2 Kronikul

21 Dɔn Jɛoshafat day jɔs lɛk in gret gret granpa dɛn, ɛn dɛn bɛr am wit in gret gret granpa dɛn na Devid in Siti; ɛn in bɔypikin Jɛoram tek in ples as kiŋ.+ 2 Jɛoram in brɔda dɛn, dat na, Jɛoshafat in bɔypikin dɛn na bin Azaraya, Jehaɛl, Zakaraya, Azaraya, Maykɛl, ɛn Shɛfataya; dɛn ɔl na bin Kiŋ Jɛoshafat na Izrɛl in bɔypikin dɛn. 3 Dɛn papa bin dɔn gi dɛn bɔku silva, gold, ɛn valyu tin dɛn as gift, dɔn bak i gi dɛn strɔng siti dɛn na Juda;+ bɔt i bin gi di kiŋdɔm to Jɛoram+ bikɔs nain fɔs bɔypikin.

4 We Jɛoram bigin rul in papa in kiŋdɔm, i kil ɔl in brɔda+ dɛn wit sɔd, ɛn sɔm prins dɛn na Izrɛl fɔ mek i go gɛt mɔ pawa. 5 Jɛoram bin ol 32 ia we i bi kiŋ, ɛn i rul fɔ et ia na Jerusɛlɛm.+ 6 I falamakata di kiŋ dɛn na Izrɛl,+ jɔs lɛk aw di wan dɛn we de na Eab in famili dɔn du, bikɔs i mared Eab in galpikin,+ ɛn i kɔntinyu fɔ du wetin bad na Jiova in yay. 7 Bɔt Jiova nɔ bin want fɔ dɔnawe wit Devid in famili bikɔs ɔf di agrimɛnt we i bin dɔn mek wit Devid,+ we i bin dɔn prɔmis am se i go gi in ɛn in bɔypikin dɛn lamp ɔltɛm.+

8 Insay in tɛm, di pipul dɛn na Idɔm tɔn dɛn bak pan Juda+ ɛn dɛn mek dɛn yon kiŋ.+ 9 So Jɛoram ɛn in kɔmanda dɛn krɔs oba wit ɔl in chariɔt dɛn, ɛn i grap na nɛt ɛn win di Idɔmayt dɛn we bin de sɔrawnd in ɛn di chariɔt kɔmanda dɛn. 10 Bɔt di pipul dɛn na Idɔm kɔntinyu fɔ tɔn dɛn bak pan Juda te to dis de. Di pipul dɛn na Libna+ dɛnsɛf tɔn dɛn bak pan Jɛoram da tɛm de, bikɔs i bin dɔn lɛf Jiova we nain gret gret granpa dɛn Gɔd.+ 11 Dɔn bak, i bin dɔn mek ay ples+ dɛn na di mawntin dɛn na Juda fɔ mek di pipul dɛn na Jerusɛlɛm wɔship ɔda gɔd dɛn, ɛn i mek di pipul dɛn na Juda nɔ fetful.

12 Leta, Prɔfɛt Ilayja sɛn lɛta to am.+ I rayt se: “Na dis Jiova we na Devid yu gret gret granpa in Gɔd se, ‘Yu nɔ falamakata yu papa Jɛoshafat+ ɛn yu nɔ falamakata Kiŋ Esa+ we bin de rul Juda. 13 Bɔt yu falamakata di kiŋ dɛn na Izrɛl+ ɛn yu mek di pipul dɛn na Juda ɛn di pipul dɛn na Jerusɛlɛm wɔship ɔda gɔd+ dɛn jɔs lɛk aw Eab in famili+ bin mek dɛn wɔship ɔda gɔd dɛn, ɛn yu ivin kil yu yon brɔda+ dɛn we bin bɛtɛ pas yu we de na yu papa in famili. 14 So Jiova go pɔnish yu pipul dɛn, yu bɔypikin dɛn, yu wɛf dɛn, ɛn i go dɔnawe wit ɔl yu prɔpati dɛn. 15 Ɛn yu go sɔfa wit bɔku sik dɛn, yu go ivin gɛt sik we go afɛkt yu gɔt, te yu gɔt kɔmɔt na do bikɔs ɔf di siknɛs; di sik go de mɔna yu ɛvride.’”

16 Dɔn Jiova mek+ di Filistin+ dɛn ɛn di Arab+ dɛn we bin de nia di Itiopian dɛn tɔn agens Jɛoram. 17 So dɛn atak di pipul dɛn na Juda, dɛn fos go insay, dɛn tek ɔl di prɔpati dɛn we bin de na di kiŋ in os,*+ ɛn dɛn tek in bɔypikin dɛn ɛn in wɛf dɛn; na Jɛoaaz*+ nɔmɔ dɛn bin lɛf wit am we nain las bɔypikin. 18 Ɛn afta ɔl dis, Jiova mek i gɛt wan sik nain gɔt+ we nɔ de mɛn. 19 Leta, afta tu ia dɔn pas, in gɔt kɔmɔt na do bikɔs ɔf in sik, ɛn i day we i bin de sɔfa bad bad wan bikɔs ɔf in sik; ɛn in pipul dɛn nɔ mek faya fɔ am pan in bɛrin lɛk aw dɛn bin de mek faya fɔ in gret gret granpa dɛn bɛrin.+ 20 I bin ol 32 ia we i bi kiŋ, ɛn i rul fɔ et ia na Jerusɛlɛm. Nɔbɔdi nɔ fil am we i day. So dɛn bɛr am na Devid in Siti,+ bɔt dɛn nɔ bɛr am na di ples usay dɛn kin bɛr kiŋ+ dɛn.