‘Emmere mu Kiseera Ekituufu’
1 Bwe tuba tumaze olukuŋŋaana olunene olw’olunaku olumu tutera okugamba nti, “Ekyo kyennyini kye tubadde twetaaga!” Omulabirizi w’ekitundu omu yagamba nti ku nkomerero y’olukuŋŋaana, abamu ku abo abali mu kitundu ky’alabirira baagamba nti baagala okwongera ku biseera bye bamala mu buweereza. Omulabirizi atambula yagamba nti, “Olukuŋŋaana lwatuyamba okulowooza ennyo ku biseera bye tulimu ne ku kusalawo kwe tukola mu kiseera kino.” Omulala yagamba nti, “Ababuulizi abawerako baagamba nti olukuŋŋaana luno kwali kujjukizibwa okwabayamba okwemalira ku kintu ekisinga obukulu, obuweereza bwabwe.” Olukuŋŋaana olunene olw’olunaku olumu lwakuyamba lutya?
2 Olukuŋŋaana olw’olunaku olumu olunaabeerawo mu mwaka gw’obuweereza ogujja, lujja kubeera ekyo kyennyini kye twetaaga. Omutwe gw’olukuŋŋaana olwo gujja kuba, “Fuula Yakuwa Ekiddukiro Kyo,” nga guggiddwa mu Zabbuli 118:8, 9, NW. Ebimu ku bijja okwogerwako bye bino: “Engeri Yakuwa gy’Ali Ekigo Kyaffe mu Biro eby’Okulabiramu Ennaku,” “Yamba Abalala Okufuna Obukuumi Wansi w’Ebiwawaatiro bya Yakuwa,” “Koppa Yakuwa ng’Oyamba Abalala Okufuna Obukuumi,” “Abavubuka, Muteeke Obwesige Bwammwe mu Yakuwa,” ne “Olusuku Lwaffe olw’Eby’Omwoyo—Nteekateeka ya Yakuwa mwe Tufunira Obukuumi.”
3 Bye Tulina Okukola Okusobola Okuganyulwa: Oluvannyuma lw’okutegeezebwa ennaku z’omwezi olukuŋŋaana we lunaabeererawo, kola enteekateeka osobole okubeerawo, era yita abayizi bo aba Baibuli nabo babeerewo. Okusobola ‘okubala ebibala n’obugumiikiriza,’ tulina okufumiitiriza ku ebyo bye tuwulira. (Luk. 8:15) N’olwekyo wuliriza bulungi ng’olukuŋŋaana lugenda mu maaso, era obeeko w’owandiika ensonga enkulu n’ebyo by’oyagala okussa mu nkola mu bulamu bwo ne mu buweereza bwo. Ng’olukuŋŋaana luwedde, funa ekiseera ggwe n’ab’omu maka go mukubaganye ebirowoozo ku ebyo bye muyize, era mulowooze ne ku ngeri gye muyinza okubikolerako.
4 Okufaananako emmere empoomu era erimu ekiriisa, olukuŋŋaana olunene olw’olunaku olumu olw’omwaka ogujja lutegekeddwa bulungi era mu ngeri ey’okwagala. Ka Yakuwa abawe emikisa nga mufuba okubeerawo era muganyulwe mu ‘mmere etuweebwa mu kiseera ekituufu’ ejja okuzimba okukkiriza kwaffe.—Mat. 24:45.
[Ebibuuzo]
1. Ggwe n’abantu abalala mwaganyulwa mutya mu lukuŋŋaana olunene olw’olunaku olumu olwakaggwa?
2. Biki ebinaayogerwako mu lukuŋŋaana olunene mu mwaka gw’obuweereza ogujja?
3. Biki ebinaatuyamba okuganyulwa mu bujjuvu nga tuli mu lukuŋŋaana?
4. Lwaki tusaanidde okwesunga olukuŋŋaana olunene olw’olunaku olumu olw’omwaka ogujja?