ເລື່ອງທີ່ໜ້າສົນໃຈຈາກຄຳພີໄບເບິນ
ດາງຈັບປາທີ່ຄົນໃນສະໄໝຄຳພີໄບເບິນໃຊ້
ຄົນທີ່ອ່ານຄຳພີໄບເບິນອາດຈື່ໄດ້ວ່າລູກສິດຂອງພະເຢຊູບາງຄົນມີອາຊີບຫາປາ. (ມຣກ. 1:16-20) ເຂົາເຈົ້າອາດຈະໃຊ້ດາງຈັບປາຕອນທີ່ເຂົາເຈົ້າຫາປາໃນທະເລຄາລີເລ.
ດາງຈັບປາເຮັດຈາກເຊືອກຫຼືດ້າຍລີນິນທີ່ເອົາມາສານກັນເປັນຕານ່າງ. ຕານ່າງຂອງດາງຈັບປາຈະມີຂະໜາດນ້ອຍຫຼືໃຫຍ່ກໍຂຶ້ນກັບວ່າຈະເອົາໄປຈັບປາຊະນິດໃດ. ປົກກະຕິແລ້ວດາງຂະໜາດນ້ອຍຈະມີແນວຖ່ວງນ້ຳໜັກທີ່ເຮັດຈາກຫີນຫຼືກົ່ວຕິດຢູ່ຕີນດາງເພື່ອໃຫ້ມັນຈົມນ້ຳ. ສ່ວນດາງໃຫຍ່ຈະມີໝາກຕຸ້ມເຫຼັກຕິດຢູ່ຂອບດາງທາງລຸ່ມແລະມີລູກລອຍທີ່ເຮັດຈາກໄມ້ຫຼືໄມ້ກ໊ອກ (cork) ຕິດຢູ່ຂອບເທິງຂອງດາງ.
ດາງຈັບປາມີລາຄາແພງຫຼາຍ. ມັນອາດຂາດໄດ້ຖ້າໄປເກາະກັບກ້ອນຫີນຢູ່ໃຕ້ທະເລຫຼືຖ້າຈັບປາໄດ້ຫຼາຍແລະໜັກໂພດ. (ລກ. 5:6) ຄຳພີໄບເບິນບອກວ່າຢາໂກໂບກັບໂຢຮັນ “ກຳລັງແປງດາງ” ໂດຍໃຊ້ເຂັມສຳລັບແປງດາງແລະດ້າຍລີນິນ. (ມທ. 4:21) ຄົນຫາປາອາດຈະຕ້ອງແປງດາງທຸກເທື່ອຫຼັງຈາກກັບເຂົ້າຝັ່ງ. ນອກຈາກນັ້ນ ລູກາຍັງບອກວ່າຄົນຫາປາຈະ “ລ້າງດາງ” ເພື່ອລ້າງຂີ້ຕົມແລະຂີ້ເຫຍື້ອອອກຈາກດາງ. (ລກ. 5:2) ແລ້ວເຂົາເຈົ້າກໍຈະເອົາດາງໄປຕາກແດດໃຫ້ແຫ້ງເພື່ອບໍ່ໃຫ້ດາງຜ່ອຍແລະຂາດງ່າຍ.—ອຊກ. 47:10
ພະເຢຊູໄດ້ຊວນຄົນເຫຼົ່ານີ້ນິແຫຼະທີ່ຊຳນານໃນການໃຊ້ດາງຫາປາໃຫ້ໄປ “ຊອກຫາຄົນແທນທີ່ຈະຫາປາ.”