ເລື່ອງຊີວິດຈິງ
ພະເຢໂຫວາສອນຂ້ອຍຕັ້ງແຕ່ຂ້ອຍຍັງນ້ອຍ
ພີ່ນ້ອງຊາຍຄົນໜຶ່ງຍື່ນເຈ້ຍໃບນ້ອຍໆໃບໜຶ່ງໃຫ້ຂ້ອຍ ຂ້ອຍແນມເບິ່ງເຈ້ຍໃບນັ້ນແບບງົງໆ. ເຈ້ຍໃບນັ້ນຂຽນວ່າ: “ເດວິດ ສະເປລນ ວັນທີ 8 ເມສາ 1953: ‘ປະກາດກ່ຽວກັບຈຸດຈົບຂອງໂລກນີ້.’” ຂ້ອຍຖາມວ່າ: “ອັນນີ້ແມ່ນຫຍັງ?” ພີ່ນ້ອງຊາຍຄົນນັ້ນຕອບວ່າ: “ໃບມອບໝາຍໃຫ້ເຈົ້າບັນລະຍາຍໃນໂຮງຮຽນການຮັບໃຊ້ຕາມລະບອບຂອງພະເຈົ້າ.”a ຂ້ອຍຕອບວ່າ: “ຂ້ອຍບໍ່ເຄີຍສະໝັກເປັນນັກຮຽນໄດ໋!”
ແຕ່ກ່ອນຈະເລົ່າຕໍ່ ຂ້ອຍຈະເລົ່າເລື່ອງຊີວິດຂອງຂ້ອຍຕັ້ງແຕ່ຕົ້ນໃຫ້ຟັງ. ຂ້ອຍເກີດໃນໄລຍະສົງຄາມໂລກຄັ້ງທີ 2 ຢູ່ເມືອງແຄລ໌ກາຣີ ປະເທດການາດາ. ໃນທ້າຍຊຸມປີ 1940 ໄພໂອເນຍໜຸ່ມຄົນໜຶ່ງຊື່ດໍໂນ ເຟຣເຊີໄດ້ມາເຄາະປະຕູເຮືອນເຮົາ. ແລ້ວແມ່ກໍຕົກລົງຮຽນຄຳພີໄບເບິນ ແລະເພິ່ນມັກຄວາມຈິງທີ່ໄດ້ຮຽນ. ແຕ່ຍ້ອນແມ່ບໍ່ສະບາຍແຮງ ເພິ່ນຈຶ່ງບໍ່ໄດ້ໄປປະຊຸມເລື້ອຍປານໃດ. ເຖິງຈະເປັນແນວນັ້ນ ແມ່ກໍກ້າວໜ້າຈົນເຖິງຂັ້ນຮັບບັບເຕມາໃນປີ 1950. ຫຼັງຈາກນັ້ນບໍ່ຮອດ 2 ປີແມ່ກໍຕາຍ. ຕອນນັ້ນພໍ່ຍັງບໍ່ທັນເຂົ້າມາເປັນພະຍານພະເຢໂຫວາ ແຕ່ເພິ່ນກໍອະນຸຍາດໃຫ້ພະຍານຈັດງານສົບແລະໃຫ້ມີຄຳບັນລະຍາຍສຳລັບແມ່.
ສອງສາມມື້ຫຼັງຈາກງານສົບ ພີ່ນ້ອງຍິງສູງອາຍຸຄົນໜຶ່ງທີ່ເປັນຜູ້ຖືກເລືອກຊື່ອາລິດສ໌ຊວນຂ້ອຍໄປປະຊຸມ. ລາວຮູ້ຈັກຂ້ອຍຍ້ອນເຄີຍເຫັນຂ້ອຍໄປປະຊຸມທ້າຍອາທິດກັບແມ່ຕອນທີ່ແມ່ສາມາດໄປໄດ້. ຂ້ອຍຖາມພໍ່ວ່າອະນຸຍາດໃຫ້ໄປໄດ້ບໍ່. ພໍ່ບອກວ່າໄປໄດ້ ແລະເພິ່ນຕັດສິນໃຈວ່າຈະໄປນຳຂ້ອຍແຕ່ “ເທື່ອດຽວ” ເພື່ອຈະຂອບໃຈພີ່ນ້ອງທີ່ບັນລະຍາຍງານສົບຂອງແມ່. ໃນຄືນນັ້ນມີການປະຊຸມໂຮງຮຽນການຮັບໃຊ້ຕາມລະບອບຂອງພະເຈົ້າແລະການປະຊຸມເພື່ອການຮັບໃຊ້. ພໍ່ໄດ້ຟັງຄຳບັນລະຍາຍຕ່າງໆແລະເພິ່ນກໍມັກຫຼາຍ. ພໍ່ຕັດສິນໃຈເຂົ້າຮ່ວມການປະຊຸມນັ້ນທຸກອາທິດ. ຕໍ່ມາ ພໍ່ກໍເລີ່ມເຂົ້າຮ່ວມທຸກໆການປະຊຸມ.
ໃນສະໄໝນັ້ນ ພີ່ນ້ອງຊາຍທີ່ເບິ່ງແຍງການປະຊຸມຈະເລີ່ມຕົ້ນການປະຊຸມໂດຍເອີ້ນຊື່ທຸກຄົນທີ່ສະໝັກເປັນນັກຮຽນ ແລະເມື່ອແຕ່ລະຄົນໄດ້ຍິນຊື່ຂອງໂຕເອງກໍຈະຕອບວ່າ: “ມາ.” ມີຄືນໜຶ່ງ ຂ້ອຍຂໍໃຫ້ພີ່ນ້ອງເອີ້ນຊື່ຂ້ອຍນຳໃນການປະຊຸມເທື່ອຕໍ່ໄປ. ພີ່ນ້ອງຊາຍຄົນນັ້ນຊົມເຊີຍຂ້ອຍ ແຕ່ກໍບໍ່ໄດ້ຖາມຂ້ອຍວ່າເຂົ້າໃຈບໍວ່າການເອີ້ນຊື່ແບບນັ້ນມັນໝາຍເຖິງຫຍັງ.
ຂ້ອຍບໍ່ຮູ້ເລີຍວ່າມັນໝາຍຄວາມວ່າຂ້ອຍກຳລັງສະໝັກບັນລະຍາຍໃນໂຮງຮຽນການຮັບໃຊ້. ທີ່ຈິງ ຂ້ອຍມີແຕ່ຢາກໃຫ້ພີ່ນ້ອງເອີ້ນຊື່ຂ້ອຍຊື່ໆ! ໃນອາທິດຕໍ່ມາ ພີ່ນ້ອງກໍເອີ້ນຊື່ຂ້ອຍ ແລະຂ້ອຍກໍຕອບດ້ວຍຄວາມພູມໃຈວ່າ “ມາ.” ຫຼັງຈາກການປະຊຸມ ພີ່ນ້ອງພາກັນມາຊົມເຊີຍຂ້ອຍ. ຫຼາຍອາທິດຕໍ່ມາ ຂ້ອຍກໍໄດ້ຮັບໃບມອບໝາຍໃຫ້ບັນລະຍາຍຕາມທີ່ເລົ່າໃຫ້ຟັງໃນຕອນທຳອິດ.
