2 Kronikul
28 Eaz+ bin ol 20 ia we i bi kiŋ, ɛn i rul fɔ 16 ia na Jerusɛlɛm. I nɔ bin du wetin rayt na Jiova in yay, lɛk aw in gret gret granpa Devid bin du.+ 2 Bifo dat, i falamakata di kiŋ dɛn na Izrɛl,+ ɛn i ivin mek mɛtal imej+ dɛn fɔ di Beal dɛn. 3 Pantap dat, i mek smok go ɔp na Inɔm in Bɔypikin in Vali,* ɛn i bɔn in bɔypikin dɛn na faya.+ I du di dɔti dɔti tin dɛn we di neshɔn+ dɛn we Jiova bin dɔn drɛb bifo di Izrɛlayt dɛn bin de du. 4 I kɔntinyu fɔ mek sakrifays dɛn ɛn mek smok go ɔp na di ay ples+ dɛn, na di il dɛn, ɛn ɔnda ɔl di stik dɛn we de gro fayn.+
5 So Jiova we nain Gɔd an ova am to di kiŋ na Siria,+ so dɛn win am ɛn dɛn kapchɔ bɔku bɔku pipul dɛn ɛn kɛr dɛn go na Damaskɔs.+ Dɔn bak, Gɔd an ova am to di kiŋ na Izrɛl, we bin kil bɔku bɔku pan in pipul dɛn. 6 Pika+ we na Rɛmalaya in bɔypikin bin kil 120,000 man dɛn na Juda insay wan de, dɛn ɔl na bin man dɛn we gɛt maynd; i kil dɛn bikɔs dɛn bin dɔn lɛf Jiova we na dɛn gret gret granpa dɛn Gɔd.+ 7 Dɔn Zikray we na wan Ifremayt fɛtman, kil di kiŋ in bɔypikin we na Measaya ɛn Azraykam, we bin de in chaj ɔf di pales,* ɛn Ɛlkena we bin de sɛkɔn to di kiŋ. 8 Pantap dat, di Izrɛlayt dɛn kapchɔ 200,000 pan dɛn brɔda dɛn, dɛn kapchɔ uman dɛn, bɔypikin dɛn, ɛn galpikin dɛn; dɔn bak dɛn tek bɔku bɔku tin dɛn na dɛn an, ɛn dɛn kɛr di tin dɛn go na Sameria.+
9 Bɔt wan pan Jiova in prɔfɛt dɛn we nem Odɛd bin de de. I go mit di ami we de kɔmɔt na Sameria ɛn tɛl dɛn se: “Luk! Na bikɔs Jiova we na una gret gret granpa dɛn Gɔd bin vɛks pan di pipul dɛn na Juda nain mek i an ova dɛn na una an,+ ɛn una dɔn kil dɛn wit wamat te Gɔd dɔn yɛri na ɛvin. 10 Ɛn naw una want fɔ mek di pipul dɛn na Juda ɛn Jerusɛlɛm bi una man savant ɛn uman savant+ dɛn. Bɔt fɔ se unasɛf nɔ dɔn du bad bifo Jiova una Gɔd? 11 Naw una lisin to mi ɛn una mek di wan dɛn we una dɔn kapchɔ frɔm una brɔda dɛn go bak, bikɔs Jiova vɛks bad bad wan pan una.”
12 Na de sɔm lida dɛn fɔ di Ifremayt dɛn, Azaraya we na Jɛoenan in bɔypikin, Bɛrikaya we na Mɛshilemɔt in bɔypikin, Jɛiskaya we na Shalɔm in bɔypikin, ɛn Amesa we na Adlay in bɔypikin, go mit di wan dɛn we kɔmɔt fɛt, 13 ɛn dɛn tɛl dɛn se: “Una nɔ kam wit di wan dɛn we una dɔn kapchɔ na ya, bikɔs dat go mek wi gilti bifo Jiova. Wetin una plan fɔ du go ad pan wi sin dɛn ɛn di gilti we wi gilti, bikɔs wi sin dɛn ɔlrɛdi bɔku ɛn Gɔd dɔn vɛks bad bad wan pan di pipul dɛn na Izrɛl.” 14 So di fɛtman dɛn we bin gɛt wɛpɔn dɛn an ova di wan dɛn we dɛn kapchɔ ɛn di tin dɛn we dɛn kam wit+ to di prins dɛn ɛn ɔl di pipul dɛn. 15 Dɔn di man dɛn we dɛn bin dɔn pik grap ɛn tek di wan dɛn we dɛn bin dɔn kapchɔ ɛn gi klos to di wan dɛn we bin nekɛd frɔm di tin dɛn we dɛn bin dɔn tek. Dɛn mek dɛn wɛr klos, dɛn gi dɛn sandal dɛn, fud ɛn tin fɔ drink, dɔn dɛn gi dɛn ɔyl fɔ rɔb na dɛn bɔdi. Pantap dat, dɛn put di wan dɛn we wik pan dɔnki dɛn ɛn kɛr dɛn go to dɛn brɔda dɛn na Jɛriko, we na pam stik siti. Afta dat, dɛn go bak na Sameria.
