ໜຸ່ມສາວຖາມວ່າ
ການແຕ່ງໂຕຂອງຂ້ອຍເປັນແນວໃດ?
ເປັນຫຍັງເຈົ້າຄວນສົນໃຈການແຕ່ງໂຕຂອງເຈົ້າ? ຍ້ອນເຄື່ອງນຸ່ງບົ່ງບອກຕົວຕົນ. ການແຕ່ງໂຕຂອງເຈົ້າບົ່ງບອກຫຍັງ?
ຄວາມຄິດຜິດໆ 3 ຢ່າງແລະວິທີຫຼີກລ່ຽງ
ຄວາມຄິດຜິດໆຢ່າງທີ 1: ໃຫ້ສື່ກຳນົດວິທີການແຕ່ງໂຕຂອງເຈົ້າ.
ໄວລຸ້ນຊື່ເທເຣຊາບອກວ່າ: “ບາງເທື່ອຂ້ອຍກໍແຕ່ງໂຕຕາມກະແສຍ້ອນຂ້ອຍເຫັນໂຄສະນາຫຼາຍໂພດກ່ຽວກັບເລື່ອງນີ້. ເມື່ອເຈົ້າເຫັນຄົນອື່ນໃສ່ເຄື່ອງນຸ່ງສະຕາຍແບບນີ້ ເຈົ້າກໍອົດບໍ່ໄດ້ທີ່ຈະຮຽນແບບ.”
ບໍ່ແມ່ນແຕ່ໄວລຸ້ນຜູ້ຍິງເທົ່ານັ້ນທີ່ໄດ້ຮັບຜົນກະທົບຈາກສື່ໂຄສະນາ. ປຶ້ມ The Everything Guide to Raising Adolescent Boys ບອກວ່າ: “ໄວລຸ້ນຜູ້ຊາຍກໍອ່ອນໄຫວຕໍ່ກະແສແຟຊັ້ນຄືກັນ ແລະຕົກເປັນເປົ້າຂອງພວກການຕະຫຼາດ.”
ທາງທີ່ດີກວ່າ: ຄຳພີໄບເບິນບອກວ່າ: “ຄົນທີ່ຂາດປະສົບການເຊື່ອຄຳເວົ້າທຸກຄຳ ແຕ່ຄົນຮອບຄອບຄິດຄັກໆກ່ຽວກັບຜົນທີ່ຈະຕາມມາ.” (ສຸພາສິດ 14:15) ເພື່ອຈະເຮັດຕາມຫຼັກການນີ້ ໃຫ້ສັງເກດສິ່ງທີ່ເຈົ້າເຫັນໃນໂຄສະນາ ເຊັ່ນ: ເມື່ອເຈົ້າເຫັນໂຄສະນາເຄື່ອງນຸ່ງທີ່ຫຼາຍຄົນບອກວ່າ: “ຖືກໃຈແຮງ” “ກຳລັງຮິດ” ຫຼື “ເຊັກຊີ້” ໃຫ້ຖາມໂຕເອງວ່າ:
‘ໃຜໄດ້ກຳໄລແທ້ໆຖ້າຂ້ອຍຕິດຕາມກະແສແຟຊັ້ນນັ້ນ?’
‘ຄົນອື່ນຈະຄິດວ່າຂ້ອຍສະໜັບສະໜູນການໃຊ້ຊີວິດແບບໃດ?’
‘ນີ້ແມ່ນການໃຊ້ຊີວິດທີ່ຂ້ອຍມັກແທ້ໆບໍ ແລະອັນໃດແມ່ນສິ່ງທີ່ຂ້ອຍຄວນຍຶດໝັ້ນ?’
