March

Tweji kutanganga nawa muMbimbiliya ngwavo kwapwile nawa vatu vakwoloka vaze valumukile nakupwa vaka-kuhenga. Mutu umwe shina Mwangana Solomone. Numba tuhu vamunangwile kanawa jijila jaKalunga nakumukisula kuli Yehova, oloze mukuhita chalwola, aputukile kulemesa tulunga vamakuli. Jishili jenyi jalingishile Yehova apihilile nakuneha ukalu uze vamwenenga vatu hamyaka yayivulu. Kaha Mbimbiliya yatulweza ngwayo, “Solomone atokele ngana mwavakakuluka jenyi,” kuhakilako vene naMwangana Ndavichi, lunga wakushishika. (Vamya. 1, 11:​5-9, 43; Vamya. 2, 23:13) Uno jila vamufunjilililemo yasolola nge chikupu vene navakamusangula tahi? Mbimbiliya kayahanjikahoko. Kusanguka chapwa wana wakufuma kuli Kalunga wazangi. Oloze eji kuchihananga kuli vaze asaka ngwenyi vakapwe nakutokwa chakumuzachila haya myaka. (Yopa 14:​13, 14; Yowa. 6:44) Kutala Solomone mwakatambula wana kana tahi? Yehova ikiye atachikiza mwakukumbulwila kanawa chihula kana. Etu katwatachikizako. Twatachikiza kaha ngwetu Yehova mwakalinga vyuma vyakwoloka. w24.05 4 ¶9

Nge tunalihane kuli Yehova nakupwa nausoko wakukola naikiye, kaha natupwa tuvangeji mumbalaka yenyi yachifwanyisa. Tweji kulivwisanga kuwaha kulya chachivulu chakushipilitu nakupwa namasepa vavavulu vaze vapwa nawa vangeji jaYehova. Mbalaka yenyi yachifwanyisa kayatwama kaha kuchihela chimweko. Mbalaka kana munahase kuyiwana kala kuchihela kwatwama vaka-kulemesa Kalunga vakwononoka. (Kuso. 21:3) Nyi ngachilihi vatu vakushishika vaze vafwa lyehi? Kutala tunahase kukukulula ngwetu, hanga vachili vangeji mumbalaka yaYehova tahi? Eyo. Mwomwo ika tunambila ngocho? Mwomwo Yehova eji kwanukanga lika vatu kana, ngocho kuli ikiye vanapu vavatonyi. Yesu alumbunwine ngwenyi: “Kutalisa kuchihande chavafu vaze navakasangula, naMose ahanjikileho mumujimbu wachiputa omu avulukile Yehova ngwenyi, ‘Ikiye Kalunga kaApalahama, Kalunga kaIsaka, Kalunga kaYakova.’ Ikiye kapwa Kalunga kavafuko, oloze wavava vavatonyi, mwomwo kuli ikiye vosena vavatonyi.”—Luka 20:​37, 38. w24.06 3 ¶6-7

Omu Zatoke ayile kuHevelone ambachile vitwa vyajita nakupwa wakulizanga kulwa jita. (Miji. 1, 12:38) Alisuwile kuya hamwe naNdavichi mangana vakinge vaIsalele kuli vaka-kole javo. Zatoke apwile lunga wakuhamuka numba tuhu kapwile liswalale wakwipangwejiko. Vyuma muka vyakafwile kapilishitu Zatoke apwenga wakuhamuka? Ayoyele namalunga vakuhamuka kaha nawa vangolo. Chikupu vene, anganyalile chikuma kuli ava malunga. Chakutalilaho, vatu vosena muIsalele vakundwijile Ndavichi namuchima wavo wosena mwomwo yakuhamuka chenyi omu ‘atwaminyinyinenga vaIsalele kujijita.’ (Miji. 1, 11:​1, 2) Lwola lwosena Ndavichi apendaminyinenga hali Yehova mangana amukafwe afungulule vaka-kole jenyi. (Samu 138:3) Malunga vakufwana nge Yehoyata, namwanenyi wakuhamuka Mbenaya, navatwamina vamiyachi 22 vaze vakundwijilenga Ndavichi valingishile Zatoke apwenga wakuhamuka.—Miji. 1, 11:​22-25; 12:​26-28. w24.07 3 ¶5-6

Saulu wakuTalasu ayanjishilenga vaka-kukavangiza Kulishitu. Vaka-Kulishitu vavavulu pamo vamumwene kupwa himutu uze keshi kukapihilila nakwalumukako. Oloze vishinganyeka vyaYesu uze vasangwile, vyalihandunwineko navishinganyeka kana. Yesu naIse vamwene vilinga vyamwaza muli Saulu. Yesu ambile ngwenyi: “Ou mutu kuli ami napu chuma chakusakula.” (Vili. 9:15) Yesu azachishile nawa chakukomwesa mangana akafwe Saulu apihilile nakwalumuka. (Vili. 7:58–8:3; 9:​1-9, 17-20) Hanyima yakupwa muka-Kulishitu, Saulu vamuvulukile jino ngwavo kaposetolo Paulu, uze asolwelenga muchima wakusakwilila hakumutetela nakumwivwila keke mujila kaneyi. (Chimo. 1, 1:​12-15) Vyuma muka alingile Paulu omu evwile chihande chize chepukile kutalisa kuujila wapwile muchikungulwilo chavaka-Kulishitu muKolinde? Alingileko vyuma vize vyatukafwa tutachikize kanawa omwo Yehova eji kuzangamisanga vatu muzangi nakuvakafwa vamone kulema chatwama hakusolola muchima wakeke. w24.08 13 ¶15-16

