Mpo na nini osengeli koyeba solo likoló na Abrahame
ABRAHAME: azali elombe na lisapo to mosakoli ya solo? Motuna oyo ezali na ntina? Lokola, engebene mitango ya Biblia, Abrahame azalaki na bomoi esili koleka pene na mibu 4 000, bato bakoki kokanisa ete ezali na ntina mingi te koyeba soki azalaki solo na bomoi to te.
Kasi tokanisa: ndambo na bato na mokili bazali kolanda lingomba oyo elobi ete endimi Abrahame. Na yango, na kotalela Encyclopédie britannique, Mokanda na mbula 1988, 32,9% na bato balobi bazali kolanda lingomba na boklisto, 17,2% lingomba na ba musulmans mpe 0,4% lingomba na Bayuda. Nzokande, Abrahame ayebani lokola moto ya ntina kati na mangomba oyo misato. Bandimi na bango baoyo bazali sembo bazali na lotomo ya kolinga koyeba soki bateyaki bango solo na ntina etali Abrahame. Bobele bongo, motuna oyo esengeli lisusu kosepelisa ata bandimi na mangomba mosusu to bato oyo bandimi ata lingomba moko te. Mpo na nini?
Mpo Biblia elobi ete Abrahame azalaki mosakoli. (Genese 20:7) Kati na Makomami, liloba oyo emonisi molobeli na Nzambe oyo azali koyebisa nsango epai na bazalani na ye. Nzokande, soko Abrahame azalaki mosakoli ya solo, bato nyonso bazali na likoki na kozwela litomba na kati, mpo ete nsango oyo ye azwaki ezalaki nsango malamu mpo na bato nyonso. (Bagalatia 3:8) Biblia eyebisi ete Nzambe apesaki na Abrahame elaka oyo: “Mpo na yo mabota nyonso na nse makopambolama.”—Genese 12:3.
Ezali wana elaka na kokamwisa, mpe Nzambe azongelaki yango epai na Abrahame ekoki kozala mbala mibale na mabaku makeseni. (Genese 18:18; 22:18) Mpo ete elaka oyo ekokana, Nzambe na Abrahame akosekwisa ata bato na mabota oyo masila kolimwa. Bomoi ekozala solo na mapamboli mingi mpo na basekwi, mpo mingi kati na bango bakozonga na mabelé oyo ekokokana na Paradis na ebandeli oyo moto abungisaki. Na nsima, bakoyekola ndenge nini kozwa bomoi na seko.—Genese 2:8, 9, 15-17; 3:17-23.
Nzokande, soko Abrahame azali bobele moto na lisapo, ntina ezali te na kondima elaka oyo na kokamwisa oyo bapesaki ye. Lisusu, soki bato bakoki kozala na elikya te kati na bilaka na Biblia, bamosusu bakoki koloba ete eleki malamu komipesa mobimba na bisengo na ntango oyo. Lokola ekomaki yango moko na baklisto ya liboso, “soko bakufi bakosekwa te, toliaka mpe tomelaka mpo ete tokokufa lobi!”—1 Bakolinti 15:32.
Na yango, tozali na ntina nyonso na kotalela motuna mpo na koyeba soko Abrahame azali bobele elombe kati na lisapo to azalaki mosakoli ya solo. Mbala mosusu, okokamwa na koyoka makambo oyo bakonzi minene na mangomba balobaki mpo na ye na ekeke ya 19, nzokande, bobele na ntango yango boluki na biloko bizwamaka na nse na mabelé ekweisaki maloba na bango.