ວັນທີ 20-26 ເມສາ 2026
ເພງທີ 49 ເຮັດໃຫ້ພະເຢໂຫວາພໍໃຈ
ໃຫ້ຕັ້ງເປົ້າໝາຍທີ່ຈະຮັບບັບເຕມາ
“ຕອນນີ້ແຫຼະເປັນເວລາທີ່ພະເຈົ້າເມດຕາພວກເຮົາເປັນພິເສດ.”—2ກຣ. 6:2
ຈຸດສຳຄັນ
ຕອນນີ້ເປັນເວລາທີ່ຈະເປັນໝູ່ສະໜິດກັບພະເຢໂຫວາແລະຮັບບັບເຕມາ.
1. (ກ) ເຮົາໄດ້ຮັບປະໂຫຍດຫຍັງແດ່ຈາກການຮັບບັບເຕມາ? (ຂ) ເຮົາຈະຮຽນຫຍັງໃນບົດນີ້?
ເຈົ້າໄດ້ອຸທິດໂຕໃຫ້ພະເຢໂຫວາແລະຮັບບັບເຕມາແລ້ວບໍ? ຖ້າແມ່ນ ນັ້ນກໍໝາຍຄວາມວ່າເຈົ້າໄດ້ຂໍໃຫ້ພະເຢໂຫວາຍົກໂທດຄວາມຜິດໃຫ້ເຈົ້າແລະຍອມໃຫ້ເຈົ້າເຂົ້າມາເປັນຜູ້ນະມັດສະການເພິ່ນ. (1ປຕ. 3:21) ນອກຈາກນັ້ນ ເມື່ອເຈົ້າຮັບບັບເຕມາ ເຈົ້າກໍເປັນຕົວຢ່າງທີ່ດີໃຫ້ຄົນທີ່ຍັງບໍ່ທັນໄດ້ຮັບບັບເຕມາທີ່ຢູ່ໃນປະຊາຄົມຂອງເຈົ້າ. ການມອບຊີວິດໃຫ້ພະເຢໂຫວາເປັນການຕັດສິນໃຈທີ່ດີທີ່ສຸດ. ແຕ່ຖ້າເຈົ້າຍັງບໍ່ທັນໄດ້ຮັບບັບເຕມາເດ? ແນ່ນອນວ່າເຈົ້າກໍຮັກພະເຢໂຫວາແລະຢາກເຮັດຕາມຄວາມຕ້ອງການຂອງເພິ່ນຄືກັນ. ເຈົ້າຮູ້ວ່າການຮັບບັບເຕມາເປັນສິ່ງທີ່ສຳຄັນເພື່ອຄວາມຜິດຂອງເຈົ້າຈະໄດ້ຮັບການຍົກໂທດແລະເພື່ອເຈົ້າຈະໄດ້ຮັບຄວາມພໍໃຈຈາກພະເຢໂຫວາ. (ກຈກ. 2:38-40) ແຕ່ເຈົ້າອາດຍັງລັງເລຢູ່. ອັນໃດຈະຊ່ວຍເຈົ້າໄດ້? ໃນບົດນີ້ ເຮົາຈະເບິ່ງ 3 ຈຸດຕໍ່ໄປນີ້: (1) ເປັນຫຍັງບາງຄົນລັງເລທີ່ຈະຮັບບັບເຕມາ? (2) ເປັນຫຍັງຈຶ່ງເປັນເລື່ອງສຳຄັນທີ່ຈະຈື່ໄວ້ວ່າຈຸດຈົບຂອງໂລກນີ້ໃກ້ຈະມາຮອດແລ້ວ? ແລະ (3) ເຈົ້າໄດ້ຮັບປະໂຫຍດແນວໃດຈາກການຕັ້ງເປົ້າໝາຍທີ່ຈະຮັບບັບເຕມາໂດຍບໍ່ຊັກຊ້າ?
ເປັນຫຍັງບາງຄົນລັງເລທີ່ຈະຮັບບັບເຕມາ?
2. ເປັນຫຍັງບາງຄົນຈຶ່ງລັງເລທີ່ຈະຮັບບັບເຕມາ?
