Munooda kalangave osangalala masiki atu taidanengana nyo!

1. N’nga ndi madhu avi odabwi-a aongile Yesu?

VA ULALIKEE wava Mwangoni Yesu aongile ira: “Muli osangalala atu taidana na nyo.” (Luk. 6:22) Atu tavwide madhu enala tatoodabwa maningi. Namwasa oi kavali mutu unodhiveliwana ira atu tam’mwidanengana. N’nga mwasiwa ngwan’ni Yesu atoonga vyevi? Yen’na ndi yofuka yapama maningi namwasa oi atu anjinji malamboano anoidana na anama-arela a Yesu. Muyofunjedha yei, ninoona mwasee atu anjinji anoniidanana thitho mwasee ninokala osangalala angalive ira atu anoniidanana.

MWASIWA NGWAN’NI ATU TANONIIDANANA?

2-3. N’nga nino-ara-ariwa namwasa wan’ni, mwasiwa ngwan’ni kofuneya vwechecha mwasee? (Ju. 16:2, 3)

² Atu tanoniidanana namwasa oi ninom’labela Yohova. Voonga vyaatu othene a-ara-ara thitho fiya vopha anama-arelee, Yesu aongile ira: “Katinondiidhiwa thitho katinom’mwidhiwa Baba. (Muleri Juwau 16:2, 3.) N’nga mbaani unoiri-a ira atu a Nlungu ta-ara-ariwenga? Ndi Satana. Liye ‘ndi nlungu wa ilambwila.’ (2 Ak. 4:3, 4) Liye unoairi-a atu ira ta-am’mwidhiwe Yohova thitho unoairi-a ira ta-are-arenga atu anom’dhiveliwana Nlungu. (Ju. 8:42-44) Mwasiwa ngwan’ni idhiwa vyevi unooda chinja moda munoaonela i-yo atu anonioni-a nyarwa? Idhiwa ira atu enala tanonami-iwa na Satana, unonikami-a ira na-aidanenga naaliwa.

³ Kaonani ifwanafwani-o ya bali Pavel,a wenuo unokala muilambo yoi basa li-u tokondi-iwa. Namwasa oi atoodhowanave m’labela Yohova mororomeleya, liye atoomangiwa, khomiwa mwauwalanga thitho no-eliwa kwartu la ekhene perezoni wa myedi minjinji. Pavel unoonga ira: “Ndinoona ira Satana na viwandavyee mbanolimbana na i-yo ira ni-iye m’labela Yohova. Vinooneya ira atu anjinji anolaba perezoni katinoidana na i-yo. Aliwa anolaba basa liwa baa-i.” Bali wa Croácia wenuo avilenle angalive ira anoo-ara-ariwa maningi na anamabalee aongile ira: “Va ee-ni nditozindiyela ira Satana ndi mwidananga nlukhulu a-kala anamabalanga.”—Aef. 6:12.

4. N’nga ninfunjedhavon’ni va ifwanafwani-o ya Yesu na ya Setefano? (Muone thitho iruthiruthi.)

⁴ I-yo kaninoidanana naatu ale anoni-ara-ara. Mwaimbarimbari, i-yo ninofwanela alobelela. (Mat. 5:44) Dhoweni nioneni vinofunjedhavo i-yo vaifwanafwani-o ya Yesu thitho namafunjedhee Setefano. Yesu atoothomeiwa vaimiri yoonelavo nyarwa na anyakhondo Airoma. Angalive ira vahora yeniyo atoovwa upha maningi, liye atoolobela ira: “Baba, mwaalevelele.” (Luk. 23:34) Yesu atoovepha Yohova ira aalevelele anyakhondo avephiwile ira tam’phe. Vinooneya thitho ira liye anoothuulela vya mwinji waatu enao tasogoleliwa na anamasogolela amaregiau nokuwanga ira Yesu aphiwe. Yesu atoovwechecha ira atwao kataidhiwa vyaira aliwa. Mofwanafwana na vyevyo, Setefano atoovepha Nlungu ira aalevelele atu othene tam’phide. (May. 7:58-60) N’nga Yohova atoowakula lobelo la Yesu na la Setefano? Ee. Atu anjinji takuziwile na wukwa wa Yesu vasogolove tatoochinyuwa nofiya vom’roromela Yesu thitho badiziwa. (May. 2:36-41) Thitho mutu mbo-i arumeli-idhe phiwa wa Setefano Saulo wau Tarso, atookala Kristau thitho atoochinyuwa khumela vathi varima vavyongo vyothene vyairile liye mo-oidhiwa.—1 Ti. 1:13.