Hamyaka yayivulu Yehova atwalililileho lika kusolola omwo vatu vakuhona kukupuka vanahase kupandama kuli ikiye. Avele, uze apwile mwanaAlama naEve wamuchivali, ikiye apwile mutu watete kufwelela Yehova hanyima yaukalu wasolokele muEtene. Avele alisuwile kuhana wana mwomwo azangile Yehova, nakufwila kumwivwisa kuwaha nakupandama kuli ikiye. Avele uze apwile kafunga, ahanyine Yehova wana wavana vamikoko. Uno Yehova akwileko ngachilihi? “Yehova evwililile Avele uselewa nakwitavila wana wenyi.” (Kupu. 4:4) Yehova evwililile nawa uselewa wana wavatu vaze vamuzangile nakumufwelela vakufwana nge Nowa. (Kupu. 8:​20, 21) Hakwitavila wana kana, Yehova asolwele hatoma ngwenyi vatu vakuhona kukupuka vanahase kupwa nausoko wamwaza naikiye nakupandama kuli ikiye. w24.08 3 ¶5-6

Nge vanatulingi mwamupi, tunahase kwivwa kukola kumuchima nakuhomba. (Kwambu. 7:7) Omu mukiko vevwile navangamba jaYehova vakushishika vakufwana nge Yopa naHambakuke. (Yopa 6:​2, 3; Hamba. 1:​1-3) Numba tuhu chapwa chakutamo kwivwa ngocho, oloze twatela kuzangama navyuma natulinga kuchina natulinga vyuma vyakuhenga nakulingisa jino ukalu uswezeleko. Tunahase kuhuhwasana numba nge chapwa chakwoloka kulinga vyuma vyakwoloka kachi nge vatu vaze vanatulingi mwamupi kavavazangamishileko. Achishinganyekenu omu evwile muka-kwimba jisamu omu amwene ngwenyi vaka-kuhuka vapwile nakufukila hakuyanjisa vaka-kwoloka. Shikaho ambile ngwenyi: “Ava vakiko vaka-kuhuka, ava veji kuyoyanga kanawa lwola lwosena.” (Samu 73:12) Evwile nawa kupihya chikuma omu amwene vatu vali nakuhengesa chiyulo, kaha ashinganyekele ngwenyi kuzachila Yehova chamokomoko. Ngocho ambile ngwenyi: “Omu ngwashinganyekele chikuma havyumevi, ngwevwilenga kukola kumuchima.”—Samu 73:​14, 16. w24.11 3 ¶5-7

Tweji kutohwesanga Yehova mwomwo twamuvumbika chikuma. Tukwechi vyuma vyavivulu vyakutulingisa tumuvumbike. Yehova apwa Kalunga wangolo josena. (Samu 96:​4-7) Mangana enyi akukomwesa twawamona hatoma muvyuma atenga. Eji kutuhananga kuyoya navyuma vyosena twasakiwa mangana tuyoye. (Kuso. 4:11) Apwa wakushishika. (Kuso. 15:4) Vyuma vyosena eji kulinganga vyeji kufukilanga, kaha nawa eji kutesangamo jishiko jenyi. (Yoshu. 23:14) Echi chikiko chalingishile kapolofweto Yelemiya ahanjike kutalisa kuli Yehova ngwenyi: “Muli vaka-mangana vakumafuchi osena namumawangana avo osena, kamweshi umwe apwa nge oveko.” (Yele. 10:​6, 7) Chikupu vene, tukwechi vyuma vyavivulu vize vyatela kutulingisa tuvumbike Setu wamwilu. Oloze Yehova atamo nawa kumuzanga. Chachinenenyi, tweji kutohwesanga Yehova mwomwo twamuzanga chikuma. w25.01 3 ¶5-6

Vaka-kole jaKalunga veji kusakanga kulingisa vyuma vyamwaza lyeji kulinganga liuka lyenyi visoloke kupwa vyavipi. Chakutalilaho, twalinangula muVisoneka ngwetu, Yehova asaka vaka-kumulemesa, vapwenga vatoma kumujimba, namuvilinga nakushipilitu. Asaka ngwenyi weshowo mwahona kupihilila nakwalumuka nakufwila kutwalaho kulinga vyuma vyavipi, vatela kumufumisa muchikungulwilo. (Koli. 1, 5:​11-12; 6:​9, 10) Shikaho, tweji kukavangizanga elu lushimbi lwamuVisoneka. Oloze vaka-kole jetu veji kuzachisanga lushimbi kana hakutuvangijikila ngwavo, katwatwama namuchima wakuzakamako, kaha nawa tweji kusopesanga vakwetu nakuhona kuvasolwela zangi. Tachikizenu owo ali nakufumbukila liuka. Satana Liyavolo ikiye ali nakulingisa vatu vahanjike vyuma vyamakuli kutalisa kuliuka lyetu. Liyavolo apwa “ise yamakuli.” (Yowa. 8:44; Kupu. 3:​1-5) Shikaho, twatela kutachikiza ngwetu Satana mwazachisa vaka-kumukundwiza, mangana vahanjike vyuma vyamakuli haliuka lyaYehova. w24.04 10-11 ¶13-14