2 ບາງຄົນລັງເລທີ່ຈະຮັບບັບເຕມາຍ້ອນຢ້ານ. ຕົວຢ່າງເຊັ່ນ: ເຖິງວ່າເຂົາເຈົ້າຢາກຮັບໃຊ້ພະເຢໂຫວາ ແຕ່ກໍຢ້ານວ່າເຂົາເຈົ້າຈະບໍ່ດີພໍທີ່ຈະເຮັດໃຫ້ພະເຢໂຫວາພໍໃຈໄດ້. ຖ້າເຈົ້າຮູ້ສຶກແບບນີ້ ໃຫ້ອ່ານຂໍ້ພະຄຳພີທີ່ຈະຊ່ວຍເຈົ້າໃຫ້ເຫັນວ່າພະເຢໂຫວາບໍ່ໄດ້ຄາດໝາຍຄວາມສົມບູນແບບຈາກເຈົ້າ ແລະເພິ່ນພໍໃຈເມື່ອເຈົ້າເຮັດສຸດຄວາມສາມາດໃນການຮັບໃຊ້ເພິ່ນ. (ພສ. 103:13, 14; ກລຊ. 3:23) ຖ້າເຈົ້າຢ້ານການຕໍ່ຕ້ານ ໃຫ້ຂໍພະເຢໂຫວາຊ່ວຍເຈົ້າໃຫ້ມີຄວາມໝັ້ນໃຈແບບດຽວກັບຜູ້ຂຽນເພງສັນລະເສີນເຊິ່ງລາວເວົ້າວ່າ: “ພະເຢໂຫວາຢູ່ຝ່າຍຂ້ອຍ ຂ້ອຍຈະບໍ່ຢ້ານຫຍັງ. ມະນຸດຈະເຮັດຫຍັງໃຫ້ຂ້ອຍໄດ້?”—ພສ. 118:6
3. ບາງຄົນຄິດແນວໃດເຊິ່ງອາດຂັດຂວາງເຂົາເຈົ້າໄວ້ຈາກການຮັບບັບເຕມາ? (ເບິ່ງຮູບໜ້າປົກນຳ)
3 ບາງຄົນທີ່ຮັກພະເຢໂຫວາເລື່ອນການຮັບບັບເຕມາອອກໄປຍ້ອນເຂົາເຈົ້າຄິດວ່າໂຕເອງຍັງບໍ່ມີຄວາມຮູ້ພຽງພໍກ່ຽວກັບພະເຢໂຫວາແລະຄຳສອນໃນຄຳພີໄບເບິນ. ແຕ່ເຈົ້າຕ້ອງຮູ້ທຸກຢ່າງກ່ອນບໍຈຶ່ງຈະຮັບບັບເຕມາໄດ້? ຂໍໃຫ້ເບິ່ງຕົວຢ່າງໜຶ່ງໃນຄຳພີໄບເບິນ. ມີຄືນໜຶ່ງ ພະເຢໂຫວາໄດ້ເຮັດໃຫ້ເກີດແຜ່ນດິນໄຫວເພື່ອປ່ອຍໂປໂລກັບຊີລາອອກຈາກຄຸກ. ຈາກນັ້ນ ສອງຄົນນີ້ກໍມີໂອກາດສອນຜູ້ຄຸມຄຸກແລະຄົນໃນເຮືອນຂອງລາວກ່ຽວກັບພະເຢຊູ. ຜູ້ຄຸມຄຸກກັບຄົນໃນເຮືອນຂອງລາວເຂົ້າໃຈວ່າພະເຢໂຫວາໄດ້ເຮັດການອັດສະຈັນເພື່ອປ່ອຍຜູ້ຮັບໃຊ້ຂອງເພິ່ນອອກຈາກຄຸກ. ນອກຈາກນັ້ນ ເຂົາເຈົ້າຍັງໄດ້ຮຽນຮູ້ເລື່ອງທີ່ສຳຄັນກ່ຽວກັບພະເຢໂຫວາແລະພະເຢຊູ. ຜົນກໍຄື ສິ່ງທີ່ເຂົາເຈົ້າໄດ້ຮຽນໃນຄືນນັ້ນມັນພຽງພໍທີ່ຈະຊ່ວຍເຂົາເຈົ້າໃຫ້ “ຮັບບັບເຕມາທັນທີ.” (ກຈກ. 16:25-33) ຖ້າເຈົ້າຮູ້ຈັກພະເຢໂຫວາ ຮັກເພິ່ນສຸດຫົວໃຈ ເຂົ້າໃຈຄຳສອນພື້ນຖານໃນຄຳພີໄບເບິນ ກັບໃຈຈາກຄວາມຜິດທີ່ເຄີຍເຮັດ ແລະຕັ້ງໃຈທີ່ຈະໃຊ້ຊີວິດຕາມຫຼັກການຂອງພະເຢໂຫວາ ເຈົ້າກໍພ້ອມແລ້ວທີ່ຈະຮັບບັບເຕມາ.—ມຣກ. 12:30
ໂປໂລກັບຊີລາສອນຜູ້ຄຸມຄຸກແລະຄົນໃນເຮືອນຂອງລາວກ່ຽວກັບພະເຢຊູ. ສິ່ງທີ່ເຂົາເຈົ້າໄດ້ຮຽນຊ່ວຍເຂົາເຈົ້າໃຫ້ “ຮັບບັບເຕມາທັນທີ” (ເບິ່ງຂໍ້ 3)
4. ມີຫຍັງອີກທີ່ເຮັດໃຫ້ບາງຄົນລັງເລທີ່ຈະຮັບບັບເຕມາ? (ເບິ່ງຮູບນຳ)
