Ɛksodɔs
17 Ɔl di Izrɛlayt dɛn kɔmɔt na di wildanɛs* na Sin.+ Dɛn bin de go ɛn blo na rod akɔdin to wetin Jiova tɛl dɛn,+ dɔn dɛn go kamp na Rɛfidim.+ Bɔt wan wata nɔ bin de de fɔ lɛ di pipul dɛn drink.
2 So di pipul dɛn bigin fɔ mek Mozis plaba+ ɛn tɔk se: “Gi wi wata fɔ drink.” Bɔt Mozis tɛl dɛn se: “Wetin mek una de mek mi plaba? Wetin mek una de kɔntinyu fɔ tɛst Jiova?”+ 3 Bɔt di pipul dɛn bin rili want fɔ drink wata, so dɛn kɔntinyu fɔ grɔmbul pan Mozis+ ɛn aks am se: “Wetin mek yu pul wi na Ijipt fɔ mek wi, wi bɔypikin dɛn, ɛn wi animal dɛn day bikɔs wata nɔ de fɔ drink?” 4 Faynali, Mozis tɛl Jiova se: “Wetin a fɔ du wit dɛn pipul dɛn ya? I nɔ go te igen dɛn go ston mi!”
5 Na de Jiova tɛl Mozis se: “Go bifo di pipul dɛn ɛn go wit sɔm pan di bigman dɛn na Izrɛl ɛn yu stik we yu bin yuz fɔ nak di Nayl Riva.+ Ol am na yu an ɛn waka go. 6 Luk! A go tinap de bifo yu pantap di rɔk na Orɛb. Yu fɔ nak di rɔk, ɛn wata go kɔmɔt de, dɔn di pipul dɛn go drink am.”+ Mozis du am bifo di bigman dɛn na Izrɛl. 7 So i kɔl di ples Masa*+ ɛn Mɛriba*+ bikɔs ɔf di plaba we di Izrɛlayt dɛn mek ɛn bikɔs dɛn tɛst Jiova+ bay we dɛn aks se: “Jiova de wit wi ɔ i nɔ de wit wi?”
8 Dɔn di Amalɛkayt+ dɛn kam ɛn fɛt di Izrɛlayt dɛn na Rɛfidim.+ 9 Na de Mozis tɛl Jɔshwa se:+ “Pik man dɛn fɔ go fɛt di Amalɛkayt dɛn fɔ wi. Tumara a go tinap pantap di il, ɛn a go ol di tru Gɔd in stik na mi an.” 10 Dɔn Jɔshwa du ɔl wetin Mozis tɛl am,+ ɛn i fɛt di Amalɛkayt dɛn. Na de Mozis, Erɔn, ɛn Ɔ+ go ɔp na di il.
11 We Mozis kɔntinyu fɔ es in an dɛn ɔp, di Izrɛlayt dɛn bin de win; bɔt as i put in an dɛn dɔŋ so, di Amalɛkayt dɛn bin de win. 12 We Mozis in an dɛn taya, dɛn tek ston ɛn mek i sidɔm pan am. Dɔn Erɔn ɛn Ɔ ol in an dɛn, wan de nain lɛftan ɛn wan de nain raytan, so dat mek in an dɛn nɔ taya te di san go dɔŋ. 13 So Jɔshwa win Amalɛk ɛn in pipul dɛn wit di sɔd.+
14 Na de Jiova tɛl Mozis se: “Rayt dis as tin fɔ mɛmba na di buk ɛn ripit am to Jɔshwa, ‘A go pul di Amalɛkayt dɛn na di wɔl* kpatakpata ɛn nɔbɔdi nɔ go mɛmba dɛn igen.’”+ 15 Dɔn Mozis bil wan ɔlta ɛn kɔl am Jiova-nisay.* 16 I tɔk se: “Jiova go fɛt wɔ wit Amalɛk frɔm jɛnɛreshɔn to jɛnɛreshɔn+ bikɔs in an de agens Ja in tron.”+