Omu luyando lwalunene nalukaputuka, vatu vamwe vaze navakamona omu “Mbavilone Yayinene” navakayinongesa, navakanuka ngwavo Vinjiho jaYehova vanahanjikanga havyuma kana evi hamyaka yayivulu. Kutala vatu vamwe vaze navakamona vyuma kana navakalumuna michima yavo tahi? (Kuso. 17:5) Chuma kana nachikalifwanako nachuma chasolokele muEjipitu mumakumbi aMose. Anukenu ngwenu kwapwile “vatu veka vavavulu” valiwezele hamukana wavaIsalele hakulovoka muEjipitu. Vatu vamwe vapwile jino nalufwelelo hakumona omwo vyuma avahuhumwine Mose kutalisa kuvipupu 10 navitesamo. (Kulo. 12:38) Shikaho, kachi nge vyuma vyakulifwanako navikasoloka hakunonga chaMbavilone Yayinene, kutala twatela kukevwa kupihya nakwamba ngwetu vatu kana vaneza hamukana wetu omu kunonga chinapandama tahi? Nduma. Mwomwo tuli nakufwila kulondezeza Setu wamwilu uze apwa “Kalunga wakeke nakutetela, wakushipwokela kukwata utenu, wazangi yakwilila, wamuchano.”—Kulo. 34:6. w24.05 11 ¶12-13

Vyuma muka navisoloka kachi nge natuhona kukavangiza “mwaya mazu amwenemwene”? Talenu hachakutalilaho chino. Mulikulukaji lyamyaka lyakulivanga, kwapwile mangwavo aze apwile muli vaka-Kulishitu vamwe, akuvuluka ngwavo likumbi lyaYehova linahete. Makuli kana pamo apwile mumukanda uze wasolokele nge kaposetolo Paulu ikiye ausonekele. Vaka-Kulishitu vamwe muTesolonyika vafwelelele ou mujimbu nakuputuka kuutanjisa, chakuzeneka kuukekesa kanawa. Nge vanukile vyuma vize Paulu avanangwile omu apwile navakiko, kachi kavavahungumwishileko. (Teso. 2, 2:​1-5) Paulu ahuhumwine vandumbwenyi vahonenga kufwelela vyuma vyosena navevwa. Kaha avalwezele mazu akuvakafwa kulutwe mumukanda wenyi wamuchivali uze asonekelele vaka-Tesolonyika, uze wapwile namazu akukukulula ngwawo: “Ami Paulu ngunamimeneka namazu awa ngunasoneka nalivoko lyami. Echi kusoneka chikiko chinjikizo chamikanda yami yosena. Omu mukiko ngweji kusonekanga.”—Teso. 2, 3:17. w24.07 12 ¶13-14

Vaka-Kulishitu muYuleya vatelelele kupwa nalukakachila mumilimo yaYehova, mwomwo yaukalu uze wapwile nakwiza kulutwe. Numba tuhu vaka-Kulishitu vamwe vavaHepeleu vavayanjishilenga chikuma, oloze vavavulu vejile nakupwa vaka-Kulishitu halwola luze kavavayanjishilenga chikumako. Kaposetolo Paulu ahanjikile ngwenyi, numba tuhu ava vaka-Kulishitu vanapunga nalukakachila muvyeseko, oloze kavayanjile ngana muze ayanjile Yesu kuheta nahaseteko yakufwako. (Hepe. 12:4) Omu kwitava chavaka-Kulishitu chatanjile, vaYuleya vapihililile chikuma nakuputuka kuyanjisa vaka-Kulishitu. Hakavanga, vaYuleya vakuzomboka 40 “valishingile lushingo ngwavo kaveshi kulyako, chipwe kunwako kuvanga vanajihi Paulu.” (Vili. 22:22; 23:​12-14) Chamokomoko nakusaka kuvalinga mwamupi, ava vaka-Kulishitu vasakiwile kulikungulwila hamwe mangana valemese Yehova, nakwambulula mujimbu wamwaza, nakutwalaho lika kuzamisa lufwelelo lwavo. w24.09 12 ¶15

Yowano apwile kaposetolo uze vazangile chikuma kuli Yesu Kulishitu. (Mateu 10:2) Yowano atambukilenga hamwe naYesu mumulimo wakwambulula, kaha nawa amwenenga vyakukomwesa alingilenga Yesu, nakupandama chikuma kuli ikiye mulwola lwaukalu. Amwene nawa omu Yesu vamusukikile, kaha amumwene nawa omu asangukile. Amwene omu kwitava chavaka-Kulishitu nawa chatanjile mulikulukaji lyamyaka lyakulivanga, kufuma kukalizavu kakandende kavatu vakushishika palanga nomwo mujimbu wamwaza vawambulwile “kuvyuma vyakutenga vyosena vize vyatwama mwishi yamelu.” (Kolo. 1:23) Omu Yowano apandamine kwakamwihi nakufwa, apwile nakutokwa chakusoneka Mazu aKalunga vahwima. Asonekele vyuma vyakukomwesa vize “asolwele Yesu Kulishitu.” (Kuso. 1:1) Yowano asonekele nawa Mukanda waMujimbu Wamwaza uze vavuluka lijina lyenyi. Asonekele nawa mikanda yeka yitatu vahwima. Kaha mumukanda wamuchitatu avulukilemo muka-Kulishitu wakushishika walijina lyaNgayu, uze Yowano amwene kupwa mwanenyi wakushipilitu uze azanga chikuma. (Yowa. 3, 1) Vyuma asonekele ou lunga wakukola wakushishika vinakolezeza vaka-kukavangiza Yesu vavavulu kuheta nakulelo lino. w24.11 12 ¶15-16

