11-17 WA MAIO WA 2026
NYUMBO 7 Yehova Ndi Mphamvu Yathu
Muroromelenga Namatonga wa vyopanduchiwa vyothene
“Yohova, nyo mwekhene muli wa dhuludhulu na wotonga ilambo yothene yavathi.”—SAL. 83:18.
VINOFUNA I-YO FUNJEDHA
Muyofunjedha yei ninoona moda munalimbi-edhe i-yo iroromelwi-u yoi Yohova ngunamatonga wa vyopanduchiwa vyothene thitho moda munanikami-edhe liye limbanana nyarwa na vyowesedha va-eeni thitho sogolo.
1. N’nga Yobo aguman’nena nyarwa dhiivi?
MO-ODEDI-EDHELA, Yobo atooluza vyongo vyothene vyana liye wahora yoyeva. A-imee othene tatookwa, fumee yatoomala thitho atoobulela maningi. Wenjedhela vevo, liye atooluza lemezo lana liye waatu am’mwandamele. Thitho “afwee” tatoonga vyongo vinjinji vyevyo vyam’sukwali-idhe Yobo. Thitho i-yanee wam’dhiveliwana liye atoofiya voonga ira ‘um’ruwane Nlungu ira wukwe.’ (Yob. 2:9; 15:4, 5; 19:1-3) Vyoireya ninga vyevi vyangairi-idhe ira Yobo a-iye m’roromela Nlungu, noroma kaikela akala ira Yohova anobareladi atwee enao anom’dhiveliwana nom’labela.
2-3. N’nga nithuulelengan’ni nagumanangana vyowesedha, n’nga ninofunjedhan’ni vaifwanafwani-o ya Yobo?
2 Ninokala “muhora yavakhundu, thitho yorucha.” (2 Ti. 3:1) Ee-no, ninooda gumanana nyarwa dhoi dhinooda wesedha iroromelwi-u wa Yohova. Nagumanangana vyowesedha mo-arana-arana, ninoova thitho ninothuulela akala ninooda vilela. Enango anofiya vokaikela ira Yohova uto-iya adhiveliwana thitho kanofuna akami-a.
3 Akala mwatooroma dhivwavo e-no, kamusukwale. Yobo atoofunjedhavo ira Yohova kanodha i-ya atu othene ali ororomeleya wa liye. I-yo ninooda m’sazi-edha Yobo, vom’nyindela Babi-u wa dhulu. Yongo imbo-i inanikami-e irana vyevi kuleri bukhu la Yobo noona mwemo munanisikimizeli-e aliwa muvyongo vinli: Yoroma, Yohova baa-i ngunamatonga wa vyopanduchiwa vyothene. Yanambili, Nlungwi-u utokaana kopolo yotonga vyoireya vyothene vya vailambwila, e-no unoonechecha ira ifunelwee ikwakwaneli-edhiwe thitho onechecha ira atwee mbobareleya mwaututuni na mwauzimu.
SATANA ATOOFIYA VARI VIWA
4. N’nga mbaani afwanyeile va gumano wa dhulu oongiwa mu bukhu la Yobo?
4 Dambo n’nango, “a-ima a Nlungu waimbarimbari” tatoogumaneya vamethoni va Yohova. Bibilya linoonga ira, “Satana thitho atoofiya vari viwa.” (Yob. 1:6) Yen’na ndi fendo yoroma yaongile Bibilya madhu oi, “Satana” venango ira “Oruni-a.” Satana ngumwidani nlukhulu wa Yohova. Vahora yaireya gumano dhulu, Satana ali anga-iidhe kala ororomeleya wa Nlungu. Liye atookala mwidani wa Yohova, waangelo ororomeleya na waatu ororomeleya vailambo yavathi. Vahora yaongile Yohova madhu ava Maromelo 3:15 liye atooni-a ira Satana kaaira ikhundu mubanja la dhulu la Yohova. Ee-no, Satana kaali ikhundu ya “i-yana,” thapulela ira, banja la Yohova la vyopanduchiwa vyauzimu, vinofuna “dhabala maziza” manjinji aatu.
5. N’nga ninofunjedhavon’ni na vyaongiwile vagumano waireile dhulu?
5 Yohova atoolemba Bibilyani vyongo vyaireile vagumano waireile dhuluwo. Madhu a Satana anothonyi-edha ira liye ngothakala thitho unoonga vyonama vyokhuza arumiwi a Yohova. (Yob. 1:9; Muone thitho Apokalipse 12:10.) Vyaireile vagumano wen’ne vinonisikimizeli-a ira Yohova hora dhothene uno-indi-edha basa kopolodhee mundhila yofwanelela na yolongomana. Nitofunjedha thitho ira Wakopolo dhothene uto-ela madile va vyongo vinofwanela irana atu enango.
