Ɛksodɔs
27 “Yu fɔ yuz akeshia wud fɔ mek di ɔlta;+ i fɔ bi fayv kyubit* lɔng ɛn fayv kyubit wayd. Di ɔlta fɔ skwaya, ɛn i fɔ bi tri kyubit ay.+ 2 Yu fɔ mek ɔn+ dɛn na di 4 kɔna dɛn; di ɔn dɛn fɔ jɔyn to di ɔlta, ɛn yu fɔ kɔba di ɔlta wit kɔpa.+ 3 Yu fɔ mek bɔkɛt dɛn fɔ gɛda ɛn trowe di ashis,* yu fɔ mek bak shɔvɛl dɛn, bol dɛn, fɔk dɛn, ɛn di tin dɛn fɔ put faya pan; yu fɔ yuz kɔpa fɔ mek ɔl dɛn tin dɛn ya.+ 4 Yu fɔ mek mɛsh fɔ di ɔlta. Yu fɔ yuz kɔpa fɔ mek di mɛsh ɛn yu fɔ yuz kɔpa fɔ mek 4 riŋ na di 4 kɔna dɛn na di mɛsh. 5 Yu fɔ put am ɔnda di frem na di ɔlta, ɛn di mɛsh fɔ go te i rich midul di ɔlta. 6 Yu fɔ yuz akeshia wud fɔ mek pol dɛn fɔ di ɔlta, ɛn yu fɔ kɔba dɛn wit kɔpa. 7 Yu fɔ put di pol dɛn insay di riŋ dɛn so dat di pol dɛn go de na di tu sayd dɛn na di ɔlta we dɛn de kɛr am go.+ 8 Yu fɔ mek di ɔlta lɛk bɔks we nɔ gɛt natin ɔnda. I fɔ de jɔs lɛk aw a bin sho yu na di mawntin.+
9 “Yu fɔ mek di kɔmpawn+ fɔ di tabanakul. Fɔ di lɛft say,* di kɔmpawn fɔ gɛt kɔtin dɛn we ɛng we dɛn mek wit fayn linin we twis, ɛn i fɔ bi 100 kyubit lɔng na di wan sayd.+ 10 I go gɛt 20 pila dɛn wit 20 bes dɛn we dɛn yuz kɔpa fɔ mek. Di uk dɛn fɔ di pila dɛn ɛn di tin dɛn we de jɔyn dɛn fɔ bi silva. 11 Di kɔtin dɛn we ɛng na di rayt* say dɛnsɛf fɔ bi 100 kyubit lɔng, togɛda wit in 20 pila dɛn ɛn dɛn 20 kɔpa bes dɛn, wit silva uk dɛn ɛn di tin dɛn we de jɔyn dɛn to di pila dɛn. 12 Yu fɔ ɛng kɔtin dɛn biɛn* di kɔmpawn ɛn i fɔ bi 50 kyubit. Dɔn yu fɔ mek bak tɛn pila dɛn ɛn tɛn bes dɛn. 13 Di frɔnt* say na di kɔmpawn we de na di say usay di san de kɔmɔt na 50 kyubit wayd. 14 Yu fɔ ɛng kɔtin dɛn we na 15 kyubit na di wansay, wit tri pila dɛn ɛn tri bes+ dɛn. 15 Ɛn na di ɔdasay, yu fɔ ɛng kɔtin dɛn we na 15 kyubit wit tri pila dɛn ɛn tri bes dɛn.
16 “Yu fɔ yuz blu trɛd, pɔpul wul, rɛd matirial, ɛn fayn linin we dɛn twis ɛn we dɛn wiv togɛda+ fɔ mek di kɔtin we fɔ ɛng na di say fɔ ɛnta di kɔmpawn, ɛn i fɔ bi 20 kyubit lɔng. I fɔ gɛt bak 4 pila dɛn ɛn 4 bes+ dɛn. 17 Ɔl di pila dɛn we de rawnd di kɔmpawn fɔ gɛt silva uk dɛn ɛn silva tin dɛn fɔ jɔyn dɛn, bɔt dɛn bes dɛn fɔ bi kɔpa.+ 18 Di kɔmpawn fɔ bi 100 kyubit lɔng,+ 50 kyubit wayd, ɛn 5 kyubit ay. Dɛn fɔ mek am wit fayn linin we dɛn twis, ɛn i fɔ gɛt kɔpa bes dɛn. 19 Dɛn fɔ yuz kɔpa fɔ mek ɔl di kɔntena dɛn ɛn di tin dɛn we dɛn go yuz fɔ wok na di tabanakul, togɛda wit di tɛnt pin dɛn ɛn ɔl di pin dɛn fɔ di kɔmpawn.+
20 “Yu fɔ tɛl di Izrɛlayt dɛn fɔ kam wit piɔ ɔliv ɔyl we dɛn dɔn mek fɔ layt di lamp dɛn na di tabanakul, so dat di lamp dɛn go de layt ɔltɛm.+ 21 Insay di mitin tɛnt, dat na, bifo di kɔtin* we de nia usay di Lɔ de,+ Erɔn ɛn in bɔypikin dɛn fɔ arenj fɔ lɛ di lamp kɔntinyu fɔ layt frɔm ivintɛm te mɔnintɛm bifo Jiova.+ Dis na lɔ we fɔ de sote go fɔ ɔl dɛn jɛnɛreshɔn dɛn we di Izrɛlayt dɛn fɔ de du.+