5. N’nga nyo mufunjedhilevon’ni vaifwanafwani-o ya César?

⁵ Malamboano, Yohova unodhowanave wakula malobelo anolobelela i-yo atu anoni-ara-ara. Kathuulelani vyam’mwireele César, wenuo unokala wu Venezuela. Babee ali oruni-a maningi. César aongile ira: “M’manga anooirecha vyongo vyothene vyofuneeleya banjani mwi-u. Thitho anoo-elecha Umwene wa Nlungu valimburo loroma, vingalive ee-no liye anom’samalela babanga mwaudhivela. Liye atoondifunji-a miyo vambo-i naabalanga m’lemeza babi-u thitho m’vwela hora dhothene i-yavo akala utovepha yongo yoi kinovwelana na vinofuna Yohova.” Vangavirile vyawa, babee César atooroma chinja. Liye aongile ira: “Dambo n’nango ndingam’mwandenle Yohova dhela mulobelo vyarimani mwanga, miyo ndatoom’fuka babanga akala unofuna funjedha Bibilya na miyo. Miyo ndatoosangalala maningi babanga angarumenle ira afunjedhenga Bibilya.” Vangavirile hora babee César atoobadiziwa. Pyaimbarimbari ira vyevi kavinoireela atu othene anoni-ara-ara, mbwenye atu enango anooda chinja mathuulelwiwa taona moda munoirela i-yo vyongo, moda oonga nowalemeza. Thitho ninokala osangalala maningi vyevi vyaireya! Ninofunechecha dhaona Yohova watangaranga “Namatonga wailambo yothene,” aitanelanga gulunimwee atu enala.—Mar. 18:25.

6. Movwelana na Marku 13:13, ndi mwasa unango uvi unoiri-a atu idanana i-yo?

⁶ Atu anoidana na i-yo namwasa oi ninolemeza Yesu. Yesu atoonga ira “Namwasa wa dhina langa” atu tanodha idana na Makristau aimbarimbari. (Muleri Marku 13:13.) N’nga “dhina” la Yesu linoimelelan’ni? Linoimela ira liye utokaana utongi thitho ndi Mwene wa Umwene wa Nlungu. Atu anoidanana i-yo namwasa oi kaninonyindela utongi waatu, mbwenye ninonyindela Yesu Kristu um’sakunle Yohova ira akale Namatonga wa vyopanduchiwa vyothene. Yesu uromile tonga ninga Mwene wa Umwene wa Nlungu romela muyawa ya 1914 thitho vo-odembuwava unodha nonga maguverno othene anoruni-ana na utongee.

7-8. Mwasiwa ngwan’ni arumiwi enango a Yohova anonyoziwa? (Ju. 15:18-20) (Muone thitho viruthiruthi.)

⁷ Atu anoniidanana namwasa o-okala ikhundu ya ilambo ya Satanila. Yesu atoowandela anama-arelee ira anodha idananiwa namwasa oi ‘katinoira ikhundu ya ilambwila.’ (Muleri Juwau 15:18-20.) Ee-no mofwanafwana na Makristau oroma, i-yo ninorambela thuulela irana vyongo thitho onga ninga munoirela atu amuilambwila. Namwasa wa vyevi, abali naarongola anjinji anooni-iwa nyarwa basani venango xikolani. (1 Pe. 4:3, 4) Mbwenye ninokala osangalala akala mutu anioni-a nyarwa utochinja mathuulelwee noroma nilemeza.