YOHOVA UNO-ELA MADILE
6. N’nga Yohova athonyi-edhe a-vi ira liye ngunoing’anela vyopanduchiwa vyothene vagumano waireile dhulu? (Yobo 1:7, 8)
6 Muleri Yobo 1:7, 8. Yohova atoothonyi-edha ira ngu liye asogolela gumanuo. Liye atoom’fuka Satana ira: “Weyo unokalelave m’mwing’ana rumiwanga Yobo?” Yohova atooidhiwa pama ira Satana anoofuna m’dhimbinuwela Yobo. Dhoweni nioneni moda mwa-indi-edhile basa Yohova kopolodhee vofuna kami-a rumiweula.
7. Movwelana na Yobo 1:10, 11, n’nga Satana aongile ira atu anom’labela Yohova namwasa wan’ni?
7 Muleri Yobo 1:10, 11. Yohova ndi namatonga wa vyopanduchiwa vyothene. Liye unooda irana yongo iliyothene inofuna liye namwasa oi utoidhiwa moda muno-indi-edhela liye basa kopolodhee. (Jer. 32:17; Dan. 4:35) Vingalive ee-no, Satana atoonga ira Yohova kano-indi-edha basa kopolodhee mundhila yofwanelela. Mwaimbarimbari, Satana atoonga ira Nlungu unova-a atu vyongo vyapama naifunelo yoi tam’labelenga. Satana thitho atoonga ira atu anolam’labela Yohova naifunelo yoi tava-iwenga vyongo vyapama. N’nga Yohova airilen’ni?
8-9. N’nga ndi madile avi a-edhi Yohova wa Satana, n’nga mwasiwa ngwan’ni? (Yobo 1:12) (Muone thitho iruthiruthi.)
8 Muleri Yobo 1:12. Yohova atoorumeli-a ira Satana am’mwesedhe Yobo vofuna m’moni-a ira akala vyongo vyaonga liye vyali vyaimbarimbari. Mbwenye atoom’elela madile. Voonga vya Yobo, Yohova atoom’mwandela Satana ira: “Nditourumeli-a iliyothene mbwenye kum’phe rumiwanga Yobo!” Vyaonga aliwa vyevi angelo othene tanoovwa. Thitho Satana afwanela vwela vyam’mwandenle Yohova. Liye kaana kopolo yoirana vyongo kwaranya vyam’mwandenle Yohova. Saasawa thitho na malamboano. Mundhila yen’na, Yohova atoo-indi-edha basa utongee na kopolodhee vom’barela Yobo thitho vothonyi-edha ira ngu Nlungu waudhivela.
9 Vyowesedha vyairile Satana vyangam’mwiri-idhe Yobo ira a-iye kala ororomeleya wa Yohova. Mbwenye Yobo atoodhowanave kala ororomeleya wa Babee wa dhulu. (Yob. 1:22) Thitho Yohova atooidhiwa ira Satana anoofuna m’mwesedha Yobo.
Yohova atoorumeli-a Satana ira aonge vyokhuza Yobo vamethoni va angelo (Muone ndima 8-9)
10. Mwasiwa ngwan’ni Yohova atoorumeli-a Satana ira am’mwesedhe Yobo? (Yobo 2:2-6)
10 Muleri Yobo 2:2-6. Mwandhila yen’na, Satana atoodhilimbi-edha ira am’mwesedhe Yobo naifunelo yoi am’ii-e m’labela Yohova. Satana aongile ira Yobo unodha i-ya m’lambela Yohova namwasa ofuna vulumucha ingumiyee. Vofuna thonyi-edha ira Satana ngonama, Yohova atoorumeli-a ira Satana am’dhimbinuwele Yobo vom’va-a marenda. Vahora yen’na thitho, Yohova atoom’elela madile. Liye atoonga ira: “Kum’phe rumiwanga Yobo!” Veva thitho Satana afwanela vwela vyam’mwandenle Yohova. Nitoona ira Yohova ali atonganga vahora yawesedhiwa Yobo, namwasa oi Satana kaaode irana vinjinji kwaranya vyam’mwandenle Yohova.
YOHOVA ATOOMALI-A NYARWA DHA YOBO
11. Movwelana na Yobo 42:10-13, n’nga Yohova am’raeli-idhe a-vi Yobo vasogolo vogumanana nyarwa?
11 Muleri Yobo 42:10-13. Namwasa oi Yobo atoodhowanave kala ororomeleya, Yohova karumeli-idhe ira Satana adhowenave m’mwesedha. I-yavo vyevyo, Yohova atooiravo yongo ira amali-e nyarwa dha rumiwee. Veva Satana kam’mwesedhe okoka Yobo. Liye kaana kopolo yom’mwimwanani-a Yohova m’barela Yobo thitho m’raeli-a.
