Nɔmbaz
36 Di wan dɛn we de bifo di famili dɛn fɔ Giliad in pikin dɛn go mit Mozis, di chif* dɛn, ɛn di wan dɛn we de bifo di famili dɛn fɔ di Izrɛlayt dɛn ɛn tɔk to dɛn. Giliad na Mekia+ in bɔypikin ɛn Manasɛ in granpikin we kɔmɔt na Josɛf in bɔypikin dɛn famili. 2 Dɛn tɔk se: “Jiova bin dɔn kɔmand yu, wi masta, fɔ yuz balɔt fɔ sheb di land+ as prɔpati to di Izrɛlayt dɛn, ɛn Jiova bin dɔn kɔmand yu fɔ gi wi brɔda Zɛlofead in prɔpati to in galpikin+ dɛn. 3 If dɛn mared ɔda man dɛn we kɔmɔt na ɔda trayb dɛn na Izrɛl, dɛn go pul di uman dɛn prɔpati frɔm dɛn papa in prɔpati ɛn ad am to di trayb we i dɔn go naw dɛn prɔpati ɛn dat go mek dɛn pul am frɔm wi yon prɔpati we dɛn bin dɔn balɔt gi wi. 4 We di Ia fɔ Fridɔm+ kam fɔ di Izrɛlayt dɛn, dɛn go ad di uman in prɔpati to di prɔpati we di trayb we i kɔmɔt gɛt, so dat dɛn go pul dɛn prɔpati frɔm di prɔpati we dɛn papa in trayb gɛt.”
5 Na de Mozis tɛl di Izrɛlayt dɛn wetin Jiova tɛl am. I se: “Na tru Josɛf in bɔypikin dɛn trayb de tɔk. 6 Dis na wetin Jiova de kɔmand Zɛlofead in galpikin dɛn. I tɛl dɛn se: ‘Dɛn fɔ mared ɛnibɔdi we dɛn want. Bɔt dɛn fɔ mared sɔmbɔdi na wan famili we kɔmɔt na dɛn papa in trayb. 7 Di Izrɛlayt dɛn prɔpati nɔ fɔ pas frɔm wan trayb to ɔda trayb, bikɔs di Izrɛlayt dɛn fɔ kip di prɔpati we dɛn gret gret granpa dɛn trayb gɛt. 8 Dɔn ɔl di galpikin dɛn we gɛt prɔpati midul di Izrɛlayt dɛn fɔ mared pɔsin we kɔmɔt na dɛn papa dɛn trayb,+ so dat di Izrɛlayt dɛn go kɔntinyu fɔ kip dɛn gret gret granpa dɛn prɔpati. 9 No prɔpati nɔ fɔ de pas pas frɔm wan trayb to ɔda trayb, bikɔs di trayb dɛn na Izrɛl fɔ kip dɛn yon prɔpati.’”
10 Zɛlofead in galpikin dɛn du ɔl wetin Jiova bin dɔn kɔmand Mozis.+ 11 Zɛlofead in galpikin dɛn we na Mala, Tiaza, Ɔgla, Milka, ɛn Noa+ mared dɛn papa in brɔda dɛn bɔypikin dɛn. 12 Dɛn mared man dɛn we kɔmɔt na famili dɛn frɔm Manasɛ we na Josɛf in bɔypikin in trayb, so dat dɛn prɔpati go kɔntinyu fɔ de na dɛn papa in famili.
13 Dis na di lɔ dɛn ɛn di tin dɛn we Jiova disayd we i tɛl Mozis fɔ tɛl di Izrɛlayt dɛn na di flat land dɛn na di dɛzat na Moab bay di Jɔdan na Jɛriko.+