ເຮົາ​ຈະ​ຮັກສາ​ຄວາມ​ເປັນ​ໝູ່​ກັບ​ພີ່ນ້ອງ​ໄດ້​ແນວ​ໃດ?

1. ເຮົາ​ຈະ​ຊອກ​ໝູ່​ແທ້​ໄດ້​ຢູ່​ໃສ?

ຊີວິດ​ໃນ​ທຸກ​ມື້​ນີ້​ມີ​ຫຼາຍ​ຢ່າງ​ທີ່​ເຮັດ​ໃຫ້​ເຄັ່ງ​ຕຶງ​ຫຼາຍ ແຕ່​ມັນ​ແຮ່ງ​ຊິ​ເຄັ່ງ​ຕຶງ​ກວ່າ​ນີ້​ອີກ​ຖ້າ​ເຮົາ​ບໍ່​ມີ​ໝູ່​ແທ້. ພະ​ເຢໂຫວາ​ຮູ້​ເລື່ອງ​ນີ້​ດີ ເພິ່ນ​ຈຶ່ງ​ໃຫ້​ເຮົາ​ມີ​ໝູ່​ແທ້​ໃນ​ສັງຄົມ​ພີ່ນ້ອງ​ທີ່​ຢູ່​ທົ່ວ​ໂລກ. (ພສ. 119:63) ເຮົາ​ຮູ້ສຶກ​ດີ​ໃຈ​ຫຼາຍ​ທີ່​ໄດ້​ຢູ່​ໃນ​ຄອບຄົວ​ຂອງ​ຄົນ​ທີ່​ຮັກ​ພະ​ເຢໂຫວາ.

2. ເຮົາ​ຢາກ​ເປັນ​ໝູ່​ແບບ​ໃດ​ກັບ​ພີ່ນ້ອງ​ຂອງ​ເຮົາ?

² ເຮົາ​ບໍ່​ຢາກ​ເປັນ​ໝູ່​ແລະ​ຮູ້​ຈັກ​ພີ່ນ້ອງ​ແບບ​ຜິວເຜີນ​ເທົ່າ​ນັ້ນ ແຕ່​ເຮົາ​ຢາກ​ເປັນ​ໝູ່​ທີ່​ສະໜິດ​ແລະ​ພັກດີ​ຕໍ່​ກັນ. ເຮົາ​ທຸກ​ຄົນ​ເປັນ​ຄອບຄົວ​ດຽວ​ກັນ​ທີ່​ຮັກ​ພະ​ເຢໂຫວາ​ແລະ​ພະ​ເຢຊູ ແລະ​ຄວາມ​ຮັກ​ແບບ​ນີ້​ແຫຼະ​ທີ່​ເຮັດ​ໃຫ້​ເຮົາ​ເປັນ​ນ້ຳ​ໜຶ່ງ​ໃຈ​ດຽວ​ກັນ. (ຢຮ. 13:35) ເຖິງ​ຈະ​ເປັນ​ແນວ​ນັ້ນ ການ​ເປັນ​ໝູ່​ສະໜິດ​ກັບ​ພີ່ນ້ອງ​ກໍ​ບໍ່​ໄດ້​ເກີດຂຶ້ນ​ໂດຍ​ອັດຕະໂນມັດ ມັນ​ຕ້ອງ​ໄດ້​ໃຊ້​ຄວາມ​ພະຍາຍາມ. ຍ້ອນ​ເຮົາ​ທຸກ​ຄົນ​ບໍ່​ສົມບູນແບບ ສະນັ້ນ ບາງ​ເທື່ອ​ເຮົາ​ຈຶ່ງ​ມີ​ບັນຫາ​ກັນ​ແລະ​ເຮັດ​ໃຫ້​ເປັນ​ເລື່ອງ​ຍາກ​ທີ່​ຈະ​ຮັກສາ​ຄວາມ​ເປັນ​ໝູ່​ໄວ້​ໄດ້.

3. ເປັນ​ຫຍັງ​ຈຶ່ງ​ເປັນ​ເລື່ອງ​ຍາກ​ທີ່​ເຮົາ​ຈະ​ຮັກສາ​ຄວາມ​ເປັນ​ໝູ່​ກັບ​ພີ່ນ້ອງ​ໄວ້​ໄດ້?

³ ໃນ​ຄວາມ​ເປັນ​ຈິງ ເຮົາ​ອາດ​ຮູ້ສຶກ​ສະໜິດ​ກັບ​ບາງ​ຄົນ​ຫຼາຍ​ກວ່າ​ຄົນ​ອື່ນ. ຍ້ອນຫຍັງ? ຍ້ອນ​ເຮົາ​ອາດ​ມັກ​ຫຍັງ​ທີ່​ຄ້າຍໆ​ກັນ ຫຼື​ມີ​ນິດໄສ​ທີ່​ເຂົ້າ​ກັນ​ໄດ້​ດີ. ແຕ່​ການ​ຮັກສາ​ສາຍ​ສຳພັນ​ທີ່​ດີ​ກັບ​ພີ່ນ້ອງ​ບາງ​ຄົນ​ກໍ​ອາດ​ເປັນ​ເລື່ອງ​ຍາກ. ບາງ​ເທື່ອ​ເຮົາ​ອາດ​ມີ​ຄວາມ​ຄິດ​ເຫັນ​ທີ່​ບໍ່​ຄື​ກັນ​ກັບ​ພີ່ນ້ອງ​ເຊິ່ງ​ເຮັດ​ໃຫ້​ເປັນ​ເລື່ອງ​ຍາກ​ທີ່​ເຮົາ​ຈະ​ຮັກ​ກັນ. ບາງ​ເທື່ອ​ອາດ​ເປັນ​ຍ້ອນ​ເຮົາ​ມີ​ນິດໄສ​ທີ່​ບໍ່​ຄື​ກັນ ເຮົາ​ຈຶ່ງ​ຮູ້ສຶກ​ວ່າ​ເຮົາ​ກັບ​ພີ່ນ້ອງ​ເຂົ້າ​ກັນ​ໄດ້​ຍາກ. ຫຼື​ບາງ​ເທື່ອ​ພີ່ນ້ອງ​ບາງ​ຄົນ​ເຈັບ​ປ່ວຍ​ທາງ​ຮ່າງກາຍ​ຫຼື​ຈິດ​ໃຈ ມັນ​ຈຶ່ງ​ເປັນ​ເລື່ອງ​ຍາກ​ທີ່​ເຮົາ​ຈະ​ສະໜິດ​ກັບ​ເຂົາເຈົ້າ​ໄດ້. ໃນ​ບົດ​ນີ້​ເຮົາ​ຈະ​ເບິ່ງ​ວ່າ​ຕົວຢ່າງ​ຂອງ​ພະ​ເຢຊູ​ຈະ​ຊ່ວຍ​ເຮົາ​ແນວ​ໃດ​ໃຫ້​ຮັກສາ​ຄວາມ​ເປັນ​ໝູ່​ກັບ​ພີ່ນ້ອງ​ໄດ້​ເຖິງ​ວ່າ​ຈະ​ເຈິ​ຂໍ້​ທ້າທາຍ​ຕ່າງໆ. ແຕ່​ທຳອິດ​ໃຫ້​ເຮົາ​ມາ​ເບິ່ງ​ວ່າ​ຄຸນລັກສະນະ​ແບບ​ຄລິດສະຕຽນ​ຈະ​ຊ່ວຍ​ເຮົາ​ແນວ​ໃດ​ໃຫ້​ຮັກສາ​ຄວາມ​ເປັນ​ໝູ່​ກັບ​ພີ່ນ້ອງ​ໄວ້​ໄດ້.

