ໜຸ່ມສາວຖາມວ່າ
ການມັກຄົນເພດດຽວກັນຜິດບໍ?
“ເມື່ອເຂົ້າສູ່ໄວລຸ້ນ ເລື່ອງໜຶ່ງທີ່ຍາກທີ່ສຸດສຳລັບຂ້ອຍແມ່ນຂ້ອຍເລີ່ມມັກຜູ້ຊາຍນຳກັນ. ຂ້ອຍຄິດວ່າມັນເປັນພຽງຄວາມຮູ້ສຶກທີ່ເກີດຂຶ້ນຊົ່ວຄາວ ແຕ່ມັນບໍ່ໄດ້ເປັນແບບນັ້ນ.”—ເດວິດ ອາຍຸ 23 ປີ
ເດວິດເປັນພະຍານພະເຢໂຫວາ ແລະລາວຢາກເຮັດໃຫ້ພະເຢໂຫວາພໍໃຈ. ແຕ່ເພິ່ນຈະພໍໃຈບໍຖ້າລາວມັກຜູ້ຊາຍນຳກັນ? ທີ່ຈິງແລ້ວ ພະເຢໂຫວາຄິດແນວໃດເລື່ອງການຮັກເພດດຽວກັນ?
ຄຳພີໄບເບິນເວົ້າແນວໃດ?
ຄົນໃນແຕ່ລະວັດທະນະທຳຫຼືໃນແຕ່ລະຍຸກສະໄໝມີຄວາມຄິດຕ່າງກັນໃນເລື່ອງການມັກຄົນເພດດຽວກັນ ແຕ່ເຮົາບໍ່ “ຄ້ອຍໄປນຳຄຳສອນຜິດໆ” ຫຼືຄວາມຄິດຂອງຄົນສ່ວນຫຼາຍ “ຄືກັບເຮືອທີ່ຖືກຄື້ນແລະລົມຊັດໄປຊັດມາ” (ເອເຟໂຊ 4:14) ເຮົາຄິດຄືກັບທີ່ຄຳພີໄບເບິນສອນແລະເຊື່ອໝັ້ນໃນມາດຕະຖານຂອງຄຳພີໄບເບິນເລື່ອງການມັກເພດດຽວກັນ (ແລະເລື່ອງອື່ນໆນຳ).
ຄຳພີໄບເບິນກຳນົດມາດຕະຖານເລື່ອງການມັກຄົນເພດດຽວກັນໄວ້ຢ່າງຊັດເຈນ. ຄຳພີໄບເບິນບອກວ່າ:
“ຫ້າມຜູ້ຊາຍກັບຜູ້ຊາຍມີເພດສຳພັນກັນ.”—ລະບຽບພວກເລວີ 18:22
“ພະເຈົ້າຈຶ່ງປ່ອຍໃຫ້ເຂົາເຈົ້າເຮັດຕາມຄວາມຕ້ອງການທີ່ບໍ່ສະອາດທີ່ຢູ່ໃນໃຈ...ໃຫ້ເຂົາເຈົ້າມີຕັນຫາແບບທີ່ເປັນຕາອາຍ. ຜູ້ຍິງປ່ຽນຈາກການນອນນຳຜູ້ຊາຍໄປນອນນຳຜູ້ຍິງນຳກັນ.”—ໂຣມ 1:24, 26
“ຢ່າຕົວະໂຕເອງ. ຄົນເຮັດຜິດສິນລະທຳທາງເພດ ຄົນຂາບໄຫວ້ຮູບບູຊາ ຄົນຫຼິ້ນຊູ້ ຜູ້ຊາຍທີ່ນອນນຳຜູ້ຊາຍ ຄົນຂີ້ລັກ ຄົນໂລບ ຄົນຂີ້ເຫຼົ້າ ຄົນປາກຮ້າຍ ແລະຄົນມັກຂູດຮີດ ຈະບໍ່ມີສ່ວນໃນການປົກຄອງຂອງພະເຈົ້າ.”—1 ໂກຣິນໂທ 6: 9, 10
ທີ່ຈິງ ພະເຢໂຫວາຕັ້ງມາດຕະຖານນີ້ໄວ້ສຳລັບມະນຸດທຸກຄົນ ບໍ່ວ່າລາວຈະມັກຄົນເພດດຽວກັນຫຼືເພດກົງກັນຂ້າມ. ຄວາມຈິງກໍຄື ເຮົາທຸກຄົນຕ້ອງພະຍາຍາມຄວບຄຸມໂຕເອງເພື່ອຈະບໍ່ເຮັດສິ່ງທີ່ພະເຢໂຫວາບໍ່ພໍໃຈ.—ໂກໂລຊາຍ 3:5
ນີ້ໝາຍຄວາມວ່າ...?
