ບົດທີ 18
ຂ້ອຍຈະຫາເງິນໄດ້ແນວໃດ?
“ຂ້ອຍຢາກມີເງິນຊື້ລົດໃຫຍ່.”—ເຊີຈີໂອ
“ຂ້ອຍມັກຊື້ເຄື່ອງ.”—ລໍຣີແອນ
“ມີບາງຢ່າງທີ່ຂ້ອຍມັກແລະກໍຢາກໄດ້ ແຕ່ພໍ່ແມ່ບໍ່ມີເງິນຊື້ໃຫ້.”—ໄມ
ເຈົ້າອາດຢາກຫາເງິນດ້ວຍເຫດຜົນຄ້າຍໆກັນ ຫຼືເຈົ້າອາດຢາກແບ່ງເບົາພາລະພໍ່ແມ່ໃນການຊື້ເຄື່ອງນຸ່ງຫຼືເຄື່ອງໃຊ້ສ່ວນໂຕຂອງໂຕເອງ. ບາງທີເຈົ້າອາດຢາກຫາເງິນເພື່ອມາເບິ່ງແຍງຄອບຄົວ.
ບໍ່ວ່າຈະຍ້ອນເຫດຜົນຫຍັງ ການຊື້ເຄື່ອງສຳລັບໂຕເຈົ້າເອງຫຼືຄອບຄົວກໍຕ້ອງໃຊ້ເງິນ. ເຖິງພະເຢຊູຈະສັນຍາວ່າພະເຈົ້າຈະເບິ່ງແຍງຄົນທີ່ ‘ໃຫ້ການປົກຄອງຂອງພະເຈົ້າເປັນສິ່ງສຳຄັນທີ່ສຸດໃນຊີວິດ’ ແຕ່ຄລິດສະຕຽນກໍຍັງຕ້ອງເຮັດວຽກຫາລ້ຽງໂຕເອງ. (ມັດທາຍ 6:33; ກິດຈະການ 18:1-3; 2 ເທຊະໂລນິກ 3:10) ຖ້າເປັນແນວນັ້ນ ເຈົ້າຈະຫາເງິນໄດ້ແນວໃດ? ແລະທີ່ສຳຄັນກວ່ານັ້ນ ເຈົ້າຈະມີຄວາມຄິດທີ່ສົມດຸນໃນເລື່ອງເງິນໄດ້ແນວໃດ?
ວິທີຫາວຽກ
ຖ້າເຈົ້າຢາກໄດ້ເຄື່ອງທີ່ລາຄາແພງເກີນກວ່າທີ່ພໍ່ແມ່ຈະຈ່າຍໄຫວ ເຈົ້າອາດຕ້ອງຫາວຽກເຮັດເພື່ອຈະມີເງິນມາຊື້ເອງໄດ້. ໃຫ້ລົມເລື່ອງນີ້ກັບພໍ່ແມ່. ເຂົາເຈົ້າອາດຊົມເຊີຍເຈົ້າທີ່ຢາກຫາວຽກເຮັດ. ຖ້າເຂົາເຈົ້າເຫັນດີແລະເຈົ້າເອງກໍໃຫຍ່ພໍທີ່ຈະເຮັດວຽກໄດ້ຕາມກົດໝາຍ ຂໍໃຫ້ເບິ່ງຄຳແນະນຳສີ່ຢ່າງຕໍ່ໄປນີ້.
ເວົ້າໃຫ້ຄົນອື່ນຟັງວ່າເຈົ້າກຳລັງຊອກຫາວຽກ. ໃຫ້ບອກເພື່ອນບ້ານ ຄູ ແລະຍາດພີ່ນ້ອງວ່າເຈົ້າກຳລັງຊອກຫາວຽກ. ຖ້າເຈົ້າຮູ້ສຶກອາຍທີ່ຈະຖາມໂດຍກົງ ກໍໃຫ້ຖາມເຂົາເຈົ້າວ່າຕອນທີ່ເຂົາເຈົ້າອາຍຸສ່ຳເຈົ້າ ເຂົາເຈົ້າເຮັດວຽກຫຍັງ. ຖ້າມີຄົນຮູ້ວ່າເຈົ້າກຳລັງຊອກຫາວຽກຫຼາຍເທົ່າໃດ ເຈົ້າກໍຈະມີໂອກາດໄດ້ວຽກເຮັດຫຼາຍຂຶ້ນເທົ່ານັ້ນ.
