Mabele ezali kobeba​—Biblia elobi nini?

“Bato bazali kosala makambo mingi oyo mosika te ekobebisa mpenza klima. Mpe yango ekosala ete bingumba minene ezinda na mai, molunge ekóma lisusu makasi, mipɛpɛ ya makasi mpenza esalema lisusu mingi, bato bázanga mai na bisika mingi, bamilio ya banzete mpe banyama ndenge na ndenge elimwa. Tozali kolekisa ndelo te mpo makambo yango ezali mpenza solo. Ezali makambo oyo bato ya siansi balobi ete ekosalema soki baguvɛrnema ebongoli te lolenge oyo bato basalelaka énergie.”​—Maloba ya António Guterres, secrétaire général ya ONU, oyo lapolo moko (Intergovernmental Panel on Climate Change report) ebimisaki na mokolo ya 04/04/2022.

“Bato ya siansi bazali kokebisa bato ete na bambula ezali koya baparkɛ nyonso 423 oyo ezalaka na États-Unis ekobebisama mpo na mbongwana ya klima, mpamba te molunge ekokóma makasi. Makambo yango ya mabe oyo ekoki kosalema ekokani na oyo Biblia elobeli, na ndakisa: mɔtɔ mpe mpela, bangomba ya baglasi ezali kosila, mai ya bibale minene ezali kokóma mingi mpe molunge ezali kokóma makasi.”​—Lisolo “Flooding Chaos in Yellowstone, a Sign of Crises to Come,” na zulunalo The New York Times, ya mokolo ya 15/06/2022.

Mabele ekoki kobonga mpenza? Soki ɛɛ, nani nde akobongisa yango? Talá makambo oyo Biblia elobi.

Biblia elobaki ete bato bakobebisa mabele

Biblia elobi ete Nzambe ‘akoboma baoyo bazali kobebisa mabele.’ (Emoniseli 11:18) Vɛrsɛ oyo ezali koteya biso makambo misato:

1. 1. Makambo oyo bato bakosala ekobebisa mpenza mabele.

2. 2. Kobebisama ya mabele ekosuka.

3. 3. Nzambe nde akobongisa mabele, kasi bato te.

Planɛti na biso ekobonga

Biblia elobi ete “mabele ezali koumela seko.” (Mosakoli 1:4) Bato bakofanda wana mpo na libela.

• “Bayengebene bakozwa mabele, mpe bakofanda wana seko.”​—Nzembo 37:29.

Mabele na biso ekobonga mpenza.

• “Esobe mpe etúká oyo ezangá mai ekosepela, mpe mokili patatalu oyo ekauká ekozala na esengo mpe ekobimisa bafololo lokola safra.”​—Yisaya 35:1.