ເຄັດລັບເລື່ອງແຟຊັ້ນ: ໃນອາທິດໜຶ່ງ ໃຫ້ເບິ່ງໂຄສະນາເຄື່ອງນຸ່ງແລະສື່ຕ່າງໆທີ່ເນັ້ນເລື່ອງແຟຊັ້ນ ແລ້ວຖາມໂຕເອງວ່າ: ‘ເຂົາເຈົ້າເນັ້ນການໃຊ້ຊີວິດແບບໃດ? ມີຫຍັງບາງຢ່າງທີ່ເຮັດໃຫ້ຮູ້ສຶກວ່າເຈົ້າຕ້ອງເຮັດຕາມກະແສນີ້ບໍ?’ ໄວລຸ້ນຊື່ຄາເລນບອກວ່າ: “ໂຄສະນາພະຍາຍາມກົດດັນວ່າເຈົ້າຕ້ອງເພີເຟັກ ແຕ່ງໂຕດີ ແລະໂຊຮູບຮ່າງທີ່ ‘ເພີເຟັກ’ ຂອງເຈົ້າ. ນັກໂຄສະນາຮູ້ວ່າເປົ້າໝາຍທີ່ງ່າຍທີ່ສຸດກໍຄືພວກໄວລຸ້ນ.”
ຄວາມຄິດຜິດໆຢ່າງທີ 2: ແຕ່ງໂຕຕາມແຟຊັ້ນເພື່ອຈະເປັນຄືກັບຄົນອື່ນໆ.
ໄວລຸ້ນຊື່ມານເວວບອກວ່າ: “ຖ້າເຄື່ອງນຸ່ງແບບໃດກຳລັງຮິດ ທຸກຄົນກໍຈະໃສ່ຄືກັນໝົດ. ຖ້າເຈົ້າບໍ່ໃສ່ ຄົນອື່ນກໍຈະເວົ້າໃຫ້.” ໄວລຸ້ນຊື່ແອນນາບອກວ່າ: “ເລື່ອງແຟຊັ້ນຫັ້ນບໍ່ປານໃດດອກ ແຕ່ມັນເປັນເລື່ອງຂອງກະແສ.”
ທາງທີ່ດີກວ່າ: ຄຳພີໄບເບິນບອກວ່າ: “ໃຫ້ເຊົາຮຽນແບບຄົນໃນໂລກນີ້.” (ໂຣມ 12:2) ເພື່ອຈະເຮັດຕາມຫຼັກການນີ້ ໃຫ້ເບິ່ງຕູ້ເຄື່ອງນຸ່ງຂອງເຈົ້າແລ້ວຖາມໂຕເອງວ່າ:
‘ອັນໃດແມ່ນສິ່ງສຳຄັນໃນການເລືອກເຄື່ອງນຸ່ງຂອງຂ້ອຍ?’
‘ການມີເຄື່ອງນຸ່ງແບນເນມສຳຄັນຕໍ່ຂ້ອຍຫຼາຍສ່ຳໃດ?’
‘ຂ້ອຍແຕ່ງໂຕເພື່ອໃຫ້ຄົນອື່ນປະທັບໃຈບໍ?’
ເຄັດລັບເລື່ອງແຟຊັ້ນ: ແທນທີ່ຈະສົນໃຈແຕ່ 2 ທາງເລືອກເຊິ່ງກໍຄື: ກຳລັງຮິດ (ແລະທຸກຄົນກໍໃສ່) ຫຼືຕົກຍຸກ (ແລະບໍ່ມີໃຜໃສ່) ໃຫ້ຄິດເຖິງທາງເລືອກທີ 3 ເຊິ່ງກໍຄື: ໝັ້ນໃຈແລະຮູ້ສຶກປອດໄພ. ແຮ່ງເຈົ້າໃສ່ແລ້ວສະບາຍໃຈ ເຈົ້າກໍບໍ່ຕ້ອງກັງວົນວ່າຈະຕ້ອງໃສ່ເຄື່ອງນຸ່ງທີ່ກຳລັງຮິດບໍ.
ຄວາມຄິດຜິດໆຢ່າງທີ 3: ຄິດວ່າ ‘ແຮ່ງເຊັກຊີ້ກໍແຮ່ງດູດີ’
ໄວລຸ້ນຜູ້ຍິງຊື່ເຈນນິເຟີ້ຍອມຮັບ: “ເວົ້າກົງໆເລີຍ ບາງເທື່ອຂ້ອຍກໍຖືກລໍ້ໃຈໃຫ້ນຸ່ງເຄື່ອງທີ່ເຊັກຊີ້ແດ່ ເຊັ່ນ: ເຂີນໆ ຟິດໆ ຫຼືໂປ້ໆ.”