ນີ້ໝາຍຄວາມວ່າຄຳພີໄບເບິນສອນໃຫ້ຊັງຄົນທີ່ເປັນເກບໍ?
ບໍ່ແມ່ນ. ຄຳພີໄບເບິນບໍ່ເຄີຍສອນໃຫ້ຊັງຜູ້ໃຜ ບໍ່ວ່າລາວຈະເປັນເກຫຼືເປັນຜູ້ຊາຍແທ້ໆຫຼືເປັນຜູ້ຍິງແທ້ໆ. ຄຳພີໄບເບິນບອກເຮົາ “ໃຫ້ພະຍາຍາມສ້າງສັນຕິສຸກກັບທຸກຄົນ” ບໍ່ວ່າລາວຈະໃຊ້ຊີວິດແບບໃດ. (ເຮັບເຣີ 12:14) ສະນັ້ນ ເປັນເລື່ອງຜິດທີ່ຈະໄປລໍ້ ທຳຮ້າຍ ຫຼືເຮັດອັນໃດກໍຕາມທີ່ເປັນການດູຖູກຄົນທີ່ມັກເພດດຽວກັນ.
ນີ້ໝາຍຄວາມວ່າພະຍານພະເຢໂຫວາຄວນຕໍ່ຕ້ານກົດໝາຍທີ່ອະນຸຍາດໃຫ້ຄົນເພດດຽວກັນແຕ່ງດອງກັນບໍ?
ຄຳພີໄບເບິນບອກໃຫ້ຮູ້ວ່າມາດຕະຖານຂອງພະເຢໂຫວາເລື່ອງການແຕ່ງດອງແມ່ນຜູ້ຊາຍຕ້ອງແຕ່ງດອງກັບຜູ້ຍິງເທົ່ານັ້ນ. (ມັດທາຍ 19:4-6) ແຕ່ກົດໝາຍເລື່ອງການແຕ່ງດອງຂອງຄົນເພດດຽວກັນຖືວ່າເປັນປະເດັນທາງການເມືອງ ບໍ່ແມ່ນປະເດັນທາງສິນລະທຳ ແລະຄຳພີໄບເບິນບອກວ່າຄລິດສະຕຽນຕ້ອງເປັນກາງໃນເລື່ອງການເມືອງ. (ໂຢຮັນ 18:36) ດັ່ງນັ້ນ ຄລິດສະຕຽນຈະບໍ່ສະໜັບສະໜູນຫຼືຕໍ່ຕ້ານກົດໝາຍຂອງລັດຖະບານບໍ່ວ່າເລື່ອງໃດ ລວມທັງກົດໝາຍເລື່ອງການແຕ່ງດອງລະຫວ່າງຄົນເພດດຽວກັນຫຼືການມັກຄົນເພດດຽວກັນນຳ.
ແຕ່ຖ້າ...?
ແຕ່ຖ້າບາງຄົນໃຊ້ຊີວິດແບບຄົນທີ່ມັກຄົນເພດດຽວກັນເດ ລາວຈະປ່ຽນໄດ້ບໍ?
ໄດ້ແທ້. ທີ່ຈິງ ບາງຄົນໃນສະໄໝແຕ່ກີ້ປ່ຽນແປງໄດ້. ຫຼັງຈາກທີ່ຄຳພີໄບເບິນບອກວ່າ ຄົນທີ່ມັກເພດດຽວກັນຈະບໍ່ມີສ່ວນໃນການປົກຄອງຂອງພະເຈົ້າ ຂໍ້ຕໍ່ມາບອກວ່າ: “ພວກເຈົ້າບາງຄົນເຄີຍເປັນແບບນັ້ນ.”—1 ໂກຣິນໂທ 6:11
ນີ້ໝາຍຄວາມວ່າຄົນທີ່ປ່ຽນໄດ້ແລ້ວຈະບໍ່ຮູ້ສຶກມັກຄົນເພດດຽວກັນອີກເລີຍບໍ? ບໍ່ແມ່ນ. ຄຳພີໄບເບິນບອກວ່າ ລາວຕ້ອງ: “ປ່ຽນນິດໄສໃໝ່ທີ່ມາຈາກພະເຈົ້າໂດຍໃຊ້ຄວາມຮູ້ທີ່ຖືກຕ້ອງ ເຊິ່ງເປັນນິດໄສທີ່ຄ່ອຍໆຖືກສ້າງຂຶ້ນຕາມແບບເພິ່ນ.” (ໂກໂລຊາຍ 3:10) ສະນັ້ນ ຄົນທີ່ເຄີຍໃຊ້ຊີວິດແບບຄົນທີ່ມັກຄົນເພດດຽວກັນຈະປ່ຽນແປງແບບຄ່ອຍເປັນຄ່ອຍໄປ.