Lunga uze azanga puwenyi amumona kupwa wamulemu kaha nawa amuvumbika. Amumona kupwa hiwana wakufuma kuli Yehova. (Vishi. 18:22; 31:10) Ngocho eji kumuzakamanga mujila yalikoji nakumuhana kalemesa nahalwola vanakulisavala, chipwe kulinga vyuma vyeka vyakupenge vyamuulo. Kaha nge vanakulisavala, keshi kumushinjila valinge vyuma vize navimwivwisa sonyi, nakumulingisa alivwe kupwa wamokomoko, chipwe vize naviyanjisa chivezu chenyiko. Lunga nawa eji kufwilanga kuzata nangolo mangana atwaleho lika kupwa nachivezu chitoma kumeso aYehova. (Vili. 24:16) Enu malunga, fwelelenu ngwenu Yehova amona kukilikita chenu kupwa chachilemu, kaha afwila ngwenyi muvumbikenga mapwevo jenu mukuyoya chenu chosena. Fwilenu kuzata nangolo mangana muvumbike mapwevo jenu, hakuvasolwela likoji, nakalemesa, nakusolola nawa ngwenu mwavazanga hakulihenda kuvyuma vize navivasaula. Nge namulinga ngocho, namusolola ngwenu mwavazanga nakuvamona kupwa vavalemu. Shikaho, enu malunga, nge namuvumbika mapwevo jenu, kaha namukinga usepa wenu naYehova uze wapwa waulemu chikuma.—Samu 25:14. w25.01 13 ¶17-18

Chuma chimwe chahandununa vangamba jaYehova kuvatu vaze valivuluka kupwa vaka-Kulishitu shina twima yavo yakwambulula. Vyuma muka navitukafwa tutwaleho lika kupwa natwima yakwambulula mujimbu wamwaza? Tunahase kulinangula vyuma vimwe kutalisa kukupwa natwima mumulimo wakwambulula hakukekesa chakutalilaho chaYesu. Omu apwile hano hamavu, kazeyeleko. Tachikizenu ngwenu mukuhita chalwola, mulimo wenyi wayile nakutohwelako lika. Ngana mwamuka-kuzata muwande wamivinyo, uze azachile hamyaka yitatu hakulima mikuyu yize kayemine mihakoko, naYesu nawa azachile kafwe myaka yitatu mumulimo wakwambulula hakwambulila vaYuleya vaze kavakwileko kanawa halwola kanako. Chipwe ngocho, Yesu kalitwaminyinyine kwambululako, Apwile ngana mwamuka-kuzata muwande wamivinyo uze atwalileho lika kukilikita. (Luka 13:​6-9) Kulinangula vyuma anangwile nakumulondezeza, nachitukafwa tutwaleho lika kupwa natwima makumbi ano. w25.03 14-15 ¶1-4

Ngachilihi nge munawane mutu munashinganyeka ngwenu nahase kupwa mutu wamwenemwene wakwingila nenyi muulo? Kutala mwatela kulusuka nakumulweza hahaze vene ngwenu mwamuzanga tahi? Mbimbiliya yahanjika ngwayo, mutu wakuzangama eji kutondanga chinyingi shimbu kanda alinge vyuma. Shikaho, namulinga kanawa kukekesa mutu kana mujila yakuzangama, shimbu kanda mumulweze ngwenu mwamuzanga. Uno munahase kutachikiza ngachilihi kanawa mujila yakuzangama mutu uze muli nakusaka kwingila nenyi muulo? Munahase kutachikiza mutu kana omwo apwa kushipilitu, navilinga vyenyi natwamiso yenyi hakukunguluka chachikungulwilo chipwe kuviwanyino. Vatu muka vapwa masepa jenyi, kaha vyuma muka eji kuhanjikanga? (Luka 6:45) Kutala vyuma alitomena vyalitombola nevi vyenu tahi? Munahase kuhulisa vakulwane muchikungulwilo chipwe vaka-Kulishitu vakuhya kushipilitu vaze vamutachikiza kanawa. (Vishi. 20:18) Munahase kuhulisa hali mutu kana kutalisa kupuho yenyi navilinga vyenyi. (Lute 2:11) Omu muli nakutalilila mutu kana, mwatela kulihenda kukulinga vyuma vize navimwivwisa sonyi. Hakusaka mulinge ngocho, fwilenu kuvumbika omwo eji kwivwanga nakuhona kutondatonda mijimbu yakusweka yachiyoyelo chenyi navyuma vyeka. w24.05 22 ¶7-8