4 ບາງຄົນຢາກປ່ຽນແປງໂຕເອງເພື່ອເຮັດໃຫ້ພະເຢໂຫວາພໍໃຈແລະຮັບບັບເຕມາ ແຕ່ເຂົາເຈົ້າກໍຄິດວ່າມັນຍາກໂພດທີ່ຈະເຮັດແບບນັ້ນ. (ລກ. 14:27-30) ແນ່ນອນວ່າເປັນເລື່ອງສະຫຼາດທີ່ຈະຄິດດີໆກ່ອນທີ່ຈະຕັດສິນໃຈເລື່ອງໃດເລື່ອງໜຶ່ງວ່າມັນຈະສົ່ງຜົນແນວໃດຕໍ່ຊີວິດຂອງເຮົາ. ແຕ່ບາງຄົນກັງວົນຫຼາຍໂພດກ່ຽວກັບສິ່ງທີ່ເຂົາເຈົ້າຕ້ອງເຊົາເຮັດເພື່ອຈະຮັບໃຊ້ພະເຢໂຫວາ. ຂໍໃຫ້ເບິ່ງເລື່ອງຂອງແຄນດັດສ໌. ຕອນຍັງນ້ອຍລາວໄດ້ຮຽນຄຳພີໄບເບິນ ແຕ່ລາວບໍ່ເຄີຍເອົາສິ່ງທີ່ໄດ້ຮຽນໄປໃຊ້. ຕໍ່ມາ ເມື່ອເປັນຜູ້ໃຫຍ່ແລ້ວ ລາວກໍເລີ່ມຮຽນຄຳພີໄບເບິນຄືນອີກ. ລາວເວົ້າວ່າ: “ຂ້ອຍຮູ້ວ່າຂ້ອຍຄວນເຮັດຫຍັງເພື່ອພະເຢໂຫວາ ແຕ່ໃຈຂ້ອຍອີກສ່ວນໜຶ່ງບໍ່ຢາກເຮັດຍ້ອນຂ້ອຍມີຄວາມສຸກກັບການໃຊ້ຊີວິດແບບຄົນໃນໂລກນີ້. ຂ້ອຍຮູ້ວ່າມັນຍາກຫຼາຍທີ່ຈະເຊົາເຮັດສິ່ງເຫຼົ່ານີ້.” ສ່ວນບາງຄົນກັງວົນວ່າເຂົາເຈົ້າຈະບໍ່ສາມາດໃຊ້ຊີວິດໃນແບບທີ່ພະເຢໂຫວາຄາດໝາຍຈາກຄົນທີ່ຮັບບັບເຕມາແລ້ວ. ເຂົາເຈົ້າຢ້ານວ່າຫຼັງຈາກຮັບບັບເຕມາແລ້ວ ເຂົາເຈົ້າຈະເຮັດຜິດຮ້າຍແຮງແລະຖືກຕັດອອກຈາກປະຊາຄົມ. ຖ້າເຈົ້າຮູ້ສຶກແບບນີ້ຄືກັນ ເຈົ້າຈະເຮັດແນວໃດ?
ບາງຄົນທີ່ຢາກເຮັດໃຫ້ພະເຢໂຫວາພໍໃຈກັງວົນຫຼາຍໂພດກ່ຽວກັບສິ່ງທີ່ເຂົາເຈົ້າຕ້ອງເຊົາເຮັດເພື່ອຈະຮັບໃຊ້ເພິ່ນ (ເບິ່ງຂໍ້ 4)
5. ເຮົາຄວນຄິດເຖິງຫຍັງເມື່ອຕັດສິນໃຈວ່າຈະຮັບບັບເຕມາຫຼືບໍ່? (ມັດທາຍ 13:44-46)
5 ເມື່ອເຮົາຢາກຊື້ບາງຢ່າງ ເຮົາບໍ່ພຽງແຕ່ເບິ່ງລາຄາເທົ່ານັ້ນ ແຕ່ເຮົາຈະເບິ່ງຄຸນຄ່າຂອງສິ່ງນັ້ນນຳ. ຖ້າມັນມີຄ່າເກີນລາຄາ ເຮົາກໍຈະຊື້ທັນທີໂລດ. ຄ້າຍຄືກັນ ເມື່ອເຮົາຕັດສິນໃຈວ່າຈະຮັບບັບເຕມາຫຼືບໍ່ ເຮົາບໍ່ຄວນຄິດແຕ່ວ່າມັນຍາກທີ່ຈະປ່ຽນແປງໂຕເອງ ແຕ່ເຮົາຄວນຄິດເຖິງຄວາມສຳຄັນຂອງການມີສາຍສຳພັນທີ່ດີກັບພະເຢໂຫວາ. ພະເຢຊູໃຊ້ຕົວຢ່າງປຽບທຽບ 2 ເລື່ອງເພື່ອສອນເຮົາກ່ຽວກັບເລື່ອງນີ້. (ອ່ານມັດທາຍ 13:44-46) ໃນຕົວຢ່າງປຽບທຽບແຕ່ລະເລື່ອງ ຜູ້ຊາຍຄົນໜຶ່ງຍອມຂາຍທຸກສິ່ງທຸກຢ່າງທີ່ລາວມີເພື່ອຈະຊື້ສິ່ງໜຶ່ງທີ່ລາວເຈິເຊິ່ງມີຄ່າຫຼາຍ. ເຈົ້າກໍໄດ້ເຈິສິ່ງໜຶ່ງທີ່ມີຄ່າຄືກັນ ນັ້ນຄື ຂ່າວດີເລື່ອງການປົກຄອງຂອງພະເຈົ້າ. ຖ້າເຈົ້າສົງໄສວ່າການໃຊ້ຊີວິດຕາມຄວາມຈິງຄຸ້ມຄ່າກັບຄວາມພະຍາຍາມຫຼືບໍ່ ໃຫ້ຄິດຄັກໆກ່ຽວກັບຕົວຢ່າງປຽບທຽບຂອງພະເຢຊູ. ເຈົ້າອາດຖາມໂຕເອງວ່າ: ‘ຂ້ອຍເຊື່ອແທ້ໆບໍວ່າຂ່າວດີເລື່ອງການປົກຄອງຂອງພະເຈົ້າເປັນສິ່ງທີ່ມີຄ່າຫຼາຍ? ຂ້ອຍເຫັນຄ່າສາຍສຳພັນທີ່ຂ້ອຍມີກັບພະເຢໂຫວາ ຄວາມຫວັງທີ່ຈະມີຊີວິດຕະຫຼອດໄປ ແລະສັງຄົມພີ່ນ້ອງທີ່ມີຄວາມຮັກບໍ?’ ຄຳຕອບຂອງເຈົ້າສຳລັບຄຳຖາມເຫຼົ່ານີ້ສາມາດຊ່ວຍເຈົ້າໃຫ້ເຫັນສິ່ງທີ່ເຈົ້າຈຳເປັນຕ້ອງເຮັດເພື່ອຈະຕັດສິນໃຈຮັບບັບເຕມາ.