⁸ Dhoweni nioneni ifwanafwani-o ya Ignacio, unokala wu America Central. Wa vyawa, vinjinji purusoree xikolani anoom’nyoza namwasa wa makalelwee apama. Mbwenye Ignacio a-anamari-e xikola purusoree atoom’fuka ira, unooda a-vi a-rela makhundo a Bibilyani angalive ira atu anounyoza? Ignacio atoom’mwandela ira, wa liye malamulo a Nlungu anom’barela. Ee-no liye atoom’mwitanela purusoruo migumanoni mbwenye Ignacio atoodabwa purusoruo angafiile vamigumanoni! Liye atookaana ifunelo na udhivela waoni liye pingoni thitho atoodhowanave fwanyeya vamigumanoni ya pingo. Vasogolovee purusoruo atooroma oni-iwa nyarwa namwasa orumela funjedha Bibilya, mbwenye liye atoodhowanave dhowa vasogolo thitho vira wahora atoobadiziwa.

9-10. (a) N’nga ndi mwasa unango uvi Makristau uli aliwa o-iyana naatu ailambwila? (b) N’nga chini inofunjedhavo i-yo va ifwanafwani-o ya rumiwi Paulo?

⁹ Yongo inango inothonyi-edha ira kanili ikhundu ya ilambwila, njoi kaninovolowela myasa ya ndale venango khondo. (Ju. 18:36) Ndi imbarimbari ira nino-arela malangi-o ava Aroma 13:1 thitho ninodhilimbi-edha vwela malamulo a guverno. Mbwenye i-yo Makristau, kaninovolowela myasa ya ndale. Thitho kaninokaana izo va myasa ya ndale venango dhowa mavotari. Mwasiwa ngwan’ni? Mwasiwa ngoi i-yo ninokala ororomeleya wa Yohova na Umwenee oi unotonga ndi Kristu. Amboni dha Yohova anjinji anomangiwa namwasa wairoromelwiwa. Angalive e-no abali naarongolala anodhowanave laleela. Voirana vyevi, aliwa anosazi-edha ifwanafwani-o ya rumiwi Paulo amadhi vyawa vinjinji angali mu perezo yo-okhuma vandhe. (May. 24:27; 28:16, 30) Angalive e-no, liye atoodhowanave laleela milanyu yapama waatu tafuna vuruwana, thangani-avo alimbo ing’anela perezo na andimuwa andimuwa a namatonga miselu, magovernadore, mamwene venango thitho andimuwa andimuwa taing’anela mwene wau Roma Nero.—May. 9:15.

¹⁰ Mofwanafwana na vyevi, abali-u ali perezoni, anolaleela wa mutu uliwethene unofuna vuruwana, thangani-avo anamatonga, anamaing’anela guverno thitho alimbo ing’anela perezo. Bali mwinango atoo-eliwa perezoni wa vyawa 6 namwasa o-ovolowela vyandale. Liye aongile ira nanoona ira kala perezoni kaali langiwa mbwenye ali urumiwi wandiva-idhe Yohova osakasaka atu amirima dhapama. Pyosangalali-a maningi i-ndi-edhiwa basa na Yohova vosakasaka atu anofuna vuruwana milanyu yapama! (Ako. 4:3) Dhoweni nioneni myasa inango inoniiri-a kala osangalala angalive ira atu enango anoniidanana namwasa om’labela Yohova.

MWASIWA NGWAN’NI NINOFWANELA DHONAVE KALA OSANGALALA MASIKI ATU TANIIDANENGANA?

