Ɛksodɔs

14 Na de Jiova tɛl Mozis se: 2 “Tɛl di Izrɛlayt dɛn se dɛn fɔ tɔn bak ɛn kamp bifo Payaayrɔt, bitwin Migdɔl ɛn di si we fesin Beal-zifɔn.+ Una fɔ kamp bay di si ɛn fesin am. 3 Dɔn Fɛro go tɔk se, ‘Di Izrɛlayt dɛn de go ɔp ɛn dɔŋ na di land bikɔs dɛn kɔnfyuz. Dɛn dɔn lɔs na di wildanɛs.’* 4 A go alaw Fɛro fɔ mek strɔngat,+ ɛn i go rɔnafta dɛn. Dɔn a go yuz Fɛro ɛn ɔl in sojaman dɛn fɔ gi misɛf glori;+ di Ijipshian dɛn go mɔs no se mi na Jiova.”+ So na dat dɛn bin du.

5 Leta, dɛn tɛl di kiŋ na Ijipt se di pipul dɛn dɔn rɔnawe. Wantɛm wantɛm, Fɛro ɛn in savant dɛn chenj dɛn maynd bɔt di pipul dɛn,+ ɛn dɛn aks se: “Wetin mek wi du dis ɛn fri di Izrɛlayt dɛn fɔ mek dɛn nɔ wok fɔ wi igen as slev?” 6 So i rɛdi in wɔ chariɔt dɛn ɛn kɛr in pipul dɛn go wit am.+ 7 I tek in 600 bɛst chariɔt dɛn ɛn ɔl di ɔda chariɔt dɛn na Ijipt, ɛn fɛtman dɛn bin de pan dɛn ɔl. 8 So Jiova alaw Fɛro we na di kiŋ na Ijipt fɔ mek strɔngat, ɛn i rɔnafta di Izrɛlayt dɛn we bin de go wit kɔnfidɛns.*+ 9 Di Ijipshian dɛn bin de rɔnafta dɛn+ ɛn ɔl Fɛro in chariɔt dɛn we ɔs dɛn de drɔ, in man dɛn we de rayd ɔs, ɛn in sojaman dɛn bin de nia usay dɛn bin kamp bay di si we de bay Payaayrɔt we fesin Beal-zifɔn.

10 We Fɛro nia di Izrɛlayt dɛn, dɛn es dɛn ed ɛn si di Ijipshian dɛn de rɔnafta dɛn. Di Izrɛlayt dɛn fred, ɛn dɛn bigin fɔ kray to Jiova.+ 11 Dɛn tɛl Mozis se: “Fɔ se na bikɔs no bɛringrɔn nɔ de na Ijipt nain mek yu briŋ wi kam na ya fɔ kam day na di wildanɛs?*+ Wetin mek yu dɔn du dis to wi? Wetin mek yu pul wi na Ijipt? 12 Nɔto dis sem tin wi tɛl yu na Ijipt we wi tɔk se, ‘Lɛf wi so dat wi go wok fɔ di Ijipshian dɛn’? Bikɔs i bɛtɛ fɔ lɛ wi wok fɔ di Ijipshian dɛn pas fɔ kam day na di wildanɛs.”*+ 13 Na de Mozis tɛl di pipul dɛn se: “Una nɔ fred.+ Una tinap tranga wan ɛn si aw Jiova go sev una tide.+ Di Ijipshian dɛn we una de si tide, una nɔ go ɛva si dɛn igen.+ 14 Na Jiova insɛf sɛf go fɛt fɔ una,+ ɛn una nɔ go tɔk natin.”

