2 Kronikul

20 Afta dat, di Moabayt+ dɛn ɛn di Amɔnayt+ dɛn wit sɔm Amɔnim* dɛn kam fɔ fɛt Jɛoshafat. 2 So sɔm pipul dɛn tɛl Jɛoshafat se: “Bɔku bɔku pipul dɛn dɔn kam fɔ fɛt yu. Dɛn kɔmɔt na di eria bay di si,* na Idɔm,+ ɛn dɛn de na Azazɔn-tema, dat na, Ɛn-gɛdi.”+ 3 Ɛn dat bin mek Jɛoshafat fred, ɛn i mek-ɔp in maynd fɔ luk fɔ Jiova.+ So i tɛl ɔlman na Juda fɔ fast. 4 Di pipul dɛn na Juda gɛda togɛda fɔ aks wetin Jiova tink;+ dɛn kɔmɔt frɔm ɔl di siti dɛn na Juda fɔ kam chɛk wetin Jiova tink.

5 So Jɛoshafat tinap usay di pipul dɛn na Juda ɛn Jerusɛlɛm gɛda na Jiova in os bifo di nyu kɔmpawn, 6 ɛn i tɔk se:

“E Jiova wi gret gret granpa dɛn Gɔd, nɔto yu na Gɔd na ɛvin;+ nɔto yu de rul oba ɔl di kiŋdɔm+ dɛn? Yu gɛt pawa ɛn trɛnk, ɛn nɔbɔdi nɔ ebul tinap bifo yu.+ 7 E wi Gɔd, nɔto yu bin drɛb di pipul dɛn we de na dis land fɔ yu pipul dɛn di Izrɛlayt dɛn ɛn gi di land as prɔpati we go de sote go to yu padi Ebraam+ in pikin dɛn? 8 Ɛn dɛn de de, ɛn dɛn bil tɛmpul fɔ ɔnɔ yu nem+ ɛn tɔk se, 9 ‘If prɔblɛm mit wi, lɛk wɔ, pɔnishmɛnt, sik we de prɛd, ɔ bad bad angri, lɛ wi tinap bifo dis os ɛn bifo yu (bikɔs yu nem de na dis os)+ ɛn lɛ wi kɔl yu fɔ ɛp wi pan wi prɔblɛm, ɛn duya yɛri ɛn sev wi.’+ 10 Bɔt luk di man dɛn we kɔmɔt na Amɔn, Moab, ɛn di eria we mawntin dɛn de na Sia,+ we yu nɔ bin alaw di Izrɛlayt dɛn fɔ dɔnawe wit we dɛn kɔmɔt na Ijipt; dɛn bin lɛf dɛn ɛn dɛn nɔ bin dɔnawe wit dɛn.+ 11 Naw dɛn de pe wi bay we dɛn de kam fɔ drɛb wi kɔmɔt na di land we yu bin dɔn gi wi as prɔpati.+ 12 E wi Gɔd, yu nɔ go pɔnish dɛn?+ Bikɔs wi nɔ gɛt trɛnk fɔ fɛt dɛn bɔku bɔku pipul dɛn ya we de kam atak wi; ɛn wi nɔ no wetin wi fɔ du,+ bɔt wi de luk ɔp to yu.”+

13 Insay da tɛm de, ɔl di man dɛn na Juda bin tinap bifo Jiova, wit dɛn wɛf dɛn, ɛn dɛn pikin* dɛn, di big wan dɛn ɛn di smɔl wan dɛn.

14 Dɔn midul di pipul dɛn, Jiova in spirit kam pan Jeazaɛl we na Zakaraya in bɔypikin. Zakaraya na Bɛnaya in bɔypikin, Bɛnaya na Jeaɛl in bɔypikin, Jeaɛl na Matanaya we na Livayt we kɔmɔt na Esaf in famili layn in bɔypikin. 15 I tɔk se: “Una pe atɛnshɔn to mi, una ɔl we de na Juda ɛn we de na Jerusɛlɛm ɛn Kiŋ Jɛoshafat! Na dis Jiova se a fɔ tɛl una, ‘Una nɔ fred ɔ panik bikɔs ɔf dɛn bɔku bɔku pipul dɛn ya, bikɔs nɔto una gɛt di fɛt, na Gɔd gɛt am.+ 16 Tumara una go dɔŋ go mit dɛn. Dɛn go de kam ɔp bay di rod we dɛn kɔl Ziz, ɛn una go si dɛn na di say we di vali ɛnd bifo di wildanɛs* na Jɛruɛl. 17 Una nɔ go nid fɔ fɛt dis wɔ. Una tek una pozishɔn, una tinap saful,+ ɛn si we Jiova go fɛt fɔ una.*+ E Juda ɛn Jerusɛlɛm, una nɔ fred ɔ panik.+ Tumara una go mit dɛn, ɛn Jiova go de wit una.’”+

18 Wantɛm wantɛm, nain Jɛoshafat butu wit in fes na grɔn, ɛn ɔl di pipul dɛn na Juda ɛn ɔl di pipul dɛn na Jerusɛlɛm dɛnsɛf butu bifo Jiova fɔ wɔship Jiova. 19 Dɔn di Livayt dɛn we na di Koatayt+ ɛn di Koraayt dɛn bɔypikin dɛn grap fɔ prez Jiova we na di Izrɛlayt dɛn Gɔd lawd lawd wan.+

20 Dɛn grap kwik di nɛks mɔnin ɛn dɛn go na di wildanɛs* na Tɛkoa.+ As dɛn de go, Jɛoshafat tinap ɛn tɔk se: “Pipul dɛn na Juda ɛn pipul dɛn na Jerusɛlɛm, una lisin to mi! Una gɛt fet pan Jiova una Gɔd so dat una go ebul fɔ tinap tranga wan.* Una gɛt fet pan in prɔfɛt+ dɛn, so dat ɛnitin we una de du go kɔmɔt fayn.”