ທາງທີ່ດີກວ່າ: ຄຳພີໄບເບິນບອກວ່າ: “ຢ່າໃຫ້ຄວາມງາມຂອງເຈົ້າຢູ່ແຕ່ພາຍນອກ...ແຕ່ໃຫ້ຄວາມງາມຂອງເຈົ້າຢູ່ພາຍໃນ.” (1 ເປໂຕ 3:3, 4) ເພື່ອຈະເຮັດຕາມຫຼັກການນີ້ ໃຫ້ຄິດເບິ່ງວ່າອັນໃດເປັນຕາສົນໃຈຫຼາຍກວ່າກັນລະຫວ່າງເດັ່ນສະດຸດຕາຫຼືນິດໄສທີ່ເປັນຕາຮັກ.
ເຄັດລັບເລື່ອງແຟຊັ້ນ: ‘ເຄື່ອງປະດັບ’ ທີ່ດີທີ່ສຸດຂອງເຈົ້າແມ່ນ ຄວາມຈຽມໂຕ. ແມ່ນຢູ່ທີ່ຄຸນລັກສະນະນີ້ບໍ່ໄດ້ເປັນທີ່ນິຍົມຫຼາຍໃນປັດຈຸບັນ ແຕ່ໃຫ້ລອງຄິດແບບນີ້:
ເຈົ້າເຄີຍລົມກັບຄົນທີ່ເວົ້າຫຼາຍ ແລະເວົ້າແຕ່ເລື່ອງໂຕເອງເທົ່ານັ້ນບໍ? ສິ່ງທີ່ໜ້າເສົ້າໃຈກໍຄື ລາວອາດບໍ່ສົນໃຈເຈົ້າເລີຍ!
ການນຸ່ງເຄື່ອງກໍເປັນຄືກັບການສົນທະນາ ມັນອາດເຮັດໃຫ້ຄົນອື່ນບໍ່ຢາກຢູ່ໃກ້ເຈົ້າຍ້ອນເຈົ້າ ‘ສົນໃຈແຕ່ໂຕເອງ’
ຖ້າເຈົ້າແຕ່ງໂຕໃຫ້ເດັ່ນ ເຈົ້າກໍເປັນຄືກັບຜູ້ນັ້ນ. ເຈົ້າກຳລັງສົ່ງສັນຍານບອກທຸກຄົນວ່າ ‘ເບິ່ງຂ້ອຍແມ້’ ແລະມັນເຮັດໃຫ້ເຈົ້າເບິ່ງບໍ່ດີຫຼືເບິ່ງເປັນຄົນທີ່ສົນໃຈແຕ່ໂຕເອງ ຫຼືອາດເປັນທັງສອງຢ່າງ. ນອກຈາກນັ້ນຍັງເຮັດໃຫ້ເຈົ້າເປັນຈຸດສົນໃຈຂອງຄົນອື່ນລວມທັງຄົນບໍ່ດີນຳ.
ແທນທີ່ຈະແຕ່ງໂຕໃຫ້ເດັ່ນເພື່ອເຮັດໃຫ້ຄົນອື່ນມາສົນໃຈເຮົາ ໃຫ້ລອງພະຍາຍາມເປັນຄົນຈຽມໂຕ. ໄວລຸ້ນທີ່ຊື່ໂມນິກ້າບອກວ່າ: “ການເປັນຄົນຈຽມໂຕບໍ່ໄດ້ໝາຍຄວາມວ່າເຈົ້າຕ້ອງແຕ່ງໂຕຄືກັບແມ່ຕູ້. ແຕ່ມັນໝາຍຄວາມວ່າເຈົ້ານັບຖືໂຕເອງແລະຄົນອ້ອມຂ້າງ.”