ມາຣິອາຄົນມັກດາເລນແມ່ນໃຜ?
ຄຳຕອບຈາກຄຳພີໄບເບິນ
ມາຣິອາຄົນມັກດາເລນເປັນລູກສິດທີ່ສັດຊື່ຂອງພະເຢຊູຄລິດ. ຄຳວ່າມັກດາເລນອາດເປັນຊື່ເມືອງມັກດາເລນ (ຫຼືມາຄາດານ) ທີ່ຢູ່ໃກ້ທະເລຄາລີເລ ແລະມາຣິອາກໍອາດຈະເຄີຍຢູ່ຫັ້ນ.
ມາຣິອາຄົນມັກດາເລນເປັນໜຶ່ງໃນກຸ່ມຜູ້ຍິງທີ່ເດີນທາງຮ່ວມກັບພະເຢຊູແລະພວກລູກສິດ. ລາວຊ່ວຍໃຫ້ພວກລູກສິດມີສິ່ງຈຳເປັນ. (ລູກາ 8:1-3) ລາວເຫັນພະເຢຊູຖືກປະຫານຊີວິດ ແລະລາວກໍເປັນໜຶ່ງໃນກຸ່ມຄົນທຳອິດທີ່ໄດ້ເຫັນພະເຢຊູຫຼັງຈາກທີ່ເພິ່ນຄືນມາຈາກຕາຍ.—ມາຣະໂກ 15:40; ໂຢຮັນ 20:11-18
ມາຣິອາຄົນມັກດາເລນເຄີຍເປັນໂສເພນີບໍ?
ຄຳພີໄບເບິນບໍ່ໄດ້ບອກວ່າມາຣິອາຄົນມັກດາເລນເປັນໂສເພນີ. ມີແຕ່ເວົ້າເຖິງພູມຫຼັງຂອງລາວວ່າ ພະເຢຊູໄລ່ປີສາດ 7 ໂຕອອກຈາກລາວ.—ລູກາ 8:2
ເປັນຫຍັງຫຼາຍຄົນບອກວ່າມາຣິອາຄົນມັກດາເລນເຄີຍເປັນໂສເພນີກ່ອນຈະມາເປັນລູກສິດຂອງພະເຢຊູ? ຫຼາຍຮ້ອຍປີຫຼັງຈາກມາຣິອາຄົນມັກດາເລນຕາຍ ບາງຄົນບອກວ່າລາວເປັນຄົນດຽວກັນກັບຜູ້ຍິງທີ່ຄຳພີໄບເບິນບັນທຶກໄວ້ແຕ່ບໍ່ໄດ້ບອກຊື່ (ອາດຈະເປັນໂສເພນີ) ເຊິ່ງໃຊ້ນ້ຳຕາແລະຜົມຂອງໂຕເອງເຊັດຕີນໃຫ້ພະເຢຊູ. (ລູກາ 7:36-38) ແຕ່ບໍ່ມີຫຼັກຖານຈາກຄຳພີໄບເບິນທີ່ສະໜັບສະໜູນຄວາມເຊື່ອແບບນີ້.
ມາຣິອາຄົນມັກດາເລນເປັນ “ອັກຄະທູດຂອງອັກຄະທູດ” ບໍ?
ບໍ່. ຄລິດຕະຈັກໂຣມັນກາໂຕລິກເອີ້ນມາຣິອາວ່າ “ນັກບຸນມາຣິອາ” ແລະ “ອັກຄະທູດຂອງອັກຄະທູດ” ຍ້ອນລາວຢູ່ໃນຄົນກຸ່ມທຳອິດທີ່ບອກພວກອັກຄະສາວົກວ່າພະເຢຊູຄືນມາຈາກຕາຍ. (ໂຢຮັນ 20:18) ແຕ່ນີ້ບໍ່ໄດ້ເຮັດໃຫ້ມາຣິອາເປັນອັກຄະທູດຫຼືອັກຄະສາວົກ ແລະບໍ່ມີບ່ອນໃດໃນຄຳພີໄບເບິນທີ່ເອີ້ນລາວແບບນັ້ນ.—ລູກາ 6:12-16
ຄຳພີໄບເບິນຂຽນແລ້ວໃນໄລຍະທ້າຍສະຕະວັດທີ 1. ແຕ່ຫຼາຍປີຕໍ່ມາ ຜູ້ມີອຳນາດໃນຄລິດຕະຈັກໄດ້ຍົກຍ້ອງມາຣິອາຄົນມັກດາເລນວ່າເປັນນັກບຸນ. ມີຜົນງານການຂຽນຈາກສະຕະວັດທີ 2 ແລະ 3 ເຊິ່ງບໍ່ໄດ້ເປັນສ່ວນໜຶ່ງຂອງຄຳພີໄບເບິນບອກວ່າລູກສິດບາງຄົນຂອງພະເຢຊູອິດສາມາຣິອາຄົນມັກດາເລນ ແຕ່ເລື່ອງທີ່ແຕ່ງຂຶ້ນນີ້ບໍ່ໄດ້ເປັນສ່ວນໜຶ່ງຂອງຄຳພີໄບເບິນທີ່ໄດ້ຮັບການດົນໃຈ.
ມາຣິອາຄົນມັກດາເລນເປັນເມຍຂອງພະເຢຊູບໍ?
ບໍ່. ຄຳພີໄບເບິນບອກຢ່າງຈະແຈ້ງວ່າພະເຢຊູບໍ່ເຄີຍແຕ່ງດອງ.a
a ເບິ່ງບົດຄວາມ “ພະເຢຊູເຄີຍແຕ່ງດອງບໍ? ພະເຢຊູມີອ້າຍເອື້ອຍນ້ອງບໍ?”