N’nga nyo munathonyi-edhe a-vi simba namwasa wa khuto?

1-2. N’nga khuto unonikanyi-edha iranan’ni, n’nga mwasiwa ngwan’ni? (2 Akoritiyo 5:14, 15) (Muone thitho iruthiruthi.)

AKALA nyo mutovulumuchiwa wu nyumba yau gwelen’ni, n’nga kamwadhivwenga ira mutokaana mangawa na mutu avulumuchile ingumiinyu? Angalive ira atu enango atovulumuchiwa, mwaimbarimba nyo munooda thonyi-edha simba thitho kamunam’diwale mutu uvulumuchile ingumi inyu.

² Ninga muoni i-yo muyofunjedha ivirile, i-yo okhene kaninaode dhithathula wu dhaari wa madawo abaliwilena i-yo. Mbwenye sembe ya Yesu inooda nivulumucha namwasa oi (1) ninoleveleliwa vyodawa vi-u, (2) nitokaana idedi-edho thitho oniwa ninga olongomana wu madawi-u (3) ninovwelana na Nlungu. Yo-arelavo yee choi nitokaana idedi-edho yodhakaana ingumi yo-omala mu ilambo ipya ya Yohova. Khuto ndi umboni oi Yesu anoodhiveliwana atu—udhivela wana liye a-anadhe va ilambo yavathi. (San. 8:30, 31) Rumiwi Paulo alembile ira udhivela wa Kristu unonikanyi-edha.” (Muleri 2 Akoritiyo 5:14, 15.) Vyevi vinothapulela ira udhivela wa Yesu unofwanela nikanyi-edha, irana vyongo vyothonyi-dha ira ninosimba thitho kanidiwale sembe yavelenle liye wa i-yo.

3. Mwasiwa ngwan’ni mutu uliwethene unooda thonyi-edha simba namwasa wa khuto mundhila dho-iyana?

³ N’nga nyo munathonyi-edhe a-vi ira munosimba yotuva ya udhivela ya khuto? Yowakhula inyu inodha kala yo-iyana na yaatu enango. Nifwanafwani-edhe ee-ni: Atu araru ali vaulendo thitho anodhowa limburo limbo-ive uliwethene waliwa ukhumele mu sidade lo-iyana. Ndhila dhinofuna aliwa vira ndidho-iyana. Ndi saasawa na “ndhila” inofuna nyo vira vothonyi-edha ira munosimba khuto la Yesu, vinonyindela moda muli uxamwalinyu na Yohova. Vothuulela vyevyo, yofunjedha yeyi inoonga magulu mararu aatu. (1) Anamafunjedha Bibilya, (2) Makristau obadiziwa, thitho (3) mabila odimela.

ANAMAFUNJEDHA BIBILYA

4. N’nga Yohova unoaona a-vi atu anofunjedha Bibilya?

⁴ Akala nyo munaafunjedha Bibilya, kathuulelani vi: Ifunelo yofunjedha Bibilya inothonyi-edha ira Yohova utouitanelani mugulunimwee. (Ju. 6:44; May. 13:48) “Yohova unoidhiwa vya rimani.” Vyevyo vinothapulela ira Yohova unoona dhilimbi-edha winyu vofunjedha vyokhuza liye thitho unosangalala nodhowa winyu vasogolo no chinja vyongo vinango ira mukale fwee. (San. 17:3; 27:11) Thitho uxamwali wen’na unoodeya namwasa wa khuto. (Aro. 5:10, 11) Kamudiwalenga vyevi.

5. N’nga atu anofunjedha Bibilya tana-arele a-vi malangi-o anofwanyeya va Afilipi 3:16?

⁵ Ninga namafunjedha Bibilya, munathonyi-edhe a-vi ira munosimba namwasa wa khuto? Ndhila imbo-i yoirela vyevi ndi a-rela malangi-o avelenle Paulo wa Afilipi, oonga ira: “Mwandhila iliyothene idhowile i-yo vasogolo, dhoweni nidhowenave irana vyongo vinoira i-yovyo.” (Afl. 3:16) Madhu enango athapuleliwile versu leli anoonga ira: “Nidhowenave wenda vandhila yen’na.” Ee-no, mu-arele malangi-o enala thitho kamurumeli-e ira yongo iliyothene venango mutu uliwethene auimwanani-eni wenda va ndhila yaingumi. —Mat. 7:14; Luk. 9:62.

