Bokutani oyo ekeseni na mosusu

EUTI NA MOKOMANI NA BISO NA GRANDE-BRETAGNE

BRUCE azalaki na mibu mibale na 1945 ntango mama na ye Marie amonaki ye mpo na mbala ya nsuka. Ntango libala ya Marie ekufaki, bakataki likambo na Leta ete tata ya Bruce abɔkɔla ye. Atako ezalaka mpasi na bolingo ya mama ete akabwana na mwana na ye, Marie amonaki malamu ete mwana na ye ya mobali abɔkwama na tata na ye mpe na mwasi ya tata na ye. Na yango, Marie azalaki koyeba lisusu te epai Bruce azali.

Nsima ya mwa bambula, Marie abalaki mobali mosusu mpe abotaki mwana mobali, kasi azalaki ntango nyonso kokanisa Bruce. Azali wapi? Akómi ndenge nini?

Ntango tata ya Bruce akufaki na 1976, Marie akendaki na molulu ya bokundi. Bruce akómaki mobali kitoko ya mibu koleka 30, azalaki mpe wana elongo na mama mobɔkɔli na ye. Lokola Marie azalaki naino kokanisa ete Bruce ayebaka mama na ye mobɔkɔli lokola mama oyo aboti ye, Marie amonaki ete ekozala malamu te amiyebisa epai na ye ete azali mama moboti na ye, mingi mpenza na ntango ya liwa ya tata na ye. Mbɛlɛ Marie ayoki mabe mpenza soki ayebaka ete tata ya Bruce asundolaki ye nokinoki nsima wana abalaki mwasi mosusu mpe ete Bruce abɔkwamaki na nkɔkɔ na ye ya mwasi.

Bobele na ntango yango, na 1976, Marie akutanaki na Sue, Motatoli ya Yehova, mpe asepelaki koyekola Biblia elongo na ye. Bobele na ntango wana, Bruce na mwasi na ye babandaki koyekola Biblia na Alan, mobali ya Sue. Nzokande, eumelaki te, Marie akataki boyekoli mpe akendaki epai mosusu mpo na mikakatano ya bokolɔngɔnɔ ya nzoto.

Na 1995, Marie akutanaki lisusu na Batatoli ya Yehova. Azongelaki boyekoli ya Biblia mpe akolaki noki na elimo. Lokola akómaki pene ya kozwa batisimo, Marie asololaki na nkulutu moko ya lisangá na ntina na mwana na ye Bruce. Nkulutu yango asalaki bolukiluki mpe ayaki koyeba ete Bruce mpe libota na ye bazali bobele Batatoli ya Yehova te kasi mpe ete Bruce azali nkulutu na lisangá moko na engumba oyo Marie afandi!

Bankulutu mosusu ya lisangá oyo Bruce azalaki bakómaki kobanga. Soki bayebisi Bruce ete mama na ye akozwa batisimo na liyangani ya mokolo moko oyo ezali koya, akosala nini? Ayebaki kutu ete mama na ye ezali moto mosusu? Nzokande, ntango Bruce ayebaki likambo yango, akendaki nokinoki elongo na libota na ye kokutana na Marie. Wana ayambaki mama na ye na esengo, Bruce alobaki maloba oyo ya kobɔndisa: “Makambo oyo maleká mazali na ntina te, tótalela nde mikolo mizali koya lokola tozali kati na solo!”

Na Mársi 1996, Marie, wana azalaki na mibu 78, abatisamaki na Ndako ya Mayangani ya Batatoli ya Yehova oyo ezwami na ɛsti ya mboka Penines, na Angleterre​—na mwana na ye Bruce. Oyo nde esengo Bruce azalaki na yango ya kozwa mama na ye lokola ndeko mwasi na elimo!

[Elilingi na lokasa 24]

Bruce elongo na mama na ye