Ɛksodɔs
12 Jiova tɛl Mozis ɛn Erɔn na Ijipt se: 2 “Dis mɔnt go bi di fɔs mɔnt insay di ia fɔ una.+ 3 Tɛl ɔlman na Izrɛl se, ‘Di de we mek tɛn insay dis mɔnt, dɛn ɔl fɔ tek wan ship+ fɔ dɛn papa dɛn famili.* Wan ship fɔ wan os. 4 Bɔt if di pipul dɛn we de na di os tu smɔl fɔ wan ship, dɛn fɔ sheb am wit dɛn neba dɛn we de nia dɛn akɔdin to ɔmɔs pipul* dɛn de na dɛn os. We dɛn de chɛk, dɛn fɔ no ɔmɔs pan di ship ɛniwan pan dɛn go it. 5 Una ship nɔ fɔ gɛt wan bɔt.+ I fɔ bi man ship we ol wan ia. Una fɔ pik dɛn frɔm di yɔŋ ship dɛn ɔ frɔm di got dɛn. 6 Una fɔ kia fɔ am te di de we mek 14 insay dis mɔnt.+ Dɔn ɔl di pipul dɛn na Izrɛl go kil am ivintɛm.*+ 7 Dɛn fɔ tek sɔm pan di blɔd ɛn rɔb am na di tu frem dɛn na di domɔt ɛn di say we de ɔp di domɔt na di os usay dɛn go it am.+
8 “‘Dɛn fɔ it di bif dis nɛt.+ Dɛn fɔ ros am oba faya ɛn it am wit bred we nɔ gɛt yist+ ɛn bita grin.+ 9 Una nɔ fɔ it ɛni pat pan am we rɔ ɔ bwɛl ɔ we dɛn kuk insay wata. Una fɔ ros am oba faya togɛda wit in ed, in fut dɛn, ɛn di pat dɛn we de insay in bɛlɛ. 10 Una nɔ fɔ lɛf ɛni pat pan am te na mɔnin. If ɛnitin lɛf te na mɔnin, una fɔ bɔn am wit faya.+ 11 Ɛn na so una fɔ it am, una fɔ tay una bɛlt, una sandal fɔ de na una fut, ɛn una staf fɔ de na una an; una fɔ it am kwik kwik wan. Na Jiova in Pasova. 12 A go pas na Ijipt dis nɛt ɛn kil ɔl di fɔs pikin dɛn na Ijipt, frɔm mɔtalman te to animal.+ Dɔn a go pɔnish ɔl di gɔd dɛn na Ijipt.+ Mi na Jiova. 13 Di blɔd go bi sayn fɔ di os dɛn usay una de, ɛn a go si di blɔd ɛn pas oba una. Dɔn di bad bad tin nɔ go kam pan una fɔ dɔnawe wit una we a go pɔnish di pipul dɛn na Ijipt.+
14 “‘Dis de go bi de we una fɔ mɛmba ɛn una jɛnɛreshɔn dɛn fɔ de sɛlibret am sote go as fɛstival to Jiova. Una fɔ sɛlibret am as lɔ we go de te go. 15 Una fɔ it bred we nɔ gɛt yist fɔ sɛvin dez.+ Di fɔs de, una fɔ pul kɔmɔt na una os dɛn ɛni do we dɔn famɛnt, bikɔs ɛnibɔdi we it ɛnitin we gɛt yist frɔm di fɔs de te to di sɛvin de, dɛn fɔ kil am. 16 Di fɔs de, una go gɛt oli kɔnvɛnshɔn. Dɔn di de we mek sɛvin, una go gɛt ɔda oli kɔnvɛnshɔn. Nɔbɔdi nɔ fɔ du wok dɛn dez dɛn de.+ Na wetin nɔmɔ una go nid fɔ it nain una go mek.