21 Jɛoshafat ɛng ed wit di pipul dɛn, dɔn i pik man dɛn fɔ siŋ+ to Jiova ɛn prez am as dɛn de go bifo di fɛtman dɛn. Di man dɛn bin wɛr oli klos. Dɛn bin de se: “Una tɛl Jiova tɛnki, bikɔs in lɔv we nɔ de chenj go de sote go.”+

22 We dɛn bigin siŋ wit gladi-at, Jiova le ambush fɔ di man dɛn we bin de kam fɔ atak Juda frɔm Amɔn, Moab, ɛn di eria we mawntin dɛn de na Sia, ɛn dɛn kil dɛnsɛf.+ 23 Dɔn di Amɔnayt dɛn ɛn di Moabayt dɛn tɔn agens di pipul dɛn we kɔmɔt na di eria we mawntin dɛn de na Sia,+ dɛn dɔnawe wit dɛn ɛn kil dɛn; ɛn we di pipul dɛn we kɔmɔt na Amɔn ɛn Moab dɔn fɔ kil di pipul dɛn we kɔmɔt na Sia, dɛn ɛp fɔ kil dɛn kɔmpin+ dɛn.

24 Bɔt we di pipul dɛn na Juda rich na di wachtawa we bin de na di wildanɛs*+ ɛn luk usay di bɔku bɔku pipul dɛn bin de, na dɛn dedebɔdi dɛn si na grɔn;+ nɔbɔdi nɔ sev. 25 So Jɛoshafat ɛn in pipul dɛn kam fɔ tek di tin dɛn we dɛn ɛnimi dɛn bin gɛt; dɛn bin si bɔku prɔpati, klos, ɛn fayn fayn tin dɛn. Dɛn tek te dɛn nɔ bin ebul fɔ tek igen.+ I bin tek tri dez fɔ mek dɛn tek di tin dɛn we dɛn ɛnimi dɛn bin gɛt, bikɔs dɛn bin bɔku pasmak. 26 Di de we mek 4, dɛn gɛda togɛda na di Vali* na Bɛraka, ɛn dɛn prez* Jiova de. Na dat mek dɛn kɔl da ples de Vali na Bɛraka*+ te tide.

27 Jɛoshafat bin de bifo ɔl di man dɛn na Juda ɛn Jerusɛlɛm we dɛn bin de go bak na Jerusɛlɛm wit gladi-at, bikɔs Jiova dɔn mek dɛn win dɛn ɛnimi+ dɛn. 28 So dɛn bin de kam ɛn ple myuzik instrumɛnt dɛn we gɛt string, ap+ dɛn, ɛn trɔmpɛt+ dɛn we dɛn bin de kam insay Jerusɛlɛm ɛn dɛn go na Jiova in os.+ 29 Gɔd mek ɔl di kiŋdɔm dɛn na di land fred we dɛn yɛri se Jiova dɔn fɛt di Izrɛlayt dɛn ɛnimi+ dɛn. 30 So nɔbɔdi nɔ bin de ambɔg Jɛoshafat in kiŋdɔm, ɛn in Gɔd mek i kɔntinyu fɔ gɛt pis ɔlsay.+

31 Ɛn Jɛoshafat kɔntinyu fɔ rul oba Juda. I bin ol 35 ia we i bi kiŋ, ɛn i rul fɔ 25 ia na Jerusɛlɛm. In mama in nem na bin Azuba. In na bin Shilay in galpikin.+ 32 I kɔntinyu fɔ du di tin dɛn we in papa Esa bin de du.+ I nɔ stɔp, ɛn i du wetin rayt na Jiova in yay.+ 33 Bɔt di ay ples dɛn kɔntinyu fɔ de na di land,+ ɛn di pipul dɛn nɔ bin dɔn mek-ɔp dɛn maynd yet fɔ wɔship dɛn gret gret granpa dɛn Gɔd.+

34 As fɔ di ɔda tin dɛn bɔt Jɛoshafat in istri, frɔm di biginin te to di ɛnd, dɛn de pan di tin dɛn we Jiu+ we na Anenay+ in bɔypikin rayt, we de insay di Buk bɔt di Kiŋ dɛn na Izrɛl. 35 Afta dis, Kiŋ Jɛoshafat we de rul Juda mek agrimɛnt wit Kiŋ Eazaya we de rul Izrɛl ɛn we bin de du wikɛd tin+ dɛn. 36 So i mek am in patna fɔ mek ship dɛn go na Tashish,+ ɛn dɛn bil di ship dɛn na Iziɔn-giba.+ 37 Bɔt Ɛlieza, we na Dɔdavau in bɔypikin we kɔmɔt na Marisha, prɔfɛsay agens Jɛoshafat ɛn tɔk se: “Bikɔs yu dɔn mek agrimɛnt wit Eazaya, Jiova go pwɛl yu wok+ dɛn.” So di ship dɛn pwɛl,+ ɛn dɛn nɔ ebul fɔ go na Tashish.