16 Dyurin da tɛm de, Kiŋ Eaz aks di kiŋ dɛn na Asiria fɔ ɛp am.+ 17 Dɔn di Idɔmayt dɛn kam insay Juda bak ɛn atak di pipul dɛn we de de ɛn dɛn kɛr di wan dɛn we dɛn bin dɔn kapchɔ. 18 Di Filistin+ dɛnsɛf red di siti dɛn na di Shɛfila+ ɛn di Nɛgɛb na Juda ɛn dɛn kapchɔ Bɛt-shimɛsh,+ Ayjalɔn,+ Gɛdirɔt, Soko ɛn di tɔŋ dɛn we de nia de, Timna+ ɛn di tɔŋ dɛn we de nia de, Gimzɔ ɛn di tɔŋ dɛn we de nia de; ɛn dɛn liv de. 19 Jiova ɔmbul di pipul dɛn na Juda bikɔs ɔf Kiŋ Eaz we de rul Izrɛl, i bin alaw di pipul dɛn na Juda fɔ du ɛnitin we dɛn want, ɛn dat mek dɛn nɔ fetful to Jiova atɔl.
20 Leta, Kiŋ Tilgat-pilniza+ we de rul Asiria kam fɛt am ɛn kɔz prɔblɛm fɔ am,+ i nɔ bin ɛp am. 21 Eaz bin dɔn tek di tin dɛn na Jiova in os, di tin dɛn na di kiŋ in os,*+ ɛn di tin dɛn na di prins dɛn os dɛn ɛn gi dɛn as gift to di kiŋ na Asiria; bɔt dat nɔ bin ɛp am. 22 Ɛn dyurin di tɛm we Kiŋ Eaz gɛt prɔblɛm, na di mɔ i nɔ bin fetful to Jiova. 23 I bigin sakrifays to di gɔd dɛn na Damaskɔs+ we bin dɔn win am pan fɛt,+ ɛn i tɔk se: “Bikɔs di gɔd dɛn fɔ di kiŋ dɛn na Siria de ɛp dɛn, a go sakrifays to dɛn so dat dɛn go ɛp mi.”+ Bɔt dɛn mek in ɛn ɔl di Izrɛlayt dɛn gɛt prɔblɛm. 24 Pantap dat, Eaz tek di tin dɛn we dɛn de yuz na di tru Gɔd in os; i kɔt kɔt di tin dɛn we dɛn de yuz na di tru Gɔd in os,+ dɔn i lɔk di domɔt dɛn na Jiova in os,+ ɛn i mek ɔlta dɛn fɔ insɛf na ɔl di kɔna dɛn na Jerusɛlɛm. 25 Ɛn i mek ay ples dɛn fɔ mek smok go ɔp to ɔda gɔd+ dɛn na ɔl di siti dɛn na Juda, ɛn i ɔfɛn Jiova we nain gret gret granpa dɛn Gɔd.
26 As fɔ di ɔda tin dɛn bɔt in istri, ɔl di tin dɛn we i du, frɔm biginin to ɛnd, dɛn rayt am na di Buk bɔt di Kiŋ dɛn na Juda ɛn Izrɛl.+ 27 Dɔn Eaz day jɔs lɛk in gret gret granpa dɛn, ɛn dɛn bɛr am na di siti na Jerusɛlɛm; dɛn nɔ bɛr am na di say we dɛn de bɛr di kiŋ dɛn na Izrɛl.+ Ɛn in bɔypikin Ɛzikaya tek in ples as kiŋ.