11. N’nga oni-iwa nyarwa unalimbi-e a-vi iroromelwi-u? Muonge ifwanafwani-o.

¹¹ I-yo ninoidhiwa ira idani ya ilamboi inokwakwaneli-edha maulosi a Bibilyani. Mu ulosi oroma olembiwa Bibilyani, Yohova atoonga ira Satana na zizalee venango ira mutu uliwethene unom’arela anodha idanana atu anom’dhiveliwana thitho m’labela Yohova. (Mar. 3:15) Yesu atoosikimizela moweli-edha weli-edha ira ulosi wen’na unodha kwakwaneli-edhiwa. Thitho madhwee atoolembiwa mumabukhu 4 a milanyu yapama. (Mat. 10:22; Mrk. 13:9-12; Luk. 6:22, 23; Ju. 15:20) Alimbo lemba Bibilya enango thitho tatoolemba mwasa wen’na. (2 Ti. 3:12; Yak. 1:2; 1 Pe. 4:12-14; Yud. 3, 17-19) Ee-no i-yo kaninodabwa namwasa o-ara-ariwa. Malomwee, ninokala osangalala voona ira maulosi a Bibilyani anaakwakwaneli-edhiwa. Vyevi vinonisikimizeli-a ira ninolabela Nlungu waimbarimbari. Rongola mwinango oi unokala wu ilambo yoi basali-u tokhondi-iwa aongile ira: “Ndingadhivelenle wa Yohova ndanooidhiwa ira hora inango ndinodha ara-ariwa. Ee-no ndingaguman’nena nyarwa kavyali vyodabwi-a thitho kandaova.” Vaatu anjinji aruni-a rongolula m’mbo-i mwa aliwa ali man’nee. Anoom’mwirela vyauwalanga thitho atooka-a Bibilyalee na mabukhu enango. Malo morumeli-a ira ova um’gonji-e, iroromelwee yatoolimba maningi. (Aeb. 10:39) Liye atoomari-a onga ira: “Bibilya latoonga ira ninodhaoni-iwa nyarwa, ee-no ndanooidhiwa ira vyevyo vinodhaireya. Gumanana vyongo vyevi, watoondisikimizeli-a ira yen’na ndi religiau laimbarimbari.”

12. N’nga chini yam’kami-idhe bali mwinango vilela nyarwa?

¹² Angalive ira ninoidhiwa ira ninodha oni-iwa nyarwa, hora dhinango vinokala vyorucha vilela. Bali mwinango atoonga vyahora yali liye perezo ira: “Hora dhinjinji ndanoorucheya mathuulelo, sukwala thitho ndanoolecha.” N’nga chini yam’kami-idhe balula vilela? Liye atoonga ira: “Undhe wacha ndanoolobelecha. Thitho dambo lothene ndanoolobelecha waireya yongo yothakala. Ndaroma nyanyuwa na vyongo vyo-olongomana, ndanoodhifungela bafani noroma lobela.” Wenjedhela veva, bali-ula anoothuulelecha vifwanafwani-o vyaatu andulimu thitho achineneeva avilenle angalive ira tanoogumanana nyarwa. Vyevyo vyatoom’kami-a ira a-awelele nduli thitho kaana rendele walanyedhile Yesu waanama-arelee.—Ju. 14:27; 16:33.

13. N’nga chini inanikami-e gonji-a umwidani?

¹³ Udhiveli-u ngwakopolo maningi kwaranya umwidani. Yesu anoodhiveliwana Babee na rimee wethene fiyedha dambo laphiwile liye. Liye thitho anoodhiveliwana afwee. (Ju. 13:1; 15:13) Nadhilimbi-edhanga dhiveliwana Yohova thitho abali naarongoli-u, ninooda gonji-a umwidani. Moi a-vi? Ira niwakhule dhoweni nithapanye ifwanafwani-o ya rumiwi Paulo.

