ໃຜເປັນຕົ້ນເຫດຂອງຄວາມທຸກລຳບາກ?
ຖ້າບໍ່ແມ່ນພະເຈົ້າ ຄັນຊັ້ນແມ່ນໃຜທີ່ເປັນຕົ້ນເຫດຂອງຄວາມທຸກລຳບາກ ຄວາມອຶກຢາກ ຄວາມທຸກຍາກ ສົງຄາມທີ່ໂຫດຮ້າຍ ພະຍາດຮ້າຍແຮງ ແລະໄພທຳມະຊາດ? ຄຳພີໄບເບິນບອກໃຫ້ຮູ້ສາເຫດຫຼັກ 3 ຢ່າງທີ່ເຮັດໃຫ້ມະນຸດເຈິຄວາມທຸກຍາກລຳບາກ ນັ້ນຄື:
ຄວາມເຫັນແກ່ໂຕ ຄວາມໂລບ ແລະຄວາມກຽດຊັງ. “ມະນຸດປົກຄອງມະນຸດແລະຄົນທີ່ຢູ່ໃຕ້ການປົກຄອງກໍຕ້ອງທົນທຸກລຳບາກ.” (ປັນຍາຈານ 8:9) ຫຼາຍເທື່ອຄົນເຮົາຕ້ອງເຈິກັບຄວາມຍາກລຳບາກຍ້ອນຕົກເປັນເຫຍື່ອຂອງຄວາມເຫັນແກ່ໂຕ ຄວາມໂຫດຮ້າຍ ແລະຄວາມບໍ່ສົມບູນແບບຂອງຄົນອື່ນ.
ເວລາແລະເຫດການທີ່ບໍ່ໄດ້ຄາດຄິດ. ຫຼາຍເທື່ອຄົນເຮົາຕ້ອງເຈິກັບຄວາມຍາກລຳບາກ ຍ້ອນ “ເວລາແລະເຫດການທີ່ບໍ່ຄາດຄິດເກີດຂຶ້ນກັບເຂົາເຈົ້າທຸກຄົນ.” (ປັນຍາຈານ 8:9) ນີ້ໝາຍຄວາມວ່າ ບາງເທື່ອຄົນເຮົາກໍເຈິອຸບັດຕິເຫດຍ້ອນຢູ່ຜິດບ່ອນຜິດເວລາ ຫຼືຍ້ອນຄວາມປະໝາດ ຫຼືເຮັດຜິດພາດ.
ຜູ້ປົກຄອງໂລກທີ່ຊົ່ວຮ້າຍ. ຄຳພີໄບເບິນບອກແຈ້ງໆເລີຍວ່າສາເຫດຫຼັກທີ່ເຮັດໃຫ້ມະນຸດມີຄວາມທຸກລຳບາກກໍຍ້ອນ “ໂລກທັງໝົດຢູ່ໃນອຳນາດຊາຕານໂຕຊົ່ວຮ້າຍ.” (1 ໂຢຮັນ 5:19) “ໂຕຊົ່ວຮ້າຍ” ນີ້ກໍຄືຊາຕານ ເຊິ່ງເປັນທູດສະຫວັນທີ່ມີລິດເດດຂອງພະເຢໂຫວາພະເຈົ້າ ແຕ່ມັນ “ບໍ່ໄດ້ຍຶດໝັ້ນໃນຄວາມຈິງ.” (ໂຢຮັນ 8:44) ທູດສະຫວັນຈຳນວນໜຶ່ງໄດ້ໄປຢູ່ຝ່າຍຊາຕານແລະກະບົດຕໍ່ພະເຢໂຫວາເພື່ອພວກມັນຈະເຮັດຕາມຄວາມຕ້ອງການທີ່ເຫັນແກ່ໂຕຂອງໂຕເອງ ຍ້ອນແນວນີ້ພວກມັນຈຶ່ງຖືກເອີ້ນວ່າປີສາດ. (ປະຖົມມະການ 6:1-5) ນັບຕັ້ງແຕ່ຊາຕານກັບພວກປີສາດກະບົດ ພວກມັນໄດ້ໃຊ້ອິດທິພົນທີ່ຊົ່ວຮ້າຍຄວບຄຸມທຸກຢ່າງໃນໂລກໂດຍສະເພາະໃນສະໄໝຂອງເຮົາ. ຕອນນີ້ຊາຕານໃຈຮ້າຍຫຼາຍແລະ “ກຳລັງລໍ້ລວງທົ່ວໂລກໃຫ້ຫຼົງຜິດ.” (ພະນິມິດ 12:9, 12) ຊາຕານເປັນຈອມບົງການທີ່ໂຫດຫ້ຽມ. ມັນດີໃຈຫຼາຍເມື່ອເຫັນມະນຸດເຈິກັບຄວາມທຸກລຳບາກ. ຊາຕານຫັ້ນແຫຼະທີ່ເປັນຕົ້ນເຫດຂອງຄວາມທຸກລຳບາກ ບໍ່ແມ່ນພະເຢໂຫວາພະເຈົ້າ.