17 “‘Una fɔ de gɛt di Bred we Nɔ Gɛt Yist Fɛstival,+ bikɔs na dis de a pul una ɔl kɔmɔt na Ijipt. Ɛn ɔl una jɛnɛreshɔn fɔ de mɛmba dis de as lɔ we de te go. 18 Insay di fɔs mɔnt, di de we mek 14 insay di mɔnt, ivintɛm, una fɔ it bred we nɔ gɛt yist te di ivintɛm fɔ di de we mek 21 insay di mɔnt.+ 19 Fɔ sɛvin dez una nɔ fɔ gɛt do we dɔn famɛnt na una os dɛn, bikɔs if ɛnibɔdi it wetin gɛt yist, ilɛk na fɔrina ɔ na Izrɛlayt,+ dɛn fɔ kil da pɔsin de.+ 20 Na bred we nɔ gɛt yist una fɔ it na ɔl una os dɛn.’”
21 Wantɛm wantɛm, Mozis kɔl ɔl di bigman dɛn na Izrɛl+ ɛn tɛl dɛn se: “Una go pik yɔŋ animal* dɛn fɔ una famili dɛn ɛn una kil dɛn fɔ di Pasova sakrifays. 22 Dɔn una fɔ put wan bɔnch isɔp plant insay di blɔd we de na bol ɛn rɔb di blɔd na di say we de ɔp na di domɔt ɛn di tu frem dɛn na di domɔt; dɔn nɔbɔdi nɔ fɔ kɔmɔt nain os te doklin. 23 Da tɛm de we Jiova de pas fɔ pɔnish di Ijipshian dɛn, ɛn i si di blɔd na di say we de ɔp na di domɔt ɛn na di tu frem dɛn na di domɔt, Jiova go mɔs pas oba di domɔt, ɛn i nɔ go alaw di bad tin fɔ kil ɛnibɔdi we de na una os+ dɛn.
24 “Una fɔ de sɛlibret dis fɛstival as lɔ we go de te go fɔ una ɛn una bɔypikin+ dɛn. 25 Ɛn una fɔ de sɛlibret dis fɛstival we una go na di land we Jiova go gi una jɔs lɛk aw i dɔn tɔk.+ 26 Ɛn we una bɔypikin dɛn aks una se, ‘Wetin dis fɛstival min to una?’+ 27 Una fɔ tɛl dɛn se, ‘Na di Pasova sakrifays to Jiova, we bin pas oba di Izrɛlayt dɛn os dɛn na Ijipt we i bin de kil di Ijipshian dɛn bɔt i nɔ bin kil di wan dɛn we de na wi os dɛn.’”
Na de di pipul dɛn butu ɛn ledɔm flat na grɔn. 28 So di Izrɛlayt dɛn go, ɛn dɛn du ɔl wetin Jiova dɔn kɔmand Mozis ɛn Erɔn.+ Dɛn du ɔltin.
29 Dɔn midulnɛt, Jiova kil ɔl di fɔs pikin dɛn na Ijipt,+ frɔm Fɛro we sidɔm nain tron in fɔs pikin to pɔsin we dɛn bin dɔn kapchɔ we de na prizin in fɔs pikin, ɛn ɔl di animal dɛn fɔs pikin+ dɛn. 30 Fɛro grap na nɛt togɛda wit ɔl in savant dɛn ɛn ɔl di ɔda Ijipshian dɛn, ɛn di Ijipshian dɛn bin de kray lawd lawd wan bikɔs no os nɔ bin de usay pɔsin nɔ day.+ 31 Wantɛm wantɛm, i kɔl Mozis ɛn Erɔn+ na nɛt ɛn tɛl dɛn se: “Una go, una kɔmɔt midul mi pipul dɛn, una ɛn di ɔda Izrɛlayt dɛn. Una go wɔship Jiova jɔs lɛk aw una dɔn tɔk.+ 32 Una tek bak una ship, got ɛn kaw dɛn ɛn go jɔs lɛk aw una dɔn tɔk.+ Bɔt una fɔ blɛs mi bak.”
