi mangana atusokole, keshi mangana atufwete mwomwo yakumuzachilako. Kachi nge natushinganyeka ngwetu vanatukonekela mwomwo yakuzachila Yehova chipwe kushinganyeka ngwetu vatela kutumona mujila yeka yakulipwila, kaha echi nachilumbununa nge tuli nakwamba ngwetu, Kulishitu novyo afwilililile vene vyauchi. (Esekesenuko Wavaka-Ngalesha 2:21.) Kaposetolo Paulu atachikijile ngwenyi Kalunga kamwivwililile uselewa mwomwo yakumuzachilako. Jino mwomwo ika Paulu akilikichilile chikuma mumilimo yaYehova? Kalingile ngocho mangana vamufweteko, oloze mangana asolole kusakwilila chenyi halikoji lyalinene amusolwelele Yehova. (Efwe. 3:7) Ngana mwaPaulu, nayetu tweji kutwalangaho lika kuzata nangolo mumilimo yaYehova keshi mangana vatuteteleko, oloze tweji kulinganga ngocho mangana tusolole kusakwilila chetu halikoji kana. w25.01 27 ¶5-6