N’nga munakozeele a-vi kazamenento inalemeze Yohova

1-2. N’nga Yohova unofuna ira vadambo la kazamento vaireengan’ni?

N’NGA nyo muli vaimweendi thitho munokozeela kazamento? Akala ndi ee-no, ninoufunelani vyapama! Venango nyo muli opingeya maningi vokozeela dambo leli. Yohova unoudhiveliwanani. Liye unofuna ira mudhasangalale vadambo la kazamentwinyua thitho mukaena sogolo lapama.— San. 5:18; Nyu. 3:11.

² Pyofuneya maningi lemeza Yohova vadambo la kazamento. Namwasa oi liye unofwanela lemeziwa. Mwasiwa ngwan’ni? N’nga nyo munaire a-vi vyevyo? Yofunjedha yei isaka-edhiwile ira ikami-e atu tali vaimweendi oi anaakozeela kazamento. Mbwenye makhundo anofuna i-yo funjedha anooda nikami-a ira nithonyi-edhe lemezo wa Yohova akala nili vakazamentoni venango akala atu tali vaimweendi atonivepha maonelo vahora inokozeela aliwa kazamentwiwa.

MWASIWA NGWAN’NI NINOFWANELA LEMEZA YOHOVA?

3. N’nga alimbo thelana tanofwanela thuulela vyongo viivi takozeelanga kazamentwiwa, n’nga mwasiwa ngwan’ni?

³ Atu anokozeela kazamento anofwanela irana vyongo movwelana na makhundo a Yohova ali Bibilyani. Mwasiwa ngwan’ni? Namwasa oi Yohova ngwaromi-idhe banja. Ngu liye Aromi-idhe banja loroma thitho ngwairi-idhe ira Adamu na Eva takhale vambo-i ninga banja. (Mar. 1:28; 2:24) Ee-no, vokozeela kazamento, atu tali vaimweendi tanofwanela e-la maonelo a Yohova vasogolo, ira tam’lemeze.

4. N’nga ndi mwasa uuvi unango unaairi-e alimbo thelana thonyi-edha lemezo wa Yohova vadambo liwa la kazamento?

⁴ Vatokala thitho mwasa unango ofuneya maningi unaulimbi-eni thuulela moda Yohova munoonela liye vyongo mwakozeelanga kazamentwinyu. (Aeb. 12:9) Yohova ndi Babinyu wadhulu thitho ndi fwinyu wapama. Mwaimbarimbari nyo munofuna ira adhowenave kala fwinyu. Nyo kamunafune ira vadambo linyu lakazamento venango vadambo nlilothene vaireye yongo inam’sukwali-e Yohova. (Sal. 25:14) Nyo mwathuulela vyongo vyothene viureleni Yohova na vinofuna liye ndhauirelani, n’nga kamunorumelela ira liye ngofwanelela lemeziwa vadambo la kazamentwinyu?— Sal. 116:12.

N’NGA MUNALEMEZE A-VI YOHOVA?

5. N’nga Bibilya linakami-e avi alimbo thelana thonyi-edha lemezo wa Yohova vanokozeela aliwa kazamentwiwa?

⁵ Bibilya kamuli thandha wa malamulo oi Makristau tanofwanela a-rela va vyongo vinaire aliwa vamwambo wa kazamento venango vapwando la kazamento. Ee-no, alimbo thelana anooda ira masaka-edhwiwa movwelana na vikalelo viwa, vilemeelo viwa na vinodhiveliwana aliwa. Mbwenye Makristau aimbarimbari, tanofwanela vwela malamulo aguverno tairanga kazamentwiwa. (Mat. 22:21) Imbarimbari choi alimbo thelana takozeelanga kazamentwiwa movwelana na makhundo a Bibilyani, aliwa tanom’lemeza Yohova thitho tanom’sangalali-a. N’nga ndi makhundo avi anofwanela aliwa athuulela?

