ບົດທີ 53
ເລືອກຄວາມບັນເທີງໃນແບບທີ່ເຮັດໃຫ້ພະເຢໂຫວາພໍໃຈ
ພະເຢໂຫວາເປັນ “ພະເຈົ້າຜູ້ມີຄວາມສຸກ.” (1 ຕີໂມທຽວ 1:11) ແລະເພິ່ນຢາກໃຫ້ເຮົາມີຊີວິດທີ່ມີຄວາມສຸກນຳ. ເພິ່ນຈະຮູ້ສຶກດີໃຈຖ້າເຫັນເຮົາພັກຈາກການເຮັດວຽກແດ່ແລະມີເວລາຜ່ອນຄາຍ. ໃນບົດນີ້ເຮົາຈະມາເບິ່ງວ່າ ເຮົາຈະໃຊ້ເວລາພັກຜ່ອນຂອງເຮົາແນວໃດເພື່ອຈະເຮັດໃຫ້ເຮົາເອງມີຄວາມສຸກແລະເປັນແບບທີ່ພະເຢໂຫວາພໍໃຈນຳ.
1. ຕອນທີ່ເຮົາເລືອກຄວາມບັນເທີງ ເຮົາຄວນແນ່ໃຈເລື່ອງຫຍັງ?
ຕອນທີ່ເຈົ້າພັກຜ່ອນ ເຈົ້າມັກເຮັດຫຍັງແດ່? ບາງຄົນມັກຢູ່ເຮືອນ ອ່ານໜັງສື ເບິ່ງໜັງ ຟັງເພງ ຫຼືຫຼິ້ນອິນເຕີເນັດ. ສ່ວນບາງຄົນກໍມັກໄປກັບໝູ່ຄູ່ ເຊັ່ນ: ໄປທ່ຽວ ໄປລອຍນ້ຳ ຫຼືຫຼິ້ນເກມນຳກັນ. ບໍ່ວ່າເຮົາຈະມັກຄວາມບັນເທີງແບບໃດ ເຮົາກໍຕ້ອງເຮັດໃຫ້ແນ່ໃຈວ່າເຮົາໄດ້ເລືອກຄວາມບັນເທີງແບບທີ່ “ຜູ້ເປັນນາຍພໍໃຈ.” (ເອເຟໂຊ 5:10) ເລື່ອງນີ້ສຳຄັນຫຼາຍເພາະຄວາມບັນເທີງຫຼາຍຢ່າງກ່ຽວຂ້ອງກັບສິ່ງທີ່ພະເຢໂຫວາຊັງ ເຊັ່ນ: ຄວາມຮຸນແຮງ ການຜິດສິນລະທຳ ຫຼືກ່ຽວຂ້ອງກັບໄສຍະສາດ. (ອ່ານເພງສັນລະເສີນ 11:5) ແລ້ວອັນໃດຈະຊ່ວຍເຮົາໃຫ້ເລືອກຄວາມບັນເທີງທີ່ດີໄດ້?
ຖ້າເຮົາເລືອກເປັນໝູ່ກັບຄົນທີ່ຮັກພະເຢໂຫວາກໍຈະມີຜົນດີກັບເຮົາແລະກັບການເລືອກຄວາມບັນເທີງຂອງເຮົາ. ເຮົາໄດ້ຮຽນໃນບົດທີ 48 ໄປແລ້ວວ່າ “ຄົນທີ່ຄົບຫາກັບຄົນສະຫຼາດຈະສະຫຼາດ.” ແຕ່ຖ້າເປັນໝູ່ສະໜິດກັບຄົນທີ່ບໍ່ໄດ້ຮັກມາດຕະຖານຂອງພະເຈົ້າ ເຮົາກໍຈະ “ເດືອດຮ້ອນ.”—ສຸພາສິດ 13:20
2. ເປັນຫຍັງເຮົາຕ້ອງກຳນົດໄວ້ວ່າຈະໃຊ້ເວລາຫຼາຍສ່ຳໃດກັບຄວາມບັນເທີງ?
