Murambelenga kaana zimu ovidhiveliwana
ATU anjinji muilambwila tanoona ira mbofuneela va-iwa lemezo wavakundo, ufulu thitho ireliwa vyongo vundhila yavakundo. Angalive ira aliwa tanovikaana vyongo vyothene vyevi, aliwa tanoonave ira kai vyokwakwanela. Atu tanokaana mathuulelo enala tanokala ovidhiveliwana thitho o-osimba. Ndivyevyo vinoonga Bibilya ira vyevi ndivinofuna dhairanga atu mumalambo omari-a.—2 Ti. 3:2.
Thitho atu takadhi tathonyi-edhanga zimu ovidhiveliwana romela wanelene. Ifwanafwani-o vamwasula ndi Adamu na Eva, enao tafuna ira tasakule okene vyongo vyapama na vyothakala. Thitho vyevi vyatowadhi-edhela nyarwa dhilukulu. Ifwanafwani-o inango nja mwene Uziya wau Yuda wenuo athuulela ira unooda velela sembe yonukela kachisini, mbwenye liye kaafwanela irana vyevyo (2 Li. 26:18, 19) Molandana na vyevi, Afarisi na Asanduki tathuulela ira Nlungu unowadhiveliwana mwavakundo namwasa oi takumenle uzila la Abrahamu.—Mat. 3:9.
Namwasa oi nitorungunuwiwa naatu ovidhiveliwana, ninooda roma tukulena vyora viwa. (Agl. 5:26) Ninooda thuulelanga ira nili ofwanelela va-iwa ngari vengango ireliwa vyongo mwavakundo. N’nga ninaire a-vi ira nirambele mathuulelo enala? Yoroma, ninofwanela idhiwa mathuulelo a Yohova vamwasuo. Dhoweni nitapanyeni makhundo a Bibillyani enao ananikami-e.
Yohova ngunofwanela sakula vyongo vinofwanela i-yo kaana. Dhoweni nioneni vifwanafwani-o vingasi.
Vabanjani, lombwana unofwanela lemeziwa na i-yanee thitho i-yana unofwanela dhiveliwiwa na manee. (Aef. 5:33) Aliwa katinofwanela thonyi-edhanga udhivelao wa mutu mwinango oi unofwanela kala vari va lombwana na i-yanee (1 Ak. 7:3) Anamabala tanofuna ira a-imiwa taavwelenga thitho a-imao tanodedi-edhela ira anamabaliwa taadhiveliwengana thitho nowakami-a.—2 Ak. 12:14; Aef. 6:2.
Pingoni ninofwanela lemeza andimuwa nolaba basa liwa mwathindi. (1 At. 5:12) Mbwenye andimuwao katina kopolo yotonga abali naarongoliwa.—1 Pe. 5:2, 3.
Nlungu unofuna ira atu tavelelenga misoko wa maguverno thitho talemezenga anamatonga.—Aro. 13:1, 6, 7.
Mwaudhivela, Yohova unoniva-a vyongo vinjinji kwaranya vinodhiveliwana i-yo. Namwasa oi nili odawa, kanafuneela kaana ingumi. (Aro. 6:23) Mbwenye namwasa wa udhivelee ororomeleya. Yohova unoniva-a maraeli-o manjinji (Sal. 103:10, 11) Liye unoniva-a maraeli-o enala a-kala namwasa oi nili ofwanelela va-iwa maraeli-o enala, mbwenye namwa oriya rimawee ulukulu.—Aro. 12:6-8; Aef. 2:8.
VYONGO VINAIRE I-YO IRA NIRAMBELE KAANA ZIMU OVIDHIVELIWANA
Nikalenga osamala ira na-atukulele makalelo aatu ailabwila. Mo-idhiwa ninooda thuulelanga ira ninofuneela va-iwa vyongo vinjinji kwaranya atu enango. Yesu atoothonyi-edha munakalele aliwa vyorucha kaana mathuulelo enala vevo vaongile liye ifwanafwani-o yaanamalaba enao tava-iwile dinari imbo-i ninga yopagali ya basa alabile aliwa. Anamalaba enango taromile laba basa namaebi-i maningi thitho tatoolaba dambo lothene vadhuwani. Voi enango talabile basa wahora imbo-i. Gurupu loroma lathuulela linofwanela wachela kobiri dhinjinji kwaranya anamala tabile wahora yoyeva. (Mat. 20:1-16) Voonga ifwanafwani-o ila, Yesu athonyi-edha ira anamalabee tanofwanela kala okwakwanana vyongo vinam’va-e Yohova.
Alombwana talabile basa dhambo lothene taona ira tafwanela va-iwa kobiri dhinjinji
Mukalenga osimba thitho kamudedi-edhenga ira atu enango tauirelenga vyongo. (1 At. 5:18) Nisazi-edhenga rumiwi Paulo oi kaavephile abalee awu Korintio ira tam’va-e vyongo vyofuneela vyavaingumi angalive ira vyali vyofuneeleya irana ee-no. (1 Ak. 9:11-14) Nisimbenga yongo iliyothene inaniva-e atu enango thitho kaniirenga atonga ira taniva-e vyongo.
Paulo kaafum’ne kami-iwana kobiri
Mukalenga odhiyevi-a. Mutu aroma thuulela kwaranya mwemo munovithuulela liye, unooda roma onanga ira unofwanela va-iwa vyongo vinjinji kwaranya vyongo vinofwanela liye va-iwa. Dhiyevi-a unooda nikami-a rambela kaana mathuulelo odaweya.
Dhiyevi-a wa namaongela Danieli watooiri-a ira Yohova am’dhiveliwengana maningi
Namaongela Danieli ndiifwanafwani-o yapama vamwasa odhiyevi-a. Liye angaodile ona ira ngofwanelela ireliwa vyongo mundhila yavakhundu venango va-iwa ngari inagwee namwasa wa banja lakumenle liye, maonelwee, zelu thitho dodolisolee. (Dan. 1:3, 4, 19, 20) Mbwenye Danieli atookalave odhiyevi-a kalelo leli latooiri-a ira Yohova am’dhiveliwengana maningi.—Dan. 2:30; 10:11, 12.
Dhoweni nirambeleni kaana zimu ovidhiveliwana wenuo una atu anjinji muilamboi. Malomwee, nisimbenga maraeli-o othene ananiva-e Yohova noriyawee rima ulukulu.