6. Mwasiwa ngwan’ni pyofuneya ira alimbo thelana tavwelenga malamulo aguverno okhuza kazamento?

⁶ Muvwelenga malamulo aguverno. (Aro. 13:1, 2) Muvilambo vinjinji, alimbo thelana anofwanela kwakwaneli-edha vyongo vyothene vinovepha guverno ira tathelane. Atu anofuna thelana, anofwanela idhiwa ikalelo ya tatamo inokala aliwa. Ee-no akala mutokaana vyofuka vyokhuza moda munafwanyele nyo makhundo enala, muvephe andimuwa avapingoni vinyu ira taukami-eni.b

7. N’nga kazamento inofwanela ireya moi a-vi?

⁷ Muonechechenga ira kazamentwinyu inoireya molemezeya. (1 Ak. 10:31, 32) Vakazamentwinyu munofwanela oni-a makalelo azimu wa Nlungu, a-kala makalelo azimu wailambwila. (Agl. 5:19-26) Movwelana na makhundo a Bibilyani okhuza muru wabanja, mulimbo thela utokaana izo yoonechecha ira mwambula unokala osangalali-a thitho ofwanelela. N’nga chini inaakami-e? Atu anjinji takozeelanga kazamentwiwa anosakula ira va kazamentoni viwa vakale mwasa okhumela Bibilyani. Akala mwasuo utoongiwa mwaudhivela, mwapolepole, na mwalemezo, unooda kami-a uliwethene vwechecha ira kazamento ndi yotuva yokhumela wa Nlungu. Mwasuo unokami-a thitho adhidhe dhavuruwana noonela ira taonenga mwambula kala ofuneya maningi. Vothuulela vyevyo, Makristau anjinji anosakula ira mwasuo udhaireele Nyumbani ya Umwene vyakala vyoodeya. Akala nyo munofuna ira mwasa wa kazamentwinyu umaireele Nyumbani ya Umwene, munofwanela vepha andimuwa avapingoni mombaranya maningi.

8. N’nga chini inakami-e ira va festa la kazamento vakale volemezeya? (Aroma 13:13)

⁸ Muleri Aroma 13:13. Akala mutosakula ira va kazamentoni vinyu vakale festa, n’nga munaire a-vi ira mwa-athonyi-edhe makalelo azimu wailambo? Madhu Aigiriki athapuleliwe ira “Mafesta o-ofwanelela” anothapulela umwa mokwaranyi-a madile na nyumbo dhinofuna dhakalavo vadambo lelo fiyedha nama-iyu. (Muidhiwe vinjinji mu “Bukhu losakasakela myasa” va lemba la Aroma 13:13.) Akala mutosakula ira vadhakale vyomwa vyolezeli-a, muonecheche ira kavakale mutu unofuna dhamwa mokwaranyi-a madile.c Akala vanokala nyumbo, muonecheche ira mutoweli-a vulume naifunelo yoi atu ali vevo taodenga tapanya. Muonecheche tundu wanyumbo dhinofuna nyo sakula na vinoonga aliwa naifunelo yoi mwa-asukwali-e atu enango.

9. N’nga alimbo thelana tanofwanela thuulelan’ni vamwasa wa vyosangalali-a vinofuna dhakala va pwandwiyo?

⁹ N’nga nyo munakozeela ira mudhaoni-e mavidiyo, viruthiruthi venango tundu unango wa vyosangalali-a? Venango lendo umwitanile nyo unofuna onga madhu wanyo alimbo thelana. Vyongo ninga vyevi vinoiri-a ira dambo la kazamentwinyu likale lavakhundu maningi. Mulimothene munofuna aliwa kalela, muonecheche ira vyothene vinofuna ireya vakazamentwiyo vikale vyolimbi-a. (Afl. 4:8) Mudhifuke ira: ‘N’nga vyevi vinodha thonyi-edha lemezo waatu? N’nga vinodha lemeza kazamento?’ Thitho yofuneya maningi kudhifuka ira: ‘N’nga vinodha lemeza Yohova?’ Pyaimbarimbari ira vinodha kala pama vakala vyosangalali-a, mbwenye muire polepole ira kavikale vyo-ofwanelela vinairi-e atu thuulelanga vyogonana. (Aef. 5:3) Akala balinyu venango fwinyu unofuna uonganani madhu enangwee va festanivo, muonecheche ira aliwa anovwechecha ira vatokala madhu anofwanelela aliwa aonga na o-ofwanelela ongiwa.