ຄຸນລັກສະນະ​ແບບ​ຄລິດສະຕຽນ​ຊ່ວຍ​ເຮົາ​ໃຫ້​ຮັກສາ​ຄວາມ​ເປັນ​ໝູ່​ກັບ​ພີ່ນ້ອງ

4. ເຮົາ​ຈະ​ສະໜິດ​ກັບ​ພີ່ນ້ອງ​ຫຼາຍ​ຂຶ້ນ​ໄດ້​ແນວ​ໃດ?

⁴ ເພື່ອ​ຈະ​ສະໜິດ​ກັບ​ພີ່ນ້ອງ ເຮົາ​ຕ້ອງ​ເບິ່ງ​ສ່ວນ​ທີ່​ດີ​ຂອງ​ເຂົາເຈົ້າ. ການ​ໃຊ້​ເວລາ​ນຳ​ກັນ​ຈະ​ຊ່ວຍ​ເຮົາ​ໃຫ້​ເຫັນ​ຄຸນລັກສະນະ​ທີ່​ດີ​ຂອງ​ເຂົາເຈົ້າ. ອັກຄະສາວົກ​ໂປໂລ​ຢາກ​ຢູ່​ນຳ​ພີ່ນ້ອງ​ແທ້ໆ. ລາວ​ຂຽນ​ຈົດໝາຍ​ໄປ​ຫາ​ພີ່ນ້ອງ​ຢູ່​ເມືອງ​ເທຊະໂລນິກ​ວ່າ: “ພວກ​ເຮົາ​ພະຍາຍາມ​ເປັນ​ພິເສດ​ເພື່ອ​ຈະ​ໄປ​ຫາ​ພວກ​ເຈົ້າ​ໃຫ້​ໄດ້.” (1ທຊ. 2:17) ຫຼາຍ​ຄົນ​ຮູ້ສຶກ​ວ່າ​ການ​ໄດ້​ລົມ​ກັນ​ໜ້າ​ຕໍ່​ໜ້າ​ເຮັດ​ໃຫ້​ສະໜິດ​ກັນ​ຫຼາຍ​ຂຶ້ນ. ມີ​ຫຼາຍ​ໂອກາດ​ທີ່​ເຮົາ​ຈະ​ເຮັດ​ແບບ​ນັ້ນ​ໄດ້ ເຊັ່ນ: ຕອນ​ທີ່​ໄປ​ຮັບໃຊ້​ນຳ​ກັນ ໄປ​ປະຊຸມ​ປະຈຳ​ປະຊາຄົມ ແລະ​ໄປ​ປະຊຸມ​ໃຫຍ່. ແຕ່​ເມື່ອ​ເຮົາ​ມີ​ບັນຫາ​ກັບ​ພີ່ນ້ອງ​ຄົນ​ໃດ​ຄົນ​ໜຶ່ງ ການ​ໃຊ້​ເວລາ​ນຳ​ກັນ​ເທົ່າ​ນັ້ນ​ກໍ​ອາດ​ບໍ່​ໄດ້​ຊ່ວຍ​ໃຫ້​ແກ້ໄຂ​ບັນຫາ​ໄດ້.

5. ອັນ​ໃດ​ຈະ​ຊ່ວຍ​ເຮົາ​ໃຫ້​ຮັກສາ​ຄວາມ​ເປັນ​ໝູ່​ກັບ​ພີ່ນ້ອງ​ໄດ້​ເມື່ອ​ມີ​ບັນຫາ​ກັນ? ຂໍ​ໃຫ້​ຍົກ​ຕົວຢ່າງ (ໂກໂລຊາຍ 3:12)

⁵ ຄຸນລັກສະນະ​ແບບ​ຄລິດສະຕຽນ​ຈະ​ຊ່ວຍ​ເຮົາ​ໃຫ້​ຮັກສາ​ຄວາມ​ເປັນ​ໝູ່​ກັບ​ພີ່ນ້ອງ​ເມື່ອ​ມີ​ບັນຫາ​ກັນ. (ອ່ານ​ໂກໂລຊາຍ 3:12) ເມື່ອ​ເຮົາ​ພະຍາຍາມ​ເປັນ​ຄົນ​ຖ່ອມ ອົດທົນ ເມດຕາ ແລະ​ເຫັນອົກເຫັນໃຈ​ຫຼາຍ​ຂຶ້ນ ມັນ​ກໍ​ຈະ​ຊ່ວຍ​ເຮົາ​ໃຫ້​ເອົາ​ຊະນະ​ຂໍ້​ທ້າທາຍ​ຕ່າງໆ​ແລະ​ຍັງ​ຮັກສາ​ຄວາມ​ເປັນ​ໝູ່​ຕໍ່​ກັນ​ໄດ້. ລອງ​ຄິດ​ເຖິງ​ຕົວຢ່າງ​ນີ້: ຄື​ກັບ​ນ້ຳມັນ​ທີ່​ເຮັດ​ໃຫ້​ເຄື່ອງ​ຈັກ​ຂອງ​ລົດ​ເຮັດ​ວຽກ​ໄດ້​ດີ ຄຸນລັກສະນະ​ແບບ​ຄລິດສະຕຽນ​ກໍ​ຈະ​ຊ່ວຍ​ຫຼຸດ​ຄວາມ​ຂັດແຍ່ງ​ລະຫວ່າງ​ເຮົາ​ກັບ​ພີ່ນ້ອງ​ໄດ້. ຕອນນີ້​ໃຫ້​ເຮົາ​ມາ​ເບິ່ງ​ຂໍ້​ທ້າທາຍ 3 ຢ່າງ​ທີ່​ມີ​ຜົນ​ຕໍ່​ສາຍ​ສຳພັນ​ຂອງ​ເຮົາ​ກັບ​ພີ່ນ້ອງ ແລະ​ເບິ່ງ​ວ່າ​ເຮົາ​ຈະ​ຮຽນ​ແບບ​ພະ​ເຢຊູ​ແນວ​ໃດ​ໃນ​ເລື່ອງ​ຄວາມ​ຖ່ອມ ຄວາມ​ອົດທົນ ຄວາມ​ເມດຕາ ແລະ​ຄວາມ​ເຫັນອົກເຫັນໃຈ​ເພື່ອ​ຊ່ວຍ​ເຮົາ​ໃຫ້​ເປັນ​ໝູ່​ແທ້​ຂອງ​ພີ່ນ້ອງ​ຕໍ່​ໄປ.

ເມື່ອ​ມີ​ຄວາມ​ຄິດ​ເຫັນ​ບໍ່​ຄື​ກັນ

6. ເປັນ​ຫຍັງ​ການ​ມີ​ຄວາມ​ຄິດ​ເຫັນ​ທີ່​ບໍ່​ຄື​ກັນ​ອາດ​ເຮັດ​ໃຫ້​ຍາກ​ທີ່​ຈະ​ຮັກສາ​ຄວາມ​ເປັນ​ໝູ່​ໄວ້​ໄດ້?