ຕາຍຄັກໆຂ້ອຍ! ສະໄໝນັ້ນ ນັກຮຽນຕ້ອງກຽມຄຳບັນລະຍາຍທີ່ຍາວ 6-8 ນາທີ. ບໍ່ແມ່ນມີແຕ່ການມອບໝາຍໃຫ້ອ່ານພະຄຳພີເທົ່ານັ້ນ. ພໍ່ຊ່ວຍຂ້ອຍກຽມຄຳບັນລະຍາຍແລະໃຫ້ຂ້ອຍຊ້ອມຕັ້ງວ່າ 20 ເທື່ອກ່ອນຈະບັນລະຍາຍແທ້. ຫຼັງຈາກບັນລະຍາຍແລ້ວ ຂ້ອຍໄດ້ຮັບຄຳແນະນຳທີ່ເປັນປະໂຫຍດຈາກພີ່ນ້ອງຊາຍທີ່ເປັນຜູ້ເບິ່ງແຍງໂຮງຮຽນ. ຕະຫຼອດຫຼາຍປີທີ່ຜ່ານມາ ພະເຢໂຫວາໄດ້ໃຊ້ພໍ່ ພີ່ນ້ອງຊາຍຍິງທີ່ມີຄວາມສາມາດ ແລະອົງການຂອງເພິ່ນໃຫ້ຝຶກສອນຂ້ອຍ.
ໄດ້ຮັບການຝຶກຕໍ່ໆໄປ
ພີ່ນ້ອງອາລິດສ໌ທີ່ຂ້ອຍເວົ້າເຖິງກ່ອນໜ້ານີ້ໄດ້ຝຶກຂ້ອຍເມື່ອຂ້ອຍເລີ່ມປະກາດ. ໃນສະໄໝນັ້ນ ເຮົາຈະອ່ານພະຄຳພີ 3 ຂໍ້ໃຫ້ເຈົ້າຂອງເຮືອນຟັງ ແລ້ວຈາກນັ້ນກໍສະເໜີປຶ້ມ. ເມື່ອຮອດຜຽນຂ້ອຍປະກາດ ພີ່ນ້ອງອາລິດສ໌ຈະແນະນຳໂຕເອງ ເລີ່ມລົມກັບເຈົ້າຂອງເຮືອນ ແລະໃຫ້ຂ້ອຍອ່ານຂໍ້ພະຄຳພີທຳອິດ. ຈາກນັ້ນ ຂ້ອຍກໍຈະເລີ່ມລົມຕໍ່ ແລ້ວກໍອ່ານພະຄຳພີຂໍ້ທີ 2 ແລະທີ 3 ແລະສະເໜີປຶ້ມໃຫ້ເຈົ້າຂອງເຮືອນ. ຕໍ່ມາ ຂ້ອຍກໍຝຶກທີ່ຈະແນະນຳໂຕເອງແລະເລີ່ມການລົມກັນດ້ວຍໂຕເອງຕັ້ງແຕ່ຕົ້ນຈົນຈົບ. ຫຼັງຈາກພໍ່ຮັບບັບເຕມາໃນທ້າຍປີ 1954 ເພິ່ນຝຶກຂ້ອຍໃຫ້ປະກາດເກັ່ງຂຶ້ນ. ເຖິງວ່າເປັນພໍ່ທີ່ລ້ຽງລູກຄົນດຽວ ແຕ່ເພິ່ນກໍເຮັດສຸດຄວາມສາມາດເພື່ອຊ່ວຍຂ້ອຍໃຫ້ຮັກພະເຢໂຫວາ. ການປະຊຸມແລະການປະກາດເປັນສິ່ງທີ່ສຳຄັນຫຼາຍສຳລັບພໍ່. ຂ້ອຍຮູ້ເລີຍວ່າໃນຄືນທີ່ມີປະຊຸມເຮົາຕ້ອງໄປປະຊຸມ ແລະຕອນເຊົ້າຂອງວັນເສົາແລະວັນອາທິດເຮົາຕ້ອງໄປປະກາດ.
ຂ້ອຍບໍ່ແມ່ນຄົນທີ່ຮຽນເກັ່ງ ແຕ່ການຮຽນທີ່ຂ້ອຍໄດ້ຮັບໃນໄລຍະ 12 ປີທີ່ຮຽນຢູ່ໂຮງຮຽນຊ່ວຍຂ້ອຍຫຼາຍເມື່ອໃຫຍ່ຂຶ້ນ. ຕົວຢ່າງເຊັ່ນ: ຂ້ອຍໄດ້ຮຽນຫຼາຍກ່ຽວກັບຄະນິດສາດແລະຫຼັກໄວຍະກອນພາສາອັງກິດ. ຫຼັກສູດພາສາອັງກິດທີ່ຂ້ອຍໄດ້ຮຽນແລະການຮຽນກ່ຽວກັບການແຕ່ງເລື່ອງໄດ້ຊ່ວຍຂ້ອຍຫຼາຍແທ້ໆໃນວຽກມອບໝາຍປັດຈຸບັນທີ່ເຮັດກັບພະແນກການຂຽນ.
ຫຼາຍຄົນມັກຖາມວ່າເປັນຫຍັງຂ້ອຍຈຶ່ງມັກດົນຕີ. ຂ້ອຍມັກດົນຕີຍ້ອນພໍ່ກັບແມ່ກໍມັກດົນຕີຄືກັນ. ຕອນອາຍຸ 7 ປີ ຂ້ອຍຮຽນຫຼິ້ນເປຍໂນໄລຍະໜຶ່ງ ແຕ່ຄູສອນຮູ້ສຶກວ່າຂ້ອຍຫຼິ້ນບໍ່ໄດ້ດີປານໃດ. ລາວບອກພໍ່ຂ້ອຍວ່າຂ້ອຍຄວນເຊົາຮຽນ. ຂ້ອຍເຂົ້າໃຈວ່າເປັນຫຍັງຄູສອນຈຶ່ງເວົ້າຈັ່ງຊັ້ນຍ້ອນຕອນນັ້ນຂ້ອຍບໍ່ສົນໃຈຢາກຮຽນເປຍໂນປານໃດ.