10. Mwasiwa ngwan’ni alimbo thelana tanofwanela kala odhiyevi-a takozeelanga kazamento? (1 Juwau 2:15-17)

¹⁰ Mukalenga odhiyevi-a. (Muleri 1 Juwau 2:15-17.) Yohova unosangalala maningi akala arumiwee anodhilimbi-edha irana vinaode aliwa ira taode m’lemeza malo modisangalali-a okhene. Ee-no, Kristau odhiyevi-a kanononga kobiri dhinjinji venango “dhioneli-edha.” N’nga ndi upama uvi unokalavo akala kazamento inokala yo-ofuna vyongo vinjinji? Muone ifwanafwani-o ya bali Mike unokala wu Noruega. Liye aongile ira: “Kanana mangawa namwasa wa kazamentwi-u, thitho vyevi vyatoonikami-a ira nidhowenave irana upainiya. Kazamentwi-u yali yo-ofuna vyongo vinjinji, mbwenye yali yosangalali-a thitho yo-odiwaleya.” Tabitha rongola wau Índia aongile ira: “Natoorambela dhikhumbanyedha maningi. Namwasa okaana kazamento yo-ofuna vyongo vinjinji, nan’na vyongo vyoeva ira nikozeele kazamentwi-u.”

11. N’nga alimbo thelana tanathonyi-edhe a-vi lemezo vamwasa owara thitho dhibalei-a? (Muone thitho viruthiruthi.)

¹¹ N’nga mutosakula vinofuna nyo dhawara vadambo linyu la kazamento? Mwaimbarimbari, munofuna dhaoneya pama. Muhora yawale, alimbo thelana tanoofwanela sakula mwapolepole vyongo vinofuna aliwa dhawara vadambo liwa la kazamento. (Esa. 61:10) Pyaimbarimbari ira vinofuna nyo dhawara vadambo linyu la kazamento, vinokala vyo-iyana maningi na vinowarecha nyo va vyoireya vinango. Mbwenye munofwanela wara mofwanelela thitho mwalemezo. (1 Ti. 2:9) Kamurumeli-e ira vyowara vinyu—venango iliyothene—ira ikale yofuneya maningi vadambo la kazamentwinyu.—1 Pe. 3:3, 4.

12. Mwasiwa ngwan’ni alimbo thelana tanofwanela khonda vilemeelo vyo-ovwelana na Bibilya vinoireya wu tatamo unokhala aliwa?

¹² Murambelenga vyoireya vyoi kavinovwelana na makhundo a Bibilyani. (Apk. 18:4) Namwasa oi ilambwila malamboano inotongiwa na Satana, mabanja manjinji tano-arela sanganiko dhovwelana na mareligiau onama, vyamizimu thitho vyamasenga. Yohova unoniwandela ira nikalenga undendai na vyongo vyothakali-iwa. (2 Ak. 6:14-17) Akala mutokaana vyofuka vyokhuza vyoireya venango sanganiko, musakesake vakhumenle aliwa thitho makhundo a Bibilyani enao anaode ukami-ani va kazamentwinyu.

13. N’nga alimbo thelana tanofwanela kaana mathuulelo avi ofwanafwana na a Yohova okhuza vyotuva?

¹³ N’nga tatamo la waninyu atu oitaniwa anovelelecha vyotuva vadambo la kazamento? Vyotuva vinovelela atu oitaniwa vinonyindela moda muli vyongo vaingumiiwa. Pyaimbarimbari ira Makristau tanolimbi-iwa ira takale ova-a thitho tanosangalala tairangana vyevyo. (San. 11:25; May. 20:35) Mbwenye kaninofuna ira alendwi-u tavelelenga vyotuva viwa moira tongeliwa thitho kaninofuna ira aliwa tathuulelanga ira kaninosangalala akala tatoniva-a yotuva yoyeva. Ninosazi-edha Yohova voona vyotuva viwa ninga munoonela Yohova. Ee-no ninorumela ira atu enango tavelelenga vyotuva viwa mokhumela vathi va rima thitho ninoirana vyevyo movwelana na moda muli vyongo vaingumiiwa.—2 Ak. 9:7.

