Nyo atu oulula—Muli ofuneya maningi pingoni
“Ndaing’ana nduli ndinodabwa na vyongo vyaoda miyo irana.Va-eeni voi nditoulula, kandinooda irana vinjinji ninga vyaira miyo ndulimu.”—Connie, wa vyawa 83.
Venango thitho kamunooda irana vyongo vinjinji namwasa oulula. Angalive ira mutom’lambela Yohova wa vyawa vinjinji, munooda dhionanga ira kamuli ofuneya namwasa oi va-eeni kamunooda irana vinjinji. Mwaifwanafwani-o, munooda fwanafwani-edhela na vyongo vinoira nyo va-eeni na vyaira nyo ndulimu. Akala ndi ee-no munaire a-vi ira mumali-e mathuulelo enala?
VYONGO VINOFUNA YOHOVA IRA MUIRENGANA
Mudhifuke ira, ‘N’nga Yohova unofuna ira ndiirengan’ni? Munodha fwanya yowakhula yei va Dotornomio 6:5 lelo linoonga ira: “Mum’dhiveliwengana Yohova na riminyu othene, inguminyu yothene na khopolo dhinyu dhothene.’’
Movwelana na versuli, Yohova unofuna ira mum’lambelenga na riminyu othene, inguminyu yothene na khopolo dhinyu dhothene. Likhundo leli linooda ukami-ani ira murambele dhifwanafwani-edha naatu enango thitho fwanafwani-edha vyongo vinoira nyo va-eeni na vyongo vyaira nyo ndulimu.
Thuuleni vi: Hora yali nyo zombwe, n’nga mwam’va-an’ni Yohova? Arumiwi a Yohova anjinji tanooda wakhula ira tanoom’va-a vyothene vyaoda aliwa irana. Va horiyo mwanooda m’va-a vyongo movwelana na moda mwali vyongo vainguminyu. N’nga vyongo vitochinja vainguminyu? N’nga va-eeni munooda m’va-an’ni Yohova? Mwaimbarimbari munoom’va-a vyongo vyothene vinaode nyo movwelana na muli vyongo vaingumiinyu va-eeni. Akala munooda ona vyongo mundhila yen’na, munodhaona ira munoom’va-a Yohova vyothene vinooda nyo ninga mwairela nyo ndulimu. Walelene mwanooda m’va-a vyothene vyaoda nyo irana thitho va-eeni munom’va-a vyothene movwelana na moda muli vyongo vaingumiinyu.
Mwanon’va-a Yohova vyothene vyaoda nyo mungali zombwe thitho munom’va-a vyothene vinooda nyo vaulule nyo
MUNOODA KAMI-A MANINGI ATU ENANGO
Likhundo n’nango lofuneya maningi ndi loi malo moona ira ulula unouimwanani-ani irana vyongo vinjinji, muonenga ira ndi ngari yoirana vyongo vinjinji. Ninga Kristau oulula, va-eeni munooda irana vyongo vinjinji vyoi kamwaviirana hora yali nyo zombwe. Mwaifwanafwani-o, munooda irana vyongo vyo-arelavi:
Muwandelenga atu enango vyongo viguman’nena nyo vaingumiinyu. Muone vinoonga Bibilya va maversu o-arelala:
Mwene Davide: “Ndali mwana mbwenye va-eeni nditoulukhula, khandinaonevo mutu uliwethene olongomana anga-iiwile, venango a-imee tavephanga yodya.”—Sal. 37:25.
Yoswa: “Ee-ni ndi-adhi vang’ono wukwa. Nyo munoidhiwa pama na riminyu othene thitho na ingumiinyu yothene ira khavali madhu namambo-ene alanyedhile Yohova Nlungwinyu oi katikwakwaneli-edhiwe. Madhu othene atokwakwaneli-edhiwa wanyo. Khavali madhu namambo-ene oi katikwakwaneli-edhiwe.”—Yos. 23:14.
Venango nyo mwatooroma ongavo madhu ninga enala. Vyongo vyaongile Davide na Yoswa ndi vyokami-a maningi namwasa oi uliwethene waaliwa atoonga vyongo vyaaireele. Namwsa oi Arumiwi ororomeleya a Yohovala, tatoonga vyongo vyaoni aliwa viireyanga thitho uvwa wa vyawa vinjinji. Ee-no vyaongile aliwa vyali vyokami-a maningi.
Akala mutom’lambela Yohova wa vyawa vinjinji, munooda wandela atu enango vyongo viuireeleni Yohova thitho na vyongo viirile liye waatu enango. N’nga munothuulela hora yaoni nyo Yohova akami-anga atwee mundhila yavakhundu maningi? Akala ndi ee-no mukalenga othathuwa wandela atu enango. Vyevyo vinooda limbi-a abali naaromgola ninga mwemo vyaulimbi-edheleni aliwa. Ee-no mwawandelanga atu enango vyongo viguman’nena nyo vom’lambela Yohova, munooda alimbi-a maningi.—Aroma 1:11, 12.