ສອງສາມເດືອນຕໍ່ມາ ພໍ່ກໍຊອກຄູຄົນໃໝ່ໃຫ້ຂ້ອຍ. ເທື່ອນີ້ ຂ້ອຍຮຽນທັງເປຍໂນແລະຮຽນຮ້ອງເພງ ແລະຂ້ອຍກໍເຮັດໄດ້ດີທັງສອງຢ່າງ. ຕອນຍັງນ້ອຍ ຂ້ອຍຮ້ອງເພງສຽງດີຫຼາຍແລະຊະນະການແຂ່ງຂັນຮ້ອງເພງບາງລາຍການ. ເປົ້າໝາຍຂອງຂ້ອຍໃນການຮຽນດົນຕີແມ່ນເພື່ອຈະໄດ້ໃບປະກາດເຊິ່ງມັນຈະຊ່ວຍຂ້ອຍໃຫ້ສອນດົນຕີໄດ້ແລະຫາລ້ຽງໂຕເອງໄດ້ໃນການຮັບໃຊ້ເຕັມເວລາ. ແຕ່ເມື່ອໃກ້ຈະຮຽນຈົບ ຂ້ອຍກໍເຫັນວ່າຕ້ອງໃຊ້ເວລາຫຼາຍໃນການຮຽນເພື່ອກຽມເສັງເລື່ອງການຮ້ອງປະສານສຽງ ປະຫວັດສາດດົນຕີ ແລະການແຕ່ງເພງ. ສະນັ້ນ ຂ້ອຍຈຶ່ງຕັດສິນໃຈເຊົາຮຽນແລະສະໝັກເປັນໄພໂອເນຍປະຈຳ. ຕອນນັ້ນແມ່ນປີ 1963.
ການເປັນໄພໂອເນຍເຮັດໃຫ້ມີຄວາມສຸກ
ຫຼັງຈາກເປັນໄພໂອເນຍໄດ້ 1 ປີ ຂ້ອຍກໍຖືກມອບໝາຍໃຫ້ເປັນໄພໂອເນຍພິເສດຢູ່ເມືອງຄາພຸສະຄາຊິງ ລັດອອນທາຣີໂອ. ຄູ່ໄພໂອເນຍຂອງຂ້ອຍຊື່ເດນຽວ ສະກິນເນີ້ ລາວອາຍຸຫຼາຍກວ່າຂ້ອຍ 2 ເທົ່າ. ລາວສອນຂ້ອຍຫຼາຍຢ່າງກ່ຽວກັບວິທີການເຮັດວຽກຂອງປະຊາຄົມ. ຂ້ອຍຖືກແຕ່ງຕັ້ງໃຫ້ຮັບໃຊ້ໃນຄະນະກຳມະການການຮັບໃຊ້ຂອງປະຊາຄົມຕອນອາຍຸ 20 ປີ ສະນັ້ນຈຶ່ງມີຫຼາຍຢ່າງທີ່ຕ້ອງຮຽນຮູ້. ຂ້ອຍດີໃຈຫຼາຍທີ່ຕອນນີ້ອົງການຂອງເຮົາກັບມາເນັ້ນອີກເທື່ອໜຶ່ງວ່າເປັນເລື່ອງສຳຄັນຫຼາຍທີ່ຈະຝຶກພີ່ນ້ອງຊາຍທີ່ອາຍຸຍັງນ້ອຍ. ຖ້າພີ່ນ້ອງຊາຍເຫຼົ່ານີ້ດຸໝັ່ນແລະຕັ້ງໃຈເຮັດວຽກ ເຂົາເຈົ້າກໍສາມາດເປັນຄົນທີ່ພະເຢໂຫວາໃຊ້ໄດ້ຕັ້ງແຕ່ອາຍຸຍັງນ້ອຍ.
ຢູ່ເມືອງຄາພຸສະຄາຊິງ ເຮົາເຈິຂໍ້ທ້າທາຍຫຼາຍຢ່າງ. ຕົວຢ່າງເຊັ່ນ: ໃນຍາມໜາວ ບາງເທື່ອອາກາດກໍໜາວຫຼາຍແທ້ໆ. ສ່ວນຫຼາຍແລ້ວ ຂ້ອຍກັບເດນຽວຈະຍ່າງໄປທຸກບ່ອນ. ແຕ່ມີສິ່ງໜຶ່ງທີ່ເຮັດໃຫ້ຂ້ອຍມີຄວາມສຸກຫຼາຍຕອນທີ່ຮັບໃຊ້ຢູ່ຫັ້ນແມ່ນການໄດ້ເຈິກັບພີ່ນ້ອງຍິງຊື່ລິນດາ ໂຄລ໌ ເຊິ່ງຕໍ່ມາລາວກໍກາຍມາເປັນລິນດາ ສະເປລນ.
ລິນດາເປັນຜູ້ປະກາດທີ່ກະຕືລືລົ້ນ ແລະລາວມີຜູ້ສົນໃຈຫຼາຍຄົນທີ່ກັບໄປຢາມເພື່ອລົມເລື່ອງພະຄຳພີນຳໄດ້. ລິນດາເປັນຄົນໃຈກວ້າງ ອົບອຸ່ນ ແລະມັກໃຊ້ເວລາກັບຄົນອື່ນ. ແມ່ຂອງລາວຊື່ໂກລ໌ດີ້ເຊິ່ງເປັນພີ່ນ້ອງຍິງທີ່ສັດຊື່. ພໍ່ຂອງລາວຊື່ແອເລນ. ຕອນທຳອິດພໍ່ຂອງລິນດາບໍ່ມັກພະຍານພະເຢໂຫວາ. ເຖິງວ່າຜົວຈະຕໍ່ຕ້ານ ແຕ່ໂກລ໌ດີ້ກໍພາລິນດາກັບນ້ອງຊາຍ 2 ຄົນເຊິ່ງກໍຄືຈອນກັບກໍດອນໄປປະຊຸມເປັນປະຈຳແລະຝຶກລູກທັງ 3 ຄົນໃຫ້ຮູ້ວິທີປະກາດ. ບາງເທື່ອ ໂກລ໌ດີ້ ລິນດາ ຈອນ ແລະກໍດອນເປັນໄພໂອເນຍນຳກັນ. ຫຼາຍປີຕໍ່ມາ ແອເລນໄດ້ເຂົ້າມາເປັນພະຍານພະເຢໂຫວາແລະດຸໝັ່ນເຮັດວຽກຮັບໃຊ້ໃນປະຊາຄົມ.
