Nɔmbaz

35 Jiova kɔntinyu fɔ tɔk to Mozis na di flat land dɛn na di dɛzat na Moab bay di Jɔdan+ na Jɛriko, i se: 2 “Tɛl di Izrɛlayt dɛn se dɛn fɔ gi di Livayt dɛn siti dɛn usay dɛn fɔ de frɔm di prɔpati we dɛn go gɛt,+ ɛn dɛn fɔ gi di Livayt dɛn land dɛn we gɛt gras fɔ dɛn animal dɛn rawnd di siti+ dɛn. 3 Dɛn go de na di siti dɛn ɛn di land dɛn we gɛt gras go de fɔ dɛn animal dɛn we dɛn de mɛn, dɛn prɔpati dɛn ɛn ɔl dɛn ɔda animal dɛn. 4 Di land dɛn we gɛt gras we una go gi to di Livayt dɛn fɔ dɛn animal dɛn fɔ bi 1,000 kyubit* frɔm di wɔl te go rawnd di siti. 5 Una fɔ kɔmɔt na di siti ɛn mɛzhɔ 2,000 kyubit na di ist pat, 2,000 kyubit na di sawt pat, 2,000 kyubit na di wɛst pat, ɛn 2,000 kyubit na di nɔt pat, di siti go de midul. Dis go bi di land dɛn we gɛt gras fɔ animal dɛn fɔ dɛn siti dɛn.

6 “Di siti dɛn we una go gi di Livayt dɛn go bi 6 siti dɛn usay sɔmbɔdi we kil pɔsin go sef,+ we una fɔ gi fɔ lɛ pɔsin we kil rɔn go de.+ Dɔn bak, una fɔ gi 42 ɔda siti dɛn. 7 Ɔl in ɔl, una fɔ gi 48 siti dɛn to di Livayt dɛn, togɛda wit dɛn land dɛn we gɛt gras fɔ dɛn animal+ dɛn. 8 Di siti dɛn we una go gi dɛn go bi frɔm di Izrɛlayt dɛn prɔpati+ dɛn. Frɔm di big grup una go tek bɔku, ɛn frɔm di smɔl grup una go tek smɔl.+ Ɔl di grup dɛn go gi sɔm pan dɛn siti dɛn to di Livayt dɛn akɔdin to di prɔpati we dɛn gi dɛn.”

9 Jiova kɔntinyu fɔ tɔk to Mozis, i se: 10 “Tɔk to di Izrɛlayt dɛn ɛn tɛl dɛn se, ‘Una de krɔs di Jɔdan fɔ go na di land na Kenan.+ 11 Una fɔ pik siti dɛn we fayn fɔ una usay sɔmbɔdi we kil pɔsin go sef, usay sɔmbɔdi we mistek kil pɔsin* go rɔnawe go.+ 12 Dɛn siti dɛn ya go bi sef ples frɔm di pɔsin we dɛn kil in fambul,+ so dat di pɔsin we kil nɔ go day te dɛn jɔj am bifo di pipul+ dɛn. 13 Di siks siti dɛn usay sɔmbɔdi we kil pɔsin go sef we una gi, go de fɔ dat. 14 Una go gi tri siti dɛn na dis pat na di Jɔdan+ ɛn tri siti dɛn na di land na Kenan+ fɔ bi siti dɛn usay sɔmbɔdi we kil pɔsin go sef. 15 Dɛn siks siti dɛn ya go bi say usay sɔmbɔdi we kil pɔsin go sef fɔ di Izrɛlayt dɛn, fɔ di fɔrina we de wit dɛn,+ ɛn fɔ di strenja, so dat ɛnibɔdi we mistek kil pɔsin* go rɔn go de.+

16 “‘Bɔt if pɔsin nak in kɔmpin wit sɔntin we dɛn mek wit ayɛn ɛn in kɔmpin day, da pɔsin de dɔn kil. Dɛn fɔ mek shɔ se dɛn kil di pɔsin we kil in kɔmpin.+ 17 Ɛn if pɔsin nak in kɔmpin wit ston we mek i day, da pɔsin de dɔn kil. Dɛn fɔ mek shɔ se dɛn kil di pɔsin we kil in kɔmpin. 18 Ɛn if di pɔsin nak in kɔmpin wit sɔntin we dɛn mek wit stik we mek i day, da pɔsin de dɔn kil. Dɛn fɔ mek shɔ se dɛn kil di pɔsin we kil in kɔmpin.