⁶ ເປັນ​ຫຍັງ​ເລື່ອງ​ນີ້​ຈຶ່ງ​ເປັນ​ຂໍ້​ທ້າທາຍ? ເມື່ອ 2 ຄົນ​ຄິດ​ບໍ່​ຄື​ກັນ ຕ່າງ​ຄົນ​ຕ່າງ​ກໍ​ໝັ້ນໃຈ​ວ່າ​ຄວາມ​ຄິດ​ຂອງ​ໂຕເອງ​ຖືກຕ້ອງ. ຕົວຢ່າງ​ເຊັ່ນ: ພີ່ນ້ອງ​ຊາຍ 2 ຄົນ​ຄິດ​ບໍ່​ຄື​ກັນ​ໃນ​ເລື່ອງ​ການ​ຈັດ​ກຸ່ມ​ການ​ຮັບໃຊ້​ໃນ​ເຂດ. ແຕ່​ລະ​ຄົນ​ຕ່າງ​ກໍ​ໝັ້ນໃຈ​ວ່າ​ວິທີ​ຂອງ​ໂຕເອງ​ດີ​ທີ່​ສຸດ. ເປັນ​ໄປ​ໄດ້​ບໍ​ທີ່​ຄວາມ​ຄິດ​ເຫັນ​ທີ່​ບໍ່​ຄື​ກັນ​ນີ້​ສາມາດ​ເຮັດ​ໃຫ້​ເລື່ອງ​ນ້ອຍໆ​ກາຍ​ເປັນ​ເລື່ອງ​ໃຫຍ່​ແລະ​ເຮັດ​ໃຫ້​ເຂົາເຈົ້າ​ມີ​ບັນຫາ​ກັນ​ໄດ້? ເຂົາເຈົ້າ​ອາດ​ເລີ່ມ​ສົນໃຈ​ແຕ່​ຄວາມ​ຄິດ​ຂອງ​ໂຕເອງ ແທນ​ທີ່​ຈະ​ຄິດ​ເຖິງ​ການ​ຮັກສາ​ຄວາມ​ເປັນ​ໝູ່​ທີ່​ດີ​ຕໍ່​ກັນ. ຖ້າ​ເຂົາເຈົ້າ​ບໍ່​ຍອມ​ເປີດ​ໃຈ​ລົມ​ກັນ​ກ່ຽວກັບ​ເລື່ອງ​ນັ້ນ​ແລະ​ຫາ​ວິທີ​ແກ້ ເຂົາເຈົ້າ​ອາດ​ເລີ່ມ​ຄຽດ​ໃຫ້​ກັນ. ເມື່ອ​ເວລາ​ຜ່ານ​ໄປ​ເຂົາເຈົ້າ​ອາດ​ຈະ​ຄ່ອຍໆ​ຫ່າງ​ກັນ​ແລະ​ໃນ​ທີ່​ສຸດ​ກໍ​ອາດ​ຈະ​ເຊົາ​ເປັນ​ໝູ່​ກັນ​ກະ​ໄດ້. ເລື່ອງ​ທັງໝົດ​ນີ້​ເກີດຂຶ້ນ​ຍ້ອນ​ເລື່ອງ​ເລັກໆ​ນ້ອຍໆ​ເທົ່າ​ນັ້ນ.

7. ພະ​ເຢຊູ​ໄດ້​ເຮັດ​ຫຍັງ​ເພື່ອ​ສອນ​ພວກ​ລູກສິດ​ວ່າ​ຄວາມ​ຖ່ອມ​ເປັນ​ສິ່ງ​ສຳຄັນ​ເມື່ອ​ມີ​ຄວາມ​ຄິດ​ເຫັນ​ບໍ່​ຄື​ກັນ?

⁷ ຮຽນ​ຈາກ​ຄວາມ​ຖ່ອມ​ຂອງ​ພະ​ເຢຊູ. ພະ​ເຢຊູ​ສອນ​ພວກ​ລູກສິດ​ວ່າ​ສິ່ງ​ທີ່​ສຳຄັນ​ທີ່​ຈະ​ຊ່ວຍ​ເຂົາເຈົ້າ​ໄດ້​ເມື່ອ​ມີ​ຄວາມ​ຄິດ​ເຫັນ​ບໍ່​ຄື​ກັນ​ກໍ​ຄື​ຄວາມ​ຖ່ອມ. ມີ​ຫຼາຍ​ເທື່ອ​ທີ່​ພວກ​ລູກສິດ​ຖຽງ​ກັນ​ວ່າ​ໃຜ​ຈະ​ເປັນ​ໃຫຍ່​ທີ່​ສຸດ. ເລື່ອງ​ນີ້​ເປັນ​ເລື່ອງ​ທີ່​ເຂົາເຈົ້າ​ໃຫ້​ຄວາມ​ສົນໃຈ​ຫຼາຍ​ເກີນ​ໄປ. ເພື່ອ​ຊ່ວຍ​ພວກ​ລູກສິດ​ໃຫ້​ເຊົາ​ຄິດ​ແບບ​ນັ້ນ ພະ​ເຢຊູ​ຈຶ່ງ​ໄດ້​ອະທິບາຍ​ວ່າ​ເຂົາເຈົ້າ​ຕ້ອງ​ເບິ່ງ​ວ່າ​ຄົນ​ອື່ນ​ດີ​ກວ່າ​ໂຕເອງ. (ມທ. 20:25-28) ພະ​ເຢຊູ​ກຳລັງ​ສອນ​ເຂົາເຈົ້າ​ວ່າ​ຄົນ​ຖ່ອມ​ຄວນ​ເປັນ​ຄົນ​ແນວ​ໃດ. ແມ່ນ​ແຕ່​ໃນ​ຄືນ​ກ່ອນ​ທີ່​ພະ​ເຢຊູ​ຈະ​ຕາຍ ເພິ່ນ​ກໍ​ຍັງ​ໄດ້ “ເຮັດ​ເປັນ​ຕົວຢ່າງ” ໃຫ້​ພວກ​ລູກສິດ​ເຫັນ​ໂດຍ​ລ້າງ​ຕີນ​ໃຫ້​ເຂົາເຈົ້າ​ທັງໆ​ທີ່​ມັນ​ເປັນ​ວຽກ​ຂອງ​ຄົນ​ຮັບໃຊ້. (ຢຮ. 13:3-5, 12-16) ສິ່ງ​ທີ່​ພະ​ເຢຊູ​ເຮັດ​ສະແດງ​ໃຫ້​ພວກ​ລູກສິດ​ເຫັນ​ວ່າ​ເຂົາເຈົ້າ​ຈະ​ຮັກສາ​ຄວາມ​ເປັນ​ໝູ່​ທີ່​ດີ​ຕໍ່​ກັນ​ໄດ້​ແນວ​ໃດ. ຖ້າ​ເຂົາເຈົ້າ​ຕ່າງ​ຄົນ​ຕ່າງ​ເບິ່ງ​ວ່າ​ຄົນ​ອື່ນ​ດີ​ກວ່າ​ໂຕເອງ ເຂົາເຈົ້າ​ກໍ​ຈະ​ຍອມ​ຟັງ​ກັນ​ຫຼາຍ​ຂຶ້ນ​ເມື່ອ​ເຂົາເຈົ້າ​ຄິດ​ບໍ່​ຄື​ກັນ. ນອກ​ຈາກ​ນັ້ນ ມັນ​ກໍ​ງ່າຍ​ຂຶ້ນ​ສຳລັບ​ເຂົາເຈົ້າ​ທີ່​ຈະ​ຮັກສາ​ຄວາມ​ເປັນ​ໝູ່​ທີ່​ດີ​ຕໍ່​ກັນ​ແມ່ນ​ແຕ່​ຕອນ​ທີ່​ມີ​ຄວາມ​ຄິດ​ເຫັນ​ຕ່າງ​ກັນ.

