Mosala ya kopesa lisungi na 2023​—“Tomoni mpenza bolingo ya Yehova”

Biblia esakolaki ete “ekólo ekobunda na ekólo” mpe makama ekozala mingi na “eleko ya nsuka ya mokili.” (Matai 24:3, 7) Na boumeli ya mobu ya mosala 2023a, tomonaki ndenge esakweli yango ekokisamaki. Atako bitumba mpe makama oyo ebimaka yango moko oyo esalemaki na mikili pene na 100, Batatoli ya Yehova bamonisaki mpe bolingo ya Yehova. Na ndenge nini?

Na boumeli ya mobu ya mosala 2023, makama koleka 200 oyo ebimaka yango moko to mpe oyo bato babimisaka ezwaki bandeko na biso. Bibongiseli ya Batatoli ya Yehova oyo endimami na leta ebimisaki badolare koleka milio zomib, oyo euti na makabo ya bandeko mpo na kopesa lisungi na ntango ya makama. Bakisa mpe makabo oyo bandeko ya bisika yango bapesaki mpo na kosunga bandeko na bango. Tótala sikoyo ndenge makabo na bino esalelamaki mpo na kosunga bandeko oyo bakutanaki na makama mibale oyo esalemaki.

“Bolingo ya solosolo ezali mpenza”

Mbala mingi na bisika mosusu na Nigeria, mpela etungisaka bato mingi. Nzokande, mpela oyo esalemaki na sanza ya 10/2022 elekaki mabe na kotalela bampela oyo esalemá bambula zomi oyo eleki. Bahectare ya mabele koleka 676 000 ebebisamaki mpe bato koleka milio mibale bakimaki bisika na bango ya kofanda. Na lombango mpenza, filiale ya Nigeria etyaki Bakomite ya kopesa lisungi mpo na kobongisa mpe kopesa lisalisi ya mosuni mpe ya elimo.

Mikakatano oyo bandeko bakutani na yango

• Basakoli 7 505 bakimaki bandako na bango

• Bandako 860 ebebaki

• Bandako ya Bokonzi mpe ya mayangani 90 ezindaki na mpela

Ndenge mbongo esalelami

Badolare koleka 250 000 esalelamaki mpo na kopesa lisungi, na kati na yango tokoki kotánga:

• Bilei lokola loso, madesu mpe makaroni

• Biloko ya ndako lokola matela mpe ba-moustiquaire

• Kobongisa to kotonga lisusu bandako oyo ebebaki

Bandeko na biso basalaki nini mpo ete makabo esalelama na ndenge ya malamu? Lolenge moko ezalaki ya kotalela malamu bandako yango mpo na koyeba soki ekosɛnga ete ebongisama lisusu. Soki esengeli kotonga lisusu ndako moko, bazalaki kotonga yango ndenge bandako mingi etongamaka na esika yango.

Bandeko na biso oyo bazwaki lisungi yango bazali na botɔndi mingi. Ndeko mwasi moko alobaki: “Mpela ebebisaki bomoi na biso mpo bisika na biso ya kobɔkola banyama ebebisamaki mpe tozangaki bisika ya kofanda. Tosepelaki mpenza ntango bandeko bayaki kaka na mokolo yango mpo na kosalisa biso mpe kopesa biso bisika malamu ya kofanda. Tosepelaki lisusu mingi ntango filiale etindelaki biso biloko ya kolya. Tozangaki maloba ntango tomonaki na miso kokokisama ya mokanda ya Yoane 13:34, 35 na bomoi na biso. . . . Bolingo ya solosolo ezali mpenza. Ngai ná libota na ngai, topesi bino bandeko matondi na motema mobimba, ndenge boyaki kosalisa biso na ntango oyo ebongi.”

Mosala yango ya kopesa lisungi ebendaki mpe likebi ya bato mosusu na esika tofandi. Mokonzi moko ya Sabagreia, na etúká ya Bayelsa, alobaki boye: “Ezali na bibongiseli mpe mangomba mingi na mokili, kasi kaka Batatoli ya Yehova nde basali likambo ya boye. . . . Ebongiseli [na bino] ezali moko ya bibongiseli eleki malamu na mokili.”

“Tomoni mpenza bolingo ya Yehova”

Na boumeli ya sanza ya 02/2023, makama ya mɔtɔ koleka 400 ebebisaki ekólo Chili. Bahectare ya mabele koleka 430 000, ata mpe biloko mingi ya kobikela ya mboka ebebaki. Bamemaki bato pene na 8 000 na bisika mosusu. Mwa moke nsima ya likama yango, Biro ya filiale ebandaki mbala moko kobongisa ndenge ya kopesa lisungi.

Mikakatano oyo bandeko bakutani na yango

• Basakoli 222 bamemamaki na bisika mosusu

• Bandako 20 ebebisamaki

Ndenge mbongo esalelami

Badolare koleka 200 000 esalelamaki mpo na kopesa lisungi, na kati na yango tokoki kotánga:

• Bilei mpe mai

• Essence, biloko ya kopɛtɔla ndako mpe bankisi

• Kotonga lisusu bandako oyo ebebaki

Bato ya libota moko bayokaki mpasi makasi ntango babungisaki biloko nyonso oyo bazalaki na yango, ezala ndako mpe mombongo na bango. Batikalaki mabɔkɔ mpamba. Na ebandeli, batungisamaki mingi na makanisi ntango bamonaki lopango esika ndako na bango ezalaki etikali mpamba. Kasi wana bazalaki komona kotongama ya ndako ya sika, bakómaki komiyoka malamu. Komona bolingo oyo bandeko bamoniselaki bango, esalisaki bango báyika mpiko. Likambo oyo ekómelaki libota yango esimbaki mpenza mitema na bango mpe etindaki bango bápesa mabɔkɔ mpo na kotonga bandako ya bandeko mosusu.

Lisungi oyo bandeko bazwaki esimbaki mpenza mitema na bango. Ndeko mobali moko alobaki: “Ebongiseli oyo Yehova atyá ya kopesa lisungi na ntango ya makama ezali mpenza malamu. Kaka mokolo moko nsima ya likama yango, bayaki esika oyo bandeko bazalaki mpo na kopesa bango biloko oyo basengelaki na yango. Ntango tozali kotánga masolo ya mosala ya kopesa lisungi na bisika mosusu na mokili, yango elendisaka biso. Kasi ntango yo nde ozwi lisungi yango, esalaka mpenza ndenge mosusu. Okosepela lisusu mingi na ebongiseli ya Yehova; ndenge oyo bandeko bazali komekola bizaleli ya Yehova; mpe ndenge oyo babomaka nzoto mpo tózala na oyo tosengeli na yango na mosuni, na elimo mpe na mayoki. Tomoni mpenza bolingo ya Yehova na misala.”

Wana mokili oyo ezali kokóma na nsuka, makama ekobakisama se kobakisama. (Luka 21:10, 11) Kasi, na nzela ya lisangá ya bokristo, tozali komona ete Mokonzi na biso ya bolingo, Yesu Kristo, azali elongo na biso “mikolo nyonso tii na eleko ya nsuka ya mokili.” (Matai 28:20) Makabo ya bolingo oyo bopesaka mpo na mosala ya mokili mobimba, na nzela ya donate.jw.org mpe na balolenge mosusu, bakisa mpe ntango mpe makasi na bino, nyonso wana emonisaka ete bopesaka mabɔkɔ na Bokonzi mpe Mokonzi na yango, oyo atondá bolingo. Matondi mingi ndenge bozali kokoba komonisa ezaleli na bino ya kokaba.