Vakulwane kavakukulula washi ngwavo mutu uze nalingi shili keshi kupihilila nakwalumukako. Numba tuhu vamwe vanahase kupihilila nakwalumuka omu navaliwana nakomiti halwola lwatete, oloze veka vanahase kusakiwa lwola lwaluvulu. Shikaho, vakulwane vanahase kuliwana mapapa kavali chipwe katatu namutu uze nalingi shili. Pamo omu navaliwana nenyi halwola lwatete, ou muka-Kulishitu nalingi shili nahase kuputuka kushinganyeka chikuma hashili alinganga kutalisa kuvyuma vize vanamukafwe. Nahase kulomba kuli Yehova namuchima wakulinyisa mangana amukonekele. (Samu 38:18) Pamo halwola lukwavo navaliwana nenyi, ou mutu nalingi shili nahase kupwa navishinganyeka vyeka vize kapwanga navyo hakuliwana chateteko. Vakulwane veji kusololanga muchima wakutetela nalikoji mangana vakafwe mutu uze nalingi shili apihilile nakwalumuka. Veji kulombanga kuli Yehova akisule kukilikita chavo nakufwelela ngwavo ndumbwavo uze nalingi shili mwalumuna vishinganyeka vyenyi nakupihilila nakwalumuka.—Chimo. 2, 2:​25, 26. w24.08 22-23 ¶12-13

Yehova kasaka mutu numba umwe akanongeko. Asaka vaka-shili valiwane cheka naikiye. (Koli. 2, 5:20) Evi vikiko vyalingisa Yehova putu vene kushikulu alembelelenga vatu jenyi vakulikanga, mwalizavu chipwe vene mutu himutu, vapihilile nakwalumuka nakukinduluka kuli ikiye. Shikaho, vakulwane muchikungulwilo vatwama nakutokwa chakuzachila hamwe naYehova hakuzata nangolo vakafwe vaze vanalingi shili vapihilile nakwalumuka. (Loma 2:4; Koli. 1, 3:9) Mwilu veji kuwahililanga chikuma nge muka-shili napihilila nakwalumuka. Chikupu vene, naSetu wamwilu Yehova eji kuwahililanga chikuma kachi nge mukoko wakujimbala umwe nakinduluka kuchikungulwilo. Zangi yetu yakuzanga Yehova yeji kutohwelangako lika omu tweji kushinganyekanga hamuchima wenyi wakutetela, nahakeke yenyi, nahalikoji lyenyi lyalinene.—Luka 1:78. w24.08 31 ¶16-17

Kachi nge Yesu etavilile vatu vamutongole kupwa mwangana, kachi apwile nakwazana muvihande vyamapolitiki vyamumakumbi avaYuleya vaze vapwile muchiyulo chavaLoma. Yesu ‘afumine kuze nakuya kupili.’ Shikaho, chamokomoko nakumushinyinyika kuli vakwavo, oloze ikiye kazanyine muvihande vyamapolitikiko. Echi hichishina chachilemu chize twatela kulinangulako. Makumbi ano, vakwetu kaveshi kutulweza tuhane jimbolo mujila yakukomwesako, chipwe kuka vatu mujila yakukomwesako, chipwe kutushinyinyika tupwenga vamyangana chipwe vaka-kuyula lifuchiko. Oloze vanahase kutushinyinyika twazane muvihande vyamapolitiki hakutulweza tuvwote chipwe tukundwize mutu uze vanamono ngwavo nahase kwolola vyuma. Chipwe ngocho, tachikizenu ngwenu Yesu atusela chakutalilaho chamwaza. Akanyine kukundwiza vihande vyamapolitiki. Echi chikiko chamulingishile mukuhita chalwola ahanjike ngwenyi: “Wangana wami kaweshi wamukaye kanoko.” (Yowa. 17:14; 18:36) Shikaho, vaka-Kulishitu makumbi ano veji kulinganga kanawa kulondezeza vishinganyeka vyaYesu navilinga vyenyi. Tweji kukundwizanga Wangana wenyi, nakuuvilika, nakulomba wizenga.—Mateu 6:10. w24.12 4 ¶5-6

Omu namutwalaho lika kulinangula, fwilenu kuwana omwo munahase kuzachishilamo vyuma muli nakulinangula. Chakutalilaho, londezezenunga Yehova uze apwa wachiyulo hakuhona kutalanga vatu kumeso. Londezezenu muchima waYesu wakuzanga Ise navatu hakulisuula kuyanjila lijina lyaYehova navandumbwetu. Londezezenu nawa Yesu nahakwambulila vakwenu mangana navakiko vapwenga nakutokwa chakwitavila wana waYehova wakanyombo. Omu natutwalaho lika kulinangula nakusakwilila handando yakusokola, nachitukafwa tuzange chikuma Yehova naMwanenyi. Kaha vakiko nawa navatwalaho kutuzanga chikuma. (Yako. 4:8) Tutwalenuho lika kuzachisa vyuma vize Yehova natuhane mangana tulinangule handando yakusokola. w25.01 25 ¶16-17

