Mibeko ya Nzambe na oyo etali malamu ná mabe esilá ngala?

Bato mingi, ezala mpe bato mosusu oyo bamibengaka bakristo, bakanisaka ete mibeko ya Biblia na oyo etali kosangisa nzoto mpe libala esilá ngala. Mpo bato bámesana na yango, mangomba mosusu ebongolá mateya na yango na oyo etali bizaleli ya malamu mpe ya mabe. Mibeko ya Nzambe na oyo etali malamu ná mabe esilá ngala? Te. Lisolo oyo elimboli ndenge toyebi ete esilá ngala te.

Bato bazali na mposa ya mibeko ya Nzambe na oyo etali malamu ná mabe

Bato bakelamá na mposa ya kotambwisama na Nzambe. Biblia elobi: “Ezali te likambo ya moto oyo azali kotambola ete atambwisa lokolo na ye.” (Yirimia 10:23) Atako Yehovaa Nzambe akelaki biso na likoki ya kopona nini tokosala, apesaki biso te bokonzi to likoki ya kokata biso moko nini ezali malamu to nini ezali mabe. Mpo na yango, alingi tótyela ye motema.​—Masese 3:5.

Mibeko ya Nzambe na oyo etali bizaleli malamu ezali na Biblia. Tótatela ntina mibale oyo ezali na valɛrɛ mingi.

• Nzambe akelaki biso. (Nzembo 100:3) Lokola azali Mozalisi na biso, Yehova Nzambe ayebi mpenza makambo oyo tosengeli na yango mpo tózala malamu na nzoto, na makanisi mpe na mayoki. Ayebi mpe makama oyo ekoki kokómela biso soki toboyi kotosa mibeko na ye na oyo etali bizaleli ya malamu. (Bagalatia 6:7) Lisusu, Yehova alingi tózala na bomoi ya malamu. Yango wana, Biblia emonisi ete Nzambe azali “Moto oyo azali kotambwisa yo na nzela oyo osengeli kotambola.”​—Yisaya 48:17.

• Bamposa na biso ekoki kobungisa biso nzela. Bato mingi bamonaka ete bakoki kokata nini ezali malamu mpe nini ezali mabe na kotalela motema mpe bamposa na bango. Kasi, Biblia elobi ete “motema ezali na bokosi mingi koleka eloko mosusu nyonso mpe ezali eloko ya kosakana na yango te.” (Yirimia 17:9) Soki motema na biso ezali kotambwisama na bwanya ya Nzambe te, ekotinda biso tósala makambo na ndenge oyo tokoyoka mawa na nsima.​—Masese 28:26; Mosakoli 10:2.

Bakonzi ya mangomba basengeli kotalela makambo oyo Biblia elobi ezali malamu mpe mabe?

Ɛɛ! Biblia eteyaka solo na ntina ya Nzambe mpe ndenge alingi biso tómitamwisa. (1 Bakorinti 6:9-11; Bagalatia 5:19-23) Alingi ete bato báyeba solo yango. (1 Timote 2:3, 4) Yango wana, bakonzi ya mangomba basengeli koteya makambo oyo Liloba ya Nzambe elobi.​—Tito 1:7-9.

Bato mingi oyo balingaka te koyokanisa bomoi na bango na mibeko ya Nzambe na oyo etali bizaleli malamu batyaka likebi na bango epai ya bakonzi ya mangomba, mpo “báyokisaka bango makambo oyo matoi na bango elingi koyoka.” (2 Timote 4:3) Kutu, Liloba ya Nzambe emonisi polele boye: “Mawa na baoyo bazali koloba ete malamu ezali mabe mpe mabe ezali malamu.” (Yisaya 5:20) Emonani polele ete Nzambe akosɛnga ete bakonzi ya mangomba bázongisa monɔkɔ mpo bazali te koteya bato makambo oyo Nzambe alobi ezali malamu to mabe.

Mibeko ya Nzambe na oyo etali bizaleli malamu etindaka moto asambisa basusu?

Te. Bato oyo balingaka kosepelisa Nzambe balandaka ndakisa mpe mateya ya Yesu Kristo. Ateyaki bayekoli na ye básambisaka basusu te, kasi bálingaka mpe bámemyaka bato nyonso.​—Matai 5:43, 44; 7:1.

Bayekoli ya Yesu basengeli kotosa mibeko ya Nzambe na makmbo nyonso ya bomoi na bango. Kasi, basengeli mpe kondima ete bato mosusu bakopona kozala na bomoi oyo eyokani te na mibeko ya Nzambe. (Matai 10:14) Yesu apesaki nzela te na bayekoli na ye básalela politiki to mwaye nyonso mpo na kotinda bato na makasi bátosa mibeko ya Nzambe.​—Yoane 17:14, 16; 18:36.

Matomba nini moto akozwa soki azali kotosa mibeko ya Nzambe?

Soki tozali kosala makasi mpo na kotosa mibeko ya Nzambe na oyo etali malamu ná mabe, tokozwa mapamboli sikoyo mpe na mikolo ezali koya. (Nzembo 19:8, 11) Talá mwa ndambo ya mapamboli yango:

• Esengo mingi.​—Masese 29:6.

• Boyokani ya malamu ná Nzambe.​—Masese 3:32.

• Lisalisi ya Nzambe na ntango ya mpasi.​—Masese 11:8.

• Elikya ya bomoi ya seko na mabele.​—Nzembo 37:29.