Obasaba Bakubuulire Abalala Abandyagadde Okuyiga?

Bw’oba olina omuntu gw’oyigiriza Baibuli, lwaki tomubuuza oba ng’alina mikwano gye, ab’eŋŋanda ze oba abantu abalala b’amanyi abandyagadde okuyiga Baibuli? Ayinza okukubuulira abantu abawerako. Bw’aba nga tafaayo, oyinza okubategeeza ng’obakyalidde nti omuyizi wo ye yakulagiridde. Oyinza okugamba nti, “[erinnya ly’omuyizi wo] anyumirwa nnyo okusoma Baibuli era alowooza nti naawe wandyagadde okuyigirizibwa Baibuli ku bwereere.” Oluvannyuma, mulage engeri gye tuyigamu Baibuli n’abantu, ng’okozesa akatabo Baibuli ky’Eyigiriza.

Bw’oba olina omuyizi wa Baibuli akulaakulana obulungi, oyinza okumukubiriza ategeeze mikwano gye n’ab’omu maka ge engeri gy’ayigamu Baibuli. Ayinza okubayita ne babeerawo ng’omuyigiriza. Ekyo bwe kiba tekisoboka, ayinza okukola enteekateeka obakyalire obalage engeri gye tuyigirizaamu abantu Baibuli. Ekyo kiyinza okukubiriza omuyizi oyo okutandika okubuulira abalala by’ayiga mu Baibuli.

Abo b’otera okukyalira okunyumyako nabo ku Baibuli, nabo bayinza okukubuulirayo abantu abalala abandyagadde okuyiga Baibuli, wadde nga bo bennyini tebannafuukira ddala bayizi ba Baibuli. Bw’oba obatwalidde akatabo Baibuli ky’Eyigiriza, oyinza okubabuuza, “Eriyo omuntu omulala gw’omanyi eyandyagadde akatabo kano?”

Olw’obukulu bw’ebiseera bye tulimu, twagala okukola kyonna ekisoboka okuyamba abantu okuwulira era n’okukkiriza amawulire amalungi. Obasaba bakubuulire abalala abandyagadde okuyiga?