Mwasiwa ngwan’ni ninofuneela khuto?

1-2. Mwasiwa ngwan’ni ninofuneela khuto? (Aroma 7:22-24) (Muone thitho iruthiruthi.)

KATHUULELANI ira, nyumba itogwa thitho mutokala mutu oi utomala vu-eleleya oi kanaode khumamo ekhene. Mbwenye liye kakwide thitho kanaode dhivulumucha ekhene munyarwa ninga yen’na. Vinaire liye ndi khuwa ira akami-iwe nodedi-edhela ira mutu mwinango am’vulumuche.

² Mwemo ndi moda muli vyongo wa mutu uliwethene. Voi Adamu kaam’vwele Namapanduchee, thitho atoodawa. Namwasa oi nili ziza la Adamu i-yo nilive odawa. Namwasa oi atu othene nili muudhaari wa madao. Thitho kaninaode khumamo muudhaarimo vaokhene. Mukartalee lodhowa wu Roma, rumiwi Paulo atoonga ira voi nili odawa, othene nili ‘adhaari’ amadao. (Muleri Aroma 7:22-24.) Paulo ali muudhaari wa madao alandele liye wa anamabalee tam’mwiri-e ira aphiwe. (Aro. 6:23) Ndi saasawa na i-yo. Nili vangovini thitho ninofuneela vulumuchiwa!

3. N’nga khuto unonivulumucha mundhila iivi?

³ Yosangalali-a choi vasogolo voonga yoruchayee, Paulo atooniva-a idedi-edho. Angafukile ira: “N’nga mbaani unofuna ndivulumucha wu manungo anondiiri-a ira ndikwala?” Liye atoowakhula molimba rima ira: “Nlungu unodha ndivulumucha dhela mwa Mbwii-u Yesu Kristu.” (Aro. 7:25) Paulo aonga vya sembe ya Khuto ya Yesu.a Khuto unonivulumucha namwasa oi (1) ninoleveleliwa madawi-u, (2) ninokaana idedi-edho yodhaakaana ingumi yolongomana thitho (3) ira nikale vauxamwali na namapanduchi-u Yohova. Nafunjedhanga makhundo enala ninodha ulukhuli-a udhiveli-u na Yohova, “Nlungu oi unoniva-a idedi-edho.” (Aro. 15:13) Ninosimba maningi Yesu namwasa oi—“nitovulumuchiwa na khuto” dhela mwa liye.—Ako. 1:14.

KHUTO UNONIIRI-A IRA NILEVELELIWENGA

4-5. Mwasiwa ngwan’ni uliothene wa i-yo unofuneela khuto? (Namalaleya 7:20)

⁴ Ninofuneela khuto ira madawi-u taleveleliwe. Mutu uliwethene o-olongomana unodawa, voonga thitho na vyoira vyee. (Muleri Namalaleya 7:20.) Madao enango anokala malukulu. Mwaifwanafwani-o, movwelana na ilamulo ya Mose, mararuo na upha mutu tongiwa wee ali piwa. (Lev. 20:10; Num. 35:30, 31) Pyaimbarimbari ira madao enango katinokala malukulu ninga enala. Mbwenye aliwa ndi madao baa-i. Mwaifwanafwani-o, Mwene Davide atoonga ira: “ndinodha ing’anela ndhila dhanga ira nda-adawe na lumi langa.” (Sal. 39:1) Vyevi vinothonyi-edha ira vyongo vinonga i-yo vinooda nidawi-a.—Yak. 3:2.

⁵ Kathuulelani vyongo vyaongile nyo thitho irana ndulimu. N’nga mwatoongavo vyongo vyoi kwamwafwanela vionga? N’nga mwatoongavo vyongo vasogolovee nyodhasukwala? Akala mutowakhula ira “Ee” va vyofukwa vyilivi, Bibilya linoonga ira: Akala ninoonga ira “kanin’na madao,” ninaadhinami-a okene mwa i-yo kamuli imbarimbari.—1 Ju. 1:8.

6-7. N’nga ndi masaka-edho aavi airile Yohova ira anilevelelenga madawi-u? (Muone thitho iruthiruthi.)

⁶ Khuto unonikami-a ira Yohova anilevelelenga madawi-u. (Aef. 1:7) Mbwenye vyevi kavinothapulela ira Yohova unopwaza madawi-u kalanga ninga vinodawi-a i-yo kavina basa. Wen’na, ndi mwasa ulukulu maningi wa Yohova. (Esa. 59:2) Namwasa wa longomanolee, Yohova atooira masaka-edho ira anilevelelenga madawi-u.