8. ຄວາມ​ຖ່ອມ​ຈະ​ຊ່ວຍ​ເຈົ້າ​ໃຫ້​ຮັກສາ​ຄວາມ​ເປັນ​ໝູ່​ທີ່​ດີ​ໄວ້​ໄດ້​ແນວ​ໃດ​ເມື່ອ​ມີ​ຄວາມ​ຄິດ​ເຫັນ​ທີ່​ບໍ່​ຄື​ກັນ? (ໂກໂລຊາຍ 3:13) (ເບິ່ງ​ຮູບ​ນຳ)

⁸ ເຈົ້າ​ຈະ​ຮັກສາ​ຄວາມ​ເປັນ​ໝູ່​ໄວ້​ໄດ້​ແນວ​ໃດ? ຄວາມ​ຖ່ອມ​ຈະ​ຊ່ວຍ​ເຈົ້າ​ໃຫ້​ເບິ່ງ​ຂ້າມ​ຄວາມ​ຄິດ​ເຫັນ​ທີ່​ບໍ່​ຄື​ກັນ​ເລັກໆ​ນ້ອຍໆ​ແລະ​ໃຫ້​ອະໄພ​ກັນ​ຢ່າງ​ໃຈ​ກວ້າງ. (ອ່ານ​ໂກໂລຊາຍ 3:13) ຖ້າ​ເຈົ້າ​ເປັນ​ຄົນ​ຖ່ອມ​ເຈົ້າ​ກໍ​ຢາກ​ຈະ​ຮັກສາ​ຄວາມ​ເປັນ​ໝູ່​ທີ່​ດີ​ໄວ້ ແທນ​ທີ່​ຈະ​ຫງຸດຫງິດ​ຫຼື​ໃຈ​ຮ້າຍ. (ພສ. 4:4) ຖ້າ​ໝູ່​ເວົ້າ​ບໍ່​ດີ​ກັບ​ເຈົ້າ​ຫຼື​ເຈົ້າ​ຫຼົງ​ເວົ້າ​ສິ່ງ​ທີ່​ບໍ່​ດີ​ອອກ​ໄປ ໃຫ້​ຈື່​ໄວ້​ວ່າ​ເຮົາ​ທຸກ​ຄົນ​ຕ່າງ​ກໍ​ເຄີຍ​ເວົ້າ​ບາງ​ຢ່າງ​ທີ່​ເຮັດ​ໃຫ້​ເສຍໃຈ​ພາຍ​ຫຼັງ. (ປຍຈ. 7:21, 22) ໃຫ້​ຖາມ​ໂຕເອງ​ວ່າ: ‘ຂ້ອຍ​ເອົາ​ຄວາມ​ຄິດ​ຂອງ​ໂຕເອງ​ເປັນ​ໃຫຍ່​ແທນ​ທີ່​ຈະ​ຮັກສາ​ສາຍ​ພັນ​ທີ່​ດີ​ຕໍ່​ຄົນ​ອື່ນ​ບໍ?’ ເຈົ້າ​ອາດ​ເລືອກ​ທີ່​ຈະ​ຍອມ​ເຮັດ​ຕາມ​ຄວາມ​ຄິດ​ເຫັນ​ຂອງ​ໝູ່​ກໍ​ໄດ້​ແລະ​ເບິ່ງ​ຂ້າມ​ເລື່ອງ​ທີ່​ເຈົ້າ​ບໍ່​ເຫັນດີ​ນຳ​ໂດຍ​ບໍ່​ຄິດ​ເຖິງ​ມັນ​ອີກ​ຫຼື​ບໍ່​ເອົາ​ເລື່ອງ​ນັ້ນ​ມາ​ເວົ້າ​ອີກ​ໃນ​ພາຍ​ຫຼັງ.

9. ຄວາມ​ຖ່ອມ​ຈະ​ຊ່ວຍ​ເຈົ້າ​ແນວ​ໃດ​ຕອນ​ທີ່​ມີ​ຄວາມ​ຄິດ​ເຫັນ​ທີ່​ບໍ່​ຄື​ກັນ​ແລະ​ຕົກ​ລົງ​ກັນ​ບໍ່​ໄດ້? (ສຸພາສິດ 17:9)

⁹ ນອກ​ຈາກ​ນັ້ນ ຄວາມ​ຖ່ອມ​ຈະ​ຊ່ວຍ​ເຈົ້າ​ໄດ້​ຕອນ​ທີ່​ມີ​ຄວາມ​ຄິດ​ເຫັນ​ທີ່​ບໍ່​ຄື​ກັນ​ແລະ​ຕົກ​ລົງ​ກັນ​ບໍ່​ໄດ້. ຢ່າ​ພະຍາຍາມ​ຖຽງ​ເພື່ອ​ຈະ​ພິສູດ​ວ່າ​ຄວາມ​ຄິດ​ເຫັນ​ຂອງ​ເຈົ້າ​ຖືກ. (ອ່ານ​ສຸພາສິດ 17:9; 1ກຣ. 6:7) ມັນ​ຈະ​ດີ​ກວ່າ​ຖ້າ​ເຈົ້າ​ຕັ້ງ​ເປົ້າໝາຍ​ທີ່​ຈະ​ຮັກສາ​ຄວາມ​ເປັນ​ໝູ່​ຕໍ່​ກັນ​ໄວ້. ພີ່ນ້ອງ​ຫຼາຍ​ຄົນ​ຮູ້ສຶກ​ວ່າ​ການ​ລົມ​ກັນ​ເພື່ອ​ຫາ​ວິທີ​ແກ້​ບັນຫາ​ຊ່ວຍ​ໄດ້​ຫຼາຍ​ແທ້ໆ. (ພສ. 34:14) ເຈົ້າ​ອາດ​ຈະ​ເວົ້າ​ກັບ​ໝູ່​ວ່າ: ‘ເຮົາ​ກໍ​ເປັນ​ໝູ່​ກັນ​ມາ​ດົນ​ແລ້ວ ໃຫ້​ເຮົາ​ມາ​ລົມ​ກັນ​ດີ​ບໍ່?’ ໃຫ້​ພ້ອມ​ທີ່​ຈະ​ຍອມຮັບ​ວ່າ​ເຈົ້າ​ເອງ​ກໍ​ມີ​ສ່ວນ​ຜິດ​ແລະ​ເຮັດ​ໃຫ້​ໝູ່​ເສຍໃຈ ແລະ​ຈາກ​ນັ້ນ​ໃຫ້​ຂໍໂທດ​ລາວ. ຖ້າ​ພີ່ນ້ອງ​ຂໍໂທດ​ເຈົ້າ​ຄື​ກັນ ກໍ​ໃຫ້​ເຈົ້າ​ຍອມຮັບ​ຄຳ​ຂໍໂທດ​ດ້ວຍ​ຄວາມ​ເຕັມໃຈ​ແລະ​ໃຫ້​ອະໄພ​ລາວ. (ລກ. 17:3, 4) ຂໍ​ໃຫ້​ຈື່​ໄວ້​ວ່າ​ເປົ້າໝາຍ​ຂອງ​ເຈົ້າ​ບໍ່​ແມ່ນ​ເພື່ອ​ໃຫ້​ຮູ້​ວ່າ​ໃຜ​ຖືກ​ໃຜ​ຜິດ ແຕ່​ເພື່ອ​ໃຫ້​ຜ່ານ​ເລື່ອງ​ນັ້ນ​ໄປ​ໄດ້​ແລະ​ກັບ​ມາ​ເປັນ​ໝູ່​ກັນ​ຄື​ເກົ່າ.—ສພສ. 18:24

ເມື່ອ​ບຸກຄະລິກ​ແລະ​ນິດໄສ​ຕ່າງ​ກັນ

10. ອັນ​ໃດ​ອາດ​ເຮັດ​ໃຫ້​ເປັນ​ເລື່ອງ​ຍາກ​ທີ່​ເຮົາ​ຈະ​ຮັກສາ​ຄວາມ​ເປັນ​ໝູ່​ໄວ້​ໄດ້?