15 Na de Jiova tɛl Mozis se: “Wetin mek yu de kɔntinyu fɔ kray to mi? Tɛl di Izrɛlayt dɛn fɔ mek dɛn kɔntinyu fɔ go. 16 As fɔ yu, es yu stik ɔp ɛn strɛch yu an oba di si ɛn sheb am so dat di Izrɛlayt dɛn go pas midul di si na grɔn. 17 As fɔ mi, a go alaw di Ijipshian dɛn fɔ mek strɔngat so dat dɛn go rɔnafta dɛn na di si; so a go yuz Fɛro, ɔl in sojaman dɛn, in wɔ chariɔt dɛn, ɛn in man dɛn we de rayd ɔs fɔ gi misɛf glori.+ 18 Ɛn di Ijipshian dɛn go mɔs no se mi na Jiova we a go yuz Fɛro, in wɔ chariɔt dɛn, ɛn in man dɛn we de rayd ɔs fɔ gi misɛf glori.”+

19 Na de di tru Gɔd in enjɛl+ we bin de go bifo di Izrɛlayt dɛn kɔmɔt bifo dɛn ɛn go biɛn dɛn ɛn di klawd we tan lɛk pila we bin de bifo dɛn go biɛn dɛn ɛn de de.+ 20 So i go bitwin di Ijipshian dɛn ɛn di Izrɛlayt+ dɛn. I mek dak klawd de na di wansay, ɛn i mek layt de na di ɔdasay na nɛt.+ So di wan grup nɔ go nia di ɔda grup ol nɛt.

21 Na de Mozis strɛch in an oba di si;+ dɔn Jiova yuz big briz we de kɔmɔt na di ist fɔ push di si go biɛn ol nɛt ɛn dat mek di grɔn na di si tɔn to dray grɔn+ ɛn di wata sheb.+ 22 So di Izrɛlayt dɛn waka midul di si na dray grɔn+ ɛn di wata mek lɛk wɔl na dɛn raytan ɛn na dɛn lɛftan.+ 23 Di Ijipshian dɛn rɔnafta dɛn ɛn ɔl Fɛro in ɔs dɛn, in wɔ chariɔt dɛn, ɛn in man dɛn we de rayd ɔs bigin fɔ rɔnafta dɛn midul di si.+ 24 Mɔnintɛm,* Jiova wach di Ijipshian dɛn frɔm di faya ɛn klawd we tan lɛk pila,+ ɛn i mek di Ijipshian dɛn kɔnfyuz. 25 I kɔntinyu fɔ pul di wil dɛn ɔnda dɛn chariɔt dɛn so dat mek i nɔ bin izi fɔ dɛn fɔ rayd dɛn, ɛn di Ijipshian dɛn bin de tɔk se: “Lɛ wi rɔnawe frɔm di Izrɛlayt dɛn bikɔs Jiova de fɛt fɔ dɛn.”+

26 Dɔn Jiova tɛl Mozis se: “Strɛch yu an oba di si so dat di wata go kam bak pan di Ijipshian dɛn, dɛn wɔ chariɔt dɛn, ɛn dɛn man dɛn we de rayd ɔs.” 27 Wantɛm wantɛm, Mozis strɛch in an oba di si ɛn as do de klin so, di si kam bak lɛk aw i bin de. We di Ijipshian dɛn bin de rɔnawe kɔmɔt na di si, Jiova bin de push dɛn go bak midul di si.+ 28 Di wata kɔba di wɔ chariɔt dɛn, di man dɛn we de rayd ɔs, ɛn ɔl Fɛro in sojaman dɛn we bin dɔn go na di si fɔ rɔnafta di Izrɛlayt+ dɛn. Nɔn pan dɛn nɔ bin sɔvayv.+

29 Bɔt di Izrɛlayt dɛn waka na dray grɔn midul di si+ ɛn di wata mek lɛk wɔl na dɛn raytan ɛn na dɛn lɛftan.+ 30 So da de de, Jiova sev di Izrɛlayt dɛn frɔm di Ijipshian+ dɛn ɛn di Izrɛlayt dɛn si di Ijipshian dɛn dedebɔdi dɛn na di bich. 31 Di Izrɛlayt dɛn bin si bak di pasmak pawa we Jiova bin yuz fɔ fɛt di Ijipshian dɛn, ɛn di pipul dɛn bigin fɔ fred Jiova ɛn gɛt fet pan Jiova ɛn in savant Mozis.+