MURAMBELENGA NYARWA THITHO DHIGONJI-A

14. N’nga alimbo thelana tanogumanana nyarwa dhoi a-vi?

¹⁴ Venango munogumanana nyarwa vanokozeela nyo kazamento yenio inaode m’lemeza Yohova. Mwaifwanafwani-o, vinooda kala vyorucha kozeela kazamento yo-ofuna vyongo vinjinji. Charlie unokala wu isuwa ya Salomoni aongile ira: “Vyali vyorucha maningi ira ndisakule atu afuna miyo aaitana. Namwasa oi nitokaana axamwali-u anjinji thitho muikalelo yi-u atu othene anodedi-edha itaniwa!” Tabitha um’mongile i-yo voromule aongile ira: “Unokala miyo ndi vyovweya maningi kaana festa ilukhulu va kazamentoni. Vatoovira hora indendai ira anamabali-u tarumele vyosakula vi-u ira niitane atu okwakwana 100 baa-i.” Sarah, wau Índia aongile ira: “Atu enango tanoona ira pyofuneya maningi a-rela ikalelwiwa. Abalanga tatoononga kobiri dhinjinji va kazamentwiwa thitho tatookaana pwando ilukhulu. Ee-no ndatoondikanyi-edha ira ndiirena festa yavadhulu maningi.” N’nga chini inofuna kami-a atu anofuna thelana ira talimbanena nyarwa dhedhi thitho nyarwa dhinango?

15. Mwasiwa ngwan’ni pyofuneya lobela mwakozeelanga kazamento?

¹⁵ Mulobelenga wa Yohova mwakozeelanga kazamento. Munooda lobela wa Yohova va vyorucha vinyu vyothene thitho m’mwandela vya rimani mwinyu na moda munodhivwela nyo. (Afl. 4:6, 7 Bukhu losakasakela myasa “va iliyothene”) Munooda m’vepha Yohova ira aukami-eni sakula vyoira mwapama, ira mukale opwaseya mwadhikhumbanyedhanga thitho mukale olimba rima akala vinofuneeleya ee-no. (1 Pe. 5:7) Mwazindiyela ira Yohova utowakhula malobelwinyu, paevo vanoroma nyo m’nyindela maningi. Tabitha umuongile i-youle aongile ira: “Miyo na mwendanga nanoova ira vanokala a-vwelana unango na fwee thtitho anamabali-u. Ee-no vahora iliyothene yatapanya i-yo vyokhuza kozeela vya kazamentwi-u naromecha na lobelo. Mwaimbarimbari nanoona kami-o la Yohova thitho namwasa oi vahora ninga yenio ndanokaana rendele.”

16-17. N’nga tapanya pama mwakozeelanga kazamento unaukami-eni a-vi?

¹⁶ Mutapanyenga mwapama thitho mwalemezo. (San. 15:22) Munodha funeeleya sakula vyongo vinjinji vyokhuza kazamento. Vyevi vinothangani-avo sakula dambo, kobiri inofuna nyo dhanonga, atu anofuna nyo dhaaitana na vyongo vinango. Mwa-anasakule vyoira, mutapanye vyongo visakunle nyo thitho makhundo a Bibilya anaukami-eni. Muthuulelenga malangi-o anowachela nyo khumela waabali naarongola olimba mwauzimu thitho oidhiwa vyongo vinjinji. Mwatapanyanga vyongo visakunle nyo, mukalenga oriya rima na ololela. Mwaifwanafwani-o, akala anamabalinyu tatouvephani yongo yoi munooda ikwakwaneli-edha, muirena ee-no. Namwasa oi ndihora thitho yavakhundu waaliwa. Akala pyo-oodeya kwakwaneli-edha viuvephileni aliwa, mwaawandelenga moriya rima thitho mwazelu. (Akl. 4:6) Mwaawandelenga abalinyu ira ifunelwinyu ilukhulu ndi kaana kazamento yosangalali-a thitho yom’lemeza Yohova.