¹⁰ ເປັນ​ຫຍັງ​ເລື່ອງ​ນີ້​ຈຶ່ງ​ເປັນ​ຂໍ້​ທ້າທາຍ? ເຮົາ​ອາດ​ຮູ້ສຶກ​ວ່າ​ຍາກ​ທີ່​ຈະ​ຮັກສາ​ຄວາມ​ເປັນ​ໝູ່​ທີ່​ດີ​ກັບ​ຄົນ​ທີ່​ມີ​ບຸກຄະລິກ​ແລະ​ນິດໄສ​ຕ່າງ​ຈາກ​ເຮົາ. ພີ່ນ້ອງ​ບາງ​ຄົນ​ອາດ​ມີ​ນິດໄສ​ບາງ​ຢ່າງ​ທີ່​ເຮົາ​ບໍ່​ມັກ. ບາງ​ຄົນ​ອາດ​ມີ​ນິດໄສ​ທີ່​ເຂົ້າ​ກັບ​ອື່ນ​ໄດ້​ຍາກ​ຍ້ອນ​ເຄີຍ​ຖືກ​ປະຕິບັດ​ບໍ່​ດີ​ໃນ​ອະດີດ ຫຼື​ຍ້ອນ​ໃຫຍ່​ມາ​ໃນ​ວັດທະນະທຳ​ທີ່​ຜູ້​ຄົນ​ບໍ່​ມັກ​ສະແດງ​ຄວາມ​ຮູ້ສຶກ​ອອກ​ມາ​ຫຼື​ບໍ່​ກໍ​ມັກ​ສະແດງ​ຄວາມ​ຮູ້ສຶກ​ອອກ​ມາ​ຫຼາຍ​ໂພດ ຫຼື​ເຮົາ​ກັບ​ພີ່ນ້ອງ​ອາດ​ມີ​ນິດໄສ​ຕ່າງ​ກັນ​ຊື່ໆ​ເຊັ່ນ: ເຮົາ​ມັກ​ຢູ່​ກັບ​ຫຼາຍ​ຄົນ ສ່ວນ​ພີ່ນ້ອງ​ພັດ​ມັກ​ຢູ່​ງຽບໆ​ແລະ​ຢູ່​ຄົນ​ດຽວ.

11. ພະ​ເຢຊູ​ຮັກສາ​ຄວາມ​ເປັນ​ໝູ່​ກັບ​ຄົນ​ທີ່​ມີ​ບຸກຄະລິກ​ແລະ​ນິດໄສ​ຕ່າງ​ຈາກ​ເພິ່ນ​ໄດ້​ແນວ​ໃດ?

¹¹ ຮຽນ​ແບບ​ຄວາມ​ອົດທົນ​ຂອງ​ພະ​ເຢຊູ. ພະ​ເຢຊູ​ຮັກສາ​ຄວາມ​ເປັນ​ໝູ່​ກັບ​ຄົນ​ທີ່​ມີ​ບຸກຄະລິກ​ແລະ​ນິດໄສ​ຕ່າງ​ຈາກ​ເພິ່ນ. ຕົວຢ່າງ​ເຊັ່ນ: ອັກຄະສາວົກ​ຢາໂກໂບ​ແລະ​ໂຢຮັນ​ເຮັດ​ໃຫ້​ເຫັນ​ວ່າ​ເຂົາເຈົ້າ​ເປັນ​ຄົນ​ທະເຍີທະຍານ​ຕອນ​ທີ່​ໄປ​ຂໍ​ຕຳແໜ່ງ​ທີ່​ສຳຄັນ​ໃນ​ການ​ປົກຄອງ​ຂອງ​ພະເຈົ້າ​ກັບ​ພະ​ເຢຊູ. (ມຣກ. 10:35-37) ແຕ່​ພະ​ເຢຊູ​ພັດ​ເປັນ​ຄົນ​ຖ່ອມ. ເພິ່ນ​ຍອມ​ສະລະ​ຕຳແໜ່ງ​ທີ່​ສູງ​ສົ່ງ​ໃນ​ສະຫວັນ​ເພື່ອ​ມາ​ຢູ່​ໂລກ​ນີ້. (ຟລປ. 2:5-8) ລອງ​ຄິດ​ເບິ່ງ​ແມ້ ບຸກຄະລິກ​ແລະ​ນິດໄສ​ຂອງ​ເຂົາເຈົ້າ​ກັບ​ພະເຢຊູ​ຕ່າງ​ກັນ​ຫຼາຍ​ແທ້ໆ! ແຕ່​ພະ​ເຢຊູ​ກໍ​ຍັງ​ອົດທົນ​ກັບ​ຢາໂກໂບ​ແລະ​ໂຢຮັນ​ແລະ​ອົດທົນ​ກັບ​ຄົນ​ອື່ນໆ​ນຳ.

12. ອັນ​ໃດ​ຊ່ວຍ​ພະ​ເຢຊູ​ໃຫ້​ອົດທົນ​ກັບ​ໝູ່​ຂອງ​ເພິ່ນ?

¹² ພະ​ເຢຊູ​ຄາດໝາຍ​ຈາກ​ໝູ່​ຂອງ​ເພິ່ນ​ຕາມ​ຄວາມ​ເປັນ​ຈິງ. ເພິ່ນ​ຮູ້​ວ່າ​ການ​ທີ່​ຢາໂກໂບ​ແລະ​ໂຢຮັນ​ຂໍ​ແບບ​ນັ້ນ​ເປັນ​ຍ້ອນ​ວ່າ​ລູກສິດ​ຂອງ​ເພິ່ນ​ສ່ວນ​ຫຼາຍ​ມີ​ນ້ຳໃຈ​ມັກ​ແຂ່ງ​ຂັນ. (ມຣກ. 9:34) ພະ​ເຢຊູ​ເອງ​ກໍ​ໃຫຍ່​ມາ​ໃນ​ວັດທະນະທຳ​ແບບ​ດຽວ​ກັນ​ກັບ​ເຂົາເຈົ້າ ເຊິ່ງ​ຕອນ​ນັ້ນ​ພວກ​ຫົວໜ້າ​ສາສະໜາ​ເຮັດ​ໃຫ້​ຫຼາຍ​ຄົນ​ຄິດ​ວ່າ​ການ​ມີ​ຕຳແໜ່ງ​ແລະ​ມີ​ໜ້າ​ມີ​ຕາ​ໃນ​ສັງຄົມ​ເປັນ​ເລື່ອງ​ທີ່​ສຳຄັນ​ຫຼາຍ ເພິ່ນ​ຈຶ່ງ​ເຂົ້າໃຈ​ຄວາມ​ຄິດ​ຂອງ​ພວກ​ລູກສິດ​ແລະ​ອົດທົນ​ກັບ​ເຂົາເຈົ້າ. ເພິ່ນ​ໃຫ້​ເວລາ​ກັບ​ພວກ​ລູກສິດ​ທີ່​ຈະ​ກຳຈັດ​ຄວາມ​ຍິ່ງ​ແລະ​ຄວາມ​ທະເຍີທະຍານ​ຂອງ​ເຂົາເຈົ້າ​ທີ່​ຝັງ​ຮາກ​ເລິກ​ມາ​ຫຼາຍ​ປີ.—ມຣກ. 10:42-45

