Bikólo ekokoka kosala elongo mpo na kolonga mbongwana monene ya klima oyo ebimisaka makama mingi?​—Biblia elobi nini?

Likita monene ya ebongiseli ya ONU oyo etalelaka mbongwana ya klima (Convention-cadre des Nations unies sur les changements climatiques) esilaki mokolo ya lomingo 20/11/2022. Atako bakonzi mpe bato minene oyo bayanganaki na likita yango bandimaki kopesa mbongo na bamboka ya bobola mpo na kosalisa bango na makama oyo mbongwana ya klima ebimisaka, bato mingi bamoni ete yango ekosilisa mpenza likambo yango te.

• Na mokolo ya 19/11/2022, António Guterres, secrétaire général ya ONU, alobaki boye: “Nazali na esengo ete tozwaki mokano ya kotya mwa mbongo pembeni mpo na kosalisa bato oyo bazali kokutana na makama ya mbongwana ya klima, kasi toyebi ete yango ekoki kaka te . . . mpo planɛti na biso ezali mpenza na likama.”

• Na mokolo ya 20/11/2022, Mary Robinson, prezida ya kala ya ekólo Irlande mpe ya ebongiseli moko ya ONU (Haut-commissaire aux droits de l’homme), alobaki boye: “Kala mingi te, mbongwana monene ya klima ekoki kosalema na mbalakaka mpe kobimisa makama ya minene na mokili.”

Bilenge bazali komitungisa mingi mpo na likambo oyo ekoki kokómela planɛti na biso na mikolo ezali koya. Kasi, bikólo ekokoka kosala elongo mpo na kokokisa makambo oyo balobi mpo na kobongisa klima? Biblia elobi nini?

Bikólo ekosangana mpenza mpe ekolonga?

Biblia emonisi ete atako bakonzi ya bikólo basangani mpe basali milende mpo na kosala mwa eloko mpo na kobongisa klima, bakosilisa mpenza likambo yango te. Mpo na nini? Tiká tólobela bantina mibale:

• “Oyo etɛngami ekoki kosembolama te.”​—Mosakoli 1:15.

  Elakisi boye: Bakonzi ya guvɛrnema bazali na likoki te ya kosala nyonso oyo bakani kosala mpo bato bakelamá te mpo bámiyangela. (Yirimia 10:23) Ata soki bikólo esangani mpe bato babomi nzoto ndenge nini, bakokoka te kosilisa bampasi ya mokili oyo.

• “Mpo bato bakozala bato oyo bamilingaka, bato balingá mbongo, . . . oyo balingaka kosala boyokani te.”​—2 Timote 3:2, 3.

  Elakisi boye: Biblia esakolaki polele ete bato mingi na mikolo na biso bakozala bato oyo balukaka kaka bolamu na bango moko mpe balingaka te kosala elongo mpo na matomba ya basusu.

Ntina ya kozala na elikya

Bilaka ya bakonzi ya baguvɛrnema ekokoka te kobongisa planɛti na biso na mikolo ezali koya. Nzambe atye Moyangeli moko ya makoki oyo akoyangela mokili mobimba, Yesu Kristo. Biblia elobi boye mpo na ye:

• “Boyangeli ekozala na lipeka na ye. Mpe bakopesa ye nkombo Mopesi-Toli Monene, Nzambe ya Nguya, Tata ya Seko, Nkumu ya Kimya.”​—Yisaya 9:6.

Yesu azali Mokonzi na Bokonzi ya Nzambe, to guvɛrnema ya likoló. (Matai 6:10) Azali na nguya, bwanya, mpe mposa ya kobongisa planɛti na biso mpe kosalisa biso. (Nzembo 72:12, 16) Na nse ya boyangeli na ye, guvɛrnema ya likoló ekoboma bato nyonso oyo bazali “kobebisa mabele” mpe ekobongisa klima ya planɛti na biso.​—Emoniseli 11:18, Yisaya 35:1, 7.

Mpo na koyeba makambo mingi etali solisyo ya malamu mpo na mbongwana ya klima ya nsɔmɔ, tángá lisolo “Les changements climatiques et notre avenir : qu’en dit la Bible ?”