14. N’nga chini yam’kami-idhe rumiwi Paulo dhowanave kala ororomeleya angalive anoidhiwa ira unophiwa?

¹⁴ Anga-adhi vang’ono ira aphiwe, Paulo atoolembela xamwalee Timoteo ira: “Nlungu kaniva-idhe zimu oova mbwenye zimu wa kopolo na waudhivela.” (2 Ti. 1:7) N’nga liye athapulelan’ni? Paulo athapulela ira m’dhiveliwana maningi Yohova unooda kami-a Kristau kala okozeya limbanana nyarwa. (2 Ti. 1:8) Udhivela wana Paulo va Yohova, watoom’kami-a ira adhowenave kala ororomeleya angalive ira anooidhiwa ira unophiwa namwasa om’labela Yohova.—May. 20:22-24.

15. N’nga abali naarongola malamboano anothonyi-edha a-vi udhivela waimbarimbari? (Muone thitho iruthiruthi.)

¹⁵ Mwaimbarimbari i-yo ninodhiveliwana maningi abali naarongoli-u odhiveliwiwa anodhowanave roromeleya angalive ira anooni-iwa nyarwa. Abali-u enango malamboano anokala okozeya e-la ingumiiwa vangovini ira takami-e abali naarongola, ninga mwemo mwairile Akila na Prisila vo-ela ingumiiwa vangovini vofuna kami-a Paulo. (Aro. 16:3, 4) Mwaifwanafwani-o, wu Russia, abali naarongola anjinji tanodhowa tribunaleni dhowa malimbi-a abali enao tali perezo. Rongola mwinango ali perezo angaoni abali na arongola tadhanga tribunale, vyatoom’khuza maningi thitho kaaoda onga. Udhivela waimbarimbari wa abalala watoom’limbi-a vahora yafuneela liye limbi-iwa. Ninokala osangalala maningi voidhiwa ira udhiveli-u ngwakopolo maningi kwaranya umwidani!

16. Mwasiwa ngwan’ni rumiwi Pedru atoonga ira atu anooni-wa nyarwa namwasa om’labela Nlungu atokaana mwasa ovweya okalela osangalala? (1 Pedru 4:14)

¹⁶ Ninoidhiwa ira Yohova unosangalala aniona nidhowanganave vilela angalive ira atu anoidanana i-yo. (Muleri 1 Pedru 4:14.) Rumiwi Pedru atoonga ira atu anodhowanave vilela, angalive ira anooni-iwa nyarwa namwasa om’labela Nlungu, atokaana myasa yovweya yowairi-a kala osangalala. Mwasiwa ngwan’ni? Namwasa oi ndi umboni othonyi-edha ira zimu wa Nlungu “uli va i-yo.” Pedru atooidhiwa ira vilela nyarwa unom’mwiri-a mutu kala orumeleya wa Nlungu. Vasogolo va Petekoste wa yawa ya 33 K.A.B. anamaing’anela kachisi tatooruma atu ira tama-inde Pedru na arumiwi enango namwasa oi aliwa tanoolaleela milanyu yapama. Mbwenye Pedru atoobarela iroromelwee molimba rima. (May. 5:24-29) Angalive ira tatookhomiwa, Pedru naafwee kata-iidhe laleela. Malomwee, ‘tatoodhowanave kala osangalala angalive ira anoonyoziwa namwasa wa dhina la Yesu.’ Mofwanafwana na arumiwala, i-yo thitho ninooda kala osangalala namwasa ovilela vyowesedha.— May. 5:40-42.

17. N’nga Yesu aongilen’ni vama-iyuwee omari-a?

¹⁷ Vama-iyuwee omari-a, Yesu atoowandela anamafunjedhee ira: “Mutu unondidhiveliwana, Babanga thitho unodha m’dhiveliwana.” (Ju. 14:21) Nili ofunechecha dhaona atu tanidhiveliwanga a-kala niidanana namwasa om’labela Yohova! (2 At. 1:6-8) Hora yeniyo ya-anafiye, ninooda kaana kopolo thitho didili-iwa namwasa okala osangalala voidhiwa ira atu anoidanana i-yo namwasa om’labela Yohova.