“ອົງສັກສິດຢູ່ໃສ?”
“ພໍ່ເອງກໍຖາມຕະຫຼອດວ່າພະເຈົ້າຢູ່ໃສ?”— ສັນຕະປາປາທີ 16 ເວົ້າປະໂຫຍກນີ້ຕອນທີ່ລາວໄປບ່ອນທີ່ເຄີຍເປັນຄ່າຍກັກຂັງເອົາສ໌ວິດຢູ່ປະເທດໂປໂລຍເຊິ່ງມີຫຼາຍກວ່າ 1 ລ້ານຄົນຖືກຂ້າ.
ເມື່ອໄດ້ຍິນເລື່ອງຮ້າຍໆເຈົ້າເຄີຍສົງໄສບໍວ່າ ‘ອົງສັກສິດຢູ່ໃສ?’ ຫຼືເວລາເລື່ອງຮ້າຍໆເກີດຂຶ້ນກັບໂຕເອງ ເຈົ້າເຄີຍສົງໄສບໍວ່າອົງສັກສິດສົນໃຈເຈົ້າຢູ່ບໍ?
ເຈົ້າອາດຮູ້ສຶກຄືກັບຜູ້ຍິງຄົນໜຶ່ງຊື່ຊີລ້າທີ່ຢູ່ປະເທດອາເມຣິກາ. ລາວໃຫຍ່ໃນຄອບຄົວທີ່ເຄັ່ງສາສະໜາ. ລາວເວົ້າວ່າ: “ຕັ້ງແຕ່ຍັງນ້ອຍ ຂ້ອຍເຊື່ອໃນພະເຈົ້າຍ້ອນເພິ່ນເປັນຜູ້ສ້າງທຸກສິ່ງ. ແຕ່ຂ້ອຍກໍບໍ່ເຄີຍຮູ້ສຶກໃກ້ຊິດກັບເພິ່ນເລີຍ. ຂ້ອຍຄິດວ່າເພິ່ນແນມເບິ່ງຂ້ອຍຢູ່ໄກໆ. ຂ້ອຍກະບໍ່ໄດ້ຄິດວ່າເພິ່ນຊັງຂ້ອຍດອກ ແຕ່ກະບໍ່ໄດ້ເຊື່ອວ່າເພິ່ນຮັກແລະເປັນຫ່ວງຂ້ອຍ.” ເປັນຫຍັງຊີລ້າຈຶ່ງຄິດແບບນັ້ນ? ລາວບອກວ່າ: “ຄອບຄົວຂອງຂ້ອຍເຈິແຕ່ເລື່ອງບໍ່ດີແບບບໍ່ຈົບບໍ່ສິ້ນຈັກເທື່ອ. ມັນເປັນຄືກັບວ່າພະເຈົ້າບໍ່ໄດ້ຊ່ວຍຫຍັງພວກເຮົາເລີຍ.”
ຄືກັບຊີລ້າ ເຈົ້າອາດເຊື່ອວ່າພະເຈົ້າຜູ້ມີລິດເດດສູງສຸດມີຢູ່ແທ້. ແຕ່ເຈົ້າອາດສົງໄສວ່າເພິ່ນສົນໃຈເຈົ້າຢູ່ບໍ? ຜູ້ຊາຍຄົນໜຶ່ງຊື່ໂຢບເຊິ່ງເປັນຄົນດີແລະເຊື່ອໝັ້ນໃນລິດເດດແລະສະຕິປັນຍາຂອງພະເຈົ້າກໍສົງໄສແບບນັ້ນຄືກັນ. (ໂຢບ 2:3; 9:4) ຫຼັງຈາກໂຢບເຈິກັບເລື່ອງຮ້າຍໆຫຼາຍເລື່ອງຕິດຕໍ່ກັນແລະໝົດຫວັງກັບຊີວິດ ລາວຖາມພະເຈົ້າວ່າ: “ເປັນຫຍັງພະອົງຈຶ່ງໜີໜ້າຈາກລູກ ແລະເຫັນລູກເປັນຄືກັບສັດຕູ?”—ໂຢບ 13:24
ຄຳພີໄບເບິນມີຄຳຕອບບໍ? ເຮົາຄວນໂທດພະເຈົ້າບໍເມື່ອມີເລື່ອງຮ້າຍໆເກີດຂຶ້ນ? ມີຫຍັງສະແດງໃຫ້ເຫັນບໍວ່າພະເຈົ້າສົນໃຈມະນຸດທຸກຄົນແລະລວມເຖິງເຮົາແຕ່ລະຄົນນຳ? ເຮົາຈະຮູ້ໄດ້ແນວໃດວ່າພະເຈົ້າສົນໃຈເຮົາ ເຂົ້າໃຈເຮົາ ເຫັນອົກເຫັນໃຈແລະພ້ອມທີ່ຈະຊ່ວຍເຫຼືອເຮົາເມື່ອເຈິບັນຫາ?
ໃນບົດຕໍ່ໆໄປ ເຮົາຈະເບິ່ງວ່າວິທີທີ່ພະເຈົ້າສ້າງມະນຸດບອກໃຫ້ຮູ້ວ່າເພິ່ນສົນໃຈເຮົາ. (ໂຣມ 1:20) ແລ້ວເຮົາກໍຈະເບິ່ງນຳວ່າຄຳພີໄບເບິນບອກແນວໃດເພື່ອໃຫ້ເຮົາຮູ້ວ່າພະເຈົ້າສົນໃຈແລະເປັນຫ່ວງເຮົາ. ແຮ່ງເຈົ້າໄດ້ “ຮູ້ຈັກເພິ່ນ” ໂດຍທາງສິ່ງທີ່ເພິ່ນສ້າງແລະໂດຍທາງຄຳພີໄບເບິນ ເຈົ້າກໍແຮ່ງຈະໝັ້ນໃຈວ່າ ‘ເພິ່ນເປັນຫ່ວງເຈົ້າ’ ຫຼາຍແທ້ໆ.—1 ໂຢຮັນ 2:3; 1 ເປໂຕ 5:7