ໃນປີ 1965 ຂ້ອຍຖືກເຊີນໃຫ້ເຂົ້າໂຮງຮຽນພະລາຊະກິດຫຼັກສູດ 1 ເດືອນຢູ່ເບເທນການາດາເພື່ອໄດ້ຮັບການຝຶກເພີ່ມເຕີມ. ຕອນທີ່ຢູ່ຫັ້ນ ພີ່ນ້ອງໃຫ້ຂ້ອຍຂຽນແບບຟອມສະໝັກເຂົ້າໂຮງຮຽນກິລຽດ. ຂ້ອຍບໍ່ເຄີຍຄິດທີ່ຈະເປັນມິດຊັນນາຣີ ແຕ່ຂ້ອຍກໍຂຽນໃບສະໝັກ. ແລ້ວຂ້ອຍກໍຖືກເລືອກໃຫ້ເຂົ້າໂຮງຮຽນກິລຽດລຸ້ນທີ 42. ຕອນຮຽນຢູ່ໂຮງຮຽນກິລຽດ ເຮົາຈະໄດ້ຮັບໃບຕິດຕາມຜົນການຮຽນຈາກຄູສອນເປັນປະຈຳ. ໃບຕິດຕາມໃບທຳອິດທີ່ຂ້ອຍໄດ້ຮັບສະໜັບສະໜູນຂ້ອຍໃຫ້ຮຽນຮູ້ທຸກຢ່າງກ່ຽວກັບອົງການຕອນທີ່ຢູ່ໂຮງຮຽນນີ້. ນັ້ນເປັນຄຳແນະນຳທີ່ດີຫຼາຍສຳລັບຂ້ອຍທີ່ຕອນນັ້ນອາຍຸ 21 ປີ.
ຢູ່ໂຮງຮຽນກິລຽດ ເຮົາໄດ້ຮຽນວິຊາໜຶ່ງກ່ຽວກັບເລື່ອງວິທີຕິດຕໍ່ພົວພັນກັບສື່ຕ່າງໆ ເຊັ່ນ: ສະຖານີວິທະຍຸ ສະຖານີໂທລະທັດ ແລະໜັງສືພິມ. ຂ້ອຍມັກຮຽນກ່ຽວກັບເລື່ອງນີ້ຫຼາຍ. ຕອນນັ້ນ ຂ້ອຍບໍ່ຮູ້ເລີຍວ່າມັນຈະເປັນປະໂຫຍດສຳລັບຂ້ອຍໃນອະນາຄົດ. ຈັກໜ້ອຍຂ້ອຍຊິເລົ່າໃຫ້ຟັງ.
ໄປເຊເນການ
ຫຼັງຈາກຮຽນຈົບໂຮງຮຽນກິລຽດໄດ້ສອງສາມມື້ ຂ້ອຍກັບໄມເຄິ້ນ ໂຮເລທີ່ເປັນຄູ່ມິດຊັນນາຣີຂອງຂ້ອຍກໍເດີນທາງໄປປະເທດເຊເນການທີ່ຢູ່ອາຟຣິກາເຊິ່ງເປັນບ່ອນທີ່ເຮົາຖືກມອບໝາຍໃຫ້ໄປຮັບໃຊ້. ຕອນນັ້ນ ມີຜູ້ປະກາດປະມານ 100 ຄົນຢູ່ເຊເນການ.
ຫຼັງຈາກເປັນມິດຊັນນາຣີໄດ້ບໍ່ຮອດ 1 ປີ ຂ້ອຍກໍຖືກເຊີນໃຫ້ຊ່ວຍວຽກຢູ່ສຳນັກງານສາຂາອາທິດລະ 1 ມື້. “ສຳນັກງານສາຂາ” ບໍ່ໄດ້ໃຫຍ່ ມັນມີແຕ່ຫ້ອງດຽວຢູ່ເຮືອນມິດຊັນນາຣີ. ເຖິງວ່າສຳນັກງານສາຂາຂອງເຮົາຈະນ້ອຍແລະທຳມະດາ ແຕ່ພີ່ນ້ອງເອັມມານູເອນ ພາເທີຣາຄິດສ໌ທີ່ເປັນຜູ້ຮັບໃຊ້ສາຂາໃນຕອນນັ້ນເຕືອນຂ້ອຍຕະຫຼອດວ່າສຳນັກງານສາຂາແມ່ນຕົວແທນຂອງອົງການຂອງພະເຢໂຫວາທີ່ຢູ່ໃນປະເທດນັ້ນ. ມີເທື່ອໜຶ່ງ ພີ່ນ້ອງເອັມມານູເອນຕັດສິນໃຈວ່າຄວນຂຽນຈົດໝາຍໄປໃຫ້ກຳລັງໃຈມິດຊັນນາຣີທຸກຄົນທີ່ຮັບໃຊ້ຢູ່ຫັ້ນ. ໃນສະໄໝນັ້ນຍັງບໍ່ມີວິທີງ່າຍໆຫຼືລາຄາຖືກໃນການກ໋ອບປີ້ຈົດໝາຍ ສະນັ້ນເຮົາຕ້ອງຕີພິມດີດຈົດໝາຍແຕ່ລະສະບັບ. ນັ້ນເປັນວຽກທີ່ໜັກຫຼາຍຍ້ອນເຮົາຕ້ອງແນ່ໃຈວ່າຈົດໝາຍແຕ່ລະສະບັບຕ້ອງບໍ່ມີຫຍັງຜິດພາດແມ່ນແຕ່ໂຕດຽວເພາະໃຊ້ຢາງລຶບລຶບບໍ່ໄດ້!
ຕອນແລງມື້ໜຶ່ງກ່ອນຈະກັບເມືອເຮືອນມິດຊັນນາຣີທີ່ຂ້ອຍພັກຢູ່ ພີ່ນ້ອງເອັມມານູເອນຍື່ນຊອງຈົດໝາຍໃຫ້ຂ້ອຍ. ລາວເວົ້າວ່າ: “ເດວິດ ອົງການສົ່ງຈົດໝາຍມາໃຫ້ເຈົ້າ.” ເມື່ອຂ້ອຍເປີດເບິ່ງຈົດໝາຍ ຂ້ອຍເຫັນວ່າມັນແມ່ນຈົດໝາຍສະບັບໜຶ່ງທີ່ຂ້ອຍພິມເອງ! ເລື່ອງນີ້ສອນຂ້ອຍໃຫ້ນັບຖືອົງການຂອງພະເຢໂຫວາບໍ່ວ່າເຮົາຈະຢູ່ໃນສາຂານ້ອຍຫຼືໃຫຍ່.