ເຖິງວ່າຄວາມບັນເທີງທີ່ເຮົາເລືອກຈະເປັນແບບທີ່ພະເຢໂຫວາພໍໃຈ ແຕ່ເຮົາກໍຕ້ອງລະວັງທີ່ຈະບໍ່ໃຊ້ເວລາກັບຄວາມບັນເທີງຫຼາຍເກີນໄປ. ເພາະຖ້າບໍ່ລະວັງ ເຮົາຈະບໍ່ມີເວລາເຮັດແນວອື່ນທີ່ສຳຄັນກວ່າ. ຄຳພີໄບເບິນບອກໃຫ້ເຮົາ “ໃຊ້ເວລາໃຫ້ເປັນປະໂຫຍດຫຼາຍທີ່ສຸດ.”—ອ່ານເອເຟໂຊ 5:15, 16
ຮຽນຮູ້ຫຼາຍຂຶ້ນ
ມາເບິ່ງວ່າເຈົ້າຈະເລືອກຄວາມບັນເທີງທີ່ດີໄດ້ແນວໃດ.
3. ເຮົາບໍ່ຄວນເລືອກຄວາມບັນເທີງທີ່ບໍ່ດີ
ເປັນຫຍັງເຮົາຄວນຄິດໃຫ້ດີຕອນທີ່ເຮົາເລືອກຄວາມບັນເທີງ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ການຕໍ່ສູ້ໃນສະໄໝໂຣມຄ້າຍຄືກັນກັບຄວາມບັນເທີງບາງຢ່າງໃນທຸກມື້ນີ້ແນວໃດ?
ຈາກວິດີໂອ ແດນນີ້ໄດ້ຮຽນຮູ້ຫຍັງກ່ຽວກັບຄວາມບັນເທີງ?
ອ່ານໂຣມ 12:9 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເມື່ອຕ້ອງເລືອກຄວາມບັນເທີງ ຂໍ້ຄຳພີນີ້ຈະຊ່ວຍເຈົ້າໄດ້ແນວໃດ?
ມີຫຍັງແດ່ທີ່ພະເຢໂຫວາຊັງ? ອ່ານສຸພາສິດ 6:16, 17 ແລະຄາລາເຕຍ 5:19-21. ຫຼັງຈາກອ່ານຂໍ້ຄຳພີຂໍ້ໜຶ່ງຈົບແລ້ວ ໃຫ້ຖາມຄຳຖາມທີ່ຢູ່ທາງລຸ່ມແລະໃຫ້ເຮັດແບບນີ້ຈົນຄົບທຸກຂໍ້.
ຈາກຂໍ້ຄຳພີທີ່ອ່ານໄປ ມີຄວາມບັນເທີງຫຍັງແດ່ທີ່ເຮົາເຫັນໄດ້ທົ່ວໄປໃນທຸກມື້ນີ້?
ເຈົ້າຈະເລືອກຄວາມບັນເທີງທີ່ດີໄດ້ແນວໃດ?
ໃຫ້ຖາມໂຕເອງວ່າ:
ຄວາມບັນເທີງນີ້ມີຫຍັງທີ່ພະເຢໂຫວາຊັງບໍ?
ຄວາມບັນເທີງນີ້ເຮັດໃຫ້ຂ້ອຍບໍ່ມີເວລາເຮັດສິ່ງທີ່ສຳຄັນກວ່າບໍ?
ຄວາມບັນເທີງນີ້ເຮັດໃຫ້ຂ້ອຍຕ້ອງໃຊ້ເວລາເລື້ອຍໆກັບຄົນທີ່ບໍ່ໄດ້ຮັກພະເຢໂຫວາບໍ?
ແຮ່ງເຮົາຢູ່ຫ່າງຈາກອັນຕະລາຍຫຼາຍສ່ຳໃດ ເຮົາກໍແຮ່ງຈະປອດໄພຫຼາຍສ່ຳນັ້ນ. ສະນັ້ນ ຖ້າເຮົາຮູ້ສຶກວ່າຄວາມບັນເທີງໃດທີ່ອາດຈະບໍ່ດີຕໍ່ເຮົາ ເຮົາກໍຄວນຈະຢູ່ຫ່າງຈາກຄວາມບັນເທີງນັ້ນ
4. ໃຊ້ເວລາຂອງເຈົ້າຢ່າງສະຫຼາດ
ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຖິງວ່າພີ່ນ້ອງຊາຍໃນວິດີໂອບໍ່ໄດ້ເບິ່ງຫຍັງທີ່ບໍ່ດີ ແຕ່ລາວໃຊ້ເວລາຂອງລາວແນວໃດແລະຜົນເປັນແນວໃດ?