⁷ Ilamulo ya Mose, yafuna ira Aisraeli tavelelenga sembe dhanyama ira madawiwa takuneliwe. (Lev. 4:27-31; 17:11) Sembe dhedi dhathonyi-edha ira atu tanofuneela Sembe ilukhulu maningi. Ndi sembe ya Yesu yadhi-idhe maraeli-o thitho yatooiri-a masaka-edho ira Yohova anilevelelenga madawi-u. Madhu a Paulo wa Makristau awu Akoritiyo anothonyi-edha ira liye atoovwechecha funeya wa Sembe ya ukwa wa Yesu. Tangaongile vyamadao tairile aliwa walelene, liye aongile ira: “Muto-ambi-iwa nokala ochena, mutosakhuliwa, thitho munooniwa kala olongomana mudhina la Yesu Kristu na Zimu wa Nlungu.”— 1 Ak. 6:9-11.

8. N’nga mwakozeelanga ithuulelo ya yawa yei munofwanela thuulelan’ni?

⁸ Vanokozeela nyo ithuulelo ya yawa yen’na, mukaena hora yothuulela vinotapulela leveleliwa na Yohova. Mwaifwanafwani-o, namwasa wa khuto kamunofwanela thuulelanga vyodawa vyairile nyo ndulimu vyoi mwatoomala chinyuwa. N’nga vinouruchani roromela vyevi? Venango munooda onga ira: Ndinoidhiwa ira Yohova utondilevelela, mbwenye miyo kandinaode dhilevelela ndekene. Akala munoona eeno, thuulelani ira Yohova ngun’na izo yolevelela atu odawa thitho utom’va-a mwanee izo yotonga atu. Bibilya linoonga ira: “Akala ninowenda mu njeza mofwanafwana na muli liye njeza, . . . kuongela ira nili ovwelana na sangiri ya Yesu oi ndi mwanee, inonicheni-a umadawi-u othene.” (1 Ju. 1:6, 7) I-yo thitho ninororomela vyevi ninga mwemo munororomela i-yo yolanyedha iliyothene ya Bibilyani. Khuto wa Yesu watooiri-a ira Yohova anivwelenga tangaranga thitho madhwee anoonga ira: “Hora dhothene liye ngokozeya nilevelela.”—Sal. 86:5.

KHUTO UNONIKAMI-A IRA NIKAENA IDEDHI-EDHO YODHA KAANA INGUMI YOLONGOMANA

9. Wenjedhela voira vyongo vyothakala, n’nga madao anothangani-avo n’ni? (Salimo 51:5)

⁹ Bibilyani, madhu oi madao katinothapulela vyongo vyothakala baa-i, mbwenye ndi a-longomana utukulele i-yo wa anamabali-u. (Muleri Salimo 51:5.) Wenjedhela vakalelo lalandele i-yo waanamabali-u, manungwi-u katinolaba ninga mwanipanduchele Yohova. Thitho ninobulela, ulula noukwa. Ndi mwasee masiki a-ima atete oi katiirile yodawa iliyothene anooda bulela thitho ukwa. Thitho vinonikami-a vwechecha mwasee atu apama na atu anoira vyothakala, othene anogumanana nyarwa noukwa. I-yo othene nili a-ima a Adamu, thitho ninogumanana vyorucha vyevi.

10. N’nga dawa wa Adamu na Eva, unikhuzile a-vi?

¹⁰ N’nga madao takhuzile a-vi banja loroma? Namwasa wamadao, ingumi iwa yatoochinja tangam’panduwele Nlungu, Adamu na Eva tatooroma gumanana nyarwa namwasa oi katavwele lamulo la Nlungu. “Thitho lamulo leli latoolembiwa mirimani mwiwa.” (Aro. 2:15) Vyongo vyatoochinja maningi vaingumi yiwa, thitho kavyaawendele pama. Aliwa tatooroma ona ira anofwanela wara vyongo manungoni mwiwa, nodhilokota ira Nlungu a-aone. (Mar. 3:7, 8) Adamu na Eva tanodhiomba landu, dhikumbanyedha, dhiona ira mbo-obareleya, uvwa upha rimani thitho sukwala. Romela dambo lelo, aliwa tanolimbanana mathuulelo enala fiyedha ukwa wiwa.—Mar. 3:16-19.

