2 Kronikul

34 Josaya+ bin ol et ia we i bi kiŋ, ɛn i rul fɔ 31 ia na Jerusɛlɛm.+ 2 I bin de du wetin rayt na Jiova in yay, i bin falamakata in gret gret granpa Devid, ɛn i nɔ go di rɔng we.

3 Insay di ia we mek 8 we i de rul, we i bin stil yɔŋ, i bigin fɔ luk fɔ in gret gret granpa Devid in Gɔd;+ ɛn insay di ia we mek 12, i bigin fɔ klin Juda ɛn Jerusɛlɛm+ bay we i pul di ay ples+ dɛn, di oli pol* dɛn, di imej dɛn we dɛn kav,+ ɛn di mɛtal imej dɛn. 4 Pantap dat, dɛn pwɛl pwɛl di ɔlta dɛn fɔ di Beal dɛn bifo am, ɛn i pwɛl pwɛl di insɛns stand dɛn we bin de pantap dɛn. I pwɛl bak di oli pol* dɛn, di imej dɛn we dɛn kav, ɛn di mɛtal imej dɛn ɛn tɔn dɛn to pawda. Dɔn i sprinkul am oba di wan dɛn we bin de sakrifays to dɛn, dɛn grev+ dɛn. 5 Ɛn i bɔn di prist dɛn bon dɛn na di ɔlta+ dɛn. Na so i klin Juda ɛn Jerusɛlɛm.

6 Ɛn na di siti dɛn na Manasɛ, Ifrem,+ Simiɔn, ɛn te go na Naftalay, na di eria dɛn we pwɛl pwɛl we de rawnd de, 7 i pwɛl pwɛl di ɔlta dɛn ɛn i nyamanyama di oli pol* dɛn ɛn di imej dɛn we dɛn kav;+ i tɔn dɛn to pawda ɛn i brok ɔl di insɛns stand dɛn ɔlsay na Izrɛl.+ Afta dat, i go bak na Jerusɛlɛm.

8 Insay di ia we mek 18 we i de rul, we i dɔn klin di land ɛn di tɛmpul,* i sɛn Shefan+ we na Azalaya in bɔypikin, Measaya we na lida na di siti, ɛn Joa we na Joaaz in bɔypikin ɛn we na klak fɔ mek di say dɛn we dɔn pwɛl pwɛl na Jiova we nain Gɔd in os.+ 9 Dɛn kam to Ilkaya we na di ay prist ɛn gi am di mɔni we dɛn bin dɔn briŋ na Gɔd in os, we di Livayt dɛn we na bin getman dɛn bin dɔn tek frɔm Manasɛ in trayb, Ifrem in trayb, frɔm ɔl di pipul dɛn na Izrɛl,+ ɛn frɔm Juda in trayb, Bɛnjamin in trayb, ɛn di pipul dɛn na Jerusɛlɛm. 10 Dɔn dɛn gi am to di wan dɛn we dɛn bin dɔn pik fɔ de oba di wok na Jiova in os. Ɛn di wokman dɛn we de wok na Jiova in os yuz am fɔ mek di say dɛn we dɔn pwɛl na di os ɛn mek am bak lɛk aw i bin de. 11 Dɛn gi am to di man dɛn we sabi wok wit dɛn an ɛn di wan dɛn we de bil fɔ bay ston dɛn we dɛn dɔn shep, bod dɛn fɔ sɔpɔt di bildin, ɛn fɔ yuz bim* dɛn fɔ bil na di os dɛn we di kiŋ dɛn na Juda bin dɔn alaw fɔ mek dɛn pwɛl pwɛl.+

12 Ɛn di man dɛn du di wok fetful wan.+ Na dɛn Livayt dɛn ya dɛn pik fɔ de oba dɛn as ovasia dɛn, dat na, Jeat ɛn Obadaya we na Mɛrarayt+ dɛn, ɛn Zakaraya ɛn Mɛshulam we na Koatayt+ dɛn. Ɛn di Livayt dɛn, ɔl di wan dɛn we na gud myuzishian+ dɛn, 13 bin de in chaj ɔf di lebra dɛn* ɛn dɛn na bin ovasia dɛn fɔ ɔl di wan dɛn we bin de du ɔlkayn wok; ɛn sɔm pan di Livayt dɛn na bin sɛktri dɛn, supavaysɔ dɛn, ɛn getman+ dɛn.

14 We dɛn bin de tek di mɔni we dɛn bin dɔn kam wit na Jiova in os,+ Ilkaya di prist fɛn di buk we gɛt Jiova in Lɔ+ we i bin gi tru Mozis.+ 15 So Ilkaya tɛl Shefan we na di sɛktri se: “A dɔn fɛn di buk we gɛt di Lɔ na Jiova in os.” Na de Ilkaya gi di buk to Shefan. 16 Dɔn Shefan briŋ di buk to di kiŋ ɛn tɛl am se: “Yu savant dɛn de du ɔl wetin dɛn dɔn tɛl dɛn fɔ du. 17 Dɛn dɔn tɔn di mɔni we dɛn fɛn na Jiova in os, ɛn dɛn dɔn gi am to di man dɛn we dɛn pik ɛn di wan dɛn we de du di wok.” 18 Na de Shefan we na di sɛktri tɛl di kiŋ bak se: “Wan buk de we Ilkaya we na di prist gi mi.”+ Dɔn Shefan bigin rid di buk bifo di kiŋ.+