12. Muonge ifwanafwani-o ya moda muno-indi-edha basa Yohova kopolodhee waarumiwee ororomeleya.
12 Mumalambo omari-ala, atu anjinji tanoona ira Yohova uno-indi-edha basa kopolodhee voakami-a. Mofwanafwani-a, mu 1945 muhora ya utongi wa Nazi, Amboni dha Yohova okwakwana 230 enao tali perezoni tatoovulumuwa vahora yadhowa aliwa maphiwa. Vasogolo vogumanana vyowesedha vyoophi-avi, aliwa tatoolemba ira: “Nitogumanana vyowesedha mbwenye vulumuchiwa wi-u, uli ninga khumi-iwa mulindi la mulo moi kavali mutu unonuka wichi wa mulo . . . Malomwee, nitokaana kopolo dhokhumela wa Yohova.” Thitho tatoomari-a noonga ira: ‘Nitokaana ifunelo imbo-i vasogolo vokala mu lindi la kalamu . . . Yohova anirumeli-e m’labela modhowa nodhowa. Enala, ndimaraeli-o malukhulu wa i-yo.’—Muone thitho Danieli 3:27; 6:22.
13. N’nga nagumanangana nyarwa kanikaikelengan’ni? (Muone thitho viruthiruthi.)
13 Ninooda thitho gumanana nyarwa ninga dhedhi nodhionanga ninga nili lindini mwa kalamu. (1 Pe. 5:8-10) Hora dhinango ninooda kala osukwala maningi nathuulelanga ira venango nyarwa dhi-u kadhinodha mala. Hora ninga yen’na thuulela vyongo vyam’mwireele Yobo vinooda nikami-a. Ninooda roromela ira Yohova utokaana kopolo dhooda mali-a nyarwa dhinogumanana i-yo, va-eeni thitho muilambo ipya. Yohova kanodha wenjedhela malambo horee yononga ilambo yavathila yadhakwakwana!
Yohova unodha mali-a nyarwa dhinogumanana arumiwee ororomeleya (Muone ndima 13)
YOHOVA UNODHIVELIWANA ARUMIWEE OROROMELEYA
14-15. N’nga Yohova unofuna airelan’ni arumiwee ororomeleya, n’nga mwasiwa ngwan’ni? (Yobo 14:15) (Muone thitho iruthiruthi yavakapani.)
14 Muleri Yobo 14:15. Babi-u wa dhulu ngororomeleya waatu othene anokala ororomeleya wa liye. Liye unoadhiveliwana maningi arumiwee, thitho unofunechecha avenyathi-a takwa. Yohova adhavenyathi-a atu muilambo ipya, mutu uliwethene unodha sangalala maningi.—Esa. 65:17.
15 Pyaimbarimbari ira Yobo atoodhowanave kala muilambo yotongiwa na Satana. Mbwenye Bibilya linonisikimizeli-a ira Yohova atoom’mwili-a Yobo thitho m’raeli-a na vyongo vinjinji kwaranya vyana liye voroma. Maraeli-o enala ndi iruthiruthi ya vyongo vinofuna dham’mwirela Yohova sogolo. Mwaimbarimbari, Yohova unofuna ira arumiwee othene ororomeleya tasangalalenga na ingumi. Liye unodha araeli-a arumiwee othene na ingumi yo-omala paradaizoni vailambo yavathi. (Apk. 21:3, 4) Voi Yohova ndi Namatonga wa vyopanduchiwa vyothene, kavali mutu unam’mwimwanani-e irana vinofuna liye waarumiwee. Thuulela moda munofuna dhaniraeli-a Yohova vinonilimbi-a vahora inogumanana i-yo nyarwa!
Vasogolo vogumanana nyarwa, Yobo na i-yanee atoowachela maraeli-o manjinji okhumela wa Yohova (Muone ndima 14 na 15)
16. N’nga chini inoniiri-a roromela maningi ira Yohova ndi Namatonga wa vyopanduchiwa vyothene?
16 Vasogolo vokaana ingumi yolapela, Yobo atookwa. Voi Yohova ndi Namatonga wa vyopanduchiwa vyothene thitho wa kopolo dhothene, liye utokaana kopolo dhomali-ana wukwa. (Dot. 32:39) Yohova utosakula hora yofwanelela ira adhavenyathi-e arumiwee odhiveliwiwa, thitho kavali mutu unofuna m’mwimwanani-a irana vyevi. —Aro. 8:38, 39.