13. ຄວາມ​ອົດທົນ​ຈະ​ຊ່ວຍ​ເຮົາ​ໃຫ້​ຮັກສາ​ຄວາມ​ເປັນ​ໝູ່​ໄວ້​ໄດ້​ແນວ​ໃດ? (ເອເຟໂຊ 4:2)

¹³ ເຈົ້າ​ຈະ​ຮັກສາ​ຄວາມ​ເປັນ​ໝູ່​ໄວ້​ໄດ້​ແນວ​ໃດ? ຖ້າ​ໝູ່​ມີ​ນິດໄສ​ບາງ​ຢ່າງ​ທີ່​ເຈົ້າ​ບໍ່​ມັກ ກໍ​ຂໍ​ໃຫ້​ອົດທົນ​ກັບ​ລາວ. (ສພສ. 14:29) ເຮົາ​ແຕ່​ລະ​ຄົນ​ມີ​ບຸກຄະລິກ​ແລະ​ນິດໄສ​ແຕກຕ່າງ​ກັນ​ເຊິ່ງ​ສ່ວນ​ຫຼາຍ​ແລ້ວ​ມັນ​ກໍ​ບໍ່​ແມ່ນ​ຂໍ້​ເສຍ​ຫຍັງ ແຕ່​ມັນ​ເປັນ​ສ່ວນ​ໜຶ່ງ​ໃນ​ຕົວ​ຕົນ​ຂອງ​ເຮົາ. ເຮົາ​ຈຶ່ງ​ຮູ້ສຶກ​ຂອບໃຈ​ຕອນ​ທີ່​ພີ່ນ້ອງ​ອົດທົນ​ກັບ​ເຮົາ. (ອ່ານ​ເອເຟໂຊ 4:2) ເຮົາ​ຕ້ອງ​ເບິ່ງ​ຄົນ​ອື່ນ​ຕາມ​ຄວາມ​ເປັນ​ຈິງ​ແລະ​ປ່ອຍ​ໃຫ້​ເຂົາເຈົ້າ​ເປັນ​ໂຕ​ຂອງ​ໂຕເອງ. ຕົວຢ່າງ​ເຊັ່ນ: ໃຫ້​ເຮົາ​ຄິດ​ເຖິງ​ພີ່ນ້ອງ​ທີ່​ຂີ້​ອາຍ​ແລະ​ບໍ່​ຄ່ອຍ​ມັກ​ເວົ້າ. ເຂົາເຈົ້າ​ຕ້ອງ​ໃຊ້​ຄວາມ​ພະຍາຍາມ​ຫຼາຍ​ສ່ຳ​ໃດ​ທີ່​ຈະ​ເຂົ້າ​ສັງຄົມ​ແລະ​ລົມ​ກັບ​ຄົນ​ອື່ນ. ໃນ​ອີກ​ດ້ານ​ໜຶ່ງ ເຮົາ​ອາດ​ຕ້ອງ​ໄດ້​ອົດທົນ​ກັບ​ພີ່ນ້ອງ​ທີ່​ມັກ​ເວົ້າ​ແລະ​ມັກ​ເຂົ້າ​ສັງຄົມ​ນຳ. ເຖິງ​ວ່າ​ເຮົາ​ບໍ່​ສາມາດ​ເປັນ​ໝູ່​ສະໜິດ​ໄດ້​ກັບ​ທຸກ​ຄົນ ແຕ່​ຂໍ​ໃຫ້​ຈື່​ໄວ້​ວ່າ​ຄົນ​ທີ່​ມີ​ບຸກຄະລິກ​ແລະ​ນິດໄສ​ທີ່​ແຕກຕ່າງ​ກັນ​ກໍ​ເປັນ​ໝູ່​ກັນ​ໄດ້.

14. ຄວາມ​ອົດທົນ​ຈະ​ຊ່ວຍ​ເຮົາ​ໃນ​ເລື່ອງ​ໃດ?

¹⁴ ຄວາມ​ອົດທົນ​ຈະ​ຊ່ວຍ​ເຮົາ​ໃຫ້​ເບິ່ງ​ຄຸນລັກສະນະ​ທີ່​ດີ​ຂອງ​ພີ່ນ້ອງ. ເມື່ອ​ເຮົາ​ເຮັດ​ແບບ​ນີ້ ເຮົາ​ກໍ​ຈະ​ເຫັນ​ວ່າ​ເຖິງ​ເຮົາ​ຈະ​ມີ​ບຸກຄະລິກ​ແລະ​ນິດໄສ​ທີ່​ແຕກຕ່າງ​ກັນ​ແຕ່​ກໍ​ສາມາດ​ເປັນ​ໝູ່​ກັນ​ໄດ້. ຕົວຢ່າງ​ເຊັ່ນ: ເຖິງ​ວ່າ​ຢາໂກໂບ​ກັບ​ໂຢຮັນ​ຈະ​ໃຫ້​ຄວາມ​ສຳຄັນ​ຫຼາຍ​ກັບ​ການ​ມີ​ຕຳແໜ່ງ ແຕ່​ມັນ​ກໍ​ສະແດງ​ໃຫ້​ເຫັນ​ວ່າ​ເຂົາເຈົ້າ​ເຊື່ອ​ວ່າ​ການ​ປົກຄອງ​ຂອງ​ພະເຈົ້າ​ເປັນ​ເລື່ອງ​ຈິງ. ພະ​ເຢຊູ​ສັງເກດ​ເຫັນ​ຈຸດ​ນີ້​ແລະ​ເຫັນຄ່າ​ທີ່​ເຂົາເຈົ້າ​ມີ​ຄວາມ​ເຊື່ອ. ຖ້າ​ເຮົາ​ເບິ່ງ​ຂໍ້​ດີ​ຂອງ​ໝູ່ ເຮົາ​ກໍ​ກຳລັງ​ຮຽນ​ແບບ​ພະ​ເຢຊູ​ແລະ​ພະ​ເຢໂຫວາ​ພໍ່​ຂອງ​ເພິ່ນ.

15. ເຮົາ​ສາມາດ​ຂໍ​ຄວາມ​ຊ່ວຍ​ເຫຼືອ​ຈາກ​ໃຜ​ເພື່ອ​ຊ່ວຍ​ເຮົາ​ໃຫ້​ຮັກສາ​ຄວາມ​ເປັນ​ໝູ່​ກັບ​ຄົນ​ທີ່​ມີ​ບຸກຄະລິກ​ແລະ​ນິດໄສ​ທີ່​ແຕກຕ່າງ​ຈາກ​ເຮົາ?