6. N’nga atu anofunjedha Bibilya tanaire a-vi tagumanangana nyarwa? (Dotornomio 30:11-14) (Muone thitho iruthiruthi.)

⁶ N’nga vinouruchani roromela likhundo linangolee la Bibilyani lifunjedhile nyo? Musakesakenga thitho lobela wa Yohova ira aukami-eni vwechecha pama mwasuo. (Sal. 86:11) Akala vinouruchanive vwechecha, kamufooke mudhowenave funjedha Bibilya, thitho vira wahora munodha uvwechecha pama mwasuo. N’nga munorucheya i-ya kalelo loi Yohova kanodhiveliwana? Thuulelani ira Yohova kanauvepheni yongo yoi “kamunaode iirana.” Munooda kaana ingumi yom’sangalali-a. (Muleri Dotornomio 30:11-14.) Yohova utolanyedha ira unodhaukami-ani. (Esa. 41:10, 13; 1 Ak. 10:13) Ee-no mudhowenave m’vwela Yohova. Malo modhikhumbanyedha na nyarwa dhinogumanana nyo va-eeni, muthuulelenga maningi vyongo viuireleni Yohova thangani-avo khuto. Mwam’dhiveliwangana maningi Yohova munodha zindiyela ira “malamulwee mbo-onyemela.”—1 Ju. 5:3.a

7. N’nga azombwe oi anamabaliwa ndi amboni tanofwanela thuulelan’ni?

⁷ Akala nyo muli zombwe oi anamabalinyu ndi amboni, nyo thitho muli namafunjedha Bibilya. Mwaimbarimbari, nyo muli namafunjedha Bibilya ofuneya maningi wa anamabalinyu. Bibilya linoonga ira: “Mum’kwivele Nlungu thitho liye unodha ukwivelani.” (Yak. 4:8; 1 Li. 28:9) Nyo mwaroma m’kwivela Yohova, liye thitho unodha ukwivelani. Yohova kanouonani ninga mutu mwinango uli vamwinjini vaatu baa-i, mbwenye liye unoitana mutu uliwethene va ekhene thangani-avo atu oi anamabaliwa ndi amboni. N’nga Yohova airilen’ni ira mukale va uxamwali olimba na liye? Yohova atoovelela mwanee. Kamudiwale ira yotuva yen’na ndi yapereso yavadhulu maningi yokhumela wa Yohova. (Aro. 5:1, 2) N’nga Ithuulelo ya yawa yei ya-anaireye, munoona a-vi kaana hora yothuulela viuireleni Yohova na Yesu? Mwamala muone moda munakhuzele aliwa ingumiinyu na vifunelo vinyu—mo-obala ira vyongo vili a-vi va ingumiinyu ira muthonyi-edhe simba namwasa wa khuto.b

MAKRISTAU OBADIZIWA

8. N’nga Kristau obadiziwa athonyi-edhe a-vi ira unosimba khuto?

⁸ Akala nyo muli Kristau obadiziwa, mutothonyi-edha ira munosimba namwasa wa khuto mundhila dhinjinji. Mwaifwanafwani-o, nyo mutodhilimbi-edha m’mwandamela Yohova nokaana ingumi yoi inom’sangalali-a. Nyo mwatoovwela lamulo la Yesu loi nilaleelenga thitho nifunji-enga atu. Mwatodhivelela wa Yohova nobadiziwa. Venango nyo mutogumanana vyowesedha namwasa osakula m’labela Yohova mbwenye mwatoovilela nodhowanave m’labela Yohova mororomeleya? (2 Ti. 3:12) Vyevi vinothonyi-edha ira munodhiveliwana maningi Yohova thitho munosimba namwasa wa khuto.—Aeb. 12:2, 3.

9. N’nga Kristau obadiziwa unofwanela kala osamala na vyongo vivi?

⁹ Voi nili Makristau obadiziwa, ninofwanela kala osamala na vyongo vinango. Vira wa hora ninooda i-ya ona ira khuto ngwapereso yavadhulu. N’nga vyevi vinaodeye a-vi? Kathuulelani vya Makristu awu Efeso a muhora ya arumiwi. Vasogolo voi Yesu utodhowa dhulu, liye atoasimba namwasa okala ovilela. Mbwenye liye atoonga ira: “Nditoufwanyana selu oi uto-iyachi thonyi-edha udhivela ninga wana wee voroma.” (Apk. 2:3, 4) Madhu aongile Yesu anothonyi-edha ira Kristau, mwavang’ono na vang’ono unooda i-ya m’labela Yohova thitho vyevi vinooda ireya mwailemeelo. Mutu oi ee-ni unooda lobelanga, dhowanga migumanoni thitho dhowanga muurumiwini. Liye unooda iranga vyevi namwasa olemeela baa-i, mbwenye a-kala namwasa om’dhiveliwana Yohova. N’nga munaire a-vi akala munoona ira udhivela wana nyo wa Yohova utoroma yeva?

