Natikaki lolendo mpe nazwaki esengo

NA 1970, nazalaki na mibu 23 mpe nazalaki moto na mposa ya makambo minene. Nazalaki kalaki mokambi na kompanyi ya mituka na masano, na engumba Ivrée, na Italie. Nazwaki ekateli ya kokoma moto monene. Nzokande, nazalaki na maladi ya makanisi mpe na mawa. Mpo na nini?

Mobali na ngai azalaki kolekisa ntango mingi na kobeta karte elongo na baninga na ye na bars, mpe azalaki kotikela ngai mikumba nyonso ya libota. Boyokani na biso ebandaki kobeba. Tozalaki koswana mpo na makambo mike. Mpo na yango, natondaki na makanisi mabe.

Nazalaki komiloba ete, ‘Moto moko te azali mpenza komibanzabanza mpo na yo, balingi bobele kozwa litomba na nzoto na yo.’ Nazalaki kokanisa ete: ‘Nzambe azali mpenza te, mpo soko azalaka alingaki te kotika nzela na ebele na mpasi mpe mabe boye. Bomoi ezali bobele komekana ya mbango kino na liwa.’ Nazalaki koyeba te mpo na nini makambo mazali bongo.

Ebandeli ya mbongwana

Mokolo moko ya mobu 1977, ba Témoins de Jéhovah mibale babetaki na ekuke na biso. Mobali na ngai, Giancarlo, akotisaki bango mpe bafandaki mpo na kosolola elongo na ye. Mposa na Giancarlo ezalaki ya kobongola bango na kondima liteya ya évolution lokola ye, kasi bango nde babongolaki makanisi na ye.

Nokinoki, Giancarlo abandaki mpe kosala mbongwana kati na bomoi na ye. Akomaki komonisa motema molai, kolekisa ntango mpe kotya likebi mingi mpo na ngai mpe na mwana na biso ya mwasi. Azalaki komeka kolobela ngai makambo oyo azalaki koyekola, kasi nazalaki ntango nyonso kokata lisolo na eyano ya mabe.

Bongo mokolo mosusu, ntango Batemwe bayaki nafandaki mpe nayokaki bango mpenza. Balobaki makambo matali nsuka ya ebongiseli ya biloko ya ntango oyo, Bokonzi na Nzambe, paradis na mabele mpe lisekwa na bakufi. Nakamwaki mingi! Nalalaki te na boumeli ya butu misato oyo elandaki! Nalóngaki koyeba makambo mingi, kasi lolendo ezalaki kopekisa ngai ete natuna mobali na ngai mituna. Mokolo mosusu, alobaki na ngai na makasi ete: “Lelo osengeli koyoka ngai. Nazali na biyano nyonso na mituna na yo.” Alimbolelaki ngai bongo solo ya Biblia.

Giancarlo ayebisaki ngai ete nkombo ya Mozalisi ezali Jéhovah, mpe ezaleli na Ye oyo eleki ntina ezali bolingo. Alimbolelaki ngai ete Jéhovah atindaki Mwana na Ye lokola lisiko mpo ete tozwa bomoi ya seko. Amonisaki ngai ete nsima na koboma bato mabe na Armagedon, Yesu Klisto akosekwisa bakufi na boumeli ya Boyangeli na ye ya Mbula Nkoto, mpe basekwi yango bakokoma na ezaleli ya kokoka ya makanisi mpe ya nzoto mpe bakozala na makoki ya kozala na bomoi ya seko kati na paradis na mabelé.

Na mokolo elandaki, nakendeki elongo na mobali na ngai mpo na mbala ya liboso na Salle du Royaume. Na nsima nayebisaki ye ete: “Bato oyo bazali na bolingo bamoko epai na basusu. Nalingi ntango nyonso koya awa mpo ete bazali mpenza na esengo.” Nabandaki koyangana ntango nyonso na makita, mpe Batemwe babandaki boyekoli ya Biblia elongo na ngai. Nazalaki kokanisa mingi na makambo nazalaki koyekola mpe nokinoki nandimisamaki ete nasili kozwa libota ya solo ya Nzambe. Na 1979, ngai mpe mobali na ngai, tomonisaki komipesa na biso epai na Jéhovah na kozwaka batisimo.