¹⁷ Akala anamabalinyu kai Amboni dha Yohova, vinokala vyorucha ira mwaawandele vyosakula vinyu. Mbwenye munooda ira vyevi akala munoawandela mathuulelwinyu moriya rima. Bali mwinango wau Índia dhinalee Santhosh aongile ira: “Abalanga tanoofuna ira tathangani-e sanganiko dhai hindus va kazamentwi-u. Miyo na mwendanga vatoovira hora indendai ira naawandele abali-u va vyosakula vi-u. Natoochinja vyongo vinango vyaoni i-yo ira kavinom’sukwali-a Yohova. Mwaifwanafwani-o, natoochinja vyodya va festiyo ira vikale vyadhiveliwena aliwa thitho natoosakula ira va-aombiwe nyumbo no ina, namwasa oi aliwa katilemenle vyevyo.”

18. N’nga munaire a-vi ira vyongo vyothene viwende pama vadambo linyu la kazamento? (1 Akoritiyo 14:40) (Muone thitho iruthiruthi.)

¹⁸ Mukozeelenga pama. Akala mutokozeela pama, mwaimbarimbari kamunodha dhikhumbanyedha vadambo linyu la kazamento. (Muleri 1 Akoritiyo 14:40.) Wayne unokala wu Taiwan aongile ira: “Vanga-adhi malambo oyeva ira niire kazamento, natokaana isigumano naatu tadhivelenle ira tanikami-e. Natootapanya vyokhuza vyongo vyakozeele i-yo ira nisikimizele akala vyongo vinodha wenda pama.” Ira muthonyi-edhe lemezo waatu aaitan’ne nyo, munodha ira phama irana vyongo vahora yofwanelela.

19. N’nga chini inofuna ukami-ani ira vyongo vyothene viwende mundhila yapama vadambo linyu la kazamento?

¹⁹ Ninodha rambela nyarwa dhinjinji akala nitokozeela vanga-adhi hora injinji. (San. 22:3) Mwaifwanafwani-o, akala munokala wu tatamo loi atu o-oitaniwa tanodha dhaonela mwambo wa kazamento, muthuulele vyongo vinaire nyo ira murambele nyarwa. Muonecheche ira abalinyu oi kai Amboni dha Yohova atoidhiwa vinofuna dhaireya thitho mwaawandele mathuulelwinyu okhuza mwambo wa kazamentwinyu. Munooda tapanya naaliwa mwasa unofwanyeya va jw.org. oonga ira “Kodi Paukwati wa Mboni za Yehova Pamachitika Zotani?” Ira vyongo viuwendeleni pama va kazamentwinyu, munooda vepha bali olimba mwauzimu ira akale “oing’anela festiyo.” (Ju. 2:8) Akala munom’mwandela pama vyongo vikozeelenyo va kazamentwinyu, liye unodha ukami-ani onechecha ira vyongo vidhaireye ninga moda munofunela nyo thitho ira banja linyu likale lolemezeya.

20. N’nga alimbo thelana tanofwanela thuulelan’ni vadambo liwa la kazamento?

²⁰ Voona vyothene vimadhi nyo kozeela vyokhuza kazamento, venango nyo munooda ova. Mbwenye muthuulele ira kazamento ndi dambo limbo-i baa-i. Ndi dambo loroma linofuna dhairi-a ingumiinyu kala yosangalala vom’labela Yohova vambo-i ninga banja. Muire vyothene vinaode nyo ira kazamentwinyu ikale yo-ofuna vyongo vinjinji thitho ikale yolemezeya. Mum’nyindele Yohova! Namalangi-oe, nyo munooda kozeela pama kazamentwinyu. Mwadhathuulela vyanduli, munodha kaana mathuulelo apama, osangalala thitho kamunodha sukwala.—Sal. 37: 3, 4.