10. N’nga munaire a-vi ira ‘muthuulelenga’ ‘ira vyongo vyauzimu pyofuneya maningi?’ (1 Timoteo 4:13, 15)

¹⁰ Rumiwi Paulo atoom’mwandela Timoteo ira ‘uthuulelenga modi-a vyongo vyevi’ thitho ‘uviirengana modhivelela ira atu othene taone ira unodhowa vasogolo.’ (Muleri 1 Timoteo 4:13, 15.) Movwelana na malangi-o enala, mudhilimbi-edhe thuulela vyongo vinaire nyo ira mudhowenave m’labela Yohova ninga mwairela nyo ‘nodhowanave kala olimba mosagoleliwa na zimu.’ (Aro. 12:11 muone thitho madhu ava nyenyedi “Mukale olimba mosogoleliwa na zimu.”) Mwaifwanafwani-o, munooda kaana hora yokozeela migumano ionanga ira njofuneya. Mwafunjedhanga Bibilya wa vamwekhene, munooda saka limburo loi kavali yongo iliyothene inaudodomi-eni naifunelo yoi muthuulelenga modi-a thitho ganyali na vyongo vinofunjedha nyo. Vyevi vili ninga wenjedhela khuni veko ira va-atime. Munofwanela irana vyevi ira mudhowenave thonyi-edha simba vyongo viuireleni Yohova namwasa wa sembe. N’nga nyo munoona a-vi indi-edha basa masumana mangaasi Ithuulelo ya-anaireye vothuulela modi-a maraeli-o ana i-yo namwasa okala wa Mboni dha Yohova? Mo-okaikela, vyevi vinodha wenjedhela simba winyu namwasa wa khuto, thitho ira mum’mwandamele Yohova nokala fwinyu wa varimani.

11-12. Akala hora dhinango munodhivwa ira kamuna thindhi ninga lana nyo voroma, n’nga vyevyo vinothapulela ira mutoluza zimu ochena wa Nlungu? Muongemo. (Muone thitho iruthiruthi.)

¹¹ Akala munoona ira va-eeni thindhi lana nyo vom’lambela Yohova litoyeva, kamufooke kamudhivwenga ira mutoluza zimu ochena wa Nlungu. Muthuulelenga vyalembile rumiwi Paulo voonga vya urumiwee waabali awu Koritiyo liye aongile ira: “Mbwenye angalive ira ndiirengana vyevi mokhanyi-edheya, ndilive namaing’anela movwelana na izo yava-iwile miyo.” (1 Ak. 9:17) N’nga liye athapulelan’ni?

¹² Vatookala vyongo vinango thitho vyamwimwanani-a Paulo laleela. Mbwenye liye ali osikimiza rima dhowanave laleela angalive ira irana vyevi wali orucha. Nyo thitho munooda kaana ilemeelo yoirana vyevi. Mudhilimbi-edhenga irana vyongo vyapama. Ee-no, mulobelenga wa Yohova ira “auva-eni rima ofuna irana vyongo vinom’dhiveliwi-a thitho kopolo dhoirela vyongovyo.” (Afl. 2:13) Mudhowenave kala opingeya na vyongo vyauzimu. Musikimezelenga ira vira wa hora vyongo vyevi vinodha wenjedhela udhivelinyu wa Yohova nokala osangalala.

13. N’nga ninaire a-vi ira nidhowenave dhisakasaka ‘ira nione akala nili airoromelo’?

¹³ Vavira hora mudhisakesakenga vo-indi-edha basa malangi-o ava 2 Akoritiyo 13:5 aliwa anoonga ira: “Mudhowenave dhisakasaka ira muidhiwe akala mutokaana iroromelo mudhowenave dhisakasaka ira muidhiwe ira muli mutu oi a-vi.” Mwaifwanafwani-o, munooda dhifuka ira: ‘N’nga ndino-ela Umwene va limburo loroma va ingumi yanga?’ (Mat. 6:33) ‘N’nga vyongo vinosakula miyovi ira ndisangalalengana vinothonyi-edha ira ndinoidanana vyongo vyothakala?’ (Sal. 97:10) ‘N’nga vyoonga vyanga thitho vyoira vyanga vinokami-a pingo ira udhowenave kala ovwelana?’ (Aef. 4:2, 3) Vahora ya Ithuulelo, ndi hora inothuulela i-yo maningi vya yotuva ya khuto iniva-idhe Yohova. Vahora yen’na ninokaana ngari yodhisakasaka ira niidhiwe ira ninokala muingumi yosangalali-a Kristu a-kala yodhisangalalali-a okhene.c

MABILA ODIMELA

14. N’nga ndi vyongo vivi vinoiri-a abali naarongoli-u ira ta-iye gumaneya pingoni?

¹⁴ Abali naarongola enango ano-iya gumaneya na pingo. Enango mwaaliwa, anokala ira vatovira vyawa vinjinji tam’labelanga Yohova mororomeleya. Vili ee-no namwasa oi atu enango anokala opingeya na ‘vyokhumbanyi-a vya ingumi.’ (Luk. 21:34) Enango anofooka namwasa wa vyongo vyaongile bali venango rongola. (Yak. 3:2) Thitho enango anokala ira tatoira vyodawa vilukhulu, namwasa wa manyadho na vyoireya vinango katavephile kami-o. Akala imbo-i mwavyongo vyevyo vitoirelani thitho muto-iya gumaneya na pingo munaire a-vi? N’nga yotuva ya khuto inaulimbi-eni iranan’ni?