Chisoneka chalelo tunahase kuchalumuna nawa ngwetu: “Jishili jami josena unajifumisa kumeso ove.” Echi chifwanyisa chasolola nge, Yehova eji kumbatanga jishili jamutu napihilila nakwalumuka, nakujimbila kuze mwazeneka kujimona. Mazu asonekele Hezekiya vanahase kuwasoneka nawa ngwavo: “Unalingisa [jishili jami] jipwenga nge kanda jisolokengaho lyehi.” Mbimbiliya yashindakanyine nawa chishina kana muchifwanyisa chikwavo chize chatwama hali Mika 7:​18, 19. Hachisoneka kana vahanjikaho ngwavo, Yehova eji kumbilanga jishili jetu mumwambe wakalungalwiji. Kushikulu, chapwilenga chachikalu mutu kumbata chuma chize vanambili mumwambe wakalungalwiji. Muvifwanyisa tunashimutwila, tunalinangula ngwetu, nge Yehova natukonekela, kaha natulelula kuchiteli chetu chajishili. Echi chinalitombola namazu ahanjikile Ndavichi ngwenyi, “vawahilila vaze vanakonekela lyehi vilinga vyavo vyaupapwoki, vaze vanafwikila lyehi jishili javo.” (Loma 4:7) Chikupu vene, echi hikukonekela chamwenemwene. w25.02 9 ¶7-8

Makumbi ano hamavu hali palachise yize yili navatu vavavulu vaze vali nakuzata milimo yayivulu. Mwazala navatu vaze vali nakulivwisa kuwaha kuunda chamwenemwene. Vaze vali lyehi mupalachise kana, veji kukilikitanga mangana vahone kuyiseza. Kaha vasaka nawa vatu vavavulu vapwenga muchihela kanechi chakulipwila. Uno chihela muka vene ocho? Chihela kana shina palachise yakushipilitu. Yehova natenge chihela chachifwanyisa chakuunda, chize chili mukaye kaSatana muze munalisale chijindo navatu vakuhuka navilinga vyavipi. (Yowa. 1, 5:19; Kuso. 12:12) Kalunga ketu wazangi namono vyuma vyavipi vize vili mukatwamino kamyaka yino vize vinahase kutwenyeka, kaha natuhane vyuma vize navitukinga mangana tufukile kushipilitu. Mazu enyi alumbununa palachise yakushipilitu kupwa chihela ‘chakuswamamo’ kaha nawa “milemba yakutukumwina kanawa meya.” (Isa. 4:6; 58:11) Vaze vatwama mupalachise kana veji kufukilanga hakuvakisula kuli Yehova mumakumbi ano akukuminyina amakalu.—Isa. 54:14; Chimo. 2, 3:1. w24.04 20 ¶1-2

Nge muli nakusaka kwingila muulo, kaha tunafwelela ngwetu munavangila kulomba kuli Yehova hachihande kana. Chipwe ngocho, Yehova kafwelelesa ngwenyi mutu himutu mwawana mutu wakwingila nenyi muuloko. Oloze azakama vyuma mwasakiwa nomwo mweji kwivwanga, kaha nawa nahase kumikafwa muwane mutu wakwingila nenyi muulo. Shikaho, twalenuho lika kumulweza vyuma mwafwila nomwo mweji kwivwanga. (Samu 62:8) Lombenu Yehova amikafwe mupwenga namuchima wakutalilila chikoki nakumihana mangana. (Yako. 1:5) Numba nge kamweshi kuwana mutu wamwenemwene wakwingila nenyi muulo halwola vene luze muli nakumutondako, oloze Yehova amishika ngwenyi mwatwalaho lika kumizanga nakumizakama. (Samu 55:22) Vangulukenu nachuma chino: Kanda kumona kutondatonda mutu wakulimbata nenyi kupwa hichuma chachilemu chikuma mukuyoya chenuko. (Fwili. 1:10) Kuwahilila chamwenemwene kachapendamina hakupwa muuloko, oloze chapendamina hakupwa nausoko wakukola naYehova. (Mateu 5:3) Kaha tachikizenu ngwenu omu muli muvajike, munahase kupwa vakulihehwa kutohwesa mulimo wenu wakwambulula. (Koli. 1, 7:​32, 33) Shikaho, mwatela kuzachisa kanawa lwola lwenu. w24.05 21 ¶4; 22 ¶6

Uno tando yingahi mwatela kumbata hakulisesembwa? Kakavulu, kulusuka kusakula vyakulinga cheji kunehanga ukalu. (Vishi. 21:5) Shikaho, mwatela kumbata tando yakutamo mangana mulitachikize kanawa. Chipwe ngocho, kamwatela kumbata tando yayisuku chikumako. Mbimbiliya yamba ngwayo: “Nge vyuma natalilila mutu vinashimbula kutesamo, cheji kwivwisanga kumuchima kukola.” (Vishi. 13:12) Uno vandumbwetu vanahase kulinga vyuma muka halwola vaze valunga napwevo vali nakulisesembwa? Tunahase kuvasanyika tulile navo hamwe vyakulya, chipwe kupwa navo kukulemesa Kalunga mwatanga, chipwe kuya navo nakulihizumuna. (Loma 12:13) Uno kunakusakiwa mutu wakupwa navo, chipwe kuvakafwa mwakutambukila, chipwe chihela chakuhengama mangana vakashimutwilileko tahi? Nge mukiko, kaha munahase kuvakafwa mujijila kana. (Ngale. 6:10) Nge vanamilombo mukapwe navo hamwe, kaha mwatela kuchimona kupwa hikutokwa chachinene. Kamwatela kuvaseza vavali kahako, chipwe ngocho, pwenu vakuvanguluka nakutachikiza lwola lwakutamo lwakuvasosolokako chindende vashimutwile. w24.05 30 ¶13-14