ຖ່າຍຮູບກັບໝູ່ທີ່ເປັນມິດຊັນນາຣີຢູ່ເຊເນການ ປີ 1967
ຂ້ອຍໄດ້ເປັນໝູ່ກັບພີ່ນ້ອງຫຼາຍຄົນໃນປະຊາຄົມ ແລະຂ້ອຍມັກໃຊ້ເວລາກັບເຂົາເຈົ້າທຸກໆວັນເສົາຕອນແລງ. ນັ້ນເປັນເວລາທີ່ມີຄວາມສຸກຫຼາຍແທ້ໆ! ໃນທຸກມື້ນີ້ ເຮົາຍັງຕິດຕໍ່ກັນຢູ່. ຕອນຢູ່ເຊເນການ ຂ້ອຍໄດ້ຮຽນພາສາຝຣັ່ງຍ້ອນເປັນພາສາທາງການທີ່ໃຊ້ຢູ່ຫັ້ນ ແລະມັນຊ່ວຍຂ້ອຍຫຼາຍຕອນໄປຢາມສາຂາຕ່າງໆຢູ່ທົ່ວໂລກທີ່ພີ່ນ້ອງເວົ້າພາສາຝຣັ່ງ.
ຂ້ອຍກັບລິນດາໝັ້ນກັນປີ 1968. ເປັນເວລາຫຼາຍເດືອນທີ່ຂ້ອຍພະຍາຍາມຊອກວຽກທີ່ບໍ່ເຕັມເວລາເຮັດເພື່ອຂ້ອຍກັບລິນດາຈະເປັນໄພໂອເນຍນຳກັນໄດ້ຢູ່ເຊເນການ ແຕ່ນາຍຈ້າງຢູ່ຫັ້ນຢາກຈ້າງຄົນທ້ອງຖິ່ນຫຼາຍກວ່າຈ້າງຄົນຕ່າງປະເທດ. ໃນທີ່ສຸດ ຫຼັງຈາກຂ້ອຍກັບໄປການາດາ ຂ້ອຍກັບລິນດາກໍໄດ້ແຕ່ງດອງກັນ. ເຮົາໄດ້ຮັບມອບໝາຍໃຫ້ເປັນໄພໂອເນຍພິເສດຢູ່ເມືອງເອັດມັນສ໌ຕັນເຊິ່ງເປັນເມືອງນ້ອຍໆໃນລັດນິວບຣັນສ໌ວິກທີ່ຕັ້ງຢູ່ຊາຍແດນຂອງແຂວງເກເບັກ.
ມື້ທີ່ເຮົາແຕ່ງດອງ ປີ 1969
ເປັນໄພໂອເນຍຢູ່ລັດນິວບຣັນສ໌ວິກແລະຢູ່ເກເບັກ
ກ່ອນເຮົາຖືກມອບໝາຍໄປເມືອງເອັດມັນສ໌ຕັນ ຢູ່ຫັ້ນບໍ່ມີຜູ້ປະກາດຈັກຄົນ ແລະມີແຕ່ນັກສຶກສາສອງສາມຄົນເທົ່ານັ້ນ. ສາສະໜາກາໂຕລິກຄວບຄຸມທຸກຢ່າງໃນຊີວິດຜູ້ຄົນ. ເຮືອນເກືອບທຸກຫຼັງຈະມີປ້າຍບອກວ່າ ບໍ່ຕ້ອນຮັບພະຍານພະເຢໂຫວາ. ໃນສະໄໝນັ້ນ ເຮົາບໍ່ໄດ້ຄິດວ່າຄວນສະແດງຄວາມນັບຖືຕໍ່ກັບປ້າຍແບບນັ້ນຄືກັບທີ່ເຮັດໃນຕອນນີ້. ສະນັ້ນ ເຮົາໄປເຮືອນທຸກຫຼັງເຖິງວ່າຈະມີປ້າຍຫຼືບໍ່ມີກໍຕາມ. ແຕ່ລະອາທິດ ພວກກາໂຕລິກຈະລົງຂ່າວໃນໜັງສືພິມວ່າ: “ໄປ໋ ໄປລ່າພວກແມ່ມົດ! ໄປເອົາພວກພະຍານພະເຢໂຫວາມາລົງໂທດ.” ໃນເມືອງນີ້ມີແຕ່ “ແມ່ມົດ” 4 ຄົນເທົ່ານັ້ນ ເຊິ່ງກໍຄືວິກເຕີ້ກັບເວວດ້າ ນໍເບີກ ແລະລິນດາກັບຂ້ອຍ. ເຮົາຮູ້ເລີຍວ່າເຂົາເຈົ້າໝາຍເຖິງໃຜ.
ຂ້ອຍຈະບໍ່ມີວັນລືມການຢ້ຽມຢາມເທື່ອທຳອິດຂອງຜູ້ເບິ່ງແຍງໝວດ. ຫຼັງຈາກໃຊ້ເວລາ 1 ອາທິດກັບພວກເຮົາ ລາວເວົ້າວ່າ: “ສິ່ງໜຶ່ງທີ່ພວກເຈົ້າອາດຈະເຮັດໄດ້ຕອນທີ່ຢູ່ນີ້ແມ່ນຊ່ວຍຄົນບໍ່ໃຫ້ມີອະຄະຕິຕໍ່ພະຍານພະເຢໂຫວາ. ຄົນຄ່ອຍໆເລີ່ມເຫັນຄວາມແຕກຕ່າງລະຫວ່າງພະຍານພະເຢໂຫວາທີ່ຖ່ອມໂຕກັບພວກຫົວໜ້າສາສະໜາກາໂຕລິກທີ່ຍິ່ງ.” ຕອນນີ້ໃນເມືອງນັ້ນມີປະຊາຄົມນ້ອຍໆປະຊາຄົມໜຶ່ງ.
ຫຼັງຈາກຮັບໃຊ້ 1 ປີໃນເຂດທີ່ໂດດດ່ຽວແບບນັ້ນ ເຮົາຖືກມອບໝາຍໃຫ້ໄປຊ່ວຍປະຊາຄົມໜຶ່ງທີ່ໃຫຍ່ຢູ່ເມືອງເກເບັກ. ເຮົາຮັບໃຊ້ຢູ່ຫັ້ນ 6 ເດືອນຢ່າງມີຄວາມສຸກກັບພີ່ນ້ອງທີ່ມີນ້ຳໃຈຕ້ອນຮັບແຂກ. ຈາກນັ້ນ ເຮົາກໍຖືກມອບໝາຍໃຫ້ເຮັດວຽກເບິ່ງແຍງໝວດ.
ເຮົາເຮັດວຽກເບິ່ງແຍງໝວດ 14 ປີຢູ່ແຂວງເກເບັກ. ມັນເປັນຊ່ວງເວລາທີ່ໜ້າຕື່ນເຕັ້ນຫຼາຍແທ້ໆ! ວຽກປະກາດຢູ່ຫັ້ນເກີດຜົນດີຫຼາຍ ແລະໃນແຕ່ລະປະຊາຄົມທີ່ເຮົາໄປຢາມ ເປັນເລື່ອງປົກກະຕິທີ່ເຮົາຈະເຫັນຫຼາຍຄອບຄົວກຳລັງຮຽນຄຳພີໄບເບິນເພື່ອຈະກ້າວໜ້າຈົນເຖິງຂັ້ນຮັບບັບເຕມາ.