ອ່ານຟີລິບປອຍ 1:10 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເມື່ອຕ້ອງຕັດສິນໃຈວ່າຈະໃຊ້ເວລາກັບຄວາມບັນເທີງຫຼາຍໜ້ອຍສ່ຳໃດ ຂໍ້ຄຳພີນີ້ຈະຊ່ວຍເຮົາແນວໃດ?
5. ເລືອກຄວາມບັນເທີງທີ່ດີ
ເຖິງຈະມີຄວາມບັນເທີງບາງຢ່າງທີ່ພະເຢໂຫວາບໍ່ມັກ ແຕ່ກໍມີອີກຫຼາຍຢ່າງທີ່ເພິ່ນພໍໃຈແລະເຮົາກໍເຮັດໄດ້. ອ່ານປັນຍາຈານ 8:15 ແລະຟີລິບປອຍ 4:8 ແລ້ວລົມກັນກ່ຽວກັບຄຳຖາມຕໍ່ໄປນີ້:
ມີຄວາມບັນເທີງຫຍັງແດ່ທີ່ເຈົ້າມັກ?
ເຈົ້າມີຄວາມສຸກກັບຄວາມບັນເທີງແລະກິດຈະກຳທີ່ມ່ວນໆໄດ້
ບາງຄົນເວົ້າວ່າ: “ເບິ່ງໜັງຫຼືຫຼິ້ນເກມທີ່ມີຜີ ມີສາກໂປ້ ຫຼືມີຄວາມຮຸນແຮງມັນກໍມ່ວນດີໄດ໋ ບໍ່ໜ້າຈະເປັນຫຍັງດອກ ຂ້ອຍກໍເບິ່ງຊື່ໆບໍ່ໄດ້ເຮັດຕາມ.”
ຖ້າມີຄົນເວົ້າແບບນີ້ ເຈົ້າຈະຕອບແນວໃດ?
ສະຫຼຸບ
ພະເຢໂຫວາຢາກໃຫ້ເຮົາຄິດດີໆຕອນທີ່ເຮົາເລືອກຄວາມບັນເທີງເພື່ອເຮົາຈະມີຄວາມສຸກແທ້ໆ.
ຄຳຖາມທົບທວນ
ຄລິດສະຕຽນບໍ່ຄວນເລືອກຄວາມບັນເທີງແບບໃດ?
ເປັນຫຍັງເຮົາຕ້ອງລະວັງທີ່ຈະບໍ່ໃຊ້ເວລາຫຼາຍເກີນໄປກັບຄວາມບັນເທີງ?
ເປັນຫຍັງເຈົ້າຢາກຈະເລືອກຄວາມບັນເທີງໃນແບບທີ່ເຮັດໃຫ້ພະເຢໂຫວາພໍໃຈ?
ເບິ່ງເພີ່ມເຕີມ
ການຕັດສິນໃຈເລືອກຄວາມບັນເທີງເປັນໜ້າທີ່ຂອງໃຜ.
“ພະຍານພະເຢໂຫວາຫ້າມການເບິ່ງໜັງ ອ່ານປຶ້ມ ຫຼືຟັງເພງບາງຢ່າງບໍ?” (ບົດຄວາມໃນເວັບໄຊ)
ອັນໃດຈະຊ່ວຍໃຫ້ເຈົ້າຕັດສິນໃຈໄດ້ດີເມື່ອຕ້ອງເລືອກຄວາມບັນເທີງແລະກິດຈະກຳຕ່າງໆ.
“ການພັກຜ່ອນຢ່ອນໃຈຂອງເຈົ້າເປັນປະໂຫຍດບໍ?” (ຫໍສັງເກດການ 15 ຕຸລາ 2011)
ອ່ານເລື່ອງ “ຂ້ອຍເຖິງກັບເອົາຊະນະອະຄະຕິໄດ້” ເພື່ອເບິ່ງວ່າຜູ້ຊາຍຄົນໜຶ່ງເລືອກຄວາມບັນເທີງທີ່ດີໄດ້ແນວໃດ.
ແມ່ຄົນໜຶ່ງເຮັດຫຍັງເມື່ອລາວເປີດໂທລະທັດໄປເຈິໜັງຜີ.