Vakulwane veji kufwilanga kuwana vyuma vyalingisanga mutu alinge shili. Chakutalilaho, uno ou muka-Kulishitu aputukile kuzeya chindende chindende kushipilitu mwomwo yakuhona kupwa nachilongesa chauka nakuhona kuyanga muwande tahi? Uno alitwaminyinyine kulomba kuli Yehova shimbu yosena tahi? Kutala alitwaminyinyine kufungulula kufwila chachipi tahi? Uno nasakulanga kulikata navatu vavilinga vyavipi, chipwe kusakula vyakuhemahema vyavipi tahi? Kutala vyuma nasakulanga vinalumunanga vishinganyeka vyenyi tahi? Kutala namono ngwenyi vyuma nasakula nakulinga oholyapwa vinevwisa Ise Yehova kupihya kumuchima tahi? Vakulwane vanahase kuhulisa vihula vyamwenemwene vize navilingisa mutu uze alinganga shili ashinganyeka havyuma vize vyamulingisanga alinge shili. Vanahase kulinga ngocho mujila yalikoji nakuhona kufwila kutachikiza vyuma vyakusweka vize kavatala kutachikizako. (Vishi. 20:5) Kaha nawa vanahase kuzachisa chakutalilaho mangana vakafwe mutu kana ashinganyeke nakumona kutohwa chashili nalingi. Pamo omu navaliwana halwola lwatete, mutu nahase kwivwa kupihya hashili alinganga. Kaha nahase nakupihilila nakwalumuka. w24.08 22 ¶9-11

Yesu ambulwilenga natwima “mujimbu wamwaza waWangana,” mwomwo atachikijile ngwenyi wapwile mulimo uze Kalunga amuhanyine kuzata. Yesu ahakilenga kulutwe mulimo wakwambulula mukuyoya chenyi nahalwola kwasalile tukweji vavandende vakuzata mulimo kana hano hamavu. Ayilenga “munganda hinganda namulimbo hilimbo” nakunangula vatu. (Luka 13:22) Kaha nawa anangwile tumbaji vakwavo mangana vazachile hamwe naikiye mulimo wakwambulula. (Luka 10:1) Makumbi ano nawa, mulimo wakwambulula mujimbu wamwaza wapwa waulemu chikuma uze Yehova naYesu vasaka tuzate. (Mateu 24:14; 28:​19, 20) Tunahase nawa kuzata natwima mumulimo wakwambulula kachi nge natumonanga vatu ngana muze avamona Yehova. Asaka vatu vavavulu vevwenga mujimbu wamwaza nakwakulako kanawa. (Chimo. 1, 2:​3, 4) Echi chamulingisa atunangula tupwenga nauhashi wakwambulula kanawa mujimbu ou wakuyovola vatu. Tachikizenu ngwenu, numba tuhu oholyapwa vatu kaveshi kwakula kanawa kumujimbu uze natuvambulilako, oloze vanahase kukapwa nakutokwa chakukalinga ngocho shimbu kanda kukuma chaluyando lwalunene. w25.03 15-16 ¶5-7

Muka-Kulishitu himuka-Kulishitu atela kuzachisa chivezu chenyi vanangula naMbimbiliya mangana amone vyuma atela kulinga. Vamwe vanahase kupwa vakukasunuka kumeneka mutu kana nge neza kukukunguluka chipwe kumutambwokesa. Oloze katwatela kushimutwila nenyi halwola lwalusuku chipwe kulikata nenyiko. Vatu vamwe vanahase kuhulisa ngwavo, ‘Uno Mbimbiliya kayahanjika ngwayo nge muka-Kulishitu mwalimeneka namuka-shili, kaha nalikate lyehi nenyi kuvilinga vyenyi vyakuhukako tahi?’ (Yowa. 2, 9-11) Mujimbu wosena wasolola nge elu lundongi lwatalisa kuli vaka-kulikanga kuli Kalunga navaze veji kuzondolanga vakwavo vavulumune milonga yashili. (Kuso. 2:20) Shikaho, nge mutu mwakundwiza kunangula chavaka-kulikanga kuli Kalunga, chipwe kukundwiza vilinga vyeka vyavipi, kaha vakulwane kaveshi kumutambukilako. Chipwe ngocho, tachikizenu ngwenu, mutu kana nahase kupihilila nakwalumuka. Oloze nge kapihililile nakwalumukako, kaha katweshi kumumeneka chipwe kumusanyika kukukungulukako. w24.08 30-31 ¶14-15