ຊອກຫາທຸກຊ່ອງທາງ. ໃຫ້ເບິ່ງປະກາດຮັບສະໝັກວຽກໃນໜັງສືພິມ ອິນເຕີເນັດ ໂຮງຮຽນຕ່າງໆ ຮ້ານຄ້າແລະບ່ອນຈັດຫາວຽກ. ໄວລຸ້ນຄົນໜຶ່ງຊື່ເດບບອກວ່າ: “ວິທີນີ້ຊ່ວຍຂ້ອຍໃຫ້ໄດ້ວຽກເຮັດ. ຂ້ອຍເຫັນປະກາດຮັບສະໝັກວຽກໃນໜັງສືພິມ ຂ້ອຍຈຶ່ງສົ່ງປະຫວັດຫຍໍ້ຂອງຂ້ອຍໃຫ້ກັບບໍລິສັດແລະໂທຫາເຂົາເຈົ້າ.” ຖ້າເຮັດວິທີນີ້ແລ້ວຍັງບໍ່ໄດ້ຜົນ ກໍໃຫ້ໄປຕິດຕໍ່ຕາມບໍລິສັດຕ່າງໆແລະອະທິບາຍວ່າເຈົ້າມີຄວາມສາມາດພິເສດໃນເລື່ອງຫຍັງແດ່ເຊິ່ງຈະເປັນປະໂຫຍດຕໍ່ເຂົາເຈົ້າ.
ຂຽນແລະແຈກຢາຍປະຫວັດຫຍໍ້. ໃຫ້ຂຽນທີ່ຢູ່ ຄວາມສາມາດແລະປະສົບການການເຮັດວຽກຂອງເຈົ້າ. ແຕ່ເຈົ້າອາດຄິດວ່າໂຕເອງບໍ່ມີຄວາມສາມາດຫຼືປະສົບການຫຍັງທີ່ຈະຂຽນລົງໄປແມ່ນບໍ? ລອງຄິດທົບທວນເລື່ອງນີ້ເບິ່ງ. ເຈົ້າເຄີຍເບິ່ງແຍງນ້ອງຕອນທີ່ພໍ່ແມ່ບໍ່ຢູ່ ຫຼືເຄີຍເບິ່ງແຍງລູກຂອງຄົນອື່ນບໍ? ນີ້ສະແດງວ່າເຈົ້າມີຄວາມຮັບຜິດຊອບ. ເຈົ້າເຄີຍຊ່ວຍພໍ່ແປງລົດບໍ? ສະແດງວ່າເຈົ້າອາດມີພອນສະຫວັນໃນການສ້ອມແປງ. ເຈົ້າຮູ້ວິທີພິມຫຼືໃຊ້ຄອມພິວເຕີບໍ? ຫຼືຕອນຢູ່ໂຮງຮຽນເຈົ້າໄດ້ຄະແນນດີຍ້ອນມີຄວາມຄິດສ້າງສັນໃນການເຮັດໂຄງການບາງຢ່າງບໍ? ສິ່ງເຫຼົ່ານີ້ເປັນຄຸນສົມບັດທີ່ນາຍຈ້າງຕ້ອງການເຊິ່ງເຈົ້າອາດຈະຂຽນໃສ່ໃນປະຫວັດຫຍໍ້ຂອງເຈົ້າ. ເມື່ອຂຽນແລ້ວ ກໍໃຫ້ເຈົ້າສົ່ງປະຫວັດຫຍໍ້ນີ້ໃຫ້ກັບນາຍຈ້າງ ຫຼືຂໍໃຫ້ໝູ່ແລະຍາດພີ່ນ້ອງຊ່ວຍສົ່ງໃຫ້ໃຜກໍໄດ້ທີ່ເຂົາເຈົ້າຮູ້ວ່າກຳລັງຊອກຫາຄົນເຮັດວຽກ.