ລອງຄິດເບິ່ງ: ມີແຕ່ຄົນທີ່ຫົວໃຈໂຫດຫ້ຽມແລະຊົ່ວຮ້າຍເທົ່ານັ້ນທີ່ເຮັດໃຫ້ຄົນບໍລິສຸດຕ້ອງທຸກທໍລະມານ. ແຕ່ຄຳພີໄບເບິນບອກວ່າ: “ພະເຈົ້າເປັນຄວາມຮັກ.” (1 ໂຢຮັນ 4:8) ຍ້ອນຄຸນລັກສະນະນີ້ຂອງເພິ່ນ ເຮົາຈຶ່ງໝັ້ນໃຈໄດ້ວ່າ “ເປັນໄປບໍ່ໄດ້ທີ່ພະເຈົ້າທ່ຽງແທ້ຈະເຮັດຊົ່ວ ແລະບໍ່ມີທາງທີ່ຜູ້ມີລິດເດດສູງສຸດຈະເຮັດຜິດ.”—ໂຢບ 34:10
ແຕ່ເຈົ້າອາດສົງໄສວ່າ ‘ພະເຈົ້າຜູ້ມີລິດເດດສູງສຸດຈະປ່ອຍໃຫ້ຊາຕານທີ່ຊົ່ວຮ້າຍປົກຄອງໂລກນີ້ໄປອີກດົນປານໃດ?’ ເຮົາໄດ້ເຫັນແລ້ວວ່າ ພະເຢໂຫວາຊັງຄວາມຊົ່ວແລະເພິ່ນເຈັບປວດໃຈຫຼາຍທີ່ເຫັນເຮົາເຈິຄວາມຍາກລຳບາກ. ຄຳພີໄບເບິນຍັງບອກເຮົາວ່າ: “ໃຫ້ຝາກຄວາມອຸກໃຈທັງໝົດໄວ້ກັບພະເຈົ້າ ຍ້ອນເພິ່ນເປັນຫ່ວງພວກເຈົ້າ.” (1 ເປໂຕ 5:7) ພະເຢໂຫວາຮັກເຮົາແລະເພິ່ນມີລິດເດດທີ່ຈະກຳຈັດຄວາມທຸກລຳບາກແລະຄວາມບໍ່ຍຸຕິທຳທຸກຢ່າງໃຫ້ໝົດໄປ. ບົດຕໍ່ໄປຈະເວົ້າເຖິງເລື່ອງນີ້.a
a ສຳລັບຂໍ້ມູນເພີ່ມເຕີມທີ່ວ່າເປັນຫຍັງໂລກນີ້ຈຶ່ງມີຄວາມທຸກລຳບາກຫຼາຍແທ້ ຂໍໃຫ້ເບິ່ງບົດທີ 26 ໃນປຶ້ມຊີວິດທີ່ມີຄວາມສຸກຕະຫຼອດໄປ! ທີ່ຈັດພິມໂດຍພະຍານພະເຢໂຫວາແລະສາມາດດາວໂຫຼດປຶ້ມນີ້ໄດ້ຟຣີໃນເວັບໄຊ jw.org.