ຄິດເຖິງພີ່ນ້ອງທີ່ເຮັດວຽກໜັກ
ພີ່ນ້ອງການາດາທີ່ເວົ້າພາສາຝຣັ່ງເປັນຄົນທີ່ໜ້າຮັກ. ເຂົາເຈົ້າເປັນຄົນກົງໆ ລ່າເລີງ ແລະກະຕືລືລົ້ນ. ແຕ່ມັນບໍ່ງ່າຍສຳລັບເຂົາເຈົ້າທີ່ຈະເຂົ້າມາເປັນພະຍານພະເຢໂຫວາແລະເຂົາເຈົ້າຖືກຄອບຄົວຕໍ່ຕ້ານໜັກຫຼາຍ. ໄວລຸ້ນບາງຄົນທີ່ພໍ່ແມ່ບໍ່ແມ່ນພະຍານບອກເຂົາເຈົ້າວ່າ: “ເຊົາຮຽນຄຳພີໄບເບິນກັບພວກພະຍານເດີ້ ຄັນບໍ່ຊັ້ນກະອອກຈາກເຮືອນຫຼັງນີ້ໄປເລີຍ!” ໄວລຸ້ນເຫຼົ່ານີ້ຮັກສາຄວາມສັດຊື່ຕໍ່ພະເຢໂຫວາເຖິງວ່າຖືກຕໍ່ຕ້ານແບບນີ້. ພະເຢໂຫວາຕ້ອງພູມໃຈໃນໂຕເຂົາເຈົ້າຫຼາຍແທ້ໆ!
ມາຮອດນີ້ແລ້ວ ຂ້ອຍຢາກເວົ້າເຖິງໄພໂອເນຍປະຈຳແລະໄພໂອເນຍພິເສດທີ່ສັດຊື່ເຊິ່ງຮັບໃຊ້ຢູ່ເກເບັກໃນຕອນນັ້ນ. ເຂົາເຈົ້າສ່ວນຫຼາຍຍ້າຍມາຈາກລັດຕ່າງໆໃນການາດາ. ນອກຈາກຕ້ອງຮຽນພາສາຝຣັ່ງແລ້ວ ເຂົາເຈົ້າຍັງຕ້ອງຮຽນກ່ຽວກັບວັດທະນະທຳທ້ອງຖິ່ນແລະວິທີທີ່ຄົນຢູ່ຫັ້ນຄິດເຊິ່ງສ່ວນຫຼາຍແລ້ວໄດ້ຮັບອິດທິພົນຈາກສາສະໜາກາໂຕລິກ.
ໄພໂອເນຍພິເສດມັກຖືກມອບໝາຍໃຫ້ໄປຮັບໃຊ້ໃນເຂດໂດດດ່ຽວທີ່ບໍ່ມີຜູ້ປະກາດຈັກຄົນ. ຍ້ອນຄົນໃນທ້ອງຖິ່ນບໍ່ມັກພະຍານພະເຢໂຫວາ ມັນຈຶ່ງຍາກທີ່ພີ່ນ້ອງຈະຊອກບ່ອນຢູ່ ແລະການຊອກວຽກເຮັດແບບບໍ່ເຕັມເວລາກໍແຮ່ງຍາກກວ່ານັ້ນອີກ. ຄູ່ຜົວເມຍທີ່ຫາກໍແຕ່ງດອງກັນຕ້ອງຢູ່ເຮືອນຫຼັງດຽວກັບພະຍານອີກ 4 ຄົນ 6 ຄົນ ຫຼື 8 ຄົນເພື່ອຫານຄ່າເຊົ່າກັນ. ເຂົາເຈົ້າບໍ່ສາມາດແຍກໄປຢູ່ຕ່າງຫາກແລະຈ່າຍຄ່າເຊົ່າເອງ. ເມື່ອເຂົາເຈົ້າເລີ່ມສຶກສາກັບບາງຄົນ ເຂົາເຈົ້າຈະເອົາໃຈໃສ່ສຸດຂີດແລະເຮັດທຸກສິ່ງທີ່ເຮັດໄດ້ເພື່ອຊ່ວຍນັກສຶກສາ. ຕອນນີ້ຢູ່ເກເບັກມີໄພໂອເນຍທ້ອງຖິ່ນຈຳນວນຫຼາຍຈຶ່ງບໍ່ຕ້ອງການຄວາມຊ່ວຍເຫຼືອຈາກໄພໂອເນຍທີ່ຍ້າຍມາຈາກບ່ອນອື່ນ. ສະນັ້ນ ໄພໂອເນຍເຫຼົ່ານີ້ຈຶ່ງສາມາດໄປຊ່ວຍເຂດທີ່ຕ້ອງການຜູ້ປະກາດຫຼາຍກວ່າ.
ຕອນທີ່ເຮົາໄປຢາມປະຊາຄົມຕ່າງໆໃນວຽກເບິ່ງແຍງໝວດ ໃນຕອນເຊົ້າວັນເສົາ ເຮົາພະຍາຍາມອອກໄປປະກາດກັບພວກໄວລຸ້ນ. ການເຮັດແບບນີ້ຊ່ວຍເຮົາໃຫ້ຮູ້ວ່າເຂົາເຈົ້າກຳລັງເຈິບັນຫາແລະຂໍ້ທ້າທາຍຫຍັງແດ່. ໄວລຸ້ນບາງຄົນທີ່ເຮົາເຄີຍໄປປະກາດນຳຕອນນີ້ຮັບໃຊ້ເປັນມິດຊັນນາຣີຢູ່ຕ່າງປະເທດ ແລະບາງຄົນກໍຮັບໃຊ້ໃນຮູບແບບອື່ນໆ.
ໃນຕອນນັ້ນ ບາງປະຊາຄົມບໍ່ສາມາດຊ່ວຍເຮົາສຳລັບຄ່ານ້ຳມັນແລະຄ່າອາຫານ ບາງເທື່ອບໍ່ທັນຮອດທ້າຍເດືອນເງິນເຮົາກໍໝົດແລ້ວ. ໃນຍາມແບບນັ້ນ ເຮົາຕ້ອງໄວ້ວາງໃຈພະເຢໂຫວາເຕັມທີຍ້ອນເພິ່ນຮູ້ຈັກສະພາບການຂອງເຮົາ. ເພິ່ນຊ່ວຍເຫຼືອເຮົາຕະຫຼອດ. ໂດຍວິທີໃດວິທີໜຶ່ງ ເຮົາສາມາດເດີນທາງຈາກປະຊາຄົມໜຶ່ງໄປອີກປະຊາຄົມໜຶ່ງໄດ້ສະເໝີ.