19 “‘Di wan we dɛn kil in fambul nain go kil di pɔsin we kil. We i si am, na insɛf sɛf fɔ kil am. 20 If pɔsin day bikɔs in kɔmpin push am bikɔs i et am ɔ i trowe sɔntin pan am fɔ du am bad,*+ 21 ɔ if i nak am wit in an bikɔs i et am ɛn di pɔsin day, dɛn fɔ mek shɔ se dɛn kil di wan we nak in kɔmpin. In na pɔsin we dɔn kil. Di wan we dɛn kil in fambul go kil di pɔsin we kil we i si am.

22 “‘Bɔt if i nɔ push am bay wilful bikɔs i et am ɔ trowe sɔntin pan am bikɔs i want fɔ du am bad,*+ 23 ɛn if i nɔ bin si am ɛn mek ston fɔdɔm pan am ɛn in nɔto bin in ɛnimi ɔ i nɔ bin de fɛn we fɔ du am bad, dɔn di pɔsin day, 24 di pipul dɛn fɔ jɔj bitwin di wan we nak in kɔmpin ɛn di wan we day in fambul, akɔdin to dɛn tin dɛn ya.+ 25 Di pipul dɛn fɔ sev di wan we kil in kɔmpin frɔm di pɔsin we i kil in fambul ɛn mek i go bak na di siti usay sɔmbɔdi we kil pɔsin go sef, usay i bin dɔn rɔnawe go. Ɛn i fɔ de de te di ay prist we dɛn bin dɔn anɔynt wit di oli ɔyl day.+

26 “‘Bɔt if di wan we kil kɔmɔt na di siti usay i bin dɔn rɔn go, usay sɔmbɔdi we kil pɔsin go sef 27 da tɛm de, di wan we i kil in fambul nɔ go gilti if i si am ɛn kil am. 28 I fɔ kɔntinyu fɔ de nain siti usay sɔmbɔdi we kil pɔsin go sef te di ay prist day. Bɔt afta di ay prist day, di pɔsin we kil kin go bak nain yon land.+ 29 Dɛn tin dɛn ya go bi lɔ fɔ una fɔ jɔj dɛn kayn kes dɛn ya frɔm jɛnɛreshɔn to jɛnɛreshɔn, na ɔl di say dɛn usay una go de.

30 “‘Dɛn fɔ kil ɛnibɔdi we kil pɔsin*+ if pipul* dɛn de fɔ gi witnɛs.+ Bɔt dɛn nɔ fɔ kil ɛnibɔdi if na wangren pɔsin* de fɔ gi witnɛs. 31 Una nɔ fɔ tek prayz fɔ fri ɛnibɔdi* we fit fɔ day bikɔs i kil pɔsin, una fɔ mek shɔ se una kil am.+ 32 Ɛn una nɔ fɔ tek prayz fɔ fri ɛnibɔdi we rɔnawe go nain siti usay sɔmbɔdi we kil pɔsin go sef, bay we una alaw am fɔ go de bak nain land bifo di ay prist day.

33 “‘Una nɔ fɔ dɔti di land usay una de, bikɔs blɔd de dɔti di land,+ ɛn no sakrifays nɔ de fɔ fɔgiv pɔsin we kil pas dɛn kil di pɔsin bak.+ 34 Una nɔ fɔ dɔti di land usay una de, usay misɛf de, bikɔs mi, Jiova, a de wit di pipul dɛn na Izrɛl.’”+