Ɛkliziastis

9 So a tink bɔt ɔl dɛn tin dɛn ya, dɔn a kam fɔ si se di wan we de du wetin rayt ɛn di wan we gɛt sɛns, ɛn ɔl di wok we dɛn de du, de na di tru Gɔd in an.+ Mɔtalman nɔ no di lɔv ɛn di et we bin de bifo in tɛm. 2 Di wan we de du wetin rayt ɛn di wan we wikɛd,+ di wan we de du wetin gud ɛn di wan we klin ɛn di wan we nɔ klin, di wan dɛn we de sakrifays ɛn di wan dɛn we nɔ de sakrifays, dɛn ɔl gɛt di sem ɛndin.+ Di wan we de du gud na di sem lɛk di wan we de sin, di wan we de swɛ na di sem lɛk di wan we nɔ de gri* fɔ swɛ. 3 Dis na wan bad tin we de apin na di wɔl: Bikɔs ɔl mɔtalman gɛt di sem ɛndin,+ na dat mek na bad ful-ɔp dɛn at; ɛn na kres de na dɛn at we dɛn de alayv, dɔn dɛn day!*

4 Op de fɔ ɛnibɔdi we de alayv, bikɔs dɔg we de alayv bɛtɛ pas layɔn we dɔn day.+ 5 Di wan dɛn we de alayv no se dɛn go day,+ bɔt dayman dɛn nɔ no natin atɔl,+ ɛn dɛn nɔ gɛt ɛni bɛnifit, bikɔs dɛn nɔ go mɛmba natin bɔt dɛn.+ 6 Dɔn dɛn lɔv, dɛn et, ɛn dɛn jɛlɔs ɔl dɔn dɔn, ɛn dɛn nɔ gɛt natin fɔ du igen wit wetin de apin na di wɔl.+

7 Go, gladi we yu de it yu fud, ɛn drink yu wayn wit gladi-at,+ bikɔs di tru Gɔd dɔn gladi wit yu wok+ dɛn. 8 Lɛ yu klos wayt* ɔltɛm, ɛn nɔ fɔgɛt fɔ put ɔyl na yu ed.+ 9 Ɛnjɔy yu layf wit yu wɛf we yu rili lɛk+ ɔl di tɛm dɛn we yu de liv yu layf we na vaniti, we Gɔd dɔn gi yu na di wɔl ɔl di tɛm we yu de alayv we na vaniti. Dat na yu pɔshɔn na layf ɛn fɔ ɔl di tranga wok we yu dɔn du na di wɔl.+ 10 Ɛnitin we yu ebul fɔ du, na fɔ du am wit ɔl yu trɛnk, bikɔs yu nɔ go wok ɔ plan ɔ sabi sɔntin ɔ gɛt sɛns na di Grev,*+ usay yu de go.

11 Wan ɔda tin bak we a dɔn si na di wɔl na dat, di wan we fast nɔ de win di res ɔltɛm, ɛn di wan we gɛt trɛnk nɔ de win di fɛt,+ di wan we gɛt sɛns nɔ de gɛt tin fɔ it ɔltɛm, di wan we smat nɔ de jɛntri+ ɔltɛm, ɛn di wan dɛn we sabi aw fɔ du tin nɔ de go bifo+ ɔltɛm, bikɔs tin dɛn we dɛn nɔ no se go apin kin apin to dɛn tɛm we dɛn nɔ de ɛkspɛkt. 12 Mɔtalman nɔ no in tɛm.+ Jɔs lɛk fish we dɛn kech na fishin nɛt ɛn bɔd we dɛn kech na trap, na so mɔtalman de di tɛm we bad tin apin to am, di tɛm we i jɔs apin to am lɛk dat.

13 A notis dis bak bɔt sɛns na di wɔl, ɛn i mek a kɔle: 14 Wan smɔl siti bin de we nɔ gɛt bɔku pipul dɛn. Dɔn wan pawaful kiŋ bin kam fɛt am, sɔrawnd am, ɛn bil strɔng wɔl dɛn rawnd am. 15 Wan poman we bin gɛt sɛns bin de na da siti de, ɛn i yuz in sɛns fɔ sev di siti. Bɔt nɔbɔdi nɔ bin mɛmba da poman.+ 16 Dɔn a tɛl misɛf se: ‘Sɛns bɛtɛ pas trɛnk,+ bɔt dɛn nɔ de valyu poman in sɛns, ɛn dɛn nɔ de lisin to wetin i de tɔk.’+

17 I bɛtɛ fɔ lisin to pɔsin we gɛt sɛns we de tɔk kwayɛt wan pas fɔ lisin we di wan we de rul oba fulman dɛn de ala.

18 Sɛns bɛtɛ pas di wɛpɔn dɛn we dɛn de yuz fɔ fɛt, bɔt wangren sina nɔmɔ kin pwɛl bɔku gud tin+ dɛn.