Livitikɔs
24 Jiova kɔntinyu fɔ tɔk to Mozis, i se: 2 “Tɛl di Izrɛlayt dɛn fɔ kam wit piɔ ɔliv ɔyl we dɛn pul pan ɔliv we dɛn dɔn bit fɔ di lamp dɛn, so dat di lamp dɛn go layt ɔltɛm.+ 3 Ɛvri nɛt, Erɔn fɔ mek shɔ se di lamp dɛn layt, ɛn dɛn fɔ layt ɔltɛm bifo Jiova te na mɔnin bifo di kɔtin we de nia di Spɛshal Bɔks insay di mitin tɛnt. Na lɔ we go de sote go fɔ ɔl una jɛnɛreshɔn dɛn. 4 I fɔ mek shɔ se di lamp dɛn we de pan di lampstand+ we dɛn mek wit piɔ gold de wok ɔltɛm bifo Jiova.
5 “Yu fɔ tek fayn flawa ɛn bek 12 rawnd bred* dɛn. Yu fɔ tek wan ifah ɛn sheb am to tɛn pat ɛn yuz tu pat* fɔ mek ich bred. 6 Yu go put dɛn na tu payl, siks go de na wan payl ɛn di ɔda siks go de na ɔda payl,+ bifo Jiova na di tebul we dɛn mek wit piɔ gold.+ 7 Yu fɔ put piɔ frankinsɛns* pan ich payl, ɛn i go bi di bred we tinap fɔ di wan ol ɔfrin*+ we dɛn kin mek wit faya to Jiova. 8 Ɛni Sabat de, i fɔ arenj am bifo Jiova.+ Na agrimɛnt wit di Izrɛlayt dɛn we go de sote go. 9 I go bi Erɔn ɛn in bɔypikin+ dɛn yon, ɛn dɛn go it am na oli ples,+ bikɔs na sɔntin we oli pas ɔl fɔ di prist frɔm Jiova in ɔfrin dɛn we dɛn kin mek wit faya. Na lɔ we go de sote go.”
10 Wan Izrɛlayt uman ɛn wan Ijipshian man+ bin gɛt wan bɔypikin, ɛn dɛn bɔypikin bin fɛt wit wan Izrɛlayt man na di kamp. 11 Di Izrɛlayt uman in bɔypikin bigin fɔ tɔk bad bɔt di Nem* ɛn swɛ* am.+ So dɛn kɛr am go to Mozis.+ I apin se in mama na Shilomit, we na Dibray we kɔmɔt na Dan in trayb in galpikin. 12 Dɛn ol di bɔbɔ te Jiova tɛl dɛn wetin i disayd.+
13 Dɔn Jiova tɛl Mozis se: 14 “Una pul di wan we swɛ kɔmɔt na di kamp, ɛn lɛ ɔl di wan dɛn we yɛri am le dɛn an nain ed ɛn lɛ ɔl di Izrɛlayt dɛn ston am.+ 15 Ɛn yu fɔ tɛl di Izrɛlayt dɛn se, ‘If ɛnibɔdi swɛ Gɔd, i go ansa fɔ in sin. 16 Dɛn fɔ kil di wan we tɔk bad bɔt Jiova in nem, natin nɔ fɔ pwɛl am.+ Ɔl di Izrɛlayt dɛn fɔ ston am, natin nɔ fɔ pwɛl am. Dɛn fɔ kil fɔrina we tɔk bad bɔt di Nem jɔs lɛk aw dɛn fɔ kil Izrɛlayt we tɔk bad bɔt di Nem.
17 “‘If pɔsin kil in kɔmpin mɔtalman, dɛn fɔ kil am, natin nɔ fɔ pwɛl am.+ 18 Ɛnibɔdi we nak animal we dɛn de mɛn ɛn kil am, i fɔ pe fɔ am. I fɔ gi layf fɔ layf. 19 If pɔsin damej in kɔmpin, dɛn fɔ du to am wetin i du to in kɔmpin.+ 20 Brok bon fɔ brok bon, yay fɔ yay, tit fɔ tit, di sem we aw i damej in kɔmpin, na so dɛn fɔ du to am bak.+ 21 Di wan we nak animal ɛn kil am fɔ pe fɔ am,+ bɔt dɛn fɔ kil di wan we nak in kɔmpin mɔtalman ɛn kil am.+
22 “‘Na wan lɔ go de fɔ una, ilɛk pɔsin na fɔrina ɔ Izrɛlayt,+ bikɔs mi na Jiova una Gɔd.’”
23 Mozis tɔk to di Izrɛlayt dɛn ɛn dɛn pul di wan we bin dɔn swɛ kɔmɔt na di kamp, dɔn dɛn ston am.+ So di Izrɛlayt dɛn du ɔl wetin Jiova bin dɔn tɛl Mozis.