6. ເຮົາຈະມີຫົວໃຈທີ່ດີໄດ້ແນວໃດ?
6 ໃນຕົວຢ່າງປຽບທຽບຂອງພະເຢຊູເລື່ອງຜູ້ຫວ່ານ ພະເຢຊູເວົ້າເຖິງສະພາບຂອງຫົວໃຈທີ່ອາດຂັດຂວາງຄົນເຮົາຈາກການກ້າວໜ້າທາງຄວາມເຊື່ອ. ແຕ່ພະເຢຊູຍັງເວົ້າວ່າ: “ຄົນທີ່ມີຫົວໃຈທີ່ດີແລະສັດຊື່” ຈະຟັງຂ່າວດີເລື່ອງການປົກຄອງຂອງພະເຈົ້າ. (ລກ. 8:5-15) ຖ້າເຈົ້າກັງວົນຍ້ອນບໍ່ແນ່ໃຈວ່າເຈົ້າພ້ອມທີ່ຈະເອົາສິ່ງທີ່ໄດ້ຮຽນໄປໃຊ້ຫຼືບໍ່ ຢ່າຟ້າວທໍ້ໃຈ. ດ້ວຍຄວາມຊ່ວຍເຫຼືອຈາກພະເຢໂຫວາ ເຈົ້າສາມາດ “ປ່ຽນຄວາມຄິດຈິດໃຈໃໝ່” ເຊິ່ງເປັນຄວາມຄິດຈິດໃຈທີ່ຈະເຊື່ອຟັງພະເຢໂຫວາ. ໃຫ້ອະທິດຖານຂໍໃຫ້ພະເຢໂຫວາຊ່ວຍເຈົ້າໃຫ້ຮັກສິ່ງທີ່ເຈົ້າກຳລັງຮຽນແລະເອົາສິ່ງນັ້ນໄປໃຊ້ໃນຊີວິດຂອງເຈົ້າ.—ອຊກ. 18:31; 36:26
7-8. ເປັນຫຍັງໄວລຸ້ນບາງຄົນຈຶ່ງບໍ່ກ້າວໜ້າຈົນເຖິງຂັ້ນຮັບບັບເຕມາ? (ເບິ່ງຮູບນຳ)
7 ໄວລຸ້ນບາງຄົນທີ່ຮັກພະເຢໂຫວາບໍ່ໄດ້ກ້າວໜ້າຈົນເຖິງຂັ້ນຮັບບັບເຕມາຍ້ອນເຂົາເຈົ້າໄດ້ຮັບອິດທິພົນຈາກຄົນອື່ນ. ຕົວຢ່າງເຊັ່ນ: ອາຈານບາງຄົນຢູ່ໂຮງຮຽນອາດບອກນັກຮຽນວ່າການປະພຶດບາງຢ່າງເປັນເລື່ອງທີ່ຍອມຮັບໄດ້ເຖິງວ່າເລື່ອງເຫຼົ່ານັ້ນເປັນສິ່ງທີ່ພະເຢໂຫວາຖືວ່າຜິດ. ແຕ່ການຟັງຄຳແນະນຳແບບນັ້ນຈະສ້າງຄວາມເສຍຫາຍຫຼາຍແທ້ໆ. (ພສ. 1:1, 2; ສພສ. 7:1-5) ເຈົ້າສາມາດຫຼີກລ່ຽງອັນຕະລາຍແບບນີ້ໂດຍເຮັດຕາມຕົວຢ່າງຂອງຜູ້ຂຽນເພງສັນລະເສີນທີ່ບອກພະເຢໂຫວາວ່າ: “ລູກມີຄວາມເຂົ້າໃຈຫຼາຍກວ່າອາຈານທຸກຄົນຂອງລູກ ຍ້ອນລູກຄິດຕຶກຕອງກ່ຽວກັບຂໍ້ເຕືອນໃຈຂອງພະອົງ.”—ພສ. 119:99
8 ເບິ່ງຄືວ່າພໍ່ແມ່ບາງຄົນທີ່ເປັນພະຍານພະເຢໂຫວາຖ່ວງດຶງລູກໄວ້ຈາກການຮັບບັບເຕມາ. ເຂົາເຈົ້າສົນໃຈຫຼາຍໂພດກ່ຽວກັບເລື່ອງການຮຽນແລະວຽກອາຊີບຂອງລູກ ຫຼືເຂົາເຈົ້າອາດຈະບໍ່ໄດ້ຊ່ວຍລູກໃຫ້ຕັ້ງເປົ້າໝາຍທາງຄວາມເຊື່ອ. ເຈົ້າຮູ້ສຶກວ່າພໍ່ແມ່ສາມາດສະໜັບສະໜູນເຈົ້າຫຼາຍຂຶ້ນໄດ້ບໍໃນການຊ່ວຍເຈົ້າໃຫ້ຕັ້ງເປົ້າໝາຍເພື່ອຈະຮັບບັບເຕມາ? ຖ້າເຈົ້າຮູ້ສຶກແບບນັ້ນ ໃຫ້ລົມເລື່ອງນີ້ກັບພໍ່ແມ່. ຂໍໃຫ້ໝັ້ນໃຈວ່າບໍ່ວ່າເຈົ້າຈະອາຍຸສ່ຳໃດ ເຈົ້າກໍສາມາດເປັນໝູ່ສະໜິດກັບພະເຢໂຫວາໄດ້.—ສພສ. 20:11
ໃຫ້ລົມເລື່ອງການຮັບບັບເຕມາກັບພໍ່ແມ່ (ເບິ່ງຂໍ້ 8)
9. ເປັນຫຍັງບາງຄົນອາດຍັງບໍ່ຢາກຮັບບັບເຕມາ?