MUM’NYINDELENGA MANINGI YOHOVA NA RIMINYU OTHENE
17. N’nga chini inothonyi-edha ira Satana kanaode gonji-a atu a Yohova?
17 Nitofunjedha mubukhu la Yobo ira nitokaana mwasa ovweya ira nim’nyindelenga maningi Yohova. Ninom’simba maningi Yohova namwasa oi kam’rumeli-idhe Satana ira anonge atwee! Arumiwi ororomeleya a Yohova okwakwana mamiliau 9 alivo va-eeni ndi umboni oi Yohova ngu namatonga wa vyopanduchiwa vyothene. Hora dhothene, nikadhi nionanga ira mafwaramento ano-indi-edha basa Satana volimbana na atu a Nlungu katinoganyali. (Esa. 54:17) Angalive ira atu a Yohova anooneya ninga o-obareleya, maguverno na anamasogolela a mareligiau akopolo katinaode anonga. Thitho kavali yongo inaniimwanani-e wandela atu enango imbarimbari yokhuza Yohova, thitho oni-a ira Satana ndi Namanami-a thitho opha. Masiki wukwa kunaode nigonji-a, namwasa oi Yohova unodha venyathi-a atu othene takwide tangali ororomeleya.—Ose. 13:14.
18. Mwasiwa ngwan’ni kaninofwanela ova vyongo vinofuna dhaireya sogolo?
18 Nathuulelanga modi-a bukhu la Yobo, ninolimbi-a iroromelwi-u wa Yohova ira liye unodhakala wu ikhundwi-u thitho kavali yongo inofuna nireela. Vanyarwa ilukhulu, Satana na anyakhondwee anodhaonanga ira atu a Yohova mbo-obareleya thitho anodha adhimbunuwela. Mofwanafwana na hora ya Yobo, Yohova unodha niing’anela thitho kanodha m’rumeli-a Satana ira anonge atwee. Vo-odembuwava, Yohova unodhamali-a nyarwa dhothene dhedho dharomi-idhe Namanami-a waatwee. Satana vambo-i na viwandavyee anodhafungeliwa lindini wa vyawa 1.000. (Luk. 8:31; Apk. 20:1-3) Vasogolovee liye vambo-i naatu othene takanle wu ikhundwee tanodha nongiwa morurumucha, ninga mwemo mwalanyedhile Yohova.—Mar. 3:15; Aro. 16:20.
19. N’nga sogolou Yohova unodha raeli-a a-vi atu anom’roromela? (Muone thitho iruthiruthi.)
19 Nili osangalala namwasa odedi-edha udha wa ilambo ipya thitho dhakaana ingumi yolongomana nosangalala waimbarimbari. Ingumi inodhakala yosangalali-a maningi kwaranya moda munothuulela i-yo. Yohova utolanyedha ira: “Kaonani! Miyo ndinosaka-edha vyongo vyothene kala vipya.” (Apk. 21:5) N’nga vyevi vinothapulelan’ni? Inodha kala fendo yoroma atu a-dhodhomi-iwa na Satana na viwandavyee ninga mwafunela Yohova voroma. N’nga ingumi inodhakala a-vi? Kaninodha imwananave gona namwasa wa vyokhumbanyi-a vya ilambo yawalila. Atu anofuna dhavulumuwa va Armagedo tanodhaona atu anjinji taili-iwanga. Vomari-edhavee, atu aadhiveliwana i-yo takwide tanodharoma venyathi-iwa. I-yo ninodhakala mosangalala ninga mwafunela Babi-u wa dhulu vamaromelo!
Yohova unodha araeli-a arumiwee othene ororomeleya tavilenle nyarwa (Muone ndima 19)
20. N’nga muli osikimizela iranan’ni?
20 Ninofwanela kala olimba rima ira nilimbanena nyarwa dhinogumana i-yo malambo omari-ala nodhowanave kala oromeleya wa Yohova. Ee-no, nili osikimiza rima m’nyindela maningi Yohova thitho kami-a utongee. Ninofwanela thonyi-edha udhivela wa Babi-u wa dhulu nosikimizela ira Satana ngonama. Ninofwanela sikimizela ira, nadhowanave kala oromeleya wa Yohova, Namatonga wa vyopanduchiwa vyothene, ninodhakaana sogolo lapama namwasa oi liye unofunechecha maningi velela yotuva waarumiwee ororomeleya!
NYUMBO 153 Yohova, ndilimbi-eni rima