11. N’nga khalelo lina i-yo la madao linonikhuza a-vi?

¹¹ Mofwanafwana na banja loroma, madao anoniiri-a ira nidhiombenga landu, thitho dhikumbanyedha. Namwasa o-olongomana, ninorucheya mumanungoni thitho mumathuulelo. Masiki nidhilimbi-edhe ira nikaena ingumi yapama kaninaode chinja ira vyongo vikale pama. Mwasiwa ngwan’ni? Namwasa oi ninga munoongela Bibilya, “nitogonji-iwa na vyongo vyo-okaana basa.” (Aro. 8:20) Vyevi kavinokhuza mutu mbo-i baa-i mbwenye atu othene. Mwaifwanafwani-o, kathuulelani vyongo vinoira atu vosamalela vyopanduchiwa, mali-a vyauwalanga, nomali-a sauwa ira takaathi-e rendele vailambo yothene. Angalive ira atu anodhilimbi-edha irana vyevi, katinaode mali-a nyarwadhi. Mbwenye namwasa wa khuto ninodedi-edhela ira vyongo vinodha kala pama.

12. N’nga khuto unoniva-a idedi-edho iivi?

¹² Kuto unoniva-a idedi-edho yoi “vyopanduchiwavyo . . . vinodha thathuliwa wuudhari na ukwa.” (Aro. 8:21) Vyevi vinothapulela ira ninodha kala olongomana mu Paradaizo. Thitho kaninodha rucheya mathuulelo namwasa odhiomba landu, dhikumbanyedha, a-bareleya, uvwa upha thitho manyadho. Wenjedhela veva “Mwinyaa rendele,” Yesu oi atoovelela khuto namwasa wa-iyo, ngunofuna dha tonganga. Liye unodha kami-a atu ira tamali-e nyarwa dhoi vaokhene kataode dhimali-a.—Esa. 9:6, 7.

13. N’nga chini inofuneela nyo thuulelanga maningi mwakozeelanga ithuulelo ya nyawa yei?

¹³ Kathuulelani moda munofuna dhakalela ingumi nadhakala olongomana. Kathuulelani ira munovenyathi dambo nlilothene mungali pama, a-kumbanyanga ira nyo venango fwinyu unom’dhiveliwana nyo, arucheyanga nandhala, bulela, venango ukwa . . . thitho va-eeni munooda kaana rendele akala munororomela maningi vyongo vinodedi-edhela i-yo vili ninga nangula wa vingumi vi-u thitho chosimikizeleya na yokaatheya. (Aeb. 6:18, 19) Mofwanafwana na nangula oi unoiri-a ira Baruku ikale yolimba, idedi-edho inyu inooda limbi-a iroromelwinyu noukami-ani limbanana vyowesedha vyothene vinogumanana nyo va-eeni. Kanikaikelenga navang’onovene ira Yohova unovelela “yotuva waatu anosakasaka narima othene.” (Aeb. 11:6) Namwasa wa khuto, ninolimbi-eya thitho ninodedi-edhela dhakaana ingumi yolongomana sogolou.

KHUTO UNONIVWELANI-A NA NLUNGU

14. N’nga madao anokhuza a-vi uxamwali-u na namapaduchi-u Yohova, N’nga mwasiwa ngwanʼni?

¹⁴ Romela vadawile Adamu na Eva, atu tatodhi-iyani-a na Nlungu thitho vaokhene kataode dhivwelani-a na liye. Bibilya linoonga ira atu othene tatolapelana na namapanduchiwa. (Aro. 8:7, 8; Ako. 1:21) N’nga mwasiwa ngwan’ni? Makhundo a Yohova mbolongomana ee-no pyo-oodeya ira apwazenga madao. Bibilya linoonga ira: “Methwinyu mbochena munoona vyongo vyothene vyothakala thitho kamunaode pwaza vyothakala.” (Aba. 1:13) Madhu enango ninooda onga ira madao atooni-iyani-a na Nlungu. Kavali uliothene wa i-yo aode kala vauxamwali na Yohova, akale ira kavali yongo yonivwelani-a na liye. Mbwenye khuto utoiri-a ira nikale vauxamwali na Nlungu.