ເຮັດວຽກອິດສະຫຼະ. ຄິດເຖິງແຖວໆເຮືອນເຈົ້າ. ເຂົາເຈົ້າຢາກໄດ້ສິນຄ້າຫຼືການບໍລິການຫຍັງບໍ? ຕົວຢ່າງເຊັ່ນ ຖ້າເຈົ້າເປັນຄົນຮັກສັດ. ເຈົ້າອາດຮັບຈ້າງອາບນ້ຳຫຼືຕັດຂົນສັດໃຫ້ເພື່ອນບ້ານໄດ້. ຫຼືຖ້າເຈົ້າຫຼິ້ນດົນຕີ ເຈົ້າອາດຮັບສອນດົນຕີກໍໄດ້. ເຈົ້າອາດຮັບຈ້າງຊັກລີດເຄື່ອງຫຼືອະນາໄມເຮືອນເຊິ່ງເປັນວຽກທີ່ຄົນສ່ວນຫຼາຍບໍ່ຢາກເຮັດ. ຄລິດສະຕຽນບໍ່ຄວນອາຍທີ່ຈະເຮັດວຽກທີ່ໃຊ້ແຮງງານ. (ເອເຟໂຊ 4:28) ແນ່ນອນວ່າ ການຫາວຽກທີ່ອິດສະຫຼະນັ້ນຕ້ອງມີຄວາມຄິດລິເລີ່ມແລະຕັ້ງໃຈເຮັດແທ້ໆ.
ສິ່ງທີ່ຕ້ອງລະວັງແມ່ນ: ຢ່າຟ້າວຟັ່ງ. ເຈົ້າຕ້ອງສຶກສາຂໍ້ມູນໃຫ້ຮອບຄອບລວມທັງຜົນໄດ້ຜົນເສຍ. (ລູກາ 14:28-30) ທຳອິດ ໃຫ້ໄປປຶກສາພໍ່ແມ່ກ່ອນ. ແລ້ວລົມກັບຄົນອື່ນທີ່ເຄີຍເຮັດວຽກຄ້າຍໆກັນນຳ. ເຈົ້າຈະຕ້ອງເສຍພາສີບໍ? ຕ້ອງມີໃບອະນຸຍາດບໍ? ກວດສອບຂໍ້ມູນຕ່າງໆກັບອຳນາດການປົກຄອງທ້ອງຖິ່ນເພື່ອເບິ່ງລາຍລະອຽດ.—ໂຣມ 13:1
ຮັກສາສົມດຸນ
ລອງນຶກພາບວ່າ ເຈົ້າກຳລັງຂີ່ລົດຖີບແລະພະຍາຍາມເອົາເຄື່ອງຂອງຫຼາຍຢ່າງໄປນຳ ເຊັ່ນ ຖົງປຶ້ມ ໝາກບານ ແລະຂອງກິນຂອງໃຊ້. ແຮ່ງເຈົ້າມີເຄື່ອງຂອງຫຼາຍເທົ່າໃດ ເຈົ້າກໍແຮ່ງຈະຄຶງລົດຖີບໄດ້ຍາກຍ້ອນມັນບໍ່ສົມດຸນ! ການເຮັດວຽກຫຼາຍເກີນໄປກໍຈະເຮັດໃຫ້ມີບັນຫາຄ້າຍໆກັນ. ຖ້າເຈົ້າໃຊ້ເວລາແລະກຳລັງຫຼາຍເກີນໄປກັບການເຮັດວຽກຫຼັງເລີກຮຽນ ມັນກໍຈະສົ່ງຜົນເສຍຕໍ່ສຸຂະພາບແລະຜົນການຮຽນຂອງເຈົ້າ. ນອກຈາກນັ້ນ ເຈົ້າຈະມີບໍ່ມີເວລາໄປປະຊຸມ ໄປປະກາດ ແລະສຶກສາຄຳພີໄບເບິນ. ໄວລຸ້ນຄົນໜຶ່ງຊື່ມິເຊວຍອມຮັບວ່າ: “ບາງເທື່ອຂ້ອຍກໍບໍ່ໄດ້ໄປປະຊຸມ ເພາະຫຼັງເລີກຮຽນຂ້ອຍຕ້ອງໄປເຮັດວຽກ ແລ້ວຂ້ອຍກໍເມື່ອຍ.”