9 ບາງຄົນທີ່ມີຄຸນສົມບັດພ້ອມແລ້ວທີ່ຈະຮັບບັບເຕມາອາດຍັງບໍ່ຢາກຮັບເທື່ອຍ້ອນຄວາມກົດດັນຈາກໝູ່ ຫຼືອາດເປັນຍ້ອນເຂົາເຈົ້າລໍຖ້າທີ່ຈະຮັບບັບເຕມາພ້ອມກັບຜູ້ໃດຜູ້ໜຶ່ງເປັນພິເສດ. ຕົວຢ່າງເຊັ່ນ: ເຂົາເຈົ້າອາດຢາກຮັບບັບເຕມາພ້ອມກັບໝູ່ສະໜິດຫຼືຄົນໃນຄອບຄົວ. ແນ່ນອນວ່າເຈົ້າສາມາດຮັບບັບເຕມາພ້ອມກັບຄົນທີ່ເຈົ້າຮັກໄດ້. ແຕ່ທີ່ຈິງແລ້ວ ເລື່ອງນີ້ຄວນເປັນເຫດຜົນທີ່ເຈົ້າບໍ່ທັນຮັບບັບເຕມາຕອນນີ້ບໍ? ຂໍໃຫ້ຈື່ໄວ້ວ່າການອຸທິດໂຕເປັນຄຳສັນຍາທີ່ເຈົ້າເຮັດເປັນສ່ວນໂຕກັບພະເຢໂຫວາ. ສະນັ້ນ ບໍ່ຄວນໃຫ້ການຮັບບັບເຕມາຂອງເຈົ້າຂຶ້ນກັບຄົນອື່ນ.—ຣມ. 14:12
ໃຫ້ຈື່ໄວ້ວ່າຈຸດຈົບຂອງໂລກນີ້ໃກ້ຈະມາຮອດແລ້ວ
10. ເປັນຫຍັງບາງຄົນຈຶ່ງຍັງບໍ່ທັນປ່ຽນແປງໂຕເອງທຸກຢ່າງເພື່ອຈະມີຄຸນສົມບັດທີ່ຈະຮັບບັບເຕມາ?
10 ນອກຈາກເຫດຜົນຕ່າງໆທີ່ເວົ້າມາແລ້ວ ບາງຄົນອາດຍັງບໍ່ທັນປ່ຽນແປງໂຕເອງທຸກຢ່າງເພື່ອຈະມີຄຸນສົມບັດທີ່ຈະຮັບບັບເຕມາຍ້ອນເຂົາເຈົ້າຄິດວ່າຍັງມີເວລາເຫຼືອເຟືອກ່ອນຈຸດຈົບຈະມາຮອດ. ແຕ່ການຫາເຫດຜົນແບບນັ້ນເປັນເລື່ອງທີ່ສະຫຼາດບໍ? ພະເຢຊູເຕືອນພວກລູກສິດຂອງເພິ່ນວ່າ: “[ໃຫ້] ກຽມພ້ອມ . . . ເພາະລູກມະນຸດຈະມາໃນຕອນທີ່ພວກເຈົ້າບໍ່ຄາດຄິດ.”—ລກ. 12:40
11. ເມື່ອເຮົາຮຽນຮູ້ກ່ຽວກັບພະເຢໂຫວາຫຼາຍຂຶ້ນ ເຮົາຖືກກະຕຸ້ນໃຫ້ເຮັດຫຍັງ? (ເພງສັນລະເສີນ 119:60)
11 ເຮົາອຸທິດໂຕໃຫ້ພະເຢໂຫວາກໍຍ້ອນເຮົາຮັກເພິ່ນ. ແຮ່ງເຮົາຮຽນຮູ້ກ່ຽວກັບພະເຢໂຫວາ ເຮົາກໍແຮ່ງຖືກກະຕຸ້ນໃຫ້ຮັກແລະເຮັດຕາມຄຳສັ່ງຂອງເພິ່ນ. (ອ່ານເພງສັນລະເສີນ 119:60) ຢາໂກໂບເວົ້າເຖິງອີກເຫດຜົນໜຶ່ງທີ່ສຳຄັນທີ່ເຮົາຕ້ອງເຮັດຕາມຄຳສັ່ງຂອງພະເຢໂຫວາ ນັ້ນຄື ເຮົາບໍ່ຮູ້ວ່າມື້ອື່ນຊິເປັນແນວໃດ. ສະນັ້ນ ເຮົາຄວນໃຊ້ແຕ່ລະມື້ເພື່ອເຮັດ “ສິ່ງ [ທີ່] ຖືກຕ້ອງ” ເຊິ່ງກໍຄືເຮັດສິ່ງທີ່ເຮົາຮູ້ວ່າພະເຢໂຫວາຢາກໃຫ້ເຮົາເຮັດ.—ຢກບ. 4:13-17
12. ເຮົາຮຽນຫຍັງຈາກຕົວຢ່າງປຽບທຽບຂອງພະເຢຊູເລື່ອງສວນໝາກລະແຊັງ?