¹⁵ ສິ່ງ​ທີ່​ສຳຄັນ​ທີ່​ສຸດ​ຄື ເຮົາ​ສາມາດ​ອະທິດຖານ​ຂໍ​ໃຫ້​ພະ​ເຢໂຫວາ​ຊ່ວຍ​ເຮົາ​ໃຫ້​ຮັກສາ​ຄວາມ​ເປັນ​ໝູ່​ກັບ​ຄົນ​ທີ່​ມີ​ບຸກຄະລິກ​ແລະ​ນິດໄສ​ທີ່​ແຕກຕ່າງ​ຈາກ​ເຮົາ​ໄດ້. ໃຫ້​ຄິດ​ລ່ວງ​ໜ້າ​ວ່າ​ມີ​ສະຖານະການ​ໃດ​ແດ່​ທີ່​ອາດ​ເຮັດ​ໃຫ້​ເຮົາ​ທົນ​ບໍ່​ໄຫວ ແລ້ວ​ອະທິດຖານ​ເພື່ອ​ໃຫ້​ໃຈ​ເຢັນ. ຂໍ​ໃຫ້​ຈື່​ໄວ້​ວ່າ​ພະ​ເຢໂຫວາ​ເປັນ​ຜູ້​ສ້າງ​ເຮົາ​ແລະ​ເພິ່ນ​ເຂົ້າໃຈ​ດີ​ວ່າ​ເຮົາ​ແຕ່​ລະ​ຄົນ​ບໍ່​ຄື​ກັນ. ສະນັ້ນ ຕອນ​ທີ່​ເຈົ້າ​ອະທິດຖານ ຂໍ​ໃຫ້​ໝັ້ນໃຈ​ວ່າ​ພະ​ເຢໂຫວາ​ຮູ້​ວ່າ​ເຈົ້າ​ຈຳເປັນ​ຕ້ອງ​ມີ​ຫຍັງ​ເພື່ອ​ຈະ​ອົດທົນ​ຕໍ່ໆ​ໄປ​ໄດ້. ແຕ່​ຖ້າ​ເຈົ້າ​ຮູ້ສຶກ​ວ່າ​ຈະ​ອົດທົນ​ບໍ່​ໄຫວ​ແລ້ວ ໃຫ້​ອະທິດຖານ​ຂໍ​ພະລັງ​ບໍລິສຸດ​ຈາກ​ພະ​ເຢໂຫວາ​ເພື່ອ​ຊ່ວຍ​ເຈົ້າ​ໃຫ້​ຄວບຄຸມ​ໂຕເອງ​ໄດ້.—ລກ. 11:13; ຄລຕ. 5:22, 23

ເມື່ອ​ພີ່ນ້ອງ​ເຈັບ​ປ່ວຍ

16. ເຮົາ​ອາດ​ເຈິ​ຂໍ້​ທ້າທາຍ​ຫຍັງ​ແດ່​ຕອນ​ທີ່​ພີ່ນ້ອງ​ເຈັບ​ປ່ວຍ?

¹⁶ ເປັນ​ຫຍັງ​ເລື່ອງ​ນີ້​ຈຶ່ງ​ເປັນ​ຂໍ້​ທ້າທາຍ? ເມື່ອ​ພີ່ນ້ອງ​ເຈັບ​ປ່ວຍ​ທາງ​ຮ່າງກາຍ​ຫຼື​ຈິດ​ໃຈ ເຂົາເຈົ້າ​ອາດ​ເຮັດ​ຫຍັງ​ບາງ​ຢ່າງ​ທີ່​ເຮັດ​ໃຫ້​ເຮົາ​ຮັບມື​ໄດ້​ຍາກ. ຕົວຢ່າງ​ເຊັ່ນ: ເຂົາເຈົ້າ​ອາດ​ບໍ່​ຢາກ​ລົມ​ກັບ​ເຮົາ ມີ​ອາລົມ​ອ່ອນ​ໄຫວ​ງ່າຍ ຫຼື​ອາດ​ເຮັດ​ຫຍັງ​ບາງ​ຢ່າງ​ທີ່​ເຮົາ​ບໍ່​ຄາດ​ຄິດ. ບາງ​ເທື່ອ​ເຂົາເຈົ້າ​ອາດ​ຈະ​ເວົ້າ​ຫຼື​ເຮັດ​ບາງ​ຢ່າງ​ທີ່​ເຮັດ​ໃຫ້​ເຮົາ​ເສຍໃຈ. (ໂຢບ 6:2, 3) ຍ້ອນ​ເຮົາ​ບໍ່​ຮູ້​ວ່າ​ພີ່ນ້ອງ​ກຳລັງ​ເຈິ​ບັນຫາ​ຫຍັງ​ຢູ່ ເຮົາ​ຈຶ່ງ​ອາດ​ຄາດໝາຍ​ຈາກ​ເຂົາເຈົ້າ​ຫຼາຍ​ເກີນ​ໄປ.

17. ເຈົ້າ​ໄດ້​ຮຽນ​ຫຍັງ​ຈາກ​ພະ​ເຢຊູ​ຕອນ​ທີ່​ເພິ່ນ​ປົວ​ບາຣະຕີມາຍ​ທີ່​ເປັນ​ຄົນ​ຕາບອດ?

¹⁷ ຮຽນ​ຈາກ​ຄວາມ​ເມດຕາ​ແລະ​ຄວາມ​ເຫັນອົກເຫັນໃຈ​ຂອງ​ພະ​ເຢຊູ. ພະ​ເຢຊູ​ເມດຕາ​ແລະ​ເຫັນອົກເຫັນໃຈ​ຄົນ​ທີ່​ມີ​ຄວາມ​ທຸກ​ແມ່ນ​ແຕ່​ກັບ​ຄົນ​ທີ່​ເພິ່ນ​ບໍ່​ເຄີຍ​ເຈິ​ມາ​ກ່ອນ. ຕົວຢ່າງ​ເຊັ່ນ: ຂໍ​ໃຫ້​ຄິດ​ເຖິງ​ຕອນ​ທີ່​ເພິ່ນ​ປົວ​ຜູ້​ຊາຍ​ຕາບອດຄົນ​ໜຶ່ງ​ທີ່​ຊື່​ບາຣະຕີມາຍ. ເມື່ອ​ບາຣະຕີມາຍ​ໄດ້​ຍິນ​ວ່າ​ພະ​ເຢຊູ​ກຳລັງ​ຈະ​ກາຍ​ມາ​ແຖວ​ນັ້ນ ລາວ​ຈຶ່ງ​ຮ້ອງ​ສຽງ​ດັງ​ເພື່ອ​ໃຫ້​ພະ​ເຢຊູ​ສົນໃຈ​ລາວ. ຫຼາຍ​ຄົນ​ໄດ້​ບອກ​ໃຫ້​ບາຣະຕີມາຍ​ມິດ. ແຕ່​ລາວ​ຢາກ​ໃຫ້​ພະ​ເຢຊູ​ປິ່ນປົວ​ລາວ​ແທ້ໆ​ລາວ​ຈຶ່ງ​ຮ້ອງ​ດັງ​ກວ່າ​ເກົ່າ. ອາດ​ຈະ​ມີ​ບາງ​ຄົນ​ທີ່​ບໍ່​ມັກ​ສິ່ງ​ທີ່​ບາຣະຕີມາຍ​ເຮັດ​ບໍ? ອາດ​ຈະ​ມີ. ແຕ່​ພະ​ເຢຊູ “ຮູ້ສຶກ​ອີ່ຕົນ” ບາຣະຕີມາຍ ເຊິ່ງ​ໝາຍ​ຄວາມ​ວ່າ​ເພິ່ນ​ຮູ້ສຶກ​ເຫັນອົກເຫັນໃຈ​ລາວ​ຫຼາຍ​ແທ້ໆ. (ມທ. 20:34; ມຣກ. 10:46-52) ພະ​ເຢຊູ​ເວົ້າ​ກັບ​ບາຣະຕີມາຍ​ແບບ​ກະລຸນາ​ແລະ​ຊົມເຊີຍ​ທີ່​ລາວ​ມີ​ຄວາມ​ເຊື່ອ. ຈາກ​ນັ້ນ ພະ​ເຢຊູ​ກໍ​ປົວ​ລາວ​ໃຫ້​ສາມາດ​ເຫັນ​ຮຸ່ງ​ໂດຍ​ການ​ອັດສະຈັນ.

