Ɛksodɔs
21 “Na dɛn tin dɛn ya a dɔn disayd we yu fɔ tɛl di pipul+ dɛn. Tɛl dɛn se:
2 “If yu bay Ibru slev,+ i fɔ wok fɔ yu as slev fɔ siks ia, bɔt di ia we mek sɛvin, yu fɔ fri am ɛn i nɔ fɔ pe yu ɛnitin.+ 3 If nain wangren kam, nain wangren fɔ go. If di man mared, in wɛf fɔ go wit am. 4 If in masta bin mared uman fɔ am ɛn di uman bɔn bɔypikin ɔ galpikin dɛn, na di masta fɔ gɛt in wɛf ɛn in pikin dɛn, ɛn nain wangren fɔ go.+ 5 Bɔt if di slev tawa ɛn tɔk se, ‘A lɛk mi masta, a lɛk mi wɛf ɛn mi pikin dɛn; a nɔ want fɔ fri.’+ 6 In masta fɔ kɛr am go bifo di tru Gɔd. Dɔn in masta fɔ briŋ am nia di domɔt ɔ di domɔt in frem, ɛn i fɔ bɔs in yes wit wan shap tin we dɛn kɔl ɔl, ɛn i go bi in slev te i day.
7 “If wan man sɛl in galpikin as slev, i nɔ go fri di sem we aw man slev go fri. 8 If in masta nɔ gladi fɔ am, ɛn i nɔ mared am as in ɔda wɛf bɔt di masta mek ɔda pɔsin kam bay am,* in masta nɔ gɛt rayt fɔ sɛl am to fɔrina, bikɔs in masta dɔn kɔmɔt biɛn am. 9 If i pik am fɔ in bɔypikin, i fɔ gi am di rayt we galpikin fɔ gɛt. 10 If in masta in bɔypikin mared ɔda uman, i fɔ kɔntinyu fɔ gi in fɔs wɛf tin fɔ it, klos, ɛn i fɔ gi am ɔl wetin i fɔ gi am as mareduman.+ 11 If i nɔ gi am ɔl dɛn tri tin dɛn de, i fɔ fri am ɛn i nɔ fɔ pe in masta natin.
12 “Dɛn fɔ kil ɛnibɔdi we nak in kɔmpin ɛn kil am.+ 13 Bɔt if i nɔ du am bay wilful ɛn mi we na di tru Gɔd alaw am fɔ apin, a go sho yu ples usay i fɔ rɔn go.+ 14 If pɔsin vɛks bad bad wan pan in kɔmpin, ɛn i kil in kɔmpin bay wilful,+ di pɔsin fɔ day ilɛksɛf yu go nid fɔ go pul am kɔmɔt na mi ɔlta.+ 15 Dɛn fɔ kil ɛnibɔdi we nak in mama ɔ in papa.+
16 “If ɛnibɔdi kidnap pɔsin+ ɛn sɛl am ɔ dɛn kech am i ol di pɔsin,+ dɛn fɔ kil am.+
17 “Dɛn fɔ kil ɛnibɔdi we swɛ* in mama ɔ in papa.+
18 “Na dis fɔ apin if pipul dɛn mek plaba ɛn wan pan dɛn wap in kɔmpin wit ston ɔ wit in an* ɛn di wan we i wap nɔ day bɔt i ledɔm sik wan nain bed: 19 If i ebul fɔ grap ɛn if i ebul fɔ yuz stik fɔ waka na do, dɛn nɔ fɔ pɔnish di wan we nak am. I fɔ pe di pɔsin we i damej fɔ di tɛm we di pɔsin nɔ de wok te i wɛl fayn fayn wan.
20 “If masta nak in man slev ɔ in uman slev ɛn di slev day bikɔs ɔf dat, dɛn fɔ pɔnish di masta fɔ dat.+ 21 Bɔt if di slev liv fɔ wan ɔ tu dez, dɛn nɔ fɔ pɔnish di masta bikɔs di masta yuz in mɔni fɔ bay am.
22 “If man dɛn de fɛt, dɔn dɛn jam bɛlɛ-uman ɛn damej am, dɔn di uman bɔn bifo in tɛm,*+ bɔt di uman ɔ di pikin nɔ day* di pɔsin we gilti fɔ pe fɔ di damej we di uman in man tɛl am fɔ pe, ɛn i fɔ pe akɔdin to wetin di jɔj dɛn disayd.+ 23 Bɔt if di uman ɔ di pikin day, yu fɔ pe layf fɔ layf,*+ 24 yay fɔ yay, tit fɔ tit, an fɔ an, fut fɔ fut,+ 25 bɔn fɔ bɔn, wund fɔ wund, blo fɔ blo.
26 “If masta nak in man slev ɔ in uman slev nain yay ɛn i bɔs am, i fɔ fri di slev as pemɛnt fɔ in yay we i dɔn bɔs.+ 27 If masta nak in man slev ɔ in uman slev ɛn pul in tit, i fɔ fri di slev as pemɛnt fɔ in tit.
28 “Bɔt if kaw bɔt pɔsin ɛn di pɔsin day, dɛn fɔ ston di kaw te dɛn kil am,+ ɛn dɛn nɔ fɔ it di kaw. Dɛn nɔ fɔ pɔnish di pɔsin we gɛt di kaw. 29 If di kaw bin gɛt di abit fɔ de bɔt pipul dɛn, ɛn dɛn bin dɔn wɔn di wan we gɛt am bɔt i nɔ put am ɔnda kɔntrol ɛn di kaw kil pɔsin, dɛn fɔ ston di kaw te i day dɔn dɛn fɔ kil di wan we gɛt am. 30 If dɛn aks di wan we gɛt di kaw fɔ pe* so dat dɛn nɔ go kil am, i fɔ pe di amawnt we dɛn tɛl am fɔ pe. 31 Ilɛksɛf na bɔypikin ɔ galpikin i bɔt, dɛn fɔ du dɛn tin dɛn ya we a dɔn disayd to di wan we gɛt di kaw. 32 If di kaw bɔt man slev ɔ uman slev, di wan we gɛt di kaw fɔ gi di slev in masta 30 shɛkɛl,* ɛn dɛn fɔ ston di kaw te i day.
33 “If pɔsin dig ol ɔ i opin wan ol ɛn i nɔ kɔba am, dɔn wan kaw ɔ dɔnki fɔdɔm insay de, 34 di wan we gɛt di ol fɔ pe.+ I fɔ pe to di wan we gɛt di animal, ɛn di animal we dɔn day go bi in yon. 35 If pɔsin in kaw bɔt ɔda pɔsin in kaw ɛn i day, dɛn fɔ sɛl di kaw we de alayv ɛn dɛn fɔ sheb di mɔni we dɛn pe fɔ am, dɛn ɔl tu fɔ sheb di animal we dɔn day. 36 If pipul dɛn no se di kaw bin gɛt di abit fɔ de bɔt in kɔmpin animal dɛn bɔt di wan we gɛt am nɔ put am ɔnda kɔntrol, i fɔ pe kaw fɔ kaw, ɛn di animal we day go bi in yon.