ຢ່າປ່ອຍໃຫ້ຄວາມຕ້ອງການທີ່ຈະມີເງິນກາຍເປັນສິ່ງສຳຄັນທີ່ສຸດໃນຊີວິດໂດຍເຮັດວຽກໜັກເກີນໄປ! ພະເຢຊູບອກວ່າຄົນທີ່ “ຮູ້ໂຕວ່າຕ້ອງໃຫ້ພະເຈົ້າຊີ້ນຳ” ຈະມີຄວາມສຸກແທ້. (ມັດທາຍ 5:3) ເພິ່ນຍັງບອກອີກວ່າ: “ເຖິງວ່າຄົນຜູ້ໜຶ່ງມີຊັບສົມບັດຫຼາຍໆ ແຕ່ມັນກໍໃຫ້ຊີວິດລາວບໍ່ໄດ້.” (ລູກາ 12:15) ໄວລຸ້ນຄົນໜຶ່ງຊື່ມໍຣີນເຮັດຕາມຄຳແນະນຳນີ້. ລາວບອກວ່າ: “ຂ້ອຍບໍ່ຢາກໝົກມຸ້ນຢູ່ກັບວັດຖຸສິ່ງຂອງ ເພາະຂ້ອຍຮູ້ດີວ່າຖ້າມົວແຕ່ຫາເງິນ ຂ້ອຍຈະສູນເສຍສາຍສຳພັນທີ່ດີກັບພະເຢໂຫວາ.”
ແມ່ນຢູ່ ໃນບາງປະເທດໜຸ່ມສາວຈຳເປັນຕ້ອງເຮັດວຽກຫຼາຍຊົ່ວໂມງເພື່ອຊ່ວຍໃຫ້ຄອບຄົວຢູ່ລອດ. ແຕ່ຖ້າເຈົ້າບໍ່ໄດ້ຢູ່ໃນສະພາບແບບນັ້ນ ແລ້ວຈະເຮັດວຽກໄປເຮັດຫຍັງ? ນັກວິໄຈສ່ວນໃຫຍ່ບອກວ່າ ການເຮັດວຽກຫຼາຍກວ່າ 20 ຊົ່ວໂມງຕໍ່ອາທິດໃນຂະນະທີ່ຕ້ອງຮຽນໜັງສືໄປນຳ ເປັນການເຮັດຫຼາຍເກີນໄປແລະມີແຕ່ຜົນເສຍ. ຜູ້ຊ່ຽວຊານບາງຄົນແນະນຳໃຫ້ເຮັດວຽກບໍ່ເກີນແປດຫາສິບຊົ່ວໂມງຕໍ່ອາທິດ. ກະສັດໂຊໂລໂມນທີ່ສະຫຼາດຫຼັກແຫຼມບອກວ່າ: “ການໄດ້ພັກຜ່ອນຈັກໜ້ອຍໜຶ່ງກໍດີກວ່າການເຮັດວຽກໜັກແລະແລ່ນໄລ່ຕາມລົມ.”—ປັນຍາຈານ 4:6
ຂໍຈື່ໄວ້ວ່າ “ຄວາມຫຼົງໄຫຼໃນຊັບສົມບັດ” ຈະເຮັດໃຫ້ເຈົ້າບໍ່ມີເວລາສົນໃຈເລື່ອງພະເຈົ້າແລະຄ່ອຍໆເຊົາໄປປະຊຸມ ໄປປະກາດແລະສຶກສາຄຳພີໄບເບິນ. (ມາຣະໂກ 4:19) ດັ່ງນັ້ນ ຖ້າເຈົ້າຕ້ອງເຮັດວຽກຫຼັງເລີກຮຽນເພື່ອຫາລາຍໄດ້ ກໍໃຫ້ຈັດຕາຕະລາງດີໆໂດຍໃຫ້ຄວາມສຳຄັນກັບເລື່ອງຂອງພະເຈົ້າກ່ອນ. ໃຫ້ອະທິດຖານເລື່ອງນີ້ກັບພະເຢໂຫວາ. ເພິ່ນຈະຊ່ວຍເຈົ້າໃຫ້ເຂັ້ມແຂງເພື່ອຮັບມືກັບສະພາບການແບບນີ້ໄດ້ ແລະຍັງຈະຊ່ວຍເຈົ້າໃຫ້ມີຄວາມສົມດຸນເພື່ອຈະຮັບໃຊ້ເພິ່ນໄດ້ຕໍ່ໆໄປ.
ອ່ານເພີ່ມເຕີມກ່ຽວກັບຫົວຂໍ້ນີ້ໃນເຫຼັ້ມທີ 1 ບົດທີ 21
ເຈົ້າຄວບຄຸມເງິນຫຼືເງິນຄວບຄຸມເຈົ້າ? ມາເບິ່ງວ່າເຈົ້າຈະຄວບຄຸມມັນໄດ້ແນວໃດ.