15. N’nga Yohova unothonyi-edha a-vi ira unosamalela mabila odimela? (Zakiyeli 34:11, 12, 16)

¹⁵ Kathuulelani moda munodhivwela Yohova vyokhuza mabila odimela. Liye kanowanyanyuwela atu enala venango adiwala. Malomwee, unoasakasa mabila enala, unoasamalela noadyi-a thitho akami-a ira tawelele wa liye. (Muleri Zakiyeli 34:11, 12, 16.) N’nga Yohova kanairena vyongo vyevi wa nyo? Mo-okaikela unooda iranadi! Ifunelwinyu voleri yofunjedha yei, inothonyi-edha ira riminyu unofunechecha welela wa liye. Ninga mwemo Yohova mwaonele liye riminyu nouitanelani mugululee, n’nga liye kanodhowanave ona vyongo vyapama mwa nyo nouitanani ira muwelele mugululee?

16. N’nga chini inakami-e mabila odimela ira tawelele wa Yohova? (Muone thitho iruthiruthi.)

¹⁶ Mu broxura loi Bwererani kwa Yehova, ninofwanyamo madhu olimbi-a o-arelala: “Musikimizele ira Yohova unodha ukami-ani ira muwelele wa liye. Liye unooda ukami-ani limbanana vyokhumbanyedha, uthathulani wu vyosukwali-a, kaana rendele wa rimani thitho kaana ithuulela rima yapama. Mwandhila yen’na, nyo munodha kaana ifunelo yom’labela Yohova vambo-i na abali naarongolinyu mu iroromelo.” Muthuulelenga ira andimuwa apingoni anofunechecha ukami-ani. Aliwa tali ninga “Yovithalelavo vahora ya liphevo nlukhulu.” (Esa. 32:2) Ira muthonyi-edhe ira munosimba namwasa wa khuto, mudhifuke ira: ‘N’nga ndinaire a-vi ira “ndisaka-edhe” uxamwalanga na Yohova?’ (Esa. 1:18; 1 Pe. 2:25) Mwaifwanafwani-o, n’nga nyo munooda fwanyeya wu migumano ya pingo nyumbani ya Umwene? N’nga munoona a-vi gumana na m’mbo-i wa andimuwa ira muvephe kami-o la uzimu? Aliwa anooda ira masaka-edho ira murome okoka funjedha Bibilya wa hora yoyeva. Munooda kala osikimiza ira mwaulobelela mwasuo thitho dhilimbi-edha ira muthonyi-edhe simba namwasa wa khuto la Yesu, Yohova unodha uraeli-ani.

N’NGA CHINI INOFWANELA NYO IRA?

17-18. N’nga nina-indi-edhe a-vi basa hori-u Ithuulelo ya yawa yei ya-anafiye?

¹⁷ Yesu aongile ira Yohova atom’ruma ira adhavelele ingumiyee “ira mutu uliwethene om’roromela a-anongiwe mbwenye akaena ingumi yo-omala.” (Ju. 3:16) Khuto ndi ndhila ino-indi-edha Yohova ira anivulumuche wu nyarwa dhinogumanana i-yo namwasa wa madawo na wukwa. I-yo kanino-iya ona khuto kala ya pereso yavadhulu. (Aro. 3:23, 24; 2 Ak. 6:1) Unga-adhi malambo oyeva ira Ithuulelo iireye ninofwanela kaana hora yothuulela vya udhivela wa Yohova na Yesu Kristu, udhivela wen’na unonilimbi-a iravo yongo ira nisimbe vyaniirele aliwa.

¹⁸ N’nga munathonyi-edhe a-vi ira munosimba namwasa wa khuto? Yowakhula inyu inodha kala yo-iyana na yowakhula yaatu enango. Mbwenye munooda kala osikimiza ira Yohova unodha raeli-a dhilimbi-edha winyu thitho wa mamiliyau atu anjinji anom’labela ‘thitho anokaana ingumi a-kala yodhisangalali-a okhene, mbwenye yom’sangalali-a wenuo anikwenle.’—2 Ak. 5:15.