ແຕ່ຖ້າຄົນທີ່ຢາກເຮັດຕາມມາດຕະຖານຂອງພະເຢໂຫວາຍັງຮູ້ສຶກມັກຄົນເພດດຽວກັນຢູ່ເດ?
ຕາມປົກກະຕິແລ້ວເມື່ອຄົນເຮົາເກີດຄວາມຮູ້ສຶກບາງຢ່າງ ເຮົາສາມາດເລືອກທີ່ຈະຢຸດຄວາມຮູ້ສຶກນັ້ນຫຼືເຮັດບາງຢ່າງເພື່ອບໍ່ໃຫ້ເກີດຄວາມຮູ້ສຶກນັ້ນຂຶ້ນມາອີກ. ເປັນໄປໄດ້ແນວໃດ? ຄຳພີໄບເບິນບອກວ່າ: “ໃຫ້ພວກເຈົ້າໃຊ້ຊີວິດຕາມການຊີ້ນຳຈາກພະລັງຂອງພະເຈົ້າ ແລ້ວພວກເຈົ້າຈະບໍ່ເຮັດຕາມຄວາມຕ້ອງການຂອງຄົນທີ່ບໍ່ສົມບູນແບບ”—ຄາລາເຕຍ 5:16
ຂໍໃຫ້ສັງເກດວ່າ ຂໍ້ນີ້ບໍ່ໄດ້ບອກວ່າຄົນທີ່ເຄີຍໃຊ້ຊີວິດແບບຄົນທີ່ມັກຄົນເພດດຽວກັນຈະບໍ່ມີຄວາມຕ້ອງການທີ່ຜິດໆອີກແລ້ວ. ແຕ່ບອກວ່າຖ້າລາວໃຊ້ຊີວິດຕາມການຊີ້ນຳຈາກພະລັງຂອງພະເຈົ້າ ໂດຍການສຶກສາຄຳພີໄບເບິນແລະອະທິດຖານເປັນປະຈຳ ລາວກໍຈະຕ້ານທານຄວາມຕ້ອງການນັ້ນໄດ້.
ເລື່ອງນີ້ເກີດຂຶ້ນແທ້ກັບເດວິດທີ່ເວົ້າເຖິງກ່ອນໜ້ານີ້. ຫຼັງຈາກເວົ້າໃຫ້ພໍ່ແມ່ທີ່ເປັນພະຍານພະເຢໂຫວາຟັງກ່ຽວກັບບັນຫານີ້ແລະເຮັດຕາມຄຳແນະນຳໃນຄຳພີໄບເບິນ ລາວບອກວ່າ: “ຂ້ອຍຮູ້ສຶກຄືກັບວ່າຍົກພູອອກຈາກເອິກ. ຖ້າຂ້ອຍລົມກັບພໍ່ແມ່ໄວກວ່ານີ້ ຂ້ອຍຄືຊິມີຄວາມສຸກກັບຊີວິດຕອນເປັນໄວລຸ້ນຫຼາຍກວ່ານີ້.”
ໃນທີ່ສຸດ ເຮົາຈະມີຄວາມສຸກຫຼາຍກວ່າຖ້າເຮົາເຮັດຕາມມາດຕະຖານຂອງພະເຢໂຫວາ. ເຮົາໝັ້ນໃຈວ່າມາດຕະຖານນີ້ “ຍຸຕິທຳແລະເຮັດໃຫ້ມີຄວາມສຸກ” ແລະ “ຜູ້ທີ່ເຮັດຕາມຈະໄດ້ລາງວັນໃຫຍ່.”—ເພງສັນລະເສີນ 19:8, 11