ENSI EJJUDDE EBIZIBU

4 | Nyweza Essuubi ly’Olina

LWAKI KIKULU?

Okweraliikirira ebizibu ebiri mu nsi kikosa abantu bangi. Abantu bangi abakoseddwa ebizibu ebyo balaba nga tewali ssuubi lyonna. Ekyo kibakwatako kitya?

Abamu tebaagala na kulowooza ku biseera bya mu maaso.
Abalala basalawo okunywa ennyo omwenge oba okukozesa ebiragalalagala nga basuubira nti bijja kubayamba okwerabira ebizibu byabwe.
Ate abamu bagamba nti obulamu tebulina mugaso, era ne batuuka n’okulowooza ku ky’okwetta.

Bye Weetaaga Okumanya

Ebimu ku bizibu by’ofuna biyinza okuba eby’akaseera obuseera, era embeera eyinza okutereera.
Embeera ne bw’etatereera, waliwo by’osobola okukola okusobola okugumira ekizibu ky’olina.
Bayibuli etuwa essuubi nti ebizibu by’abantu bijja kuggweerawo ddala.

Ky’Oyinza Okukola Kati

Bayibuli egamba nti: “Temweraliikiriranga bya nkya, kubanga olunaku olw’enkya lunaaba n’ebyeraliikiriza ebyalwo. Buli lunaku luba n’emitawaana egirumala.”—Matayo 6:34.

Teweeraliikirira nnyo bya nkya ne kikulemesa n’okukola by’olina okukola leero.

Okweraliikirira ebintu ebiyinza n’obutabaawo kiyinza okukumalamu amaanyi, era ne kikuleetera okuggwaamu essuubi.

ENGERI GY’OYINZA OKUGUMIRA EBIZUBU—Amagezi Aganaakuyamba

BEERA N’ENDOWOOZA ENNUNGI

Bayibuli egamba nti: “Ennaku zonna ez’omuntu abonaabona ziba mbi, naye ow’omutima omusanyufu aba ng’ali ku mbaga ebbanga lyonna.” (Engero 15:15) Bw’omalira ennyo ebirowoozo ku kizibu ky’olina, oyinza obutalaba ngeri ya kukigonjoolamu. Ku luuyi olulala, bw’oba n’endowooza ennuŋŋamu kijja kukuyamba okulowooza ku engeri gy’oyinza okugonjoolamu ekizibu ky’olina.

Tomalira budde bungi ku mawulire era tosaayo nnyo birowoozo ku ebyo ebifulumira mu mawulire.
Ku nkomerero ya buli lunaku, lowooza ku bintu bibiri oba bisatu ebikugendedde obulungi.
Kola olukalala lw’ebintu eby’okukola mu lunaku, era luteekeko ebyo byokka by’osobola okumala mu lunaku lumu. Emirimu eminene gigabanyeemu emirimu emitonotono, kikusobozese okulaba by’osobodde okukola mu lunaku.

SABA ABALALA BAKUYAMBE

Bayibuli egamba nti: “Eyeeyawula ku balala . . . yeesamba amagezi amalungi gonna.” (Engero 18:1) Tosobola kuva mu kinnya ekiwanvu wekka, okuggyako nga waliwo akuyambyeko.

Saba ab’omu maka go oba mikwano gyo bakuyambeko.
Ate era, lowooza ku ngeri naawe gy’osobola okubayambamu. Bw’obaako by’okolera abalala, kijja kukuyamba obutamalira birowoozo byo ku bizibu by’olina.
Bw’owulira ng’oggwereddemu ddala essuubi era ng’owulira nti okuba omulamu tekikyakugasa, oyinza okulaba omusawo. Oluusi abawulira batyo baba balina obulwadde, gamba ng’obulwadde bw’okwennyamira. Bangi abalina obulwadde ng’obwo bafunye obujjanjabi era ne batereera.a

a Abakubi ba magazini eno eya Zuukuka! tebalina kika kya bujjanjabi kye bagamba nti ky’olina okukozesa.

Bayibuli Etuwa Essuubi Erya Nnamaddala

Omuwandiisi wa zabbuli omu bwe yali asaba Katonda, yagamba nti: “Ekigambo kyo ye ttaala emulisiza ebigere byange, kye kitangaala ekimulisa ekkubo lyange.” (Zabbuli 119:105) Ka tulabe engeri Ekigambo kya Katonda, Bayibuli, gye kiringa ettaala.

Mu budde obw’ekiro, ettaala etuyamba okulaba wa we tulina okutambulira. Mu ngeri y’emu, Bayibuli erimu amagezi agasobola okutuyamba nga tulina bye twagala okusalawo.

Ekitangaala kisobola okutuyamba okulaba ebiri mu maaso gye tulaga. Mu ngeri y’emu, Bayibuli esobola okutuyamba okuba n’essuubi erikwata ku biseera eby’omu maaso.

Bayibuli kitabo kitukuvu era tekoma ku kutubuulira ebikwata ku byafaayo by’omuntu, naye era etuwa essuubi ekkakafu erikwata ku biseera eby’omu maaso. Etubuulira:

1

Engeri okubonaabona gye kwatandikamu: Bayibuli egamba nti “okuyitira mu muntu omu ekibi kyayingira mu nsi, okufa ne kuyitira mu kibi, okufa ne kubuna ku bantu bonna kubanga bonna baayonoona.”—Abaruumi 5:12.

2

Ensonga lwaki gavumenti z’abantu tezisobodde kumalawo bizibu by’abantu. Bayibuli egamba nti “omuntu talina buyinza kuluŋŋamya bigere bye.” (Yeremiya 10:23) Ebizibu ebiri mu nsi biraga nti ekyo kituufu ddala.

3

Engeri Katonda gy’anaggyawo ebizibu by’abantu. Bayibuli egamba nti Katonda “alisangula buli zziga mu maaso gaabwe era okufa tekulibaawo nate, newakubadde okukungubaga, newakubadde okukaaba, newakubadde obulumi.”—Okubikkulirwa 21:4.