12 ໃຫ້ຄິດເຖິງຕົວຢ່າງປຽບທຽບຂອງພະເຢຊູເລື່ອງສວນໝາກລະແຊັງ. ເພິ່ນບອກວ່າບາງຄົນຈະເຮັດວຽກແຕ່ຊົ່ວໂມງດຽວແລະຍັງໄດ້ຮັບຄ່າຈ້າງສ່ຳກັບຄົນທີ່ເຮັດວຽກໝົດມື້. ເປັນຫຍັງຄົນທີ່ເຮັດວຽກພຽງແຕ່ຊົ່ວໂມງດຽວບໍ່ເລີ່ມເຮັດວຽກແຕ່ດົນ? ເຂົາເຈົ້າຕອບວ່າ: “ຍ້ອນບໍ່ມີໃຜຈ້າງພວກເຮົາ.” ຄົນເຫຼົ່ານີ້ບໍ່ໄດ້ຂີ້ຄ້ານ. ເຂົາເຈົ້າຢາກເຮັດວຽກໝົດມື້ ແຕ່ບໍ່ມີໃຜຈ້າງເຂົາເຈົ້າ. ເມື່ອມີຄົນຈ້າງ ເຂົາເຈົ້າກໍໄປເຮັດວຽກທັນທີເລີຍ. (ມທ. 20:1-16) ໃນທຸກມື້ນີ້ ພະເຢຊູຊວນເຮົາໃຫ້ເຂົ້າມາເປັນລູກສິດຂອງເພິ່ນແລະເຮັດວຽກປະກາດ. ເຮົາຄວນເຮັດຕາມທັນທີເມື່ອເພິ່ນຊວນ.
13. ເຮົາຮຽນຫຍັງຈາກເມຍຂອງໂລດ?
13 ບາງຄົນອາດບໍ່ທັນຢາກປ່ຽນແປງໂຕເອງເພື່ອເຂົ້າມາຮັບໃຊ້ພະເຢໂຫວາຍ້ອນເຂົາເຈົ້າຄິດວ່າຈະບໍ່ສາມາດປ່ຽນແປງໄດ້ທັນທີກ່ອນທີ່ຈຸດຈົບຂອງໂລກນີ້ຈະມາຮອດ. ແຕ່ແຮ່ງເຈົ້າລໍຖ້າ ມັນກໍແຮ່ງຍາກທີ່ຈະປ່ຽນແປງໂຕເອງແລ້ວເຂົ້າມາຮັບໃຊ້ພະເຢໂຫວາ. ພະເຢຊູຮູ້ເລື່ອງນີ້ແລະເພິ່ນໄດ້ເຕືອນພວກລູກສິດວ່າ: “ຈື່ເລື່ອງເມຍຂອງໂລດໄວ້ໃຫ້ດີ.” (ລກ. 17:31-35) ເມຍຂອງໂລດຮູ້ວ່າພະເຢໂຫວາຈະທຳລາຍເມືອງໂຊໂດມກັບເມືອງໂກໂມຣາໃນໄວໆນີ້ ແຕ່ເບິ່ງຄືວ່າໃຈລາວຍັງຜູກພັນຢູ່ກັບວັດຖຸເງິນຄຳທີ່ລາວປະຖິ້ມໄວ້. (ປຖກ. 19:23-26) ເລື່ອງຂອງລາວຍັງເຕືອນເຮົາວ່າປະຕູສູ່ຄວາມລອດຈະບໍ່ໄດ້ເປີດໄວ້ຢູ່ຕະຫຼອດ. ເມື່ອຮອດເວລາທີ່ພະເຢໂຫວາກຳນົດໄວ້ ປະຕູນັ້ນຈະປິດແລະຖືກລ໋ອກໄວ້ຕະຫຼອດໄປ.—ລກ. 13:24, 25
14. ຄຳພະຍາກອນຕ່າງໆໃນຄຳພີໄບເບິນກ່ຽວກັບຈຸດຈົບຂອງໂລກນີ້ຄວນສົ່ງຜົນຕໍ່ເຈົ້າແນວໃດ?