ຮຽນຈາກພີ່ນ້ອງທີ່ສັດຊື່
ຄືກັບທີ່ໄດ້ເວົ້າໄປແລ້ວ ຂ້ອຍໄດ້ຮັບປະໂຫຍດຫຼາຍຈາກການຮຽນຢູ່ໂຮງຮຽນກິລຽດເລື່ອງວິທີຕິດຕໍ່ພົວພັນກັບສື່ຕ່າງໆ. ຕອນທີ່ຮັບໃຊ້ຢູ່ເກເບັກ ຫຼາຍເທື່ອເຮົາມີໂອກາດໄດ້ປະກາດທາງວິທະຍຸ ທາງໂທລະທັດ ແລະທາງໜັງສືພິມ. ຂ້ອຍມັກຖືກມອບໝາຍໃຫ້ເຮັດວຽກກັບພີ່ນ້ອງເລອົງ ເຄຣໂປທີ່ເປັນຜູ້ເບິ່ງແຍງໝວດຄືກັນ ແລະລາວເປັນຄົນຕິດຕໍ່ກັບສື່ຕ່າງໆເກັ່ງຫຼາຍ. ເມື່ອໄປລົມກັບຜູ້ບໍລິຫານລະດັບສູງຂອງສື່ຕ່າງໆ ພີ່ນ້ອງເລອົງບໍ່ໄດ້ພະຍາຍາມອວດວ່າລາວມີຄວາມຮູ້ຫຼາຍໃນດ້ານນັ້ນ ແຕ່ລາວເວົ້າດ້ວຍຄວາມຖ່ອມກັບຜູ້ບໍລິຫານເຫຼົ່ານັ້ນວ່າ: “ທ່ານ ຂ້ອຍກັບໝູ່ພຽງແຕ່ເປັນຜູ້ສອນສາສະໜາ. ເຮົາບໍ່ຮູ້ຫຼາຍປານໃດກ່ຽວກັບການເວົ້າໃນໂທລະທັດແລະໃນວິທະຍຸ. ແຕ່ເຮົາຖືກມອບໝາຍທີ່ຈະບອກໃຫ້ຄົນຮູ້ກ່ຽວກັບການປະຊຸມໃຫຍ່ຂອງພະຍານພະເຢໂຫວາທີ່ຈະຖືກຈັດຂຶ້ນ. ເຮົາຈະດີໃຈຫຼາຍຖ້າທ່ານຊ່ວຍເຮົາ.” ຄຳເວົ້າທີ່ຖ່ອມໂຕແບບນັ້ນເຮັດໃຫ້ສື່ຕ່າງໆຍິນດີຊ່ວຍເຮົາເຕັມທີ.
ຕໍ່ມາ ສຳນັກງານສາຂາໄດ້ມອບໝາຍໃຫ້ຂ້ອຍເຮັດວຽກກັບພີ່ນ້ອງເກລນ ຮາວທີ່ເປັນທະນາຍຄວາມ. ເຮົາເຮັດວຽກນຳກັນກ່ຽວກັບຄະດີຍາກໆທີ່ສື່ໃຫ້ຄວາມສົນໃຈຫຼາຍ. ຂ້ອຍໄດ້ຮັບປະໂຫຍດຈາກການຝຶກອົບຮົມທີ່ໄດ້ຮັບຢູ່ໂຮງຮຽນກິລຽດແລະຈາກປະສົບການທີ່ເຮັດວຽກກັບພີ່ນ້ອງເລອົງ. ເປັນສິດທິພິເສດແທ້ໆທີ່ໄດ້ເຮັດວຽກກັບພີ່ນ້ອງເກລນ. ລາວປົກປ້ອງອົງການຢ່າງກ້າຫານທາງດ້ານກົດໝາຍ ແລະສຳຄັນທີ່ສຸດ ລາວຮັກພະເຢໂຫວາຫຼາຍ.
ໃນປີ 1985 ເຮົາຖືກມອບໝາຍໃຫ້ເຮັດວຽກເບິ່ງແຍງໝວດຢູ່ທາງພາກຕາເວັນຕົກຂອງການາດາເຊິ່ງໃກ້ກັບເຮືອນຂອງພໍ່ຂ້ອຍເພື່ອຂ້ອຍຈະເບິ່ງແຍງພໍ່ໄດ້. ສາມເດືອນຕໍ່ມາພໍ່ກໍຕາຍ. ເຮົາຍັງຮັບໃຊ້ຢູ່ຫັ້ນຕໍ່ໄປຈົນຮອດປີ 1989 ແລະເຮົາຕົກໃຈຫຼາຍເມື່ອໄດ້ຮັບຈົດໝາຍເຊີນໃຫ້ມາຮັບໃຊ້ຢູ່ເບເທນອາເມຣິກາ. ນີ້ໝາຍຄວາມວ່າເຮົາຕ້ອງອອກຈາກວຽກເບິ່ງແຍງໝວດຫຼັງຈາກເຮັດວຽກນີ້ມາເກືອບ 19 ປີ. ຕະຫຼອດຫຼາຍປີນັ້ນ ເຮົາໄດ້ພັກກັບພີ່ນ້ອງຫຼາຍຮ້ອຍຄອບຄົວແລະໄດ້ກິນເຂົ້າຫຼາຍພັນຄາບກັບພີ່ນ້ອງຊາຍຍິງທີ່ມີນ້ຳໃຈຕ້ອນຮັບ. ເຮົາຂອບໃຈທຸກຄົນຫຼາຍແທ້ໆທີ່ເປີດບ້ານຕ້ອນຮັບພວກເຮົາແລະແຕ່ງກິນໃຫ້ພວກເຮົາກິນ!