ຂໍ້ຄຳພີຫຼັກ
“ຄົນຂີ້ຄ້ານຢາກໄດ້ນັ້ນຢາກໄດ້ນີ້ແຕ່ກໍບໍ່ໄດ້ຫຍັງຈັກຢ່າງ ແຕ່ຄົນດຸໝັ່ນຢາກໄດ້ຫຍັງກໍສົມຫວັງ.”—ສຸພາສິດ 13:4
ຄຳແນະນຳ
ສົ່ງປະຫວັດຫຍໍ້ຂອງເຈົ້າໃຫ້ກັບບໍລິສັດຕ່າງໆໂດຍບໍ່ຕ້ອງຖ້າໃຫ້ເຂົາເຈົ້າປະກາດຮັບສະໝັກວຽກ.
ເຈົ້າຮູ້ບໍ . . . ?
ໃນບາງບ່ອນ ມີວຽກຕັ້ງ 85 ເປີເຊັນທີ່ບໍ່ມີການປະກາດຮັບສະໝັກວຽກ.
ແຜນພາກປະຕິບັດ!
ເພື່ອຈະຫາວຽກງ່າຍຂຶ້ນ ຂ້ອຍຈະ ․․․․․
ຂ້ອຍຈະເຮັດວຽກພຽງ ․․․․․
ຊົ່ວໂມງໃນແຕ່ລະອາທິດ. ․․․․․ ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ
ເຈົ້າຄິດແນວໃດ?
● ເປັນຫຍັງເຈົ້າຕ້ອງຫາເງິນ?
● ຖ້າເຈົ້າຫາວຽກເຮັດ ເຈົ້າຈະເຈິບັນຫາຫຍັງແດ່?
● ເຈົ້າຈະມີຄວາມຄິດທີ່ສົມດຸນໃນເລື່ອງເງິນໄດ້ແນວໃດ?
[ຖ້ອຍຄຳທີ່ຍົກມາໜ້າ 153]
“ຖ້າຄວາມສຸກຂອງເຈົ້າຂຶ້ນຢູ່ກັບການມີວັດຖຸສິ່ງຂອງ ເຈົ້າກໍຈະບໍ່ມີທາງທີ່ຈະມີຄວາມສຸກເລີຍ ເພາະສິ່ງຂອງຈະມີມາໃໝ່ຕະຫຼອດ. ເຈົ້າຕ້ອງຮູ້ຈັກພໍໃຈໃນສິ່ງທີ່ມີຢູ່.”—ໂຈນາທານ
[ຂອບໜ້າ 155]
ຮູ້ຄ່າຂອງເງິນ ແຕ່ຢ່າຮັກເງິນ
ສຳລັບພໍ່ຄົວແລ້ວ ມີດຄົມໆເປັນເຄື່ອງມືທີ່ມີປະໂຫຍດຫຼາຍ. ແຕ່ຖ້າຄົນທີ່ບໍ່ມີປະສົບການຫຼືຄົນທີ່ບໍ່ຄ່ອຍລະວັງມາໃຊ້ມີດຄົມໆນັ້ນກໍອາດເຮັດໃຫ້ບາດເຈັບໄດ້. ເງິນກໍຄືກັບມີດຄົມໆ. ຖ້າເຈົ້າຮູ້ຈັກໃຊ້ເງິນ ມັນກໍມີປະໂຫຍດຫຼາຍ. ແຕ່ຖ້າເຈົ້າບໍ່ລະວັງ ມັນອາດເຮັດໃຫ້ເຈົ້າເຈັບໂຕໄດ້! ອັກຄະສາວົກໂປໂລເຕືອນວ່າຢ່າຮັກເງິນ. ບາງຄົນທີ່ຢາກລ່ຳລວຍກໍຍອມເສຍໝູ່ ເສຍຄອບຄົວ ແລະສາຍສຳພັນກັບພະເຈົ້າ. ຜົນກໍຄື ເຂົາເຈົ້າ ‘ຕ້ອງເຈັບປວດໃຈຫຼາຍອີ່ຫຼີ.’ (1 ຕີໂມທຽວ 6:9, 10) ຍ້ອນແນວນີ້ເຮົາຕ້ອງຮູ້ຈັກໃຊ້ເງິນແລະຮູ້ຄ່າຂອງເງິນ ແຕ່ຢ່າຮັກເງິນ!
[ຮູບພາບໜ້າ 153]
ການເຮັດຫຼາຍຢ່າງໃນເວລາດຽວກັນເຮັດໃຫ້ເຈົ້າຮັກສາຄວາມສົມດຸນໄດ້ຍາກ