15. N’nga ukwa wa Yesu uiri-idhe a-vi ira nikale vauxamwali na Yohova?

¹⁵ Bibilya linoonga ira “Yesu ndi sembe yokhunela madawi-u.” (1 Ju. 2:2) Madhu aigriki athapuleliwe ira “khunela vyodawa” anooda thitho thapulela ira “kaathei-a rendele.” Nʼnga khuto unoniva-a a-vi rendele? Kai ira ukwa wa mwanee wairi-idhe ira Yohova adhivwe pama. Mbwenye khuto watookwakwaneli-edha makhundo alongomano thitho watooiri-a ira Yohova akale varendele naatu. (Aro. 3:23-26) Liye angaodile “roromela” atu tan’lambela mororomeleya Kristu a-anakwe. (Mar. 15:1, 6, madhu achindo.) N’nga vyaodeye a-vi? Vyaodeye dhela mwakhuto wavelele Yesu vasogolovee. Namwasa oi Yohova atooidhiwa ira mwanee Yesu unodha velela khuto. (Esa. 46:10) Ee-no khuto watoodhula ndhila ira Yohova anilevelelenga madawi-u thitho ira nikale vauxamwali naliye.

16. N’nga ndi vyongo vinango viivi vinofwanela nyo thuulela mwakozeelanga ithuulelo ya yawa yen’na? (Muone thitho iruthiruthi.)

¹⁶ Kathuulelani vyongo vyapama vinosangalala nanyo namwasa okala vauxamwali na Yohova. Mwaifwanafwani-o, munooda m’mwitana Yohova ira “Baba” ninga mwanifunji-edhe Yesu. (Mat. 6:9) Thitho hora dhinango nyo munooda m’mwitana ira “xamwalanga.” Naonganga madhu oi “Baba” venango “xamwalanga” ninofwanela irana vyevi mwalemezo thitho modhiyevi-a. Mwasiwa ngwan’ni? Namwasa oi i-yo atu odawa vaokhene kanaode kala vauxamwali na Yohova. Mbwenye khuto utoiri-a ira nikale vauxamwali na liye. Dhela mwa kuto wa Yesu Yohova atooiri-a ira “nivwelane na liye, thitho ira vyongo vyothene vikale vyoodeya nokaathei-a rendele dhela mwa sangiri ya Yesu yachuchi-idhe liye va imuri yoonelavo nyarwa.” (Ako. 1:19, 20) Ndi mwasee ninooda kala vauxamwali na Yohova—angalive ira va-eeni nili o-olongomana.

KHUTO UNOTHONYI-EDHA IRA YOHOVA GWATANGARANGA

17. N’nga khuto unothonyi-edha a-vi ira Yohova ngwatangaranga? (Aefeso 2:4, 5)

¹⁷ Khuto unothonyi-edha ira Yohova “ngwatangaranga dhilukulu” liye “utoniva-a ingumi . . . namwasa oi nali okwa na vyodawa vi-u.” (Muleri Aefeso 2:4, 5.) Atu “ana mathuulelo apama oi anoakami-a fwanya ingumi yo-omala” anofunechecha kami-iwa namwasa oi anozindiyela ira anokala ninga atovu-eleli-wa na madao alandenle i-yo kumela wa anamabali-u thitho ninofuneela vulumuchiwa. (May. 13:48) Yohova unoakami-a atu enala voonechecha ira tavuruwane milanyu ya Umwene naifunelo yoi am’mwidhiwe liye na mwanee. (Ju. 17:3) Akala Satana athuulela ira soka lagweenle Adamu na Eva linom’mwimanani-a Yohova kwakwaneli-edha ifunelwee, aira dhinami-a.

18. N’nga nafunjedhanga vyakhuto, chini inofuneela i-yo thuulela?

¹⁸ Nathuulelanga maraeli-o anofwanya i-yo namwasa wa khuto, nithuulelenga ira ndi yongo yofuneya maningi. Malo moonanga ira khuto ndi okami-a wa-iyo, nithuulelenga thitho ira Yohova unom’mwakhula Satana vyonama viongile liye mundani mwa Edeni (Mar. 3:1-5, 15) Yohova uno-indi-edha basa khuto ira acheni-e dhinalee wu vyonama vyothene vyaongile Satana vyokhuza liye. Liye utonivulumucha wu madao na wukwa, yen’na ndi ndhila inothonyi-edha Yohova ira liye ngwaudhivela. Namwasa oriya rima wa Yohova liye utoniva-a ngari yothonyi-edha ira Satana ndi namanami-a angalive ira kanili olongomana. (San. 27:11) N’nga ninathonyi-edhe a-vi simba namwasa wa khuto? Mu yofunjedha yo-arela inodha wakula yofuka yei.