Mpo na nini bato bazali te kokoka kotya kimya?​—Biblia elobi nini?

Bakonzi ya mokili mpe bibongiseli ya mokili mobimba balongi te kotya kimya na mokili. Lelo oyo na mokili, uta Etumba ya Mibale ya mokili mobimba bitumba ebakisami mingi koleka. Bato pene na miliare mibale, elingi koloba motángo ya bato na mokili mobimba kabola na minei, bazali kofanda esika bitumba yango ezali.

Mpo na nini bato bakoki te kotya kimya? Biblia elobi nini?

Makambo misato oyo mpo na yango bato bakoki kotya kimya te

1. 1. Bato bazali komonisa bizaleli oyo ezali kopekisa bango bátya kimya. Biblia esakolaki ete na mikolo na biso, “bato bakozala bato oyo bamilingaka, bato balingá mbongo, bato oyo bamikumisaka, bato ya lolendo, . . . oyo bazangi bosembo, . . . oyo balingaka kosala boyokani te, . . . oyo bazangi komipekisa, bato ya nko, . . . bato ya motó makasi, oyo bavimbi na lolendo.”​—2 Timote 3:2-4.

2. 2. Bato bazali na likoki te ya kosilisa mikakatano na bango kozanga lisalisi ya Mozalisi na bango, Yehovaa Nzambe. Biblia elobi ete “ezali te likambo ya moto oyo azali kotambola ete atambwisa makolo na ye.”​—Yirimia 10:23.

3. 3. Satana Zabolo, oyo azali moyangeli ya mabe nde azali kotambwisa mokili oyo, mpe “azali kokosa mokili mobimba.” (Emoniseli 12:9) Ntango nyonso oyo “mokili mobimba [ekozaláká] na mabɔkɔ ya moto mabe,” mobulu mpe bitumba ekosiláká te.​—1 Yoane 5:19.

Nani akoki kotya kimya?

Biblia endimisi biso ete kimya ekotyama, na milende ya bato te kasi nde na makasi ya Nzambe.

• “‘Mpo nayebi malamu makanisi oyo nazali na yango mpo na bino,’ Yehova alobi bongo, ‘makanisi ya kimya, kasi ya mpasi te, mpo na kopesa bino bomoi ya malamu na mikolo ezali koya mpe elikya.’”​—Yirimia 29:11.

Ndenge nini Nzambe akokokisa elaka yango? “Nzambe oyo apesaka kimya akopanza Satana.” (Baroma 16:20) Nzambe akosalela guvernɛma moko ya likoló, oyo Biblia ebengi “Bokonzi ya Nzambe,” mpo na kotya kimya na mokili mobimba. (Luka 4:43) Na nzela ya Yesu Kristo, Mokonzi ya Bokonzi yango, bato bakoyekola ndenge ya kofanda na kimya.​—Yisaya 9:6, 7.

• Mpo na koyeba makambo mosusu, tángá lisolo “Bokonzi ya Nzambe ekosala makambo nini?”