14 ໃນແຕ່ລະມື້ທີ່ຜ່ານໄປ ເຫດການຕ່າງໆທີ່ກຳລັງເກີດຂຶ້ນໃນໂລກເຮັດໃຫ້ຄຳພະຍາກອນໃນຄຳພີໄບເບິນກ່ຽວກັບຈຸດຈົບຂອງໂລກນີ້ເກີດຂຶ້ນແທ້. ເຖິງວ່າບາງຢ່າງບໍ່ໄດ້ເກີດຂຶ້ນໃນບ່ອນທີ່ເຈົ້າຢູ່ ແຕ່ການເຫັນສິ່ງເຫຼົ່ານັ້ນກຳລັງເກີດຂຶ້ນຢູ່ບ່ອນອື່ນຄວນກະຕຸ້ນເຈົ້າໃຫ້ປ່ຽນແປງໂຕເອງເພື່ອຈະຮັບບັບເຕມາໃຫ້ໄວເທົ່າທີ່ຈະເປັນໄປໄດ້. ໃຫ້ເບິ່ງສິ່ງທີ່ອັກຄະສາວົກເປໂຕບອກຄລິດສະຕຽນໃນສະຕະວັດທຳອິດ. ລາວບອກເຂົາເຈົ້າໃຫ້ “ມີສະຕິ” ຍ້ອນ “ຈຸດຈົບຂອງທຸກສິ່ງມາໃກ້ແລ້ວ.” (1ປຕ. 4:7) ເບິ່ງຄືວ່າ “ຈຸດຈົບ” ທີ່ເວົ້າເຖິງໃນຂໍ້ນີ້ໝາຍເຖິງຕອນທີ່ເມືອງເຢຣູຊາເລັມແລະວິຫານຈະຖືກທຳລາຍ. ຄົນທີ່ເປໂຕຂຽນຈົດໝາຍໄປຫາຢູ່ໄກຈາກເມືອງເຢຣູຊາເລັມ ສະນັ້ນ ເຂົາເຈົ້າຈະບໍ່ໄດ້ຮັບຜົນກະທົບໂດຍກົງເມື່ອເມືອງນີ້ຖືກທຳລາຍ. (1ປຕ. 1:1) ແຕ່ເມື່ອເຂົາເຈົ້າເຫັນວ່າຄຳພະຍາກອນນັ້ນເກີດຂຶ້ນແທ້ ເຂົາເຈົ້າກໍຈະໝັ້ນໃຈຫຼາຍຂຶ້ນໃນຄຳສັນຍາອື່ນໆຂອງພະເຢໂຫວາ. ຄ້າຍຄືກັນ ເມື່ອເຈົ້າເຫັນຄຳພະຍາກອນຕ່າງໆກ່ຽວກັບຈຸດຈົບຂອງໂລກນີ້ກຳລັງເກີດຂຶ້ນແທ້ ເຈົ້າກໍຈະຖືກກະຕຸ້ນໃຫ້ເຮັດໃນສິ່ງທີ່ຈຳເປັນຕ້ອງເຮັດເພື່ອຈະຮັບບັບເຕມາໄດ້.
15. ເຮົາຈະກຽມພ້ອມແນວໃດສຳລັບວັນຂອງພະເຢໂຫວາ? (2 ເປໂຕ 3:10-13)
15 ໃນຈົດໝາຍສະບັບທີ 2 ຂອງເປໂຕ ລາວບອກວ່າເຮົາຄວນກຽມພ້ອມແນວໃດສຳລັບວັນຂອງພະເຢໂຫວາເຊິ່ງກໍຄືຈຸດຈົບຂອງໂລກນີ້. ສຳລັບຄລິດສະຕຽນທີ່ມີຊີວິດໃນສະຕະວັດທຳອິດ ມື້ນັ້ນຍັງຢູ່ອີກໄກ. ແຕ່ເປໂຕບອກເຂົາເຈົ້າໃຫ້ “ຄິດຢູ່ສະເໝີ” ຫຼືໃຫ້ “ຢາກເຫັນວັນຂອງພະເຢໂຫວາມາຮອດໄວໆ.” (ອ່ານ 2 ເປໂຕ 3:10-13; ໄຂເງື່ອນ) ເຮົາຄິດເຖິງວັນຂອງພະເຢໂຫວາສະເໝີຖ້າເຮົາສຳນຶກຢູ່ຕະຫຼອດວ່າວັນນັ້ນຈະມາໃນໄວໆນີ້. ເຮົາສະແດງໃຫ້ເຫັນວ່າເຮົາກຽມພ້ອມໂດຍ “ປະພຶດໂຕໃຫ້ບໍລິສຸດແລະເຮັດສິ່ງທີ່ສະແດງວ່າ [ເຮົາ] ຢ້ານຢຳພະເຈົ້າ.” ພະເຢໂຫວາຕ້ອງດີໃຈຫຼາຍແທ້ໆທີ່ເຫັນເຈົ້າ ‘ເຮັດສິ່ງທີ່ສະແດງວ່າເຈົ້າຢ້ານຢຳພະເຈົ້າ.’ ແນ່ນອນວ່າພະເຢໂຫວາຊິດີໃຈຫຼາຍກວ່າທີ່ເຫັນເຈົ້າອຸທິດໂຕໃຫ້ເພິ່ນແລະຮັບບັບເຕມາ.