18. ເຮົາ​ຈະ​ຊ່ວຍ​ໝູ່​ທີ່​ກຳລັງ​ເຈິ​ຄວາມ​ທຸກ​ໄດ້​ແນວ​ໃດ? (1 ເທຊະໂລນິກ 5:14)

¹⁸ ເຈົ້າ​ຈະ​ຮັກສາ​ຄວາມ​ເປັນ​ໝູ່​ໄວ້​ໄດ້​ແນວ​ໃດ? ໃຫ້​ເປັນ​ຄົນ​ທີ່​ມີ​ຄວາມ​ເມດຕາ​ແລະ​ເຫັນອົກເຫັນໃຈ. ຄຸນລັກສະນະ​ເຫຼົ່າ​ນີ້​ຈະ​ຊ່ວຍ​ເຈົ້າ​ໃຫ້ “ເວົ້າ​ປອບ​ໃຈ” ພີ່ນ້ອງ​ທີ່​ເຈັບ​ປ່ວຍ​ທາງ​ຮ່າງກາຍ​ຫຼື​ຈິດ​ໃຈ​ໄດ້. (ອ່ານ 1 ເທຊະໂລນິກ 5:14) ຂໍ​ໃຫ້​ຈື່​ວ່າ​ໝູ່​ແທ້​ພ້ອມ​ທີ່​ຈະ​ຊ່ວຍ​ເຫຼືອ​ກັນ​ສະເໝີ​ໂດຍ​ສະເພາະ “ໃນ​ຍາມ​ທີ່​ຍາກ​ລຳບາກ.” (ສພສ. 17:17) ໝູ່​ແບບ​ນີ້​ບໍ່​ພຽງ​ແຕ່​ຮູ້ສຶກ​ເຫັນອົກເຫັນໃຈ​ຕໍ່​ຄົນ​ທີ່​ເຈິ​ຄວາມ​ທຸກ ແຕ່​ລາວ​ຈະ​ພະຍາຍາມ​ເຮັດ​ທຸກ​ສິ່ງ​ທີ່​ລາວ​ເຮັດ​ໄດ້​ເພື່ອ​ໃຫ້​ໝູ່​ສະບາຍ​ໃຈ ເວົ້າ​ໃຫ້​ກຳລັງ​ໃຈ ແລະ​ລົງມື​ຊ່ວຍ​ເຫຼືອ​ນຳ.

19. ເຮົາ​ຈະ​ເຮັດ​ຫຍັງ​ໄດ້​ແດ່​ເພື່ອ​ຈະ​ສະແດງ​ຄວາມ​ເມດຕາ​ແລະ​ເຫັນອົກເຫັນໃຈ? (ເບິ່ງ​ຮູບ​ນຳ)

¹⁹ ເຮົາ​ຈະ​ເຮັດ​ຫຍັງ​ໄດ້​ແດ່​ເພື່ອ​ຈະ​ສະແດງ​ຄວາມ​ເມດຕາ​ແລະ​ເຫັນອົກເຫັນໃຈ? ແນ່ນອນ​ວ່າ​ເຈົ້າ​ບໍ່​ສາມາດ​ເຮັດ​ໃຫ້​ພີ່ນ້ອງ​ເຊົາ​ເຈັບ​ປ່ວຍ​ໄດ້. ແຕ່​ເຈົ້າ​ສາມາດ​ພະຍາຍາມ​ເຂົ້າໃຈ​ຄວາມ​ຮູ້ສຶກ​ແລະ​ເຂົ້າໃຈ​ວ່າ​ພີ່ນ້ອງ​ກຳລັງ​ເຈິ​ຫຍັງ​ຢູ່. (ມທ. 7:12; 1ປຕ. 3:8) ໃຫ້​ຕັ້ງໃຈ​ຟັງ​ເມື່ອ​ພີ່ນ້ອງ​ເວົ້າ​ກ່ຽວກັບ​ສິ່ງ​ທີ່​ລາວ​ກຳລັງ​ເຈິ. ຖ້າ​ເຫັນ​ວ່າ​ເໝາະສົມ​ກໍ​ໃຫ້​ເວົ້າ​ສິ່ງ​ທີ່​ໃຫ້​ກຳລັງ​ໃຈ​ລາວ. (ສພສ. 12:25) ບໍ່​ຄວນ​ຄິດ​ເອົາ​ເອງ​ວ່າ​ເຈົ້າ​ເຂົ້າໃຈ​ສະຖານະການ​ຂອງ​ລາວ​ດີ. (ສພສ. 18:13) ໃຫ້​ອົດທົນ​ກັບ​ລາວ​ແລະ​ຄາດໝາຍ​ຈາກ​ລາວ​ຕາມ​ຄວາມ​ເປັນ​ຈິງ.—ອຟຊ. 4:32

20. ເຈົ້າ​ຢາກ​ເປັນ​ໝູ່​ແບບ​ໃດ?

²⁰ ເຮົາ​ຮູ້ສຶກ​ເຫັນຄ່າ​ແທ້ໆ​ທີ່​ມີ​ໝູ່​ໃນ​ອົງການ​ຂອງ​ພະ​ເຢໂຫວາ. ແຕ່​ເຮົາ​ກໍ​ຕ້ອງ​ຈື່​ໄວ້​ວ່າ​ເຮົາ​ທຸກ​ຄົນ​ບໍ່​ສົມບູນແບບ​ແລະ​ພວກ​ເຮົາ​ຫຼາຍ​ຄົນ​ກໍ​ເຄີຍ​ເຈິ​ເລື່ອງ​ທີ່​ບໍ່​ດີ​ໃນ​ອະດີດ. ຍ້ອນ​ແນວ​ນີ້ ບາງ​ເທື່ອ​ເຮົາ​ຈຶ່ງ​ເວົ້າ​ຫຼື​ເຮັດ​ໃຫ້​ຄົນ​ອື່ນ​ເສຍໃຈ. ສະນັ້ນ ເຮົາ​ຈຶ່ງ​ຮູ້ສຶກ​ຂອບໃຈ​ຫຼາຍ​ເມື່ອ​ພີ່ນ້ອງ​ສະແດງ​ຄວາມ​ຖ່ອມ ອົດທົນ ເມດຕາ ແລະ​ເຫັນອົກເຫັນໃຈ​ເຮົາ ແລະ​ຍັງ​ຮັກສາ​ຄວາມ​ເປັນ​ໝູ່​ກັບ​ເຮົາ​ໄວ້. ສະນັ້ນ ຂໍ​ໃຫ້​ເຮົາ​ພະຍາຍາມ​ເຕັມທີ​ທີ່​ຈະ​ເປັນ​ໝູ່​ແບບ​ນັ້ນ​ຄື​ກັນ.