Omu Yesu alishile liyongomena, ikiye navaposetolo jenyi vafumine kuze kuchihela nakuya kuKapelenau muwato, kaha nawa vachinyinyine kupili mangana lize liyongomena lihone kumulingisa kupwa mwangana. (Yowa. 6:​16-20) Omu vaposetolo jenyi vapwile nakusununa wato, peho yahuhwile chikuma nakuneha makimba. Halwola kana Yesu atambukile hameya, kaha alwezele nakaposetolo Petulu naikiye atambuke hameya. (Mateu 14:​22-31) Omu Yesu engilile muwato yize peho yaunjile. Tumbaji vatambakanyine ngwavo: “Chikupu vene ove uMwanaKalunga.” (Mateu 14:33) Chipwe ngocho kavamwene omwo chakukomwesa kana, chalikwatasanyine navyuma vyasolokele hakavanga hakulisa mayongomena avatuko. Mako ahakililileko mijimbu yikwavo ngwenyi: “[Vaposetolo] valikomokelele chikuma mwomwo kavalinangwile vimwe kuchuma chakukomwesa alingile chajimboloko.” (Mako 6:​50-52) Chikupu vene, vahonene kwivwishisa ngolo jize Yehova ahanyine Yesu jakulinga vyakukomwesa. w24.12 5 ¶7

Tunahase kusolola ngwetu twasakwilila Yehova hazangi yenyi hakuzachisa ngonde yino yaKwanuka Kufwa chaMwata mangana tusolole ngwetu twasakwilila Yehova hakutuhana ndando yakusokola. Kaha nawa omu tuli nakufwila kukapwa kuchilika chaKwanuka Kufwa chaMwata, twatela nawa kusanyikako vakwetu mangana vakapweko. Kalumbunwinenu vatu vaze munasanyika vyuma navikasoloka kuchilika kana. Kaha nawa munahase kukavatalisa jivindiyo jaha jw.org jakwamba ngwavo, Mwomwo Ika Yesu Afwililile?, nayakwamba ngwavo Kwanuka Kufwa chaYesu. Vakulwane muchikungulwilo vatela kusanyika navaze vazeya. Achishinganyekenu kuwaha nachikapwa mwilu nahamavu kachi nge mukoko waYehova umwe wakujimbala mwakakinduluka hautanga. (Luka 15:​4-7) Hachilika chaKwanuka Kufwa chaMwata twatela kukameneka vatu vosena, chikumanyi vaze vanezako halwola lwatete, chipwe vaze valitwaminyinyine kwiza hamyaka yayivulu chikuma. Natukafwila kuvalingisa vakalivwe kupwa vakulihehwa.—Loma 12:13. w25.01 29 ¶15

Ndando yakusokola yatukafwa tutachikize ngwetu Yehova atwama nachiyulo, kaha chikumanyi yatukafwa tumone ngwetu atuzanga. (Yowa. 3:16; Yowa. 1, 4:​9, 10) Vyuma yatunangula ndando yakusokola vyasolola nge Yehova asaka tukayoye haya myaka nakupwa nawa mutanga yenyi. Shinganyekenu hachuma echi: Omu Alama alingile shili, Yehova amuhangile mutanga yenyi yavaka-kumulemesa. Echi chalingisa tuvosena tusemukile kuweluka watanga yaKalunga. Oloze Yehova atukonekela jishili jetu kuhichila mundando yakusokola, kaha kulutwe mwakaneha vatu vosena vaze vamufwelela nakumwononoka, mutanga yenyi. Noholyapwa tunahase kupwa nausoko wamwenemwene naYehova navandumbwetu. Chikupu vene Yehova atuzanga.—Loma 5:​10, 11. w25.01 21 ¶6

Ndando yakusokola yapwa wana. (Koli. 2, 9:15) Hakuwana nge Yesu alisuwile kutufwila, tunahase kupwa nausoko wakukola naYehova Kalunga, nakupwa nawa nalutalililo lwakukayoya haya myaka. Chakutamo kusakwilila Yehova mwomwo atuhanyine ndando yakusokola. (Loma 5:8) Yesu ahakileko chilika chakwanuka kufwa chenyi mwaka himwaka, mangana chitukafwe tutwaleho lika kusakwilila ndando yakusokola nakuyimona kupwa yayilemu. (Luka 22:​19, 20) Uno mwaka, chilika chaKwanuka Kufwa chaMwata nachipwako lyaChiwana haApril 2, 2026. Chikupu vene, tuvosena tuli nakutalilila kukapwako. Kaha natunganyala chikuma kachi nge natuwanako lwola mungonde yaKwanuka Kufwa chaMwata lwakuhunanana havyuma atulingila Yehova naMwanenyi. w25.01 20 ¶1-2

Munahase kutwalaho lika kulinangula hazangi atusolwela Yehova Kalunga naKulishitu Yesu kachi nge namutwalaho lika kushinganyekanga hazangi kana. Pamo mungonde yaKwanuka Kufwa chaMwata chauno mwaka munahase kulitomena kutangako mukanda umwe waMujimbu Wamwaza chipwe yosena. Kanda kufwila kulinangula vyavivulu chikuma halwola lwolumweko. Oloze tangenunga chindende chindende mangana muwane vyuma vikwavo vyatela kumilingisa muzange Yehova naYesu. Kachi nge munatwame mumuchano hamyaka yayivulu, munahase kulizakamina numba nge munahase kulinangula vyavihya kutalisa kuchiyulo chaKalunga nazangi yenyi nahandando yakusokola. Tachikizenu ngwenu lwola lwosena natulinangulanga vyuma vyavihya kutalisa kuvihande kana. Shikaho, livwisenunga kuwaha kutanga mijimbu yayivulu havihande kana mumikanda yetu. w25.01 24-25 ¶13-15