ປະໂຫຍດຂອງການຮັບບັບເຕມາຕັ້ງແຕ່ຕອນນີ້
16. ຕອນໃດເປັນເວລາທີ່ດີທີ່ສຸດທີ່ຈະຮັບບັບເຕມາ? (2 ໂກຣິນໂທ 6:1, 2) (ເບິ່ງຮູບນຳ)
16 ຕອນນີ້ເປັນເວລາທີ່ດີທີ່ສຸດທີ່ຈະຮັບບັບເຕມາ. (ອ່ານ 2 ໂກຣິນໂທ 6:1, 2) ຂ້າລາຊະການຄົນເອທິໂອເປຍທີ່ຟີລິບເຈິເຂົ້າໃຈວ່າລາວຄວນຮັບບັບເຕມາທັນທີເມື່ອລາວໄດ້ຮຽນຮູ້ເລື່ອງຂ່າວດີແລະເຫັນວ່າມີບ່ອນທີ່ຈະຮັບບັບເຕມາໄດ້. ລາວບໍ່ໄດ້ຄິດວ່າ: ‘ຂ້ອຍຈະຮຽນຮູ້ເລື່ອງຂ່າວດີຕື່ມອີກກ່ອນ ແລະຢູ່ຕາມທາງຄືຊິມີໜອງນ້ຳໂຕອື່ນຢູ່ດອກ.’ ແທນທີ່ຈະຄິດແບບນັ້ນ ລາວຖາມຟີລິບວ່າ: “ມີຫຍັງທີ່ເຮັດໃຫ້ຂ້ອຍຮັບບັບເຕມາບໍ່ໄດ້?” (ກຈກ. 8:26, 27, 35-39) ນີ້ເປັນຕົວຢ່າງທີ່ດີແທ້ໆ. ຫຼັງຈາກຂ້າລາຊະການຄົນເອທິໂອເປຍຮັບບັບເຕມາແລ້ວ ລາວກໍ “ເດີນທາງຕໍ່ໄປຢ່າງມີຄວາມສຸກ.”
ຕົວຢ່າງຂອງຂ້າລາຊະການຄົນເອທິໂອເປຍສອນເຮົາວ່າ ຕອນນີ້ເປັນເວລາທີ່ດີທີ່ສຸດທີ່ຈະຮັບບັບເຕມາ! (ເບິ່ງຂໍ້ 16)a
17. ເຮົາສາມາດໝັ້ນໃຈໃນເລື່ອງໃດ?
17 ຖ້າເຈົ້າຍັງລັງເລທີ່ຈະຮັບບັບເຕມາ ຂໍໃຫ້ເຈົ້າໝັ້ນໃຈວ່າພະເຢໂຫວາຢາກຊ່ວຍເຈົ້າໃຫ້ມາເປັນໝູ່ສະໜິດຂອງເພິ່ນ. (ຣມ. 2:4) ເພິ່ນສາມາດຊ່ວຍເຈົ້າໃຫ້ເອົາຊະນະຄວາມຢ້ານ ຄວາມກັງວົນ ຫຼືອິດທິພົນຈາກຄົນອື່ນທີ່ອາດເຮັດໃຫ້ເຈົ້າບໍ່ກ້າວໜ້າຈົນເຖິງຂັ້ນຮັບບັບເຕມາ. ເມື່ອເຈົ້າຮັບບັບເຕມາແລ້ວ ເຈົ້າຈະມີຄວາມສຸກຫຼາຍທີ່ໄດ້ເຮັດໃຫ້ພະເຢໂຫວາພໍໃຈ ແລະເຈົ້າຈະເຫັນວ່າ “ສິ່ງຕ່າງໆທີ່ຢູ່ທາງຫຼັງ” ບໍ່ມີຄ່າຫຍັງສຳລັບເຈົ້າ. (ຟລປ. 3:8, 13) ຕໍ່ຈາກນີ້ໄປ ເຈົ້າສາມາດຕັ້ງໃຈລໍຖ້າ “ສິ່ງທີ່ຢູ່ທາງໜ້າ” ເຊິ່ງກໍຄືການທີ່ພະເຢໂຫວາຈະເຮັດໃຫ້ຄຳສັນຍາຕ່າງໆຂອງເພິ່ນເກີດຂຶ້ນແທ້ສຳລັບຄົນທີ່ອຸທິດໂຕໃຫ້ເພິ່ນແລະຮັບບັບເຕມາ.—ກຈກ. 3:19
ເພງທີ 38 ພະອົງຈະເຮັດໃຫ້ເຈົ້າເຂັ້ມແຂງ
a ຄຳອະທິບາຍຮູບ: ຄືກັບທີ່ຂ້າລາຊະການຄົນເອທິໂອເປຍບອກຟີລິບວ່າລາວຢາກຮັບບັບເຕມາ ນັກສຶກສາຄຳພີໄບເບິນຄົນໜຶ່ງກໍໄປຫາຜູ້ເບິ່ງແຍງເພື່ອບອກເຂົາເຈົ້າວ່າລາວຢາກຮັບບັບເຕມາ.