19 As di kiŋ yɛri di wɔd dɛn we de na di Lɔ, i chɛr in klos.+ 20 Dɔn di kiŋ kɔmand Ilkaya, Aaykam+ we na Shefan in bɔypikin, Abdɔn we na Mayka in bɔypikin, Shefan we na di sɛktri, ɛn Asaya we na di kiŋ in savant se: 21 “Una go aks Jiova fɔ mi ɛn fɔ ɔl di wan dɛn we lɛf na Izrɛl ɛn Juda bɔt di wɔd dɛn we de na di buk we dɛn fɛn; bikɔs Jiova go vɛks bad bad wan pan wi bikɔs wi gret gret granpa dɛn nɔ bin du wetin Jiova se bay we dɛn nɔ fala ɔl wetin rayt insay dis buk.”+

22 So Ilkaya, wit di wan dɛn we di kiŋ sɛn, go to Ɔlda we na prɔfɛtɛs.+ Ɔlda na Shalɔm in wɛf, Shalɔm na Tikva in bɔypikin ɛn Aas in granpikin, ɛn na Shalɔm de tek kia ɔf di wɔdrob. Ɔlda bin de na di Nyu Pat na Jerusɛlɛm; ɛn dɛn go tɔk to am de.+ 23 I tɛl dɛn se: “Na dis Jiova we na di Gɔd na Izrɛl se, ‘Una tɛl di man we sɛn una to mi se: 24 “Dis na wetin Jiova se, ‘A go briŋ trɔbul na dis ples ɛn pan di pipul dɛn we de de,+ a go mek ɔl di swɛ dɛn we dɛn rayt na dis buk+ we dɛn rid bifo di kiŋ na Juda apin. 25 Bikɔs dɛn dɔn lɛf mi+ ɛn dɛn de mek smok go ɔp pan dɛn sakrifays dɛn we dɛn de mek to ɔda gɔd dɛn fɔ ɔfɛn mi+ wit ɔl di tin dɛn we dɛn de du wit dɛn an, a go pul mi wamat na dis ples ɛn nɔbɔdi nɔ go ebul fɔ stɔp am.’”+ 26 Bɔt as fɔ di kiŋ na Juda we sɛn una fɔ aks Jiova, na dis una fɔ tɛl am, “Dis na wetin Jiova we na di Gɔd na Izrɛl se: ‘As fɔ di wɔd dɛn we yu yɛri,+ 27 bikɔs yu fil bad na yu at ɛn yu ɔmbul yusɛf bifo mi we na yu Gɔd we yu yɛri di wɔd dɛn we a dɔn tɔk bɔt dis ples ɛn di pipul dɛn we de de, ɛn yu put yusɛf dɔŋ bifo mi ɛn chɛr yu klos ɛn kray bifo mi, misɛf dɔn yɛri yu,+ na dat Jiova se. 28 So a nɔ go kam wit di prɔblɛm te yu day ɛn dɛn bɛr yu di tɛm we pis de, ɛn yu yay nɔ go si ɔl di prɔblɛm we a go briŋ na dis ples ɛn pan di pipul dɛn we de de.’”’”+

Dɔn dɛn briŋ di mɛsej to di kiŋ. 29 So di kiŋ sɛn wɔd ɛn kɔl ɔl di bigman dɛn na Juda ɛn Jerusɛlɛm.+ 30 Afta dat, di kiŋ go ɔp na Jiova in os wit ɔl di man dɛn na Juda, di pipul dɛn we de na Jerusɛlɛm, di prist dɛn, di Livayt dɛn—ɔl di pipul dɛn, di big wan dɛn ɛn di smɔl wan dɛn.* I rid fɔ mek dɛn yɛri ɔl di wɔd dɛn we de na di agrimɛnt buk we dɛn bin dɔn fɛn na Jiova in os.+ 31 Di kiŋ tinap nain ples ɛn mek agrimɛnt*+ bifo Jiova se i go fala Jiova ɛn kip in kɔmandmɛnt dɛn, di tin dɛn we i de mɛmba dɛn, ɛn in lɔ dɛn wit ɔl in at ɛn wit ɔl in layf*+ bay we i de du di tin dɛn we rayt na di agrimɛnt insay dis buk.+ 32 Pantap dat, i mek ɔl di wan dɛn we de na Jerusɛlɛm ɛn Bɛnjamin gri fɔ du am. Ɛn di pipul dɛn we de na Jerusɛlɛm fala Gɔd in agrimɛnt, we na dɛn gret gret granpa dɛn Gɔd.+ 33 Na de Josaya pul ɔl di dɔti dɔti tin* dɛn we bin de na ɔl di Izrɛlayt dɛn land+ dɛn, ɛn i mek ɔl di Izrɛlayt dɛn sav Jiova we na dɛn Gɔd. Te i day, dɛn nɔ lɛf fɔ fala Jiova we na dɛn gret gret granpa dɛn Gɔd.