2 Kronikul

2 Sɔlɔmɔn gi kɔmand fɔ mek dɛn bil os fɔ ɔnɔ Jiova in nem+ ɛn os* fɔ in kiŋdɔm.+ 2 Sɔlɔmɔn pik 70,000 man dɛn as lebra dɛn,* 80,000 man dɛn we bin de kɔt ston dɛn na di mawntin dɛn,+ ɛn 3,600 edman dɛn fɔ de oba dɛn.+ 3 Apat frɔm dat, Sɔlɔmɔn sɛn wɔd to Ayram+ we na di kiŋ na Taya se: “Du fɔ mi wetin yu bin du fɔ mi papa we yu sɛn sida wud dɛn fɔ mek i bil in os.*+ 4 A de bil os fɔ ɔnɔ Jiova mi Gɔd in nem, fɔ dɛdiket am to am, fɔ bɔn pafyum insɛns+ bifo am, ɛn fɔ mek di bred we dɛn kin le pantap dɛn kɔmpin*+ de de ɔltɛm ɛn di bɔn sakrifays dɛn, mɔnin ɛn ivintɛm,+ di de fɔ di Sabat,+ di nyu mun,+ ɛn wi Gɔd Jiova in fɛstival sizin+ dɛn. Dis na sɔntin we di Izrɛlayt dɛn fɔ du sote go. 5 Di os we a de bil fɔ big ɛn fayn pasmak, bikɔs wi Gɔd pawaful pas ɔl ɔda gɔd dɛn. 6 Ɛn udat go ebul fɔ bil os fɔ am? Di ɛvin, dat na, di ɛvin we de rayt rayt ɔp nɔ du fɔ am,+ so udat na mi fɔ bil os fɔ am? Pas fɔ mek ples usay smok go kɔmɔt pan di sakrifays dɛn bifo am. 7 So sɛn fɔ mi man we sabi wok wit in an ɛn we rili sabi aw fɔ wok wit gold, silva, kɔpa,+ ayɛn, pɔpul wul, dip rɛd matirial, blu trɛd ɛn we no aw fɔ kav dizayn. I go wok na Juda ɛn Jerusɛlɛm wit mi man dɛn we rili sabi aw fɔ wok wit dɛn an, we Devid mi papa bin dɔn pik.+ 8 Ɛn sɛn fɔ mi sida, junipa,+ ɛn algɔm bod+ dɛn frɔm Libanɔn, bikɔs a no se yu savant dɛn gɛt ɛkspiriɛns fɔ kɔt di stik dɛn na Libanɔn.+ Mi savant dɛn go wok wit yu savant+ dɛn 9 fɔ gɛda fɔ mi bɔku bɔku bod dɛn, bikɔs di os we a go bil go big ɛn fayn pasmak. 10 A go gi di it to yu savant+ dɛn, dat na, di wan dɛn we de kɔt di stik dɛn; 20,000 kɔ* wit, 20,000 kɔ bali,* 20,000 bat* wayn, ɛn 20,000 bat ɔyl.”

11 Na de Ayram we na di kiŋ na Taya rayt mɛsej ɛn sɛn am to Sɔlɔmɔn. I rayt se: “Bikɔs Jiova lɛk in pipul dɛn, nain mek i dɔn mek yu dɛn kiŋ.” 12 Dɔn Ayram tɔk se: “Mek pipul dɛn prez Jiova di Gɔd na Izrɛl, we mek di ɛvin ɛn di wɔl, bikɔs i dɔn gi Kiŋ Devid bɔypikin we gɛt sɛns,+ we de tink gud gud wan ɛn we ɔndastand+ tin dɛn, we go bil os fɔ Jiova ɛn os fɔ in kiŋdɔm. 13 A de sɛn Ayram-ebay+ we rili sabi fɔ wok wit in an ɛn we ɔndastand tin dɛn. 14 Ayram-ebay na wan Danayt uman in bɔypikin bɔt in papa kɔmɔt na Taya; i gɛt ɛkspiriɛns fɔ wok wit gold, silva, kɔpa, ayɛn, ston dɛn, bod dɛn, pɔpul wul, blu trɛd, fayn matirial ɛn dip rɛd matirial.+ I ebul fɔ kav ɛnikayn dizayn ɛn mek ɛni dizayn we yu gi am.+ I go wok wit yu man dɛn we rili sabi fɔ wok wit dɛn an ɛn wit mi masta Devid yu papa in man dɛn we rili sabi fɔ wok wit dɛn an. 15 Lɛ mi masta sɛn di wit, bali,* ɔyl, ɛn wayn we i bin dɔn prɔmis in savant+ dɛn. 16 Ɛn wi go kɔt stik dɛn na Libanɔn,+ ilɛk ɔmɔs yu nid, ɛn fɔ briŋ dɛn kam, wi go tay dɛn togɛda ɛn mek dɛn flot na di si fɔ kam na Jɔpa,+ ɛn yu go tek dɛn de ɛn kɛr dɛn go ɔp na Jerusɛlɛm.”+

17 Dɔn Sɔlɔmɔn kɔnt ɔl di man dɛn we na fɔrina na Izrɛl,+ afta we Devid in papa+ bin dɔn kɔnt, ɛn i si se na 153,600 fɔrina dɛn de. 18 So i mek 70,000 pan dɛn bi lebra dɛn,* 80,000 pan dɛn bin de kɔt ston+ dɛn na di mawntin dɛn, ɛn i mek 3,600 as edman dɛn fɔ mek di pipul dɛn wok.+