Ndhila inango inalimbi-edhe nyo atu enango kufwanyeya vamigumanoni vambo-i naaliwa akala pyoodeya irana ee-no. Wu migumanoni munooda limbi-a atu enango thitho nyo munooda limbi-iwa. Connie umuongile i-yo ndulimu aongile ira: “Fwanyeya vamigumanoni unondikami-a ira nda-afooke. Ndadhowa nyumbani ya Umwene abali naarongola anondithonyi-edha udhivela moi khandinokhumbanyedha iliyothene. Ndinodhilimbi-edha ava-a yotuva vothonyi-edha asimba thitho ndinoonechecha ira nditoira vyongo vyauzimu vambo-i naaliwa.”
YOHOVA UNOSIMBA VYONGO VINOIRA NYO VOM’LAMBELA
Bibilya mutokhala vifwanafwani-o vinjinji vyaatu adhiveliwana Yohova angalive ira katairana vyongo vinjinji namwasa wa moda mwali vyongo vaingumiiwa. Ifwanafwani-o ndi Simiyoni wenuo ali oulula wa Uisraeli oi ana ingumi vahora yabaliwile Yesu. Simiyoni adhowa kachisini, vinooneya ira anoona azombwe talabanga mabasa ofuneya maningi. N’nga Simiyoni adhivwa a-vi? Vinooneya ira adhiona ninga mutu o-ofuneya namwasa oi khaaoda laba basa ninga mwalaba liye angali zombwe. Mbwenye kai mwemo mwamuonela Yohova. Yohova anoona ira Simiyoni “ali olongomana na odhivelela” thitho atookhaana ngari yom’mona Yesu angali tete. Yohova ato-indi-edha basa Simiyoni ira aonge ulosi okhuza mwanula oi unodha kala Mesiya. (Luk. 2:25-35) Veva pyoneelatu ira kaiira Yohova am’mona Simiyoni ninga mutu oulula baa-i mbwenye anom’mona ninga mutu wairoromelo yolimba “thitho zimu ochena wali va liye.”
Yohova atoom’va-a Simiyoni ngari yoi aone Yesu angali tete thitho oi aonge ulosi okhuza mwanuo ira unodhakala Mesiya
Nyo thitho kamukaikelenga ira Yohova unosimba vyongo vinoira nyo vom’labela angalive ira kamunaode irana vyongo vinjinji. Yohova unofuna ira mutu avelelenga sembe “dhinaode liye velela, a-kala dha-anaode liye velela.”—2 Ak. 8:12.
Ee-no muthuulelenga maningi vyongo vinaode nyo irana. Mwaifwanafwani-o, munooda thuulela ndhila dha mwemo munalaleelenga nyo angalive ira munalaleelenga wa hora yoyeva. Munooda thitho kami-a atu enango voaligarela venango alembela karta. Vyongo ving’ono vyothonyi-edha udhivela vinolimbi-a maningi atu enango simbwasimbwa vyakhumela waatu oi atom’lambela Yohova wahora indendai.
Atu enango katinaode irana vyongo vinjinji namwasa wa marenda. Kaonani vyongo vyamuireele rongola mwinango wa wu Easte africa va kwadru loi “Zinapulumutsa Moyo Wake.”
Muthuulelenga ira roromeleya winyu unooda limbi-a atu enango. Nyo muli ifwanafwani-o yapama vamwasa ovilela thitho kamukaikelenga namwasa oi “Nlungu kai o-olongomana ira adiwale basa linyu naudhivela wathonyi-edhe nyo va dhinalee, volabela ochena thitho munaadhowanave alabela.”—Aeb. 6:10.
MUPINGEENGA NO KAMI-A ATU ENANGO
Alimbo sakasaka adodoliso tanothonyi-edha ira atu oulula anjinji tanopingeecha no kami-a atu enango tanokaana manungo apama, tanothuulela pama thitho tanokaana ingumi yolapela.
Pyaimbarimbari ira irela atu enango vyapama kunamali-e nyarwa dhi-u dhothene dhinodha namwasa oulula. Umwene wa Nlungu baa-i ngunofuna dhamali-a yongo inoromi-a ulula, wukwa oi ndi madao athukunle i-yo wa Adamu.—Aro 5:12.
Mbwenye urumiwi unom’mwirela nyo Yohova oi unothangani-avo ira atu tamwidhiwe, unoukami-ani ira mudhowenave kaana iroromelo yolimba thitho manungo apama. Nyo atu oulula idhiwani ira Yohova unosimba vyothene vinoira nyo vom’labela thitho abali naarongola pingoni tanosimba ifwanafwani-o yinyu yapama ya iroromelo yolimba.