33 Dɔn di Ijipshian dɛn bigin fɔ beg di pipul dɛn fɔ kɔmɔt na dɛn land kwik kwik wan+ “bikɔs” dɛn bin de tɔk se, “if una nɔ go ɔlman go day!”+ 34 So di pipul dɛn tek dɛn do we dɛn mek wit flawa bifo i famɛnt, dɔn dɛn rap dɛn bol dɛn usay dɛn de nid do na dɛn klos ɛn put am na dɛn sholda. 35 Di Izrɛlayt dɛn du wetin Mozis bin dɔn tɛl dɛn, ɛn dɛn aks di Ijipshian dɛn fɔ gi dɛn klos dɛn ɛn tin dɛn we dɛn mek wit silva ɛn gold.+ 36 Jiova mek di Ijipshian dɛn du gud to in pipul dɛn, ɛn dat mek dɛn gi dɛn wetin dɛn aks fɔ, ɛn dɛn tek di Ijipshian dɛn prɔpati+ dɛn.
37 Dɔn di Izrɛlayt dɛn kɔmɔt na Ramesis+ fɔ go na Sɔkɔt.+ Apat frɔm pikin dɛn, na bin lɛk 600,000 man dɛn bin de waka bay fut.+ 38 Dɔn bɔku bɔku difrɛn pipul+ dɛn* bin go wit dɛn bak, togɛda wit dɛn ship, got, ɛn kaw dɛn; di animal dɛn bin rili bɔku. 39 Dɛn bigin fɔ bek di do we dɛn pul na Ijipt to rawnd bred we nɔ gɛt yist. I nɔ bin famɛnt bikɔs dɛn bin drɛb dɛn kɔmɔt na Ijipt kwik kwik wan ɛn dat mek dɛn nɔ bin ebul mek it fɔ dɛnsɛf.+
40 Di Izrɛlayt dɛn bin dɔn de na Ijipt+ fɔ 430 ia.+ 41 Di de we mek 430 ia, na da de de Jiova in bɔku bɔku pipul dɛn kɔmɔt na Ijipt. 42 Na da nɛt de dɛn go sɛlibret di pul we Jiova pul dɛn kɔmɔt na Ijipt. Ɔl di pipul dɛn na Izrɛl fɔ sɛlibret dis nɛt fɔ ɔnɔ Jiova frɔm jɛnɛreshɔn to jɛnɛreshɔn.+
43 Dɔn Jiova tɛl Mozis ɛn Erɔn se, “Dis na lɔ fɔ di Pasova: No fɔrina nɔ fɔ it am.+ 44 Bɔt if pɔsin bay slev wit mɔni, i fɔ sakɔmsayz am. Na da tɛm de nɔmɔ, i go it am.+ 45 Fɔrina we kam de na di land ɛn wokman we dɛn aya nɔ fɔ it am. 46 Na insay wan os una fɔ it am, una nɔ fɔ tek sɔm pan di bif ɛn kɛr am go na do, dɔn una nɔ fɔ brok ɛniwan pan in bon+ dɛn. 47 Ɔl di Izrɛlayt dɛn fɔ sɛlibret am. 48 If fɔrina we de wit una want fɔ sɛlibret di Pasova to Jiova, i fɔ sakɔmsayz ɔl di man dɛn we de wit am. Dɔn i go kam nia fɔ sɛlibret am, ɛn i go tan lɛk Izrɛlayt na di land. Bɔt ɛni man we nɔ sakɔmsayz nɔ fɔ it am.+ 49 Na di sem lɔ go de fɔ Izrɛlayt ɛn fɔ fɔrina we de wit una.”+
50 So ɔl di Izrɛlayt dɛn du ɔl wetin Jiova dɔn kɔmand Mozis ɛn Erɔn. Dɛn du ɔltin. 51 Na dis de Jiova pul di Izrɛlayt dɛn togɛda wit dɛn bɔku bɔku pipul dɛn kɔmɔt na Ijipt.