ເຮົາຍ້າຍໄປອາເມຣິກາ
ເມື່ອມາຮອດບຸກລິນ ຂ້ອຍຖືກມອບໝາຍໃຫ້ເຮັດວຽກຢູ່ພະແນກການຮັບໃຊ້. ຂ້ອຍຂອບໃຈແທ້ໆທີ່ໄດ້ຮັບການຝຶກຢູ່ຫັ້ນ. ບົດຮຽນຢ່າງໜຶ່ງທີ່ຂ້ອຍໄດ້ຮຽນຮູ້ແມ່ນຕ້ອງກວດສອບໃຫ້ແນ່ໃຈກ່ອນວ່າຄວາມຈິງເປັນແນວໃດແລະຢ່າສະຫຼຸບເອົາເອງ. ຕໍ່ມາ ໃນປີ 1998 ຂ້ອຍຖືກມອບໝາຍໃຫ້ເຮັດວຽກຢູ່ພະແນກການຂຽນ ແລະໃນທຸກມື້ນີ້ກໍຍັງມີຫຼາຍຢ່າງທີ່ຂ້ອຍຕ້ອງຮຽນຮູ້. ຂ້ອຍມີສິດທິພິເສດທີ່ໄດ້ຊ່ວຍວຽກພີ່ນ້ອງຈອນ ບາຣ໌ເປັນເວລາຫຼາຍປີ. ລາວເປັນຜູ້ປະສານງານຄະນະກຳມະການຝ່າຍການຂຽນ. ຂ້ອຍເຫັນຄ່າສະເໝີສຳລັບການຝຶກອົບຮົມທີ່ຂ້ອຍໄດ້ຮັບຈາກພີ່ນ້ອງຈອນແລະເຫັນຄ່າເວລາທີ່ໄດ້ເຮັດວຽກກັບລາວ. ພີ່ນ້ອງຈອນເປັນຄົນທີ່ຮຽນແບບພະເຢຊູແທ້ໆ.
ຖ່າຍຮູບກັບພີ່ນ້ອງຈອນແລະພີ່ນ້ອງມິວດຣິດ ບາຣ໌
ຂ້ອຍມີຄວາມສຸກຫຼາຍທີ່ໄດ້ເຮັດວຽກກັບພີ່ນ້ອງຊາຍຍິງທີ່ເປັນຄົນຖ່ອມເຊິ່ງເຮັດວຽກຢູ່ພະແນກການຂຽນ. ເຂົາເຈົ້າອະທິດຖານຂໍໃຫ້ພະເຢໂຫວາຊ່ວຍສະເໝີໃນວຽກມອບໝາຍຂອງເຂົາເຈົ້າ ແລະເຂົາເຈົ້າຮູ້ວ່າທຸກສິ່ງທຸກຢ່າງທີ່ເຂົາເຈົ້າເຮັດໄດ້ສຳເລັດແມ່ນຍ້ອນພະລັງບໍລິສຸດຂອງເພິ່ນບໍ່ແມ່ນຍ້ອນຄວາມສາມາດຂອງເຂົາເຈົ້າເອງ.
ຄວບຄຸມວົງດົນຕີນັກຮ້ອງປະສານສຽງຂອງວັອດສ໌ທາວເວີ້ໃນການປະຊຸມປະຈຳປີ 2009
ຢາຍຄຳພີໄບເບິນຢູ່ການປະຊຸມນານາຊາດຢູ່ເມືອງໂຊລ໌ ປະເທດເກົາຫຼີ ປີ 2014
ຂ້ອຍກັບລິນດາຮູ້ສຶກວ່າເປັນສິດທິພິເສດແທ້ໆທີ່ໄດ້ໄປຢາມພີ່ນ້ອງທີ່ສັດຊື່ໃນ 110 ປະເທດ. ເຮົາໄດ້ເຫັນວ່າມິດຊັນນາຣີ ຄະນະກຳມະການສາຂາ ແລະພີ່ນ້ອງທີ່ຮັບໃຊ້ເຕັມເວລາໃນຮູບແບບອື່ນຮັກພະເຢໂຫວາຫຼາຍ. ເຮົາຍັງໄດ້ເຫັນຄວາມກະຕືລືລົ້ນແລະຄວາມພັກດີຂອງພີ່ນ້ອງທ້ອງຖິ່ນທີ່ຢູ່ໃນປະເທດເຫຼົ່ານີ້ທີ່ໃຫ້ການຮັບໃຊ້ພະເຢໂຫວາເປັນສິ່ງສຳຄັນທີ່ສຸດ ເຖິງວ່າເຂົາເຈົ້າຈະເຈິກັບສົງຄາມ ບັນຫາເສດຖະກິດ ແລະການຂົ່ມເຫງ. ພະເຢໂຫວາຕ້ອງຮັກເຂົາເຈົ້າຫຼາຍແທ້ໆ.
ຕະຫຼອດຫຼາຍປີທີ່ຜ່ານມາ ລິນດາໄດ້ຊ່ວຍຂ້ອຍຫຼາຍອີ່ຫຼີເມື່ອຂ້ອຍພະຍາຍາມເຮັດວຽກມອບໝາຍໃຫ້ສຳເລັດ. ລາວຮັກຜູ້ຄົນແລະມັກຊອກຫາໂອກາດທີ່ຈະຊ່ວຍເຫຼືອຄົນອື່ນ. ນອກຈາກນັ້ນ ລາວຍັງເກັ່ງໃນການເລີ່ມລົມກັບຄົນອື່ນໃນການປະກາດແບບບໍ່ເປັນທາງການ. ລາວໄດ້ຊ່ວຍຫຼາຍຄົນໃຫ້ຮຽນຮູ້ກ່ຽວກັບພະເຢໂຫວາ ແລະໄດ້ຊ່ວຍບາງຄົນທີ່ເຊົາຮັບໃຊ້ພະເຢໂຫວາໃຫ້ກັບມາຮັບໃຊ້ເພິ່ນອີກ. ລິນດາເປັນຂອງຂວັນທີ່ມີຄ່າຫຼາຍຈາກພະເຢໂຫວາ! ຕອນນີ້ລິນດາກັບຂ້ອຍເຖົ້າແລ້ວ ເຮົາສອງຄົນເຫັນຄ່າທີ່ພີ່ນ້ອງຊາຍຍິງທີ່ຍັງໜຸ່ມຊ່ວຍເຫຼືອເຮົາໃນເລື່ອງການເດີນທາງແລະໃນເລື່ອງອື່ນໆນຳ.—ມຣກ. 10:29, 30
ເມື່ອເບິ່ງຄືນຫຼັງຕະຫຼອດ 80 ປີທີ່ຜ່ານມາ ຂ້ອຍຮູ້ສຶກຂອບໃຈແທ້ໆ. ຂ້ອຍເຫັນດີກັບຄຳເວົ້າຂອງຜູ້ຂຽນເພງສັນລະເສີນທີ່ຂຽນວ່າ: “ພະເຈົ້າເອີ້ຍ ພະອົງສອນລູກຕັ້ງແຕ່ລູກຍັງນ້ອຍໆ ແລະຈົນຮອດຕອນນີ້ ລູກກໍຍັງປະກາດເລື່ອງຜົນງານທີ່ໜ້າງຶດງໍ້ຂອງພະອົງ.” (ພສ. 71:17) ຂ້ອຍຢາກເຮັດແບບນີ້ຕໍ່ໆໄປຕາບໃດທີ່ຍັງມີຊີວິດຢູ່.
a ປັດຈຸບັນແມ່ນການປະຊຸມກາງອາທິດ.