Mosala ya pionnier

Na assemblée moko ya circonscription oyo esalemaki na mbula wana, lisolo moko epesamaki oyo ezalaki kolendisa mosala ya pionnier. Naokaki mposa ya kosala mosala yango, mpe nalobelaki yango na libondeli epai na Jéhovah. Kasi, nazwaki zemi mpe mikano na ngai mibulunganaki. Na boumeli ya mibu minei oyo milandaki, tobotaki bana misato. Mibale kati na bango bazwaki bokono oyo etyaki bomoi na bango na likama. Na esengo nyonso, bango nyonso bazongelaki kolongono na bango.

Na nsima, namonaki ete nakoki lisusu te kozela mpo na kokokisa mokano na ngai ya kobanda mosala ya pionnier. Natikaki mosala na ngai ya mosuni mpo na kopesa likebi mingi na mikumba na ngai ya mwasi ya libala mpe ya mama. Ngai mpe mobali na ngai, tozwaki ekateli ya kobika bobele na lifuti moko, likambo oyo esengaki ete totika kolula biloko mingi. Atako bongo, Jéhovah apambolaki biso mpe atikaki biso na bobola to na kozanga biloko te.

Na 1984, mwana na ngai ya mwasi oyo azalaki na mibu 15 mpe azwaki batisimo kala mingi te, abandaki mosala ya ntango nyonso lokola pionnier. Bobele na eleko yango, mobali na ngai aponamaki nkulutu. Bongo ngai? Lokola nazalaki komona ete nakokaki naino kokoma pionnier te, namityelaki mokano ya kokokisa bangonga 30 na sanza kati na mosala ya kosakola. Nalongaki yango mpe namilobelaki ete: ‘Longonya! Ozali komipesa mingi.’

Nzokande, lolendo ekomaki lisusu mokakatano na ngai. (Masese 16:18) Nakanisaki ete oyo nazalaki kosala ekoki mpe nakokaki lisusu kosala eloko te mpo na kokola mingi na elimo. Nabandaki kolemba na elimo mpe uta kobungisa bizaleli malamu oyo nalonaki. Nazwaki bongo discipline oyo nabongaki na yango.

Na 1985, toyambaki na ndako na biso bakengeli ya zongazonga mibale elongo na basi na bango, wana lokola na momeseno bayaki kotala lisanga na biso. Komisokisa mpe elimo ya komipesa oyo namonaki epai na baklisto wana etindaki ngai na kokanisa mingi. Nasalaki bolukiluki kati na mikanda ya la Société Watch Tower na ntina na komisokisa. Nakanisaki mozindo na ntina na komisokisa monene oyo Jéhovah amonisaki kati na boyokani na ye elongo na biso, bato na masumu. (Nzembo 18:35) Nasosolaki ete esengelaki na ngai kobongola lolenge na ngai ya kokanisa.

Nabondelaki Jéhovah ete asunga ngai na kolona ezaleli ya komikitisa mpo nakoka kosalela ye na motindo alingi mpe atambolisa ngai na kosalela makoki nazali na yango mpo na nkembo na ye. Nasengaki mosala ya pionnier mpe nabandaki kosalela ye lokola pionnier na mars 1989.

Sikawa, nakoki koloba ete nazali mpenza na esengo, mpe kotika lolendo ezali likambo oyo ememaki ngai na esengo. Nasili kokanga ntina ya solo ya bomoi: Nazali kosunga bato oyo bazali komonisa mposa na koyeba ete Jéhovah, Nzambe na solo, azali mosika te na baoyo